Ўзбекистон Республикаси Президентининг «Ўзбекистон Республикаси Вазирлар Маҳкамасининг ижро этувчи тузилмасини такомиллаштиришга доир қўшимча чора-тадбирлар тўғрисида» 2017 йил 12 июндаги ПҚ-3051-сон қарорини бажариш юзасидан Вазирлар Маҳкамаси қарор қилади:

1. Ўзбекистон Республикаси Вазирлар Маҳкамасининг Ҳуқуқий экспертиза, халқаро шартномалар ва ташқи алоқаларни ривожлантириш бошқармаси тўғрисидаги низом 1-иловага мувофиқ тасдиқлансин.

2. Ўзбекистон Республикаси Ҳукуматининг 2-иловага мувофиқ айрим қарорлари ўз кучини йўқотган деб ҳисоблансин.

3. Мазкур қарорнинг бажарилишини назорат қилиш Ўзбекистон Республикаси Вазирлар Маҳкамаси Ҳуқуқий экспертиза, халқаро шартномалар ва ташқи алоқаларни ривожлантириш бошқармаси бошлиғи ҳамда Ўзбекистон Республикаси Вазирлар Маҳкамаси аппарати бошқарувчиси Р.В. Абдуқодиров зиммасига юклансин.

1. Ўзбекистон Республикаси Вазирлар Маҳкамасининг Ҳуқуқий экспертиза, халқаро шартномалар ва ташқи алоқаларни ривожлантириш бошқармаси (кейинги ўринларда Бошқарма деб аталади) Ўзбекистон Республикаси Вазирлар Маҳкамаси Ижро этувчи аппаратининг Ўзбекистон Республикаси Вазирлар Маҳкамаси, унинг Раёсати, Ўзбекистон Республикаси Вазирлар Маҳкамаси Ижро этувчи аппаратининг норматив-ҳуқуқий ҳужжатлар ва халқаро шартномалар лойиҳаларини ҳуқуқий экспертизадан ўтказиш ва ҳуқуқий жиҳатдан ишлаб чиқиш, уларнинг бажарилишини назорат қилиш ва мониторингини олиб бориш, шунингдек Мустақил Давлатлар Ҳамдўстлиги (кейинги ўринларда МДҲ деб аталади) мамлакатлари ва тузилмалари, Шанхай ҳамкорлик ташкилоти (кейинги ўринларда ШҲТ деб аталади) тузилмалари ва бошқа халқаро ташкилотлар билан ташқи алоқаларни ривожлантириш масалалари бўйича фаолиятини таъминлайдиган таркибий бўлинмаси ҳисобланади.

2. Бошқарма ўз фаолиятида Ўзбекистон Республикаси Конституциясига, «Ўзбекистон Республикаси Вазирлар Маҳкамаси тўғрисида»ги Ўзбекистон Республикаси Қонунига ва Ўзбекистон Республикасининг бошқа қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек мазкур Низомга амал қилади.

3. Бошқарма ўз фаолиятини Ўзбекистон Республикасининг Бош вазири раҳбарлигида амалга оширади.

Бошқарма Ўзбекистон Республикаси Вазирлар Маҳкамаси аппарати бошқарувчисига бўйсунади.

4. Бошқарма ўз фаолиятини Ўзбекистон Республикаси Президенти Давлат маслаҳатчиларининг тегишли хизматлари, Ўзбекистон Республикаси Олий Мажлиси палаталарининг қўмиталари, Ўзбекистон Республикаси Вазирлар Маҳкамасининг Ижро этувчи аппарати таркибий бўлинмалари, давлат ва хўжалик бошқаруви органлари, маҳаллий ижро этувчи ҳокимият органлари ва бошқа ташкилотлар билан ўзаро ҳамкорликда амалга оширади.

