Ўзбекистон Республикаси Ҳукумати ва Миср Араб Республикаси Ҳукумати, кейинги ўринларда «Томонлар» деб аталувчилар,

олий таълимнинг иқтисодий тараққиёт омили, шунингдек, уларнинг халқлари ўртасидаги алоқаларни мустаҳкамлаш воситаси сифатидаги муҳим аҳамиятини эътироф этган ҳолда,

олий таълим соҳасидаги ҳамкорлик иккала мамлакат учун ҳам манфаатли бўлишига ишонч билдириб,

икки давлат ўртасидаги дўстона муносабатларни кенгайтириш истагида,

қуйидагилар тўғрисида келишиб олдилар:

Томонлар мазкур Битим қоидалари ва иккала давлатнинг амалдаги қонунчилигига мувофиқ тенг ҳуқуқлилик ва ўзаро манфаатдорлик асосида икки давлат ўртасида билим ва интеллектуал тараққиётни илгари суриш мақсадида олий таълим соҳасидаги ҳамкорликка кўмаклашишга келишиб олдилар.

Томонлар ўз давлатларининг амалдаги қонунчилигига мувофиқ олий таълим соҳасида ўзаро ҳамкорликни рағбатлантириш ва кўллаб-қувватлаш учун куйидаги чора-тадбирларни амалга оширишга интиладилар:

a) Ўзбекистон Республикаси Олий ва ўрта махсус таълим вазирлиги ва Миср Араб Республикаси Олий таълим вазирлиги маслаҳатлашувлар ёрдамида олий таълим муассасалари ўртасида иккала Томон учун манфаатли бўлган дастурлар бўйича профессор ва ўқитувчилар, экспертлар ва талабаларнинг алмашинувини рағбатлантириш ва унга кўмаклашиш. Бундай алмашинув таълим машғулотлари ва/ёки тадқиқотлар олиб боришни ўз ичига олиши мумкин, бунда уларнинг натижалари бўйича қўшма ҳисобот тайёрлаш, мақола чоп этиш ёки ўқув ташрифларини ташкил қилиш мумкин. Мазкур алмашинувлар давомийлиги ва шартлари маслаҳатлашувлар ёки расмий хатлар алмашинуви орқали белгиланади;

b) олий, техник ва касб-ҳунар таълим соҳаларида ўзаро ёрдамни қўллаб-қувватлаш;

c) олий таълим муассасалари ўртасида иккала Томон учун ўзаро манфаатли бўлган икки томонлама дастурларни янада ривожлантиришга кўмаклашиш;

d) таълим соҳаси маъмурий ходимлари ва ўқитувчиларни, шу жумладан, кадрлар тайёрлашга жалб қилинганларни тайёрлашга кўмаклашиш;

e) иккала Томон олий таълим муассасалари ўртасида баҳолашни ҳисобга олиш ва ўхшаш дастурлар имкониятини ҳамда академик, касбий ва касб-ҳунар малакаларини ўзаро тан олиш имкониятларини ўрганиш;

f) ўқув адабиётлари, ўқитиш воситалари, ахборот ва тақдимот материаллари билан алмашинувга, шунингдек, тегишли махсус кўргазма ва семинарлар ташкил қилишга кўмаклашиш;

g) гуманитар, табиий ва амалий фанлар соҳасида ўзаро ёрдамни қўллаб-қувватлаш;

h) олимлар билан алмашинув ва грантлар тақдим этиш;

i) Томонлар ўртасида ўзаро келишиладиган ҳамкорликнинг бошқа шаклларини амалга ошириш.

Ўзбекистон Республикаси Ҳукумати номидан Олий ва ўрта махсус таълим вазирлиги ҳамда Миср Араб Республикаси Ҳукумати номидан Олий таълим вазирлиги мазкур Битимни амалга ошириш учун масъул орган ҳисобланади.

Ҳар бир алмашинув дастурининг шартлари тегишли ваколатли вазирликлар орқали ишлаб чиқилади ва улар томонидан тасдиқланади, бунда профессор-ўқитувчилар, талабалар, олий ўқув юртидан кейинги таълимга жалб қилинган шахслар, тадқиқотчилар, стажёрлар ёки материаллар билан алмашинув бир вақтнинг ўзида ўзаролик асосида амалга оширилмаслиги мумкин.

