«Ўзбекистон Республикаси Президенти И. А. Каримовнинг Олий Мажлис ўн тўртинчи сессиясидаги нутқи юзасидан» Ўзбекистон Республикаси Олий Мажлисининг 1999 йил 14 апрелдаги қарорига мувофиқ ва суд-ҳуқуқ ислоҳотини чуқурлаштириш мақсадида Ўзбекистон Республикаси Олий Мажлисининг Кенгаши қарор қилади:

1. Ўзбекистон Республикаси Олий Мажлиси ҳузурида доимий асосда ишлайдиган Суд-ҳуқуқ тизимини ислоҳ қилиш тўғрисида таклифлар тайёрлаш комиссияси тузилсин (1-илова).

2. Суд-ҳуқуқ тизимини ислоҳ қилиш тўғрисида таклифлар тайёрлаш комиссиясига ўзининг фаолиятига вазирликлар, идоралар, корхоналар, муассасалар, ташкилотларнинг ходимларини, олимлар ва мутахассисларни жалб этиш ҳуқуқи берилсин.

3. Суд-ҳуқуқ тизимини ислоҳ қилиш тўғрисида таклифлар тайёрлаш комиссияси ҳақидаги Низом тасдиқлансин (2-илова).

4. Суд-ҳуқуқ тизимини ислоҳ қилиш тўғрисида таклифлар тайёрлаш комиссияси бир ойлик муддат ичида ўз фаолиятининг дастурини ишлаб чиқсин ва тасдиқласин.

1. Суд-ҳуқуқ тизимини ислоҳ қилиш тўғрисида таклифлар тайёрлаш комиссияси Ўзбекистон Республикаси Олий Мажлиси ҳузурида тузилади ва доимий асосда иш олиб боради.

2. Комиссия жамоатчилик асосида ишлайдиган Комиссия раиси, раис ўринбосари, котиб ва аъзолардан иборат бўлади.

Комиссия таркиби Олий Мажлиси Кенгаши томонидан тасдиқланади.

3. Комиссиянинг асосий вазифаси суд-ҳуқуқ тизимини ислоҳ қилиш тўғрисида таклифлар тайёрлашдан иборатдир.

4. Комиссия асосий вазифасига мувофиқ:

ўз фаолиятининг дастурини ишлаб чиқади ва тасдиқлайди;

суд ҳокимияти мустақиллигини таъминлашга, судья кадрларни танлаш ва жой-жойига қўйиш механизмини такомиллаштиришга, суд процессининг тортишув, судларда ишларни кўришда давлат айбловчиси ва ҳимоячининг ҳуқуқлари тенглиги принципларини амалий жиҳатдан рўёбга чиқаришга қаратилган таклифлар тайёрлайди ва, зарурат бўлганда, тегишли қонун ҳужжатларининг лойиҳаларини ишлаб чиқади;

ҳуқуқни муҳофаза қилиш ва бошқа давлат органлари, судлар, адвокатура, илмий муассасалар ҳамда бошқа ташкилотлардан суд-ҳуқуқ ислоҳотини ўтказишга тааллуқли ҳужжатлар, ёзма хулосалар, ҳисобот маълумотлари ва бошқа материалларни талаб қилиб олади;

таклифлар ва қонун ҳужжатларининг лойиҳаларини келишиб олиш ёки экспертиза ўтказиш учун тегишли вазирликлар, идоралар, корхоналар, муассасалар, ташкилотларга, шунингдек олимлар ва мутахассисларга юборади;

зарур ҳолларда ўз мажлисларига судлар, ҳуқуқни муҳофаза қилиш органлари, вазирликлар, идоралар, бошқа ташкилотларнинг вакилларини таклиф этади ҳамда Комиссиянинг суд-ҳуқуқ тизимини ислоҳ қилишга оид таклифлари қандай бажарилаётганлиги тўғрисида уларнинг ахборотини тинглайди;

Комиссия аъзоларининг топширилган ишни бажаришга оид ахборотларини тинглайди.

Комиссия ўзининг асосий вазифасини бажариш билан боғлиқ бошқа фаолиятни ҳам амалга оширади.

5. Комиссия ўз ишини ошкоралик, масалаларни эркин муҳокама этиш ва коллегиал тарзда қарор қабул қилиш, ўз аъзоларининг кенг ташаббускорлиги асосида олиб боради.

6. Комиссия аъзолари Комиссия фаолиятида қатнашишлари, белгиланган вазифалар амалга оширилишига ёрдамлашишлари, Комиссия топшириқларини бажаришлари шарт.

7. Комиссия масалаларни тайёрлаш ва чуқур ишлаб чиқиш учун вазирликлар, идоралар, корхоналар, муассасалар, ташкилотларнинг ходимларини, олимлар ва мутахассисларни жалб этишга, шунингдек Комиссия фаолияти билан боғлиқ у ёки бу масалаларни тайёрлаш учун улар орасидан ишчи гуруҳлари тузишга ҳақли.

8. Комиссия мажлислари заруратга қараб, аммо ҳар ойда камида бир марта ўтказилади.

9. Комиссия мажлислари, башарти уларда Комиссия таркибининг камида ярми ҳозир бўлган бўлса, ваколатлидир. Комиссия аъзоси мажлисга келишга имкони бўлмаган тақдирда бу ҳақда Комиссия раисини олдиндан хабардор этиб қўяди.

10. Комиссия кўриб чиқилаётган масалалар юзасидан қарор қабул қилади. Комиссия қарори унинг мажлисида ҳозир бўлган Комиссия аъзоларининг оддий кўпчилик овози билан қабул қилинади.

11. Комиссия томонидан тайёрланган таклифлар Олий Мажлис раҳбариятига маълум қилинади ва зарур бўлса, Олий Мажлис Кенгаши муҳокамасига киритилади, шунингдек тегишли давлат органлари ва бошқа манфаатдор ташкилотларга юборилиши мумкин.

12. Давлат органлари, юридик ва жисмоний шахслар Комиссия томонидан юборилган, суд-ҳуқуқ ислоҳотини амалга ошириш билан боғлиқ таклифларни кўриб чиқиши ҳамда уларнинг натижалари тўғрисида Комиссияга хабар қилиши шарт.

13. Комиссия раиси:

Комиссия фаолиятига раҳбарликни амалга оширади;

зарур материалларнинг тайёрланишини ташкил этади, Комиссия мажлисини чақиради ва мажлисларда раислик қилади;

Комиссия фаолияти дастурини амалга ошириш жараёни устидан назорат олиб боради;

Комиссия раисининг ўринбосари, котиб ва аъзоларга топшириқлар беради, уларга Комиссия фаолияти билан боғлиқ материаллар ва ҳужжатлар йўллайди;

суд-ҳуқуқ тизимини ислоҳ қилиш юзасидан Комиссия тайёрлаган таклифлар тўғрисида Олий Мажлис раҳбариятига ва Олий Мажлис Кенгашига ахборот беради;

Комиссия қарорларини имзолайди.

14. Комиссия раисининг ўринбосари раис топшириғига биноан унинг айрим вазифаларини бажаради ҳамда раис йўқлигида ёки унинг ўз вазифаларини амалга ошириши мумкин бўлмаган ҳолларда раиснинг вазифасини бажариб туради.

15. Комиссия котиби Комиссия фаолиятининг ташкилий жиҳатдан таъминланишини амалга оширади ҳамда унинг иш юритувини олиб боради.