Ўзбекистон Республикаси Ҳукумати ва Буюк Люксембург Герцоглиги Ҳукумати,

Ўзбекистон Республикаси ва Буюк Люксембург Герцоглиги ўртасида 1997 йил 2 июлда Люксембург шаҳрида имзоланган иккиёқлама солиқ солинишининг олдини олиш ҳамда даромад ва сармоя солиқларини тўлашдан бош тортишни бартараф қилиш тўғрисида Конвенцияга (бундан кейинги ўринларда Конвенция деб юритилади) ўзгартиришлар киритиш истагида,

қуйидагилар тўғрисида келишиб олдилар:

Конвенция Муқаддимаси чиқариб ташлансин ва қуйидагиларга алмаштирилсин:

«Ўзбекистон Республикаси Ҳукумати ва Буюк Люксембург Герцоглиги Ҳукумати,

ўзаро иқтисодий алоқаларни янада ривожлантириш ва солиқ масалаларида ҳамкорликни кенгайтириш истагида,

солиқларни тўлашдан қочиш ва бош тортиш йўли билан солиққа тортилмаслик ҳамда солиқ солинишини камайтириш имкониятини (жумладан, учинчи мамлакатлар резидентларининг билвосита манфаатлари учун мазкур Конвенция томонидан тақдим этиладиган имтиёзлар берилишига йўл очадиган имкониятларни) яратмаслик учун Ўзбекистон Республикаси ва Буюк Люксембург Герцоглиги ўртасида даромад ва фойда солиқларига нисбатан икки ёқлама солиқ солишни бартараф қилиш тўғрисида Конвенция тузиш мақсадида, қуйидагилар тўғрисида келишиб олдилар:».

Конвенциянинг 25-моддаси 1-банди (ЎЗАРО КЕЛИШУВ ТАРТИБЛАРИ) чиқариб ташлансин ва қуйидагиларга алмаштирилсин:

«1.Агар бирор-бир шахс Аҳдлашувчи Давлатлардан бирининг ёки ҳар иккаласининг хатти-ҳаракатлари уни мазкур Конвенция қоидаларига мувофиқ бўлмаган тарзда солиққа тортилишига олиб келмоқда ёки олиб келади деб ҳисобласа, у мазкур Давлатларнинг ички қонунчилигида кўзда тутилган ҳуқуқий ҳимоя воситаларидан қатъи назар, ўз ишини Аҳдлашувчи Давлатлардан исталган бирининг ваколатли органига тақдим этиши мумкин. Иш Конвенция қоидаларига мувофиқ бўлмаган тарзда солиққа тортилишга олиб келган ҳаракат ҳақида биринчи марта хабар олинган пайтдан бошлаб уч йил давомида тақдим этилиши мумкин».

Конвенциянинг 26-моддаси (АХБОРОТ АЛМАШИШ) чиқариб ташлансин ва қуйидагиларга алмаштирилсин:

1. Аҳдлашувчи Давлатларнинг ваколатли органлари мазкур Конвенция қоидаларини амалга ошириш ёки Аҳдлашувчи Давлатлар ёки уларнинг маҳаллий ҳокимият органлари фойдасига солиқ солиниши билан боғлиқ мазкур Конвенцияга зид бўлмаган тарзда ундириладиган ҳар қандай тур ва тавсифдаги солиқларга оид миллий қонунчиликни татбиқ этиш ёки уни қўллашга алоқадор ахборотни алмашадилар. Ахборот алмашинуви 1 ва 2-моддалар билан чекланмайди.