Мазкур Битим доирасида барча алмашинувлар ва тадбирларга оид молиявий шартлар музокаралар, расмий хатлар ёки Томонлар имзолайдиган алоҳида баённомалар орқали келишилади.

1. Томонлар мазкур Битимни амалга ошириш бўйича Қўшма ишчи гуруҳни ташкил этадилар.

2. Қўшма ишчи гуруҳга Ўзбекистон Республикаси Ҳукумати номидан Олий ва ўрта махсус таълим вазирлигининг вакили бошқа тегишли муассасалар иштирокида ҳамраислик қилади.

3. Қўшма ишчи гуруҳга Миср Араб Республикаси Ҳукумати номидан Олий таълим вазирлигининг вакили бошқа тегишли муассасалар иштирокида ҳамраислик қилади.

4. Қўшма ишчи гуруҳ мазкур Битимнинг амалга оширилишини муҳокама қилиш мақсадида Ўзбекистон ёки Мисрда йилига камида бир марта ёки Томонларнинг ўзаро келишувига мувофиқ ўзгача тарзда йиғилиш ўтказиши мумкин.

1. Мазкур Битимга мувофиқ алмашиладиган барча маълумот ва ҳужжатлар Томонлар тарафидан махфий сақланади ҳамда улардан ҳар қандай бошқа мақсадларда ушбу маълумот ва ҳужжатларни тақдим қилган Томоннинг олдиндан ёзма розилигисиз фойдаланилмайди.

2. Иккала Томон мазкур Битимнинг амал қилиши тугатилишидан қатъи назар, Томонлар ўртасида келишилган муддат давомида ушбу модданинг қоидалари ўз кучида қолиши тўғрисида келишиб олдилар.

1. Интеллектуал мулк ҳуқуқларини ҳимоя қилиш Томонлар давлатларининг тегишли қонун ҳужжатлари ҳамда Томонлар имзолаган бошқа халқаро шартномаларга мувофиқ амалга оширилади.

2. Ҳар бир Томоннинг номи, логотипи ва (ёки) расмий рамзидан ҳар қандай нашр, ҳужжат ва (ёки) мақолада ушбу Томоннинг ёзма розилигисиз фойдаланиш тақиқланади.

Томонлар халқаро ҳуқуқий нормалар ва миллий манфаатларга оид сабаблар билан мазкур Битимнинг амал қилишини вақтинчалик тўлиқ ёки қисман тўхтатиш ҳуқуқига эгалар, бундай тўхтатиш бошқа Томонга дипломатик каналлар орқали ёзма хабарнома берилгандан бошлаб бир (1) ойдан сўнг амал қилади.

Мазкур Битимга Томонларнинг ўзаро ёзма розилиги билан унинг ажралмас қисми ҳисобланадиган хамда мазкур Битимнинг 12-моддасида белгиланган тартибда кучга кирадиган алоҳида баённомалар шаклида ўзгартириш ва қўшимчалар киритилиши мумкин.

Мазкур Битим қоидаларини амалга ошириш ёки талқин қилишдан келиб чиқадиган ҳар қандай низолар, келишиш учун бирон-бир миллий, халқаро ва учинчи томон судига мурожаат қилинмасдан, Томонлар ўртасида музокаралар ва маслаҳатлашувлар орқали ҳал этилади.

Мазкур Битим имзоланган санадан бошлаб кучга киради. Мазкур Битим Томонлардан бири унинг амал қилишини тугатиш нияти тўғрисида тугатиш санасидан камида олти (6) ой олдин дипломатик каналлар орқали бошқа Томонни ёзма равишда хабардор қилгунига қадар ўз кучида қолади.

Мазкур Битимнинг тугатилиши, башарти Томонлар ўртасида ўзгача тарзда келишилмаган бўлса, унинг тугатилиш санасига кадар келишилган жорий тадбирлар ёки дастурларни амалга оширишга дахл қилмайди.

Тошкент шаҳрида 2018 йил 5 сентябрда икки (2) асл нусхада, хар бири ўзбек, араб ва инглиз тилларида тузилди. Бунда барча матнлар тенг аутентикдир.

Талқин қилишда тафовут юзага келган тақдирда, инглиз тилидаги матн устувор ҳисобланади.