5. Қуйидагилар Бошқарманинг асосий вазифалари ҳисобланади:

давлат ва хўжалик бошқаруви органлари, маҳаллий ижро этувчи ҳокимият органлари томонидан Ўзбекистон Республикаси Вазирлар Маҳкамасига киритиладиган Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари лойиҳаларининг ҳар томонлама ҳуқуқий экспертизадан ўтказилишини ташкил этиш;

Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари лойиҳаларини тайёрлаш ва ишлаб чиқишда иштирок этиш;

қонунлар лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш бўйича дастурларнинг ишлаб чиқилиши ва амалга оширилишини ташкил этиш;

Ўзбекистон Республикаси Ҳукумати томонидан киритилган қонун лойиҳалари ва бошқа масалалар юзасидан Ўзбекистон Республикаси Олий Мажлиси палаталари ва уларнинг қўмиталари билан ўзаро ҳамкорликни таъминлаш;

халқаро шартномалар лойиҳалари ва халқаро шартномаларни имзолаш, уларга қўшилиш, уларни ратификация қилиш ва тасдиқлашнинг мақсадга мувофиқлиги тўғрисидаги таклифлар лойиҳаларини эксперт жиҳатдан пухта ишлаб чиқилишини ташкил этиш, Ўзбекистон Республикасининг халқаро шартномалари лойиҳаларини тайёрлашда иштирок этиш;

Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикасининг халқаро шартномалари амалга оширилишининг туркумланган маълумотлар банкини шакллантириш ва мониторингини олиб бориш;

Ўзбекистон Республикасининг МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларни ривожлантириш масалаларини мувофиқлаштириш.

6. Бошқарма ўзига юкланган вазифаларни бажариш учун қуйидаги функцияларни амалга оширади:

а) норматив-ҳуқуқий ҳужжатлар лойиҳаларини ҳар томонлама ҳуқуқий экспертизадан ўтказишни ташкил этиш, Ўзбекистон Республикаси Вазирлар Маҳкамасининг фаолиятини ҳуқуқий таъминлаш соҳасида:

Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари лойиҳаларини, шу жумладан хорижий ҳуқуқ амалиёти мисолида чуқур қиёсий таҳлил қилиш асосида ҳамда улардаги мавжуд нормаларни амалга ошириш аниқ механизмларининг норматив-ҳуқуқий ҳужжатларда мавжудлиги юзасидан ҳуқуқий экспертизадан ўтказади ҳамда уларнинг Ўзбекистон Республикаси Конституциясига ва Ўзбекистон Республикасининг қонун ҳужжатларига, қонунчилик техникаси қоидалари талабларига мувофиқлиги тўғрисида хулосалар тайёрлайди;

Ўзбекистон Республикаси қонун ҳужжатлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари лойиҳаларини тайёрлашда қатнашади ва уларни тайёрлашни амалга оширади;

қонун ҳужжатларини Ўзбекистон Республикаси Конституцияси ва қонунларига мувофиқлаштириш, ҳуқуқий тартибга солишнинг тизимлилиги ва яхлитлигини таъминлаш тўғрисида таклифлар ишлаб чиқади;

қабул қилинаётган норматив-ҳуқуқий ҳужжатларни амалга ошириш бўйича Ўзбекистон Республикаси Вазирлар Маҳкамаси Ижро этувчи аппаратининг тегишли ахборот-таҳлил департаментлари ва бошқа таркибий бўлинмалари томонидан киритилган назорат режаларини ва тадбирлар режаларини ҳуқуқий экспертизадан ўтказиш ва келишишни амалга оширади;

қонун ҳужжатларини такомиллаштиришга доир таклифларни таҳлил қилади ва умумлаштиради ҳамда уларни Ўзбекистон Республикасининг Бош вазири, унинг ўринбосарлари, Ўзбекистон Республикаси Вазирлар Маҳкамаси аппарати бошқарувчиси кўриб чиқиши учун киритади;

қонун ҳужжатларининг тизимли ҳисобини юритади, қонун ҳужжатлари бўйича маълумотнома ишларини ташкил этади;

