Давлат органлари ва ташкилотлари ахборот тизимларининг ўзаро самарали ҳамкорлиги ва интеграциясини, ахборотларни таҳлил қилиш, қайта ишлаш ва сақлаш, кейинчалик ҳудудларни ижтимоий-иқтисодий ривожлантириш лойиҳалари ва дастурларини ишлаб чиқишда улардан фойдаланиш, инновацион ғоялар, ишланмалар ва ишни ташкил қилиш технологияларини кенг жорий этиш, шунингдек, қўшни мамлакатлар билан савдо-иқтисодий муносабатларни мустаҳкамлашни таъминлаш мақсадида:

1. Ўзбекистон Республикаси Президентининг «Ўзбекистон Республикаси Президенти ҳузуридаги Лойиҳа бошқаруви миллий агентлиги фаолиятини ташкил этиш тўғрисида» 2017 йил 27 июлдаги ПҚ-3150-сон ва «Ахборот-коммуникация технологиялари соҳасида лойиҳа бошқаруви тизимини янада такомиллаштириш чора-тадбирлари тўғрисида» 2017 йил 29 августдаги ПҚ-3245-сон қарорига мувофиқ:

Давлат ахборот тизимларини яратиш ва қўллаб-қувватлаш бўйича ягона интегратор (кейинги ўринларда — Ягона интегратор) ташкил этилгани;

республика ижтимоий-иқтисодий ривожланишини тизимли таҳлил қилиш ва прогнозлаш имконини берувчи, давлат ва бошқа ахборот тизимлари билан интеграциялашган Ўзбекистон Республикаси Лойиҳа бошқарувининг ягона миллий ахборот тизимини 2019 йил 1 январга қадар ишга тушириш белгилангани маълумот ўрнида қабул қилинсин.

2. Ўзбекистон Республикаси Ахборот технологиялари ва коммуникацияларини ривожлантириш вазирлиги, Бош прокуратура, Давлат хавфсизлик хизмати, Ўзбекистон Республикаси Президенти ҳузуридаги Лойиҳа бошқаруви миллий агентлигининг:

а) Қорақалпоғистон Республикаси, вилоятлар ва Тошкент шаҳрида Ягона интеграторнинг маълумотларни қайта ишлаш марказларини ташкил этиш ва уларга қуйидагиларни:

давлат органлари ва ташкилотлари маълумотлар базаларидаги барча ахборотларни сақлашни;

давлат органлари ва ташкилотларининг барча ахборот тизимлари (кейинги ўринларда — ахборот тизимлари) ўртасида мустаҳкам ўзаро алоқани;

маълумотларни хавфсиз сақлаш ва барча ахборот тизимларининг барқарор ишлашини;

тарқоқ ахборот тизимларидаги маълумотларни кейинчалик таҳлилий қайта ишлаш бўйича платформа яратишни таъминлаш вазифаларини юклаш;

б) Ўзбекистон Республикаси Лойиҳа бошқарувининг ягона миллий ахборот тизими функцияларини Ягона интеграторга бериш тўғрисидаги таклифлари қабул қилинсин.

3. Белгилансинки, Ягона интегратор ва маълумотларга ишлов бериш марказларининг фаолияти:

ахборот тизимлари, ресурслар ва дастурий маҳсулотларнинг самарали фаолият юритиши, уларнинг «Электрон ҳукумат» тизимига интеграцияси, шунингдек, давлат органлари ва ташкилотларида замонавий ахборот-коммуникация технологияларини жорий этишни мувофиқлаштириш соҳасида — Ўзбекистон Республикаси Ахборот технологиялари ва коммуникацияларини ривожлантириш вазирлиги томонидан;

Ўзбекистон Республикасини ривожлантириш давлат дастурлари ва инвестиция лойиҳаларини ишлаб чиқишнинг шаффофлиги, сифатли ва ўз вақтида амалга ошириш соҳасида — Ўзбекистон Республикаси Президенти ҳузуридаги Лойиҳа бошқаруви миллий агентлиги томонидан;

давлат органлари ва ташкилотларининг ўз фаолияти шаффофлигини, давлат хизматлари қулайлиги ва сифатини ошириш борасидаги фаолияти устидан назорат қилиш соҳасида — Ўзбекистон Республикаси Бош прокуратураси томонидан;

Ягона интеграторнинг хавфсиз фаолият юритиши, ташқи ва ички таҳдидлар, хакерлик ҳужумларидан, шу жумладан инфратузилма объектларини ҳимоя қилиш соҳасида — Ўзбекистон Республикаси Давлат хавфсизлик хизмати томонидан таъминланади.

4. Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимликлари маълумотларни қайта ишлаш марказларининг захира электр таъминоти, совутиш ва хавфсизлик тизимига уланган, муҳандислик-коммуникация инфратузилмаси ривожланган жойларга жойлаштирилишини таъминласин.

5. Маълумотларни қайта ишлаш марказлари ўз фаолиятини самарали ташкил этиши учун мақсадида сервер ускуналари, техникалар, дастурий таъминот, эҳтиёт қисмлари ва бошқа воситаларни олиб кирганлик учун божхона тўловлари (божхона расмийлаштируви учун йиғимлардан ташқари)дан озод этилсин.

6. Белгилаб қўйилсинки, давлат органлари ва ташкилотларининг ахборот тизимлари, ресурслари ва дастурий маҳсулотларини ишлаб чиқиш, жорий этиш ва интеграция қилишни назарда тутувчи норматив-ҳуқуқий ҳужжатлар лойиҳалари, шунингдек, уларнинг лойиҳавий ва техник ҳужжатлари мажбурий равишда Ягона интегратор билан келишилади.

13. Ўзбекистон Республикаси Президенти ҳузуридаги Лойиҳа бошқаруви миллий агентлиги, Ўзбекистон Республикаси Иқтисодиёт вазирлиги, Молия вазирлиги, Ички ишлар вазирлиги, Давлат солиқ қўмитасининг қуйидагиларни:

солиқ тўловчиларни ҳисобга олишни кенгайтириш ва солиқ тушумлари устидан назоратни кучайтириш ҳисобига бюджет даромадларини кўпайтириш имконини берадиган «онлайн» назорат-касса машиналари тизимларини;

телекоммуникация хизматлари учун бюджет маблағларини тежашни, телефон сўзлашувларининг хавфсизлиги ва назоратини таъминлаш имконини берадиган ҳукумат мобил алоқа тизимини;

ҳайдовчилик гувоҳномасидан ташқари, паспортлар, туғилганлик тўғрисидаги гувоҳномалар ва шахсни тасдиқловчи бошқа ҳужжатларнинг мавжуд тизими ўрнига (республика ичида) ҳар бир фуқаронинг ягона идентификация рақами, унинг шахсий маълумотларини ўзида жамлаган ва давлат хизматларидан фойдаланишда шахсни аниқлаш учун ишлатилувчи идентификация карталари (ID-карталар) тизимини;

амалдаги давлат рақамларини халқаро намунадаги рақамларга алмаштириш, тегишли маълумотларни автомобиль эгаларининг идентификация карталари (ID-карталари)га киритган ҳолда транспорт воситалари учун қоғоз ҳужжатларни бекор қилишни назарда тутувчи транспорт воситаларини ҳисобга олиш тизимини жорий этиш тўғрисидаги таклифларига розилик берилсин.

14. Ўзбекистон Республикаси Президенти ҳузуридаги Лойиҳа бошқаруви миллий агентлиги, Ўзбекистон Республикаси Инвестициялар бўйича давлат қўмитаси масъул вазирликлар ва идоралар, етакчи консалтинг компаниялари ва хорижлик мутахассислар билан биргаликда:

2018 йил 1 июлга қадар ушбу қарорнинг 13-бандида назарда тутилган лойиҳаларни, шу жумладан, халқаро молия институтлари кредитлари, донор ташкилотлар, хорижий давлатларнинг грантлари ва инвесторларнинг хайрия маблағлари ҳисобига молиялаштириш бўйича аниқ таклифлар киритсин;

2018 йил 1 августга қадар ушбу қарорнинг 13-бандида назарда тутилган лойиҳаларнинг техник топшириқлари ва техник-иқтисодий асосларини тайёрлаш ва экспертизадан ўтказишни таъминласин;

2018 йил 1 ноябрга қадар лойиҳаларни бюджетдан ташқари маблағлар ҳисобига Тошкент шаҳрида жорий этиш ва пилот тартибида ишга туширишни таъминласин.

15. Ўзбекистон Республикаси Бош прокуратураси ва Давлат хавфсизлик хизмати масъул вазирлик ва идораларни жалб этган ҳолда ушбу қарорда назарда тутилган чора-тадбирларнинг ўз вақтида ва тўлиқ амалга оширилиши устидан тизимли мониторинг олиб борсин.

16. Ўзбекистон Республикаси Адлия вазирлиги бир ой муддатда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

17. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Давлат хавфсизлик хизмати раиси И.Б. Абдуллаев ва Ўзбекистон Республикаси Бош прокурори О.Б. Муродов зиммасига юклансин.