«Маҳаллий давлат ҳокимияти тўғрисида»ги ва «Чиқиндилар тўғрисида»ги Ўзбекистон Республикаси қонунларига ҳамда Ўзбекистон Республикаси Вазирлар Маҳкамасининг 1992 йил 14 августдаги «Аҳолига сотиладиган ёқилғи, энергия ва кўрсатиладиган хизмат чакана нархлари ҳамда тарифларини қайта кўриб чиқиш тўғрисида»ги 381-сон, 2010 йил 28 октябрдаги «Товарлар (ишлар хизматлар)га тартибга солинадиган нархлар (Тарифлар) ни декларация қилиш (тасдиқлаш) ва белгилаш тартибини янада такомиллаштириш чора-тадбирлари тўғрисида»ги 239-сон, 2013 йил 3 декабрдаги «Республика аҳоли пунктларида санитария жиҳатидан тозалаш тизимини ривожлантириш ва такомиллаштириш чора-тадбирлари тўғрисида»ги 315-сон, 2014 йил 15 июлдаги «Коммунал хизматлар кўрсатиш қоидаларини тасдиқлаш тўғрисида»ги 194-сон ва Ўзбекистон Республикаси Президентининг 2017 йил 21 апрелдаги «2017 — 2021 йилларда маиший чиқиндилар билан боғлиқ ишларни амалга ошириш тизимини тубдан такомиллаштириш ва ривожлантириш чора-тадбирлари тўғрисида»ги ПҚ-2916-сонли қарорларига асосан вилоят ҳудудидаги чиқиндиларни фуқаролар ҳаёти ва соғлиғига, атроф-муҳитга зарарли таъсирини олдини олиш, чиқиндилар ҳосил бўлишини камайтириш, туманлар ҳудудини экологик ҳамда санитария ҳолатини, тозаликни амалга ошириш, шунингдек, чиқиндиларни тўплаш ва олиб чиқиб кетиш хизматлари учун янги тарифларни белгилаш мақсадида қарор қиламан:

1. Вилоят «Тоза ҳудуд» давлат унитар корхонасининг туманлар филиаллари ҳудудларидаги қаттиқ ва суюқ ҳолдаги маиший чиқиндиларни олиб кетиш ва қабул қилиш бўйича кўрсатиладиган хизматлар учун тўлов миқдорлари иловага* мувофиқ тасдиқлансин.

2. Вилоят «Тоза ҳудуд» давлат унитар корхонасининг туманлар филиаллари томонидан аҳолидан чиқиндиларни тўплаб олиб кетганлиги учун тўловларни вақтида тўланишида маҳалла фуқаролар йиғинлари ҳамда кўп хонадонли уйларда хусусий уй-жой мулкдорлари ширкатлари яқиндан амалий ёрдам кўрсатиши тавсия қилинсин.

3. Мазкур қарор вилоят ҳокимлигининг расмий нашри ҳисобланган «Хоразм ҳақиқати» ва «Хорезмская правда» газеталарида эълон қилинган кундан кучга киради.

4. Вилоят ҳокимлигининг «Компьютерлаштириш маркази» унитар корхонаси (С. Садиқов)га мазкур қарорни вилоят ҳокимлигининг веб-сайтида жойлаштирилишини таъминлаш топширилсин.

5. Хоразм вилояти ҳокимининг 2016 йил 13 февралдаги «Вилоят ҳудудидаги чиқиндиларни тўплаш ва олиб чиқиб кетиш хизматлари учун янги тарифларни белгилаш тўғрисида»ги қарори ўз кучини йўқотган деб ҳисоблансин.

6. Ушбу қарорнинг бажарилишини назорат қилиш вилоят ҳокимининг ўринбосари вазифасини бажарувчи Ш. Абдуллаев зиммасига юклансин.