Ўзбекистон Республикаси Президентининг 2018 йил 21 февралдаги ПҚ-3553сс-сонли «Ўзбекистон Республикаси Президенти Давлат хавфсизлик хизмати фаолиятини ташкил этиш тўғрисида»ги қарорига мувофиқ:

1. Ўзбекистон Республикаси Президенти Давлат хавфсизлик хизмати байроғи ва эмблемаси намуналари 1 ва 2-иловаларга мувофиқ тасдиқлансин.

Байроқ ва эмблеманинг фойдаланиш тартиби Ўзбекистон Республикаси Президенти Давлат хавфсизлик хизмати Раиси томонидан тасдиқланиши белгилаб қўйилсин.

2. Ушбу Фармоннинг ижросини назорат қилиш Ўзбекистон Республикаси Президенти ҳузуридаги Хавфсизлик кенгаши котиби В.В. Маҳмудов ва Ўзбекистон Республикаси Президенти Давлат хавфсизлик хизмати раисининг в.б. Б.Х. Ташматов зиммасига юклансин.

Ўзбекистон Республикаси Президенти Давлат хавфсизлик хизмати байроғи (кейинги ўринларда — байроқ) тўқ кўк ва оқ рангдаги тўғри тўртбурчак шаклидаги матодан иборат бўлиб, у вертикал равишда тенг иккига бўлинган. Байроқдаги тўқ кўк ранг улуғворлик, жасорат ва садоқатни ифодаласа, оқ ранг донолик, олийжаноблик, поклик, самимийлик, умид, ҳақиқатпарварликни англатади. Байроқдаги кўк ва оқ рангларнинг уйғунлиги шараф ва олийжанобликни, ҳалоллик ва самимийликни, очиқлик ва покликни ифодалайди.

Байроқнинг марказида, олд ва орқа томонларида Ўзбекистон Республикаси Президенти Давлат хавфсизлик хизмати гералдик белгиси — эмблемаси тасвирланган. Эмблема байроқнинг устун (древка) томонига нисбатан вертикал жойлашган бўлиб, у диаметри 98 см бўлган доирага сиғади. Эмблеманинг юқори қисмида горизонталь равишда «OʼZBEKISTON RESPUBLIKASI PREZIDENTI», пастки қисмида эса «DAVLAT XAVFSIZLIK XIZMATI» ёзувлари жойлашган. Ҳарфларнинг баландлиги 6,5 см, кенглиги 4,5 см, ҳарфлар орасидаги масофа 1,5 см ни ташкил этади. Байроқдаги ҳарфлар марказдан четга қараб жойлашган бўлиб, кўк фонда оқ рангда, оқ фонда эса кўк рангда акс эттирилган.

Байроқнинг узунлиги 250 см, кенглиги эса 125 см ни ташкил этади. Ҳар бир чизиқнинг (полосанинг) узунлиги 125 см га тенг. Байроқ бошқа ўлчамларда тайёрланиши мумкин, бироқ барча ҳолатларда унинг кенглиги ва узунлиги ўртасидаги нисбат 1:2 бўлиши лозим.

Ўзбекистон Республикаси Президенти Давлат хавфсизлик хизмати гералдик белгиси — эмблемаси тўқ кўк ва оқ ранглардан иборат бўлган доира шаклида тасвирланиб, унинг чет қисмида тўқ кўк рангли ҳалқа чизиғи жойлашган.

Ҳалқа чизиғининг юқори қисмида оқ рангдаги тўғри ҳарфлар билан лотин алифбосида «OʼZBEKISTON RESPUBLIKASI PREZ1DENTI», пастки қисмида эса «DAVLAT XAVFSIZLIK XIZMATI» ёзувлари жойлашган.

Доиранинг марказида учбурчак шаклдаги, пастга чўзилган ва юқори бурчаклари кесилган қалқон тасвирланган бўлиб, у ташқи ва ички таҳдидлардан ҳимояни англатади. Қалқоннинг юза қисми ва ички қисми олтин рангда. Қалқоннинг марказида саккиз қиррали юлдуз тасвирланган бўлиб, у тасдиқлаш белгисини ифодалайди.

Қалқоннинг юзасида тасвирланган перчинлар ҳимоя қилинаётган шахсларни ички ва ташқи тажовузлардан ҳимоя қилиш рамзи сифатида ифодаланади.

Қалқоннинг орқасида вертикал равишда симметрия ўқи бўйлаб пастга қаратилган қилич тасвирланган. Қилич куч, шараф, қадр-қиммат, жасорат ва ҳушёрликни ифодалайди. Қилич кумуш рангда. Унинг дастаси ва ғилофи олтин рангда.

Қалқоннинг пастки қисмида, қилич учининг икки томонида, дафна новдалари тасвирланган бўлиб, улар мустаҳкамлик, барқарор шон-шараф ва ғалабани ифодалайди.

Қалқон ва қиличнинг орқасида қанотлари туширилган ҳолда Семург (Феникс) қуши тасвирланган бўлиб, у юқори кесилган бурчакларидан икки панжаси билан қалқонни ушлаб туради ва жасорат, масъулият ҳамда синдирилмас руҳни ифодалайди.

Ўзбекистон Республикаси Давлат байроғининг Семурғ қуши ортида жойлашуви давлатнинг турли таҳдидлардан ҳимояланганлигини ифодалайди.

Эмблеманинг орқа фонида Ўзбекистон Республикаси Президенти Давлат хавфсизлик хизмати байроғи тасвирланган.