2. Аҳдлашувчи Давлат томонидан мазкур модданинг 1-бандига мувофиқ олинган ҳар қандай ахборот ушбу Давлатнинг миллий қонунчилигига мувофиқ олинган ахборот сингари махфий ҳисобланади ҳамда фақат мазкур модданинг 1-бандида қайд этилган солиқларни баҳолаш ёки ундириш, мажбурий ундириш ёки суд таъқиби ёки ушбу солиқларга нисбатан даъволар бўйича қарорлар қабул қилиш ёхуд юқоридагиларни назорат қилиш билан шуғулланувчи шахслар ёки органларгагина (жумладан, судлар ва маъмурий органлар) ошкор этилиши мумкин. Бундай шахслар ёки органлар ахборотлардан фақат кўрсатилган мақсадлардагина фойдаланадилар. Улар бундай ахборотни очиқ суд мажлисида ёки суд қарорларида ошкор этишлари мумкин. Юқоридагилардан қатъи назар, Аҳдлашувчи Давлат томонидан олинган ахборот бошқа мақсадларда фойдаланилиши мумкин, башарти бундай ахборот ҳар иккала Давлатнинг қонунчилигига мувофиқ бошқа мақсадларда фойдаланишга рухсат этилган бўлса ҳамда ахборотни тақдим этувчи Давлат ваколатли органининг бундай фойдаланишга розилиги мавжуд бўлса.

3. Ҳеч қандай ҳолатда мазкур модданинг 1 ва 2-бандлари қоидалари Аҳдлашувчи Давлатларга қуйидаги мажбуриятларни юклайдиган тарзда талқин қилинмаслиги лозим:

a) у ёки бу Аҳдлашувчи Давлатнинг қонунчилиги ва маъмурий амалиётига зид бўлган маъмурий чораларни қўллаш;

b) у ёки бу Аҳдлашувчи Давлатнинг қонунчилигига ёки маъмурий амалиётига мувофиқ олиниши мумкин бўлмаган ахборотни тақдим қилиш;

c) ҳар қандай савдо, тадбиркорлик, саноат, тижорат ёки касб сирини ёхуд савдо жараёнини ошкор қилувчи ёхуд ошкор этилиши жамоат тартибига (ordre public) хилоф бўлган ахборотни тақдим қилиш.

4. Агар ахборот Аҳдлашувчи Давлат томонидан ушбу модда қоидаларига мувофиқ сўралган бўлса, бошқа Аҳдлашувчи Давлат ўз солиқ мақсадлари учун бундай ахборотга эҳтиёж мавжуд бўлмаса ҳам сўралаётган ахборотни йиғиш бўйича ўзининг имкониятларидан фойдаланиши лозим. Аввалги жумлада назарда тутилган мажбурият 3-банд қоидаларига мувофиқ чекланиши мумкин, бироқ ҳеч қандай ҳолатда, бундай чекловлар фақатгина ички манфаатлар мавжуд эмаслиги сабабли ахборот тақдим этишни рад қилиш учун Аҳдлашувчи Давлатга ижозат берадиган тарзда талқин қилинмаслиги лозим.

5. 3-банд қоидалари ҳеч қандай ҳолатда бундай ахборот фақатгина банк, бошқа молия ташкилоти, номинал сақловчи ёхуд агент ёки ишончли бошқарувчи сифатида иштирок этаётган шахснинг ихтиёрида эканлиги ёки бундай ахборот бирор бир шахснинг мулкий ҳуқуқларига тааллуқли эканлиги сабабли Аҳдлашувчи Давлатга ахборот тақдим қилишни рад этишга рухсат сифатида талқин қилиниши мумкин эмас.».

Қуйидаги 26А-модда (СОЛИҚЛАРНИ УНДИРИШДА КЎМАКЛАШИШ) Конвенцияга 26-моддадан кейин қўшилсин:

1. Аҳдлашувчи Давлатлар ўзларига тегишли солиқ даъволарини ундиришда бир-бирларига ёрдам кўрсатадилар. Бундай ёрдам Конвенциянинг 1 -моддаси қоидалари билан чекланмайди. Аҳдлашувчи Давлатларнинг ваколатли органлари мазкур моддани қўллаш тартибини ўзаро келишув йўли билан белгилайдилар.

2. Мазкур моддада қўлланилган «солиқ даъвоси» атамаси Конвенцияда назарда тутилган барча солиқлар бўйича тўланиши керак бўлган ҳар қандай суммани, шунингдек шундай сумма билан боғлиқ фоизлар, маъмурий жарималар, йиғиш ёки ундиришга кетган харажатларни англатади.

3. Башарти Аҳдлашувчи Давлатлардан бирига тааллуқли солиқ даъвоси ушбу Давлатнинг қонунчилигига мувофиқ ундирилиши мумкин бўлса ва ушбу Давлатнинг қонунчилигига кўра айни шу пайтда ундирилишига тўсқинлик қила олмайдиган шахс томонидан тўланиши лозим бўлса, бу ҳолда ушбу Давлатнинг ваколатли органлари сўровномасига биноан бундай даъво мажбурияти иккинчи Аҳдлашувчи Давлатнинг ваколатли органлари томонидан ундирув учун қабул қилинади. Бундай солиқ даъвоси иккинчи Давлат томонидан, айни мазкур Давлатга тааллуқли солиқ. даъвоси каби, унинг ўз солиқларини ундириши учун қўлланадиган ўзининг қонунчилиги қоидаларига мувофиқ ундириб олинади.

4. Агар Аҳдлашувчи давлатларнинг бирига тааллуқли солиқ даъвоси уни ундириш учун ушбу Давлат қонунчилигига мувофиқ ундиришни таъминлаш чораларини кўришни тақозо қиладиган мажбурият ҳисобланса, бундай солиқ даъвоси ушбу Давлат ваколатли органларининг сўровномаси билан иккинчи Аҳдлашувчи Давлат ваколатли органлари томонидан таъминот чораларини кўриш мақсадида қабул қилиниши лозим. Мазкур иккинчи Давлат бундай солиқ даъволарига нисбатан, ҳаттоки ушбу солиқ даъвоси, бундай чораларни қўллаш пайтида биринчи кўрсатилган Давлатда солиқ талабини ижро этишнинг имкони бўлмаса ёки уни ижросига тўсқинлик қилишга ҳақли шахс тарафидан тўланиши лозим бўлган ҳолатда иккинчи Давлатга тааллуқли бўлганидек, ўз қонунчилиги қоидаларига мувофиқ даъвони таъминлаш чораларини кўриши лозим.

5. 3 ва 4-бандларнинг қоидаларидан қатъи назар, Аҳдлашувчи Давлатлардан бирининг қонунчилигига мувофиқ, солиқ даъволарига нисбатан шундай даъвонинг хусусиятига кўра қўлланиши мумкин бўлган вақт чекловлари тақдим этилган ва устуворлик ушбу Давлат томонидан 3 ва 4-бандларда назарда тутилган мақсадлар учун қабул қилинаётган солиқ даъвосига нисбатан қўлланилмайди. Шунингдек, Аҳдлашувчи Давлатларнинг бири томонидан 3 ёки 4-бандларда назарда тутилган мақсадлар учун қабул қилинаётган солиқ даъвосига нисбатан ушбу Давлатда бошқа Аҳдлашувчи Давлатнинг қонунчилигига мувофиқ устуворликка эга эмас.

6. Аҳдлашувчи давлатларнинг бирига тааллуқли солиқ даъвосининг мавжудлиги, ҳақиқийлиги ёки миқдорини аниқлаш бўйича тартиботлар иккинчи Аҳдлашувчи Давлатнинг суд ёхуд маъмурий органлари муҳокамасига олиб чиқилмайди.

