Савдо хизмати кўрсатиш сифати ва маданиятини ошириш, «Чорсу савдо маркази» савдо комплексида истеъмол товарлари билан чакана савдони амалга оширувчи тадбиркорлар учун қулай шарт-шароитлар яратиш мақсадида Вазирлар Маҳкамаси қарор қилади:

1. Тошкент шаҳар ҳокимлиги томонидан Ўзбекистон Республикаси Давлат мулки қўмитаси ҳамда Молия вазирлиги билан биргаликда Вазирлар Маҳкамасининг 2000 йил 24 июндаги 242-сон қарорини бажариш юзасидан очиқ акциядорлик жамияти шаклидаги «Чорсу савдо маркази» (кейинги ўринларда «Чорсу савдо маркази» очиқ акциядорлик жамияти деб аталади) савдо комплекси ташкил этилганлиги ва қуйидагилар унинг асосий вазифалари этиб белгиланганлиги маълумот учун қабул қилинсин:

«Чорсу савдо маркази» очиқ акциядорлик жамиятига тегишли савдо ва омборхона майдонларини истеъмол товарлари, биринчи навбатда, жисмоний шахслар томонидан республика ҳудудига келтириладиган истеъмол товарлари билан майда улгуржи ва чакана савдони ташкил этиш учун юридик ва жисмоний шахсларга ижарага бериш;

бошқа манфаатдор ташкилотлар ва корхоналар билан биргаликда савдонинг юқори сифати ва маданиятини таъминловчи транспорт, банк хизматлари, маиший ва бошқа хизматлар комплексини ташкил этиш;

ижарага олувчилар учун зарур моддий-техник, технологик ва ташкилий шарт-шароитлар яратиш, савдо комплекси ҳудудида сотувчилар ва харидорларга зарур ахборот хизматлари, шу жумладан истеъмол товарларига талаб ва таклиф конъюнктураси тўғрисида ахборот хизматлари кўрсатиш;

«Чорсу савдо маркази» очиқ акциядорлик жамияти ҳудудида савдо фаолиятини амалга оширишни хоҳловчи тадбиркорлар ўртасида мунтазам равишда кенг реклама ва зарур тушунтириш ишларини олиб бориш.

2. Ўзбекистон Республикаси Давлат мулки қўмитаси, Молия вазирлиги ва Тошкент шаҳар ҳокимлигининг:

«Чорсу савдо маркази» очиқ акциядорлик жамиятининг эълон қилинган акцияларига очиқ обуна бўлишдан тушадиган пул маблағлари жамият томонидан унинг балансидаги бинолар ва иншоотларни реконструкция қилишга ва техника билан қайта жиҳозлашга йўналтирилиши;

«Чорсу савдо маркази» очиқ акциядорлик жамияти ҳудудида савдо фаолиятини амалга оширувчи ва хизматлар кўрсатувчи жисмоний шахслар фаолияти Вазирлар Маҳкамасининг 1999 йил 2 августдаги 373-сон қарори билан тасдиқланган Ўзбекистон Республикаси ҳудудида жойлашган чакана бозорлар, савдо марказлари ва савдо комплексларида жисмоний шахслар томонидан чакана савдо қилиш ва хизматлар кўрсатиш Тартибига мувофиқ амалга оширилиши тўғрисидаги таклифига розилик берилсин.

3. Ўзбекистон Республикаси Давлат солиқ қўмитаси «Чорсу савдо маркази» очиқ акциядорлик жамияти ҳудудида жисмоний шахслар даромадларидан солиқнинг тўлиқ ва ўз вақтида ундирилишини таъминлаш учун таянч пункт ташкил этсин. Давлат солиқ хизматининг кўрсатиб ўтилган таянч пункт штатида бўлмаган мансабдор шахсларининг жисмоний шахслар томонидан «Чорсу савдо маркази» очиқ акциядорлик жамияти ҳудудида тадбиркорлик фаолияти даромадидан белгиланган солиқнинг ўз вақтида тўланиши устидан назоратни амалга оширишлари тақиқлансин.

4. Ўзбекистон Республикаси тижоат банклари «Чорсу савдо маркази» очиқ акциядорлик жамияти ҳудудида валюта алмаштириш пунктлари, шунингдек пул маблағларини қабул қилиш кассалари очсинлар.

6. Мазкур қарорнинг бажарилишини назорат қилиш Бош вазир ўринбосари М. З. Усмонов ҳамда Тошкент шаҳар ҳокими Р. М. Шоабдураҳмонов зиммасига юклансин.