Ўзбекистон Республикаси Вазирлар Маҳкамаси Ижро этувчи аппаратининг бошқа таркибий бўлинмалари, тегишли давлат ва хўжалик бошқаруви органлари ҳамда бошқа ташкилотлар билан биргаликда белгиланган тартибда Ўзбекистон Республикаси Вазирлар Маҳкамаси қарорлари ва фармойишларини қўллаш бўйича шарҳ ҳамда тушунтиришларни тайёрлайди ва уларни тайёрлашда иштирок этади ҳамда Ўзбекистон Республикаси Вазирлар Маҳкамаси Раёсати, Ўзбекистон Республикасининг Бош вазири, унинг ўринбосарлари, Ўзбекистон Республикаси Вазирлар Маҳкамаси аппарати бошқарувчиси кўриб чиқиши учун киритади;

қонун ҳужжатлари, Ўзбекистон Республикасининг Бош вазири ва унинг ўринбосарлари бошчилик қиладиган Ҳукумат комиссиялари, кенгашлари ва бошқа коллегиал маслаҳатлашув органлари қарорлари лойиҳаларини тайёрлашда Ўзбекистон Республикасининг Бош вазирига, унинг ўринбосарларига, Вазирлар Маҳкамаси аппарати бошқарувчисига ва Вазирлар Маҳкамасининг Ижро этувчи аппаратининг таркибий бўлинмаларига ҳуқуқий масалалар бўйича маслаҳатлар беради;

Ўзбекистон Республикаси Вазирлар Маҳкамасининг Ижро этувчи аппарати таркибий бўлинмаларини, унинг мутахассисларини норматив-ҳуқуқий ҳужжатлар матнлари, шунингдек қонун ҳужжатлари бўйича маълумотнома материаллари билан таъминлашни яхшилашга қаратилган чора-тадбирлар кўради;

Ўзбекистон Республикаси Президенти, Ўзбекистон Республикасининг Бош вазири ва унинг ўринбосарлари томонидан ўтказиладиган йиғилишлар материалларини тайёрлашда ва уларда қабул қилинадиган қарорларни расмийлаштиришда иштирок этади;

Ўзбекистон Республикаси Вазирлар Маҳкамаси аппарати бошқарувчиси буйруқлари лойиҳаларини ҳуқуқий экспертизадан ўтказади, Ўзбекистон Республикаси Вазирлар Маҳкамасининг Ижро этувчи аппарати фаолияти билан боғлиқ ҳуқуқий ҳужжатларни тайёрлашда иштирок этади;

Ўзбекистон Республикаси Вазирлар Маҳкамасининг Умумий бўлими билан биргаликда Ўзбекистон Республикаси Ҳукуматининг қарорлари тўпламини нашр этишга тайёрлайди;

Бошқарманинг бевосита вазифа ва функциялари билан боғлиқ бўлган жисмоний ва юридик шахсларнинг мурожаатларини кўриб чиқади ва уларда қўйилган масалаларни ҳал қилиш бўйича таклифларни тайёрлайди, ушбу мурожаатларни кўриб чиқиш ва чора кўриш учун тегишли давлат ва хўжалик бошқаруви органларига, маҳаллий давлат ҳокимияти органларига ва бошқа ташкилотларга юборади, уларнинг ўз вақтида кўриб чиқилишини назорат қилади, жисмоний шахсларни ва юридик шахсларнинг вакилларини қабул қилади;

б) Ўзбекистон Республикаси Ҳукуматининг қонун лойиҳаларини тайёрлаш ишларини ташкил қилиш соҳасида:

Ўзбекистон Республикаси Адлия вазирлиги бошқа давлат ва хўжалик бошқаруви органлари, маҳаллий ижро этувчи ҳокимият органлари ва бошқа ташкилотлар, Ўзбекистон Республикаси Вазирлар Маҳкамасининг Ижро этувчи аппарати таркибий бўлинмалари билан биргаликда қонун лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш бўйича дастурлар лойиҳаларини Ўзбекистон Республикаси Бош вазирининг кўриб чиқиши учун киритади;

қонун лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш дастурларининг бажарилиши мониторинги олиб борилишини, кўрсатиб ўтилган дастурлар амалга оширилишининг ҳолати тўғрисида Ўзбекистон Республикаси Вазирлар Маҳкамаси Раёсати мунтазам хабардор қилинишини ташкил этади;

