Ўзбекистон Республикаси Президентининг «Ўзбеккино» давлат-акционерлик компаниясини тузиш тўғрисида» 1996 йил 29 апрелдаги ПФ-1427-сон Фармонига мувофиқ Вазирлар Маҳкамаси қарор қилади:

1. Вилоятлар ва Тошкент шаҳар кинолаштириш ва кино-видео прокат бошқармалари негизида «Кино-видео» ҳудудий акционерлик бирлашмалари тузилсин, «Кино-видео» ҳудудий акционерлик бирлашмасининг намунавий тузилмаси 1-иловага мувофиқ тасдиқлансин.

Белгилансинки, «Кино-видео» ҳудудий акционерлик бирлашмалари:

акционерлик жамиятларини ва бошқа ташкилий-ҳуқуқий шакллардаги корхоналарни акциялаштириш принциплари асосида ихтиёрий равишда бирлаштиради, уларга берилган функцияларни бажариш юзасидан ўз муассислари олдида жавоб беради;

ўз фаолияти тўғрисида вилоятлар ва Тошкент шаҳар ҳокимларига ҳисоб беради ҳамда муассис ҳуқуқлари билан «Ўзбеккино» давлат-акционерлик компанияси таркибига киради. «Кино-видео» ҳудудий акционерлик бирлашмалари раислари ҳокимларнинг тавсияларига кўра муассислар йиғилиши томонидан сайланадилар ва «Ўзбеккино» давлат-акционерлик компанияси бошқаруви томонидан тасдиқланадилар.

Қорақалпоғистон Республикаси кинолаштириш ва кино-видео-прокат бошқармаси ҳамда «Қорақалпоқфильм» киностудияси негизида «Қорақалпоқкино» давлат-акционерлик компанияси ташкил этилсин.

2. Вазирлар Маҳкамасининг 1995 йил 4 декабрдаги 448-сон қарори билан Ўзбекистон давлат кинокомпаниясига 1996 йилга 450 корхона ва ташкилотни хусусийлаштириш ва давлат тасарруфидан чиқариш юзасидан топшириқ белгиланганлиги маълумот учун қабул қилинсин.

Ўзбекистон Республикаси Давлат мулки қўмитаси ва «Ўзбеккино» Давлат-акционерлик компанияси 1996 йил давомида «Ўзбекфильм» киностудияси, «Ўзкинохроника» киностудияси, «Ўзбекистон Республикаси видео маркази» ишлаб чиқариш-ижодий бирлашмаси, «Ўзбеккинодеталь» заводи, А. Навоий номидаги Санъат саройи, кино-видео хизмати кўрсатиш шаҳар ва туман бўлинмаларини очиқ турдаги акционерлик жамиятларга айлантиришга оид ташкилий тадбирларни амалга оширсинлар.

Белгилансинки, кўрсатиб ўтилган ташкилотларни акционерлик жамиятларига айлантиришда акциялар:

«Ўзбекфильм» ва «Ўзкинохроника» киностудиялари, «Ўзбекистон Республикаси видео маркази» бирлашмаси, А. Навоий номидаги Санъат саройи бўйича акцияларнинг 51 фоизи давлат ихтиёрида қолади, 25 фоизи меҳнат жамоалари аъзолари ва собиқ Кинематографчилар уюшмаси аъзолари сотиб олишлари учун, 24 фоизи эркин сотиш учун.

«Ўзбеккинодеталь» заводи бўйича — акцияларнинг 35 фоизи давлат ихтиёрида қолади, 16 фоизи меҳнат жамоасига, 49 фоизи хорижий шерикка;

кино-видео хизмати кўрсатиш шаҳар ва туман бўлимлари бўйича — акцияларнинг 35 фоизи давлат ихтиёрида қолади, 25 фоизи меҳнат жамоасига, 40 фоизи эркин сотиш учун тақсимлансин.

3. «Ўзбеккино» давлат-акционерлик компанияси таркибига кирувчи бирлашмалар ва корхоналар рўйхати, уларнинг хўжалик мустақиллиги ва юридик шахс ҳуқуқлари сақлаб қолинган ҳолда, 2 ва 2а-иловаларга мувофиқ тасдиқлансин.

4. Белгилансинки, «Ўзбеккино» давлат-акционерлик компаниясининг дастлабки устав фонди компания таркибига кирувчи бирлашмалар, корхоналар ва ташкилотларни давлат тасарруфидан чиқариш ва хусусийлаштириш натижасида ташкил этиладиган акционерлик жамиятлари (бирлашмалари) акцияларининг давлатга тегишли акцияларининг 60 фоизи, шунингдек бошқа манфаатдор юридик ва жисмоний шахсларнинг, шу жумладан хорижий юридик ва жисмоний шахсларнинг пайлари ҳисобига ташкил топади.

«Ўзкино-видеоижара» корхонаси, Кинематографчилар уйи, «Дўрмон» ижод уйи, Кино санъати музейи, «Ўзкинотехтаъминот» фирмаси мол-мулки қиймати давлат улуши сифатида «Ўзбеккино» давлат-акционерлик компаниясининг устав фонди таркибига киритилсин.

5. Белгилаб қўйилсинки, «Ўзбеккино» давлат-акционерлик компанияси:

«Ўздавкинокомпания» ва Ўзбекистон Кинематографчилар уюшмаси илгари қабул қилган мажбуриятлар, тузган шартномалар, контрактлар ва уларга тегишли мол-мулк юзасидан уларнинг ҳуқуқий вориси ҳисобланади;

ўз фаолияти тўғрисида Ўзбекистон Республикаси Вазирлар Маҳкамасига ҳисоб беради;

компания таркибига кирувчи акционерлик бирлашмалари ва жамиятлари акцияларининг давлатга тегишли улушини траст шартномалари асосида бошқаради;

миллий кино ва видеофондни ташкил этади ва сақлаш шароитларини таъминлайди;

мулкчилик шаклларидан қатъи назар, кино қурилмаларида, кино-видео театрларида, видеосалонларда ва бошқа залларда оммавий равишда тижорат ва нотижорат йўли билан намойиш қилиш, сотиш, прокатга ва ижарага бериш, видеотекалар ва прокатга бериш пунктлари орқали тарқатиш мақсадларида нусха кўпайтириш учун мўлжалланган бадиий, ҳужжатли, илмий-оммабоп, ўқув, мультипликацион кино ва видеофильмлар рўйхатини юритади.

6. Белгилаб қўйилсинки, «Ўзбеккино» давлат-акционерлик компанияси муассислари вакилларидан иборат бўлган Компания кенгаши «Ўзбеккино» давлат-акционерлик компаниясини бошқаришнинг юқори органи ҳисобланади, у доимий ишловчи ижро этувчи орган Компания бошқарувини сайлайди.

«Ўзбекино» давлат-акционерлик компаниясининг раиси айни вақтда Компания кенгаши ва бошқарувининг раиси ҳисобланади.

7. Муассисларнинг «Ўзбеккино» давлат-акционерлик компанияси ижро этувчи аппарати ходимларининг чекланган сонини 40 нафардан иборат этиб белгилаш (хизмат кўрсатувчи ходимлардан ташқари) ҳақидаги таклифига розилик берилсин ва унинг тузилмаси 3 ва 3а-иловаларга мувофиқ тасдиқлансин.

Белгилансинки:

«Ўзбеккино» давлат-акционерлик компанияси ва унинг «Кино-видео» ҳудудий акционерлик бирлашмалари ижро этувчи аппарати харажатлари 2000 йилгача давлат бюджети ҳисобидан амалга оширилади;

«Ўзбеккино» давлат-акционерлик компаниясининг раис, компания раисининг биринчи ўринбосари ва икки нафар ўринбосаридан иборат раҳбарияти Ўзбекистон Республикаси Вазирлар Маҳкамаси томонидан тайинланади.

8. Ўзбекистон Республикаси Давлат мулки қўмитаси:

«Ўзбеккино» давлат-акционерлик компаниясига давлат мулкини хусусийлаштиришдан тушган маблағлардан 20 млн сўм миқдорида беғараз молиявий ёрдам ажратсин;

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда маданият ва кино объектларини, асосий фаолият соҳасини ўзгартирмасдан сақлаб қолишга ва улардан мақсадли фойдаланишга оид зарур чоралар кўрсин.

9. «Ўзбеккино» давлат-акционерлик компанияси ва Ўзбекистон Республикаси Адлия вазирлиги:

икки ҳафта муддатда компания Низомини ишлаб чиқсинлар ва белгиланган тартибда тасдиқласинлар:

бир ой муддатда «Кино-видео» ҳудудий акционерлик бирлашмаси тўғрисидаги намунавий Низомни ишлаб чиқсинлар ва тасдиқласинлар;

«Истеъмолчиларнинг ҳуқуқларини муҳофаза қилиш тўғрисида»ги Ўзбекистон Республикаси Қонунига мувофиқ икки ой муддатда аҳолига кино-видео хизмати кўрсатиш қоидаларини ишлаб чиқсинлар ва тасдиқлаш учун Вазирлар Маҳкамасига киритсинлар.

10. Ўзбекистон Республикаси Ташқи иқтисодий алоқалар вазирлиги, Ташқи иқтисодий фаолият миллий банки, Давлат мулки қўмитаси корхоналарини давлат тасарруфидан чиқариш ва хусусийлаштириш жараёнига инвесторларни, шу жумладан чет эл инвесторларини жалб этишда, шунингдек чет эл инвесторларини жалб этган ҳолда киноплёнка фабрикаси қурилишига техник-иқтисодий асослашларни ишлаб чиқишда «Ўзбеккино» давлат-акционерлик компаниясига кўмаклашсинлар.

11. Ўзбекистон Республикаси Молия вазирлиги 6 бадиий, 40 қисмли ҳужжатли, илмий-оммабоп ва мультипликацион фильмлар, 8 та «Зумраша», «Қорақалпоғистон» киножурналларини яратиш, жаҳон киносининг 20 номдаги энг сара намуналарини харид қилиш, нусхалаштириш ва дубляж қилишга, шунингдек кинотармоғи ташкилотларига ажратиладиган ҳар йиллик дотацияларни 2000 йилгача сақлаб қолсин.

12. Ўзбекистон Республикаси Олий ва ўрта махсус таълим вазирлиги, Маданият ишлари вазирлиги ва Алоқа вазирлиги «Ўзбеккино» давлат-акционерлик компанияси учун 1996 — 2000 йилларда контракт-шартнома асосида кадрлар тайёрлашни таъминласинлар.

«Ўзбеккино» давлат-акционерлик компанияси Вазирлар Маҳкамасига 1996 — 2000 йилларда энг иқтидорли ёшлар вакилларини илғор хорижий кино академиялар ва ўқув марказларига ўқиш ва малака ошириш учун юбориш тўғрисида бир ой муддатда таклифлар киритсин.

13. Ўзбекистон Республикаси Молия вазирлиги «Ўзбеккино» давлат-акционерлик компаниясига 4 та енгил автомашина харажатларига лимит ажратсин.

14. Тошкент шаҳар ҳокимлиги ва Ўзбекистон Республикаси Маданият ишлари вазирлиги бир ой муддатда Тошкент шаҳар, Чилонзор кўчаси, 2а-уйда жойлашган бинолар мажмуини балансдан «Ўзбеккино» давлат-акционерлик компанияси балансига ўтказсин.

Ўзбекистон Республикаси Давлат матбуот қўмитаси Маданият ишлари вазирлигининг Республика илмий-услубият марказини Тошкент шаҳар, Навоий кўчаси, 30-уйдаги илгари «Ўздавкинокомпания» эгаллаб турган хоналарга жойлаштирсин.

15. «Ўзбеккино» давлат-акционерлик компанияси Тошкент шаҳри, Ўзбекистон кўчасидаги 98-уйга жойлаштирилсин.

16. Ўзбекистон Республикасининг қуйидаги қарорларига ўзгартиришлар киритилсин:

Вазирлар Маҳкамасининг «Ташқи иқтисодий фаолиятни янада эркинлаштириш ва такомиллаштириш чора-тадбирлари тўғрисида» 1995 йил 25 июлдаги 287-сон қарорига 6-илованинг 2-бандидаги «кино ва видео маҳсулотлари» сўзлари олиб ташлансин ва қуйидаги мазмундаги банд билан тўлдирилсин: «Кино ва видео маҳсулотларини импорт ва экспорт қилиш» «Ўзбеккино» давлат-акционерлик компанияси»;

Вазирлар Маҳкамасининг 1994 йил 19 апрелдаги 215-сон қарори билан тасдиқланган Корхоналар (ташкилотлар)га фаолиятнинг алоҳида турлари билан шуғулланиш ҳуқуқини берадиган махсус рухсатномалар (лицензиялар) бериш тартиби тўғрисидаги Низомнинг 2-бандидаги жадвалнинг 24 — 27 хат бошиларидаги «Вазирлар Маҳкамаси» сўзлари «Ўзбеккино» давлат-акционерлик компанияси» сўзлари билан алмаштирилсин.

17. Ўзбекистон Республикаси Вазирлар Маҳкамасининг «Ўзбекистон Республикаси Давлат кинокомпанияси («Ўздавкинокомпания») фаолиятини ташкил этиш тўғрисида» 1992 йил 6 майдаги 224-сон қарори ўз кучини йўқотган деб ҳисоблансин.

18. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари С.С. Саидқосимов зиммасига юклансин.

Бирлашма ходимларининг тахминий сони:

1. Қорақалпоғистон Республикаси, Андижон, Самарқанд, Тошкент, Фарғона вилоятлари, Тошкент шаҳри — 12 — 15 киши.

2. Хоразм, Сирдарё, Сурхондарё, Наманган, Навоий, Қашқадарё, Жиззах, Бухоро вилоятлари — 10 — 12 киши.

«Қорақалпоқкино» ДАК, шу ж., «Қорақалпоқфильм» киностудияси

«Андижонкино-видео» АБ

«Бухорокино-видео» АБ

«Жиззахкино-видео» АБ

«Қашқадарёкино-видео» АБ

«Навоийкино-видео» АБ

«Наманганкино-видео» АБ

«Самарқандкино-видео» АБ

«Сирдарёкино-видео» АБ

«Сурхондарёкино-видео» АБ

«Тошкентвилояткино-видео» АБ

«Фарғонакино-видео» АБ

«Хоразмкино-видео» АБ

«Тошкентшаҳаркино-видео» АБ

«Ўзбекфильм» киностудияси

«Ўзкинохроника» киностудияси

«Ўзбекистон Республикаси видеомаркази» ишлаб чиқариш ижодий бирлашмаси

А. Навоий номидаги Санъат саройи

«Ўзбеккинодеталь» заводи

«Ватан»

«Юлдуз»

«Инсон»

«Достонфильм»

ЭЁИБ «5-студияси»

«Шод»

«Имон»

Кинематографчилар уйи

«Дўрмон» ижодий уйи

Кино санъати музейи

«Ўзкино-видеоижара» корхонаси

«Ўзкинотехтаъминот» фирмаси

«Буюк Амир Темур» фильмини яратиш бош дирекцияси

Хўжалик ҳисобидаги «Меъмор» киностудияси

Хўжалик ҳисобидаги «Самарқандфильм» ижодий ишлаб чиқариш бирлашмаси

«Ўзбеккино» ДАК тизими бўйича жами умумий ходимлар сони — 6464 шу жумладан, МБХ — 337

Бюджетдан таъминланадиган ходимлар сони — 174 шу жумладан, МБХ — 164

Хўжалик ҳисобидаги ташкилотлар бўйича умумий ходимлар сони — 6290 шу жумладан, МБХ — 173

Раҳбарият

Кино-видео дастурларни тузиш, мувофиқлаштириш ва кино-видео фаолиятини лицензиялаш бошқармаси

Иқтисодиёт, молиялаштириш ва бухгалтерия ҳисоботи бошқармаси

Маркетинг, моддий-техника ресурслари, транспорт ва қурилиш бошқармаси

Акциялаштириш ва қимматли қоғозлар бошқармаси

Бадиий, ҳужжатли, илмий-оммабоп кино-видео фильмларни прогноз қилиш, шакллантириш ва тематик режалаштириш бошқармаси

Жамоат ташкилотлари билан алоқалар, реклама-ахборот ва ноширлик фаолияти бўлими

Халқаро алоқалар ва кинофестиваллар бўлими

Юридик хизмат

Ишлар бошқармаси

ЖАМИ: 40 киши (қўриқлаш ва биноларга хизмат кўрсатиш ходимларидан ташқари)