Мамлакатимизда 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси доирасида давлат бошқарувини такомиллаштириш ҳамда жамиятни демократлаштириш, аҳолининг турмуш даражаси ва сифатини ошириш, ҳудудларни комплекс ривожлантириш борасида амалга оширилаётган кенг кўламли ислоҳотлар парламент олдига янгидан-янги вазифаларни қўймоқда.

Бугунги шиддатли ислоҳотлар даврида парламент вакилларининг халқ билан доимий мулоқотини сифат жиҳатидан янги даражага кўтариш, Қонунчилик палатаси фаолиятининг қонун ижодкорлиги, парламент ва депутатлик назорати, парламентлараро алоқаларни ривожлантириш, шунингдек қуйи палата фаолиятини оммавий ахборот воситаларида кенг ёритиш каби муҳим йўналишларини янада такомиллаштириш талаб этилмоқда.

Шундан келиб чиқиб, Қонунчилик палатасининг 2018 йил иккинчи ярим йиллигига мўлжалланган фаолиятининг асосий йўналишларини мамлакатимиз Президентининг Фармон ва қарорларида ҳамда ўтказилаётган видеоселектор йиғилишларида белгилаб берилаётган устувор йўналишлардан келиб чиққан ҳолда танқидий қайта кўриб чиқишни тақозо этмоқда.

Юқоридагиларни инобатга олиб, демократик ислоҳотларни амалга ошириш ва мамлакатни модернизация қилишда Қонунчилик палатасининг фаол иштирокини таъминлаш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатасининг 2018 йил иккинчи ярим йиллигига мўлжалланган фаолиятининг асосий йўналишлари тасдиқлансин (илова қилинмоқда*).

2. Ўзбекистон Республикаси Олий Мажлиси Қонунчилик палатаси Кенгашининг 2018 йил 22 январдаги 1431-III-сонли қарори билан тасдиқланган Ўзбекистон Республикаси Олий Мажлиси Қонунчилик палатасининг 2018 йилга мўлжалланган фаолиятининг асосий йўналишларига мувофиқ июль — декабрь ойларида амалга оширилиши назарда тутилган тадбирларнинг ўтказилиши бекор қилинсин.

3. Ўзбекистон Республикаси Олий Мажлиси Қонунчилик палатасининг 2018 йил иккинчи ярим йиллигига мўлжалланган фаолиятининг асосий йўналишларида назарда тутилган тадбирларнинг бажарилишини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари зиммасига юклатилсин.

4. Ушбу қарор Ўзбекистон Республикаси Олий Мажлиси Қонунчилик палатасининг мажлисида тасдиқлаш учун киритилсин.