Бошқарма ваколатига кирадиган масалалар бўйича қонун лойиҳаларининг ишлаб чиқилишини ва Ўзбекистон Республикаси Олий Мажлисига белгиланган тартибда тақдим этилишини ташкил қилади;

Ўзбекистон Республикаси Олий Мажлиси палаталарининг қўмиталари билан ўзаро ҳамкорлик қилади, Ўзбекистон Республикаси Вазирлар Маҳкамаси томонидан киритилган қонун лойиҳалари улар томонидан муҳокама этилишида қатнашади, тегишли қонун лойиҳалари бўйича Ўзбекистон Республикаси Вазирлар Маҳкамасининг вакиллари фаолиятини мувофиқлаштиради;

Ўзбекистон Республикаси Олий Мажлисининг палаталарида Ўзбекистон Республикаси Вазирлар Маҳкамаси томонидан киритилган қонун лойиҳаларини муҳокама қилиш бўйича Ўзбекистон Республикаси Вазирлар Маҳкамасининг ахборот-таҳлил департаментлари ишларини мувофиқлаштиради;

в) халқаро шартномалар лойиҳалари ва халқаро шартномаларни имзолаш, уларга қўшилиш, уларни ратификация қилиш ва тасдиқлашнинг мақсадга мувофиқлиги тўғрисидаги таклифлар лойиҳаларининг эксперт жиҳатдан ишлаб чиқилишини ташкил этиш соҳасида:

Ўзбекистон Республикаси Вазирлар Маҳкамасининг Ижро этувчи аппарати тегишли таркибий бўлинмалари билан биргаликда халқаро шартномалар лойиҳаларининг ва халқаро шартномаларни имзолаш, уларга қўшилиш, уларни ратификация қилиш ва тасдиқлашнинг мақсадга мувофиқлиги тўғрисидаги масалаларнинг белгиланган тартибда эксперт жиҳатдан ишлаб чиқилишини ташкил этади;

Ўзбекистон Республикаси Вазирлар Маҳкамаси ахборот-таҳлил департаментларининг лойиҳаларнинг сифатли эксперт жиҳатдан ишлаб чиқилишини таъминлаш масалалари бўйича ишларини мувофиқлаштиради;

халқаро шартномалар лойиҳаларини тайёрлаш ва келишиш масалаларида Ўзбекистон Республикаси Ташқи ишлар вазирлиги, Адлия вазирлиги ҳамда бошқа вазирликлар ва идоралар билан ўзаро ҳамкорлик қилади;

Ўзбекистон Республикаси Вазирлар Маҳкамаси, Ўзбекистон Республикаси Вазирлар Маҳкамаси Раёсати, Ўзбекистон Республикасининг Бош вазири, Ўзбекистон Республикаси Вазирлар Маҳкамаси аппарати бошқарувчиси топшириқларига мувофиқ Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланиши лозим бўлган Ўзбекистон Республикасининг халқаро шартномалари лойиҳаларини тайёрлашни амалга оширади, уларни тайёрлашда иштирок этади;

Ўзбекистон Республикасининг Бош вазири ёки унинг ўринбосарлари топшириғига кўра Бошқармага тегишли соҳага кирадиган масалалар юзасидан Ўзбекистон Республикасининг Бош вазири ва унинг ўринбосарлари раҳбарлик қиладиган Ҳукуматлараро комиссиялар ва қўмиталар мажлисларида иштирок этади;

Ўзбекистон Республикасининг халқаро шартномаларини тайёрлаш ва тузиш масалалари бўйича хорижий давлатлар ҳукуматлари, халқаро ташкилотлар вакиллари билан ўтказиладиган музокараларда иштирок этади;

г) Ўзбекистон Республикаси халқаро шартномаларининг туркумлаштирилган маълумотлар банкини шакллантириш ва юритиш ҳамда амалга оширилиши мониторингини олиб бориш соҳасида;

Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикасининг халқаро шартномаларини амалга ошириш масалалари бўйича ахборотларни тўплайди, умумлаштиради ва таҳлил қилади;

Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикаси халқаро шартномаларининг туркумлаштирилган маълумотлар банкини шакллантиришни, юритишни ва мунтