«Маҳаллий давлат ҳокимияти тўғрисида»ги (Ўзбекистон Республикаси Олий Кенгашининг Ахборотномаси, 1993 йил 9-сон, 320-модда) Ўзбекистон Республикаси Қонунига ҳамда Ўзбекистон Республикаси Вазирлар Маҳкамасининг 2012 йил 28 августдаги «Бозорлар ва савдо комплекслари фаолиятини тартибга солишга доир қўшимча чора-тадбирлар тўғрисида»ги 253-сонли қарори ҳамда вилоят Молия бош бошқармаси, вилоят Давлат Солиқ бошқармаси ва «Хоразм бозорлари ва савдо комплекслари» вилоят уюшмасининг бозорлар ва савдо комплекслари маъмурияти томонидан ундириб олинадиган бир марталик йиғимлар, ижара тўлови, кўрсатиладиган хизматлар қийматининг минимал миқдорларини белгилаш тўғрисидаги таклифига асосан вилоят ҳудудидаги бозорлар ва савдо комплекслари бошқариш тизимини янада такомиллаштириш, улар томонидан кўрсатиладиган хизмат турларини кенгайтириш, аҳолига хизмат кўрсатиш сифатини ошириш, бозорлар ва савдо комплекслари ҳудудида пул оқимларини тўлиқ ҳисобга олинишини таъминлаш мақсадида қарор қиламан:

1. Вилоят Молия бош бошқармаси (М. Давлатов) ва вилоят Давлат Солиқ бошқармалари (Ж. Темуров) ҳамда «Хоразм бозорлари ва савдо комплекслари» вилоят уюшмаси (Ш. Раззақов) таклифлари асосида «Бозорлар ва савдо комплекслари» маъмурияти томонидан ундириб олинадиган бир марталик йиғимлар, ижара тўлови, кўрсатиладиган хизматлар қийматининг минимал миқдорлари 1 ва 2-иловаларга* мувофиқ тасдиқлансин.

2. Вилоят Молия бош бошқармаси (М. Давлатов), вилоят Давлат Солиқ бошқармаси (Ж. Темуров) бозорлар ва савдо комплекслари маъмуриятлари билан биргаликда:

бозорлар ва савдо комплексларидан тушадиган йиғимларни белгиланган тартибда тўлиқ ундирилишини;

бозорлар ва савдо комплекслари маъмуриятлари томонидан ундириб олинадиган бир марталик йиғимлар, кўрсатиладиган хизматлар, бино ва иншоат ва бошқа мол-мулкдан ҳамда бозор инфратузилмасидан фойдаланганлик учун ижара тўловлари йиғим миқдорларини кўпайтириш эвазига тушадиган тушумларни Ўзбекистон Республикаси Солиқ кодексида белгиланган тартибда маҳаллий бюджетга йўналтирилишини таъминласинлар.

3. Туманлар ва Урганч, Хива шаҳар ҳокимликлари ўз ҳудудларидаги бозорлар ва савдо комплекслари маъмуриятлари томонидан ундириб олинадиган бир марталик йиғимлар, кўрсатиладиган хизматлар, бино ва иншоат ва бошқа мол-мулкдан ҳамда бозор инфратузилмасидан фойдаланганлик учун ижара тўловларининг тўлиқ ундирилиши ва улардан мақсадли фойдаланиш устидан назоратни кучайтирсинлар ҳамда Ўзбекистон Республикаси Вазирлар Маҳкамасининг 2012 йил 28 августдаги «Бозорлар ва савдо комплекслари фаолиятини тартибга солишга доир қўшимча чора-тадбирлар тўғрисида»ги 253-сон қарори асосида иш ташкил қилсинлар.

4. Қарор иловасидаги 2-бўлимнинг 3.10-бандида транспорт воситаларининг юк ортиш ва юк тушириш учун бозорлар ва савдо комплексларига кирганлик учун ҳақ ундириш (қишлоқ хўжалик маҳсулотларини олиб кириш бундан мустасно) назарда тутилган сабабли мазкур қарор «Маҳаллий давлат ҳокимияти тўғрисида»ги Ўзбекистон Республикаси Қонунининг 24-моддасига мувофиқ Ҳалқ депутатлари Хоразм вилоят кенгашнинг тасдиғига киритсин.

5. Ушбу қарор қабул қилиниши билан вилояти ҳокимининг 2017 йил 10 мартдаги 130қ-сонли қарори ўз кучини йўқотган деб ҳисоблансин.

6. «Хоразм ҳақиқати» ва «Хорезмская прaвда» газеталарида мазкур қарор эълон қилинсин.

7. Вилоят ҳокимлиги ҳузуридаги «Вилоят компьютерлаштириш маркази» ДУК (Садиқов) мазкур қарорни вилоят ҳокимлигининг расмий веб-сайтида жойлаштирилишини таъминласин.

8. Ушбу қарорнинг бажарилишини назорат қилиш вилоят ҳокимининг биринчи ўринбосари М. Сапаев зиммасига юклатилсин.