7. Аҳдлашувчи давлатлардан бири 3 ёки 4-бандларга мувофиқ сўровнома юборганидан сўнг иккинчи Аҳдлашувчи Давлат тегишли солиқ даъвоси суммасини ундириб биринчи Аҳдлашувчи Давлатга ўтказгунига қадар бўлган ҳолларда, солиқ даъвоси:

a) сўровнома 3-бандга мувофиқ юборилганда — биринчи айтилган Давлатга тааллуқли, ушбу Давлатнинг қонунчилигига мувофиқ ундирилиши ҳамда шу пайтда ушбу Давлатнинг қонунчилигига кўра унинг ундирилишига тўсқинлик қила олмайдиган шахс томонидан тўлаб берилиши лозим солиқ даъвоси ҳисобланмай қолса ёки;

b) сўровнома 4-бандга мувофиқ юборилганда — кўрсатилган биринчи Давлатга тааллуқли, уни ундириш учун ушбу Давлат ўз қонунчилигига мувофиқ таъминот чораларини кўриши мумкин солиқ даъвоси ҳисобланмай қолса;

бу ҳолда биринчи Давлатнинг ваколатли органи бу ҳақда дарҳол иккинчи Давлатнинг ваколатли органини хабардор қилади ва биринчи Давлат иккинчи Давлатнинг ихтиёри бўйича ўз сўровномасини тўхтатади ёки чақиртириб олади.

8. Ушбу модданинг қоидалари ҳеч бир ҳолатда Аҳдлашувчи Давлат зиммасига қуйидаги мажбуриятларнинг юкланиши сифатида талқин қилиниши мумкин эмас:

a) у ёки бу Аҳдлашувчи Давлатнинг қонунчилиги ва маъмурий амалиётига зид бўлган маъмурий чораларни кўриш;

b) жамоат тартибига (ordre public) зид бўлган чораларни кўриш;

c) ёрдам кўрсатиш, башарти бошқа Аҳдлашувчи Давлат мавжуд бўлган ҳолат бўйича ўз қонунчилиги ёки маъмурий амалиётида мавжуд бўлган ундириш ёки ундирувни таъминлашга доир барча оқилона чораларни кўрмаган бўлса;

d) кўмаклашаётган Давлат зиммасига тушаётган маъмурий сарф-харажатлар ундирув натижасида иккинчи Аҳдлашувчи Давлат олиши мумкин бўлган фойдага номутаносиб бўлган ҳолатларда кўмаклашиш.».

Куйидаги 27А-модда (ИМТИЁЗЛАР БЕРИЛИШИ) Конвенциянинг 27-моддасидан кейин қўшилсин:

Ушбу Конвенциянинг бошқа қоидаларидан қатъи назар, агар барча тегишли фактлар ва шартларни ҳисобга олган ҳолда, ҳар қандай келишув ёки битимнинг асосий мақсадларидан бири мазкур Конвенция доирасида имтиёз олиш бўлиб ва бевосита ёки билвосита бундай имтиёзнинг олинишига олиб келган деб хулоса қилишга асос бўлса, бундай даромад ва фойда предметига нисбатан ушбу имтиёзлар тақдим қилинмайди, башарти бундай шартларда ушбу имтиёзларнинг берилиши мазкур Конвенция тегишли қоидаларининг объекти ва мақсадига мувофиқ деб топилмаса.».

1. Аҳдлашувчи давлатларнинг ҳар бири дипломатик каналлар орқали мазкур Баённоманинг кучга кириши учун ўз қонунчилигида белгиланган процедураларнинг бажарилгани ҳақида иккинчи Давлатни хабардор қилади.

2. Баённома ушбу модданинг 1-бандида кўрсатилган хабарномаларнинг сўнггиси олинган санадан бошлаб кучга киради. Ушбу Баённоманинг қоидалари у кучга кирган йилдан кейинги тақвим йилининг 1 январи ёки ундан кейин бошланадиган солиқ даврларига нисбатан амал қилади.

3. Ушбу Баённома Конвенциянинг ажралмас қисми ҳисобланади ва Конвенциянинг амал қилиниши тугатилгунга қадар ўз кучида қолади.

БУНИНГ ТАСДИҒИ СИФАТИДА тегишли тартибда ваколатга эга бўлган қуйида имзо чекувчилар мазкур Баённомани имзоладилар.

Люксембург шаҳрида 2017 йил 18 сентябрда икки нусхада, ҳар бири ўзбек, француз ва инглиз тилларида тузилди, бунда барча матнлар бир хил кучга эга.