Ўзбекистон Республикаси Ҳукумати ва Ҳиндистон Республикаси Ҳукумати (кейинги ўринларда «Томонлар» деб аталувчилар),

1972 йилдаги Баённома билан ўзгартириш киритилган 1961 йилдаги Гиёҳвандлик воситалари тўғрисида Ягона конвенция, 1971 йилдаги Психотроп моддалар тўғрисидаги Конвенция ва 1988 йилдаги Гиёҳвандлик воситалари ва психотроп моддаларнинг ноқонуний муомаласига қарши курашиш тўғрисида Бирлашган Миллатлар Ташкилоти Конвенцияси гиёҳвандлик воситалари устидан миллий ва халқаро назоратнинг асосини ташкил қилишини инобатга олиб,

гиёҳвандлик таҳдиди билан курашиш борасида давлатлар сиёсий иродасининг ифодаси сифатида 1998 йилдаги БМТ Бош Ассамблеясининг махсус сессиясида қабул қилинган Гиёҳвандлик воситаларни суиистеъмол қилиниши ва уларнинг ноқонуний муомаласи билан курашиш тўғрисидаги Декларацияга содиқ эканликларини тасдиқлаб,

гиёҳвандлик моддаларини ноқонуний етиштириш, ишлаб чиқариш, қайта ишлаш ва улар билан ноқонуний муомалада бўлиш юзасидан чуқур ташвиш билдириб,

гиёҳвандлик таҳдидига қарши биргаликда курашишга қарор қилганликларини яна бир бор тасдиқлаб,

гиёҳвандлик воситалари ва психотроп моддаларнинг тиббий қўлланилиши оғриқ ва изтиробларни енгиллаштириш учун зарур бўлиб қолаётганини ҳамда ушбу мақсадларда фойдаланиш учун гиёҳвандлик воситалари ва психотроп моддалар билан етарли даражада таъминлаш лозимлигини тан олган ҳолда,

ўзларининг конституциявий, ҳуқуқий ва маъмурий тизимларини лозим даражада ҳисобга олган ҳолда ва ўз давлатлари суверенитетини ҳурмат қилиб,

қуйидагилар тўғрисида келишиб олдилар:

Мазкур Битим мақсадлари учун атамалар қуйидаги маъноларни англатади:

«Ноқонуний муомала» — 1988 йилдаги Гиёҳвандлик воситалари ва психотроп моддаларнинг ноқонуний муомаласига қарши курашиш тўғрисида Бирлашган Миллатлар Ташкилоти Конвенциясининг 3-моддаси 1 ва 2-бандларида кўрсатилган ҳуқуқбузарликлар.

«Гиёҳвандлик воситалари» ва «психотроп моддалар» — 1972 йилдаги Баённома билан ўзгартириш киритилган 1961 йилдаги Гиёҳвандлик воситалари тўғрисида Ягона конвенция ва 1971 йилдаги Психотроп моддалар тўғрисидаги Конвенцияда белгиланган ёки тавсифланган моддалар.

«Прекурсорлар, асосий кимёвий моддалар ва эритмалар» — 1988 йилдаги Гиёҳвандлик воситалари ва психотроп моддаларнинг ноқонуний муомаласига қарши курашиш тўғрисида Бирлашган Миллатлар Ташкилоти Конвенциясининг 12-моддасида назарда тутилган Жадвалларга киритилган моддалар ёки ўзаро келишилиши мумкин бўлган ҳар қандай бошқа моддалар.

Томонлар мазкур Битим мақсадлари учун ва ўз давлатларининг миллий қонунчилигига мувофиқ қуйидаги соҳаларда ҳамкорлик қилишга келишиб олдилар:

а) гиёҳвандлик воситалари, психотроп моддалар ва прекурсор кимёвий моддаларнинг ноқонуний муомаласига қарши курашиш;

b) жиноий даромадларни легаллаштиришнинг олдини олиш ва ноқонуний муомаладан олинган ёки унда фойдаланилган мол-мулкларни таъқиб қилиш, аниқлаш, музлатиш, олиб қўйиш ва мусодара этишда ҳамкорлик қилиш;

с) гиёҳвандлик воситалари, психотроп моддалар, прекурсорлар, асосий кимёвий моддаларнинг ноқонуний муомаласига жалб этилган шахсларни аниқлаш мақсадида назорат остида етказиб беришдан лозим даражада фойдаланиш учун бир-бирларига рухсат бериш ва кўмаклашиш;

d) гиёҳвандлик воситалари, психотроп моддалар ва уларнинг прекурсорлари ноқонуний муомаласига қарши кураш соҳасида ўз давлатлари миллий қонунчилигининг мавжуд меъёрий-ҳуқуқий ҳужжатлари тўғрисида ахборот алмашиш ва келгусида ушбу қонунчиликка киритиладиган ҳар қандай ўзгартириш ва қўшимчалар ҳақида бир-бирларини хабардор қилиш.

Томонлар ўз давлатларининг миллий қонунчилигига мувофиқ қуйидаги шаклларда ҳамкорлик қилиш учун барча саъй-ҳаракатларни амалга ошириш ва зарур чораларни кўришга келишиб олдилар:

а) икки мамлакатнинг ваколатли органлари ўртасида тезкор, техник ва умумий хусусиятдаги ахборот билан алмашиш;

b) ноқонуний фойдаланилаётган объектларни аниқлаш ва гиёҳвандлик воситаларини ишлаб чиқарадиган лабораторияларни йўқ қилиш;

с) гиёҳвандлик воситаларини ноқонуний тайёрлаш ва ишлаб чиқаришда қўлланилиши мумкин бўлган прекурсорлар ва асосий кимёвий моддаларни ишлаб чиқариш, импорт ва экспорт қилиш, транзитини амалга ошириш, сақлаш, тарқатиш ва сотишни тартибга солиш ва назорат қилиш;

d) олдини олиш, хабардор қилиш, таълим ва жамоатчилик дастурлари, шунингдек, даволаш ва реабилитация қилиш орқали гиёҳвандлик воситаларига бўлган талабни қисқартириш юзасидан ахборот алмашиш ва ҳамкорлик қилиш;

е) бир Томон давлати фуқароларининг бошқа Томон давлати ҳудудида ҳибсга олинганлиги тўғрисидаги ахборот билан тезкор алмашиш, шунингдек, тергов, жиноий таъқиб ва шу билан боғлиқ бўлган масалалар бўйича қўшимча маълумотларни тақдим этиш;

f) гиёҳвандлик воситалари, психотроп моддалар ва прекурсор кимёвий моддаларнинг миллий рўйхатлари ва уларга киритилган ҳар қандай ўзгартиришлар билан алмашиш;

g) сўровнома асосида тезкор масалалар бўйича, шу жумладан, ноқонуний фойдаланиладиган барча турдаги гиёҳвандлик воситалари ва синтетик моддалар, шунингдек, кимёвий прекурсорларни тақиқлаш учун зарур бўлиши мумкин бўлган тергов усулларидан фойдаланиш бўйича бир-бирларига кўмаклашиш.

Мазкур Битим доирасида Томонлар ўртасида қуйидаги хусусиятдаги ахборот алмашинувини амалга ошириш мумкин:

а) тезкор алоқа воситалари, хусусан, телефон, телекс/факс ва электрон почта орқали узатилиши мумкин бўлган гиёҳвандлик воситаларининг ноқонуний муомаласи тўғрисида тезкор ахборот;

b) гиёҳвандлик воситалари ва психотроп моддалар билан савдо қилувчи, уларнинг контрабандаси билан шуғулланувчи, шу бўйича гумонланувчи, молиялаштирувчи, ташкилотчилар ва бошқаларга оид маълумотлар тўпламини яратиш учун ёзишма орқали узатилиши мумкин бўлган батафсил ахборот.

Ушбу ахборот алмашинуви одатда ноқонуний муомалага оид ишлар ва унга жалб қилинган шахслар бўйича I ва II иловаларга мувофиқ белгиланган тегишли шаклларда амалга оширилади. Зарурият бўлган ҳолларда, ҳар қандай бошқа муҳим ахборот исталган бошқа шаклда алмашиниши мумкин.

Томонлар алоқа каналлари хавфсизлигини таъминлаш учун барча саъй-ҳаракатларини амалга оширадилар.

Мазкур Битим доирасида Томонлар ўртасидаги ахборот инглиз тилида узатилади.

Томонлар ўртасида мазкур Битим доирасида тақдим этилган ахборот махфий ҳисобланади ва ундан сўралганидан бошқа мақсадларда фойдаланилмайди ҳамда ахборотни тақдим этган Томоннинг ёзма розилигисиз учинчи томонга берилмайди.

Мазкур Битимни самарали амалга ошириш учун Томонлар ўзаро келишувга кўра ҳар йили икки мамлакатнинг ваколатли идоралари экспертлари ўртасида учрашувлар ўтказишлари мумкин.

Мазкур Битим Томонлар давлатлари иштирокчи бўлган бошқа халқаро шартномалардан келиб чиқадиган ҳуқуқ ва мажбуриятларга дахл қилмайди.

Томонлар гиёҳвандлик воситалари устидан назорат қилиш соҳасида кадрлар тайёрлаш, мутахассислар ва экспертлар алмашинуви бўйича ҳамкорлик қиладилар.

Томонлар гиёҳвандлик воситалари, психотроп моддалар ва уларнинг прекурсорлари ноқонуний транзакцияларини назорат қилиш бўйича янги услубларни ишлаб чиқиш ва жорий этиш, шунингдек, гиёҳвандлик воситаларига қарам бўлган шахсларни даволаш ва ижтимоий реабилитация қилишда ҳамкорлик қиладилар.

Томонлар гиёҳвандлик воситалари устидан назорат қилиш соҳасидаги халқаро конвенциялар доирасида ҳуқуқий ёрдам учун гиёҳвандлик воситалари, психотроп моддалар ва прекурсорлар билан боғлиқ бўлган экспорт-импорт операцияларини амалга оширишлари мумкин.

Мазкур Битимни лозим даражада амалга ошириш мақсадида ҳар бир Томон бошқа Томонга мувофиқлаштирилган ҳаракатларни молиялаштириш ва институционал салоҳиятни такомиллаштириш учун ёрдам сўраб мурожаат қилиши мумкин.

Мазкур Битимга Томонларнинг ўзаро келишувига кўра унинг ажралмас қисми ҳисобланадиган ва мазкур Битимнинг 14-моддасида назарда тутилган тартибда кучга кирадиган алоҳида баённомалар билан ўзгартириш ва қўшимчалар киритилиши мумкин.

Мазкур Битимни амалга ошириш ва ҳар қандай ахборотни алмашиш учун ваколатли органлар қуйидагилар ҳисобланади:

Ўзбекистон Республикаси Ҳукумати учун — III иловада белгиланган органлар;

Ҳиндистон Республикаси Ҳукумати учун — IV иловада белгиланган органлар.

Мазкур Битим қоидаларини талқин қилиш ёки қўллаш юзасидан ҳар қандай низолар Томонлар ўртасида музокара ва маслаҳатлашув орқали ҳал этилади.

Мазкур Битим имзоланган санадан бошлаб кучга киради ва беш йил муддатда амал қилади. Агар Томонлардан ҳеч бири бошқа Томонни мазкур Битимни тугатиш нияти тўғрисида камида уч ой аввал ёзма шаклда хабардор қилмаса, Битим кейинги беш йиллик муддатларга ўз-ўзидан узаяверади.

Бунинг тасдиғи сифатида ўзларининг тегишли ҳукуматлари томонидан ўрнатилган тартибда ваколат берилган қуйида имзо чекувчилар мазкур Битимни имзоладилар.

Деҳли шаҳрида 2018 йил 1 октябрда икки асл нусхада, ҳар бири ўзбек, ҳинд ва инглиз тилларида тузилди, бунда барча матнлар тенг аутентиқдир.

Талқин қилишда тафовут юзага келган тақдирда, инглиз тилидаги матн устувор ҳисобланади.

1. Гиёҳвандлик воситаларини олиб қўйган идора номи

2. Олиб қўйилган гиёҳвандлик воситалари/ контрабанда тури

3. Миқдори

4. Кимёвий таҳлили

5. Қўлга олинган жойи

6. Қўлга олинган санаси

7. Қадоғи, маркировкаси ва товар белгилари

8. Ташиш воситалари тўғрисида маълумотлар

9. Сақловчининг исми ва миллати/Ташиш воситаси эгаси

10. Компания, авиакомпания, кема номи

10. (а) Коносамент / авиация йўл ҳужжати/ҳисоб-фактура

11. Яшириш усули

12. Йўналиши

13. Ишлаб чиқарилган/қайта ишланган жойи

14. Гиёҳвандлик воситалари/контрабанда қабул қилинган жой

15. Келиб чиқиши/манбаси

16. Манзили

17. Олиб қўйилган ҳар қандай ускуна/мосламалар

18. Ҳар қандай бошқа маълумотлар

(Бир неча шахслар назарда тутилган ҳолларда, ҳар бир шахс учун алоҳида шаклдан фойдаланиш лозим)

1. Исми ва фойдаланган тахаллуси

2. Отасининг исми

3. Жинси

4. Ёши

5. Туғилган санаси ва жойи

6. Миллати

7. Паспорт рақами

8. Паспорт берилган жой/сана

9. Касби

10. Манзили

11. Жалб этилганлик даражаси

12. Олдинги жалб этилганлик ҳолатлари

13. Шериклари

14. Ҳибсга олинган / қўлга олинган

16. Қўлланилган суд ёки маъмурий чоралар

17. Паспортнинг биринчи бети ёки фотосуратга эга бўлган шахсни тасдиқловчи бошқа ҳужжатнинг нусхаси (гиёҳвандлик воситалари билан савдо қилувчиларнинг фотосурати (лари) мавжуд бўлган тақдирда, улар ҳам илова қилиниши мумкин).

(Терговга кўмаклашиш мақсадида ишнинг тафсилотларини кўрсатинг)

1. Вазирлар Маҳкамаси ҳузуридаги Наркотик моддаларни назорат қилиш миллий-ахборот таҳлил маркази.

2. Ички ишлар вазирлиги.

3. Давлат хавфсизлик хизмати.

4. Давлат божхона қўмитаси.

5. Бош прокуратура.

1. Гиёҳвандлик воситалари устидан назорат қилиш Бюроси.

2. Ички ишлар вазирлиги.

3. Молия вазирлиги.

4. Ижтимоий адолат ва ваколатлар вазирлиги.

5. Гиёҳвандлик воситалари бўйича Марказий бюро.