Шошилинч тиббий ёрдамнинг илғор технологияларидан фойдаланган ҳолда мамлакат аҳолисига малакали тиббий хизмат кўрсатиш мақсадида ва Ўзбекистон Республикаси соғлиқни сақлаш тизимини ислоҳ қилиш Давлат дастурига мувофиқ Вазирлар Маҳкамаси қарор қилади:

1. Ўзбекистон Республикаси Соғлиқни сақлаш вазирлигининг «Ўзтиббийэкспорт» республика ташқи иқтисодий корхонаси томонидан Тошкент шаҳридаги Шошилинч тиббий ёрдам республика марказини жиҳозлаш учун замонавий тиббиёт техникаси ва анжомлар, касалхона асбоб-ускуналари харид қилиш ва тиббиёт ходимларини ўқитиш учун «Suministros De Comercio Exterior, S.A.» (Испания) фирмаси билан 10,62 млн евро миқдорида контракт тузилганлиги маълумот учун қабул қилинсин.

Ўзбекистон Республикаси Соғлиқни сақлаш вазирлиги мазкур лойиҳанинг буюртмачиси ва ижрочиси деб белгилансин.

2. Белгилансинки, сотиб олинаётган тиббиёт асбоб-ускуналарини маблағ билан таъминлаш:

«CESCE» агентлиги суғурта мукофоти пулининг 50 фоизи қўшилган контракт умумий қийматининг 50 фоизи (5,31 млн евро) Испаниянинг «Instituto de Credito Oficial» (ICO) Давлат кредит агентлигининг «CESCE» агентлигининг суғурта қопламаси остида 31,5 йил муддатга бериладиган имтиёзли кредити маблағларини қайта молиялаш йўли билан Ўзбекистон Республикаси Ташқи иқтисодий фаолият миллий банкининг кредити ҳисобига;

«CESCE» агентлиги суғурта мукофоти пулининг 50 фоизи қўшилган контракт умумий қийматининг 50 фоизи (5,31 млн евро) Испаниянинг «Banco Bilbao Viscaya Argentaria» банкининг «CESCE» агентлигининг суғурта қопламаси остида 5 йил муддатга бериладиган маблағларини қайта молиялаш йўли билан Ўзбекистон Республикаси Ташқи иқтисодий фаолият миллий банкининг кредити ҳисобига амалга оширилади.

3. Ўзбекистон Республикаси Молия вазири Ўзбекистон Республикаси Ташқи иқтисодий фаолият миллий банкининг хорижий кредиторлар олдидаги тўлов мажбуриятлари, шунингдек Ўзбекистон Республикаси Соғлиқни сақлаш вазирлигининг Ўзбекистон Республикаси Ташқи иқтисодий фаолият миллий банки олдидаги тўлов мажбуриятлари бўйича Ўзбекистон Республикаси Ҳукумати номидан белгиланган тартибда кафолат беришга вакил қилинсин.

4. Ўзбекистон Республикаси Адлия вазирлиги кредит битимига иловада белгиланган шакл бўйича Ўзбекистон Республикаси Ҳукуматининг хорижий банклар-кредиторлар олдидаги кафолатлари бўйича белгиланган тартибда хулоса берсин.

5. Ўзбекистон Республикаси Соғлиқни сақлаш вазирлиги:

Ўзбекистон Республикаси Ташқи иқтисодий фаолият миллий банкининг кредитлари бўйича 1 ва 2-иловаларга* мувофиқ асосий қарз, фоизлар ва воситачилик ҳақи ушбу мақсадлар учун ажратиладиган давлат бюджети маблағлари ҳисобига қайтарилишини;

асбоб-ускуналарни жойлаштириш ва монтаж қилиш учун бинолар ўз вақтида тайёрланишини;

мамлакат аҳолисининг кенг қатламларига шошилинч тиббий ёрдам кўрсатиш учун замонавий тиббиёт техникаси ва касалхона асбоб-ускуналаридан самарали фойдаланилишини;

янги тиббиёт технологияларини ўрганиш учун мутахассислар танланиши ва чет элга юборилишини таъминласин.

Жалб этиладиган кредит маблағларидан мақсадли ва самарали фойдаланилиши ва улар ҳисобига сотиб олинадиган зарур асбоб-ускуналар тўғри танланиши учун масъулият Ўзбекистон Республикаси Соғлиқни сақлаш вазирига юклансин.

6. Ўзбекистон Республикаси Молия вазирлиги 2000 йилдан бошлаб Ўзбекистон Республикаси Соғлиқни сақлаш вазирлигига мазкур қарорга мувофиқ жалб қилинадиган кредитлар бўйича асосий қарзни, фоизларни ва воситачилик ҳақини қайтариш билан боғлиқ харажатларни тўлаш учун республика бюджетидан зарур маблағлар ажратишни назарда тутсин.

7. Мазкур лойиҳани маблағ билан таъминлашда қатнашувчи хорижий кредиторлар ва экспорт-кредит агентликлари Ўзбекистон Республикаси ҳудудида норезидентлардан ундириладиган даромад (фойда) солиғи тўлашдан озод қилинсин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Р.С. Азимов ва Ҳ.С. Кароматов зиммасига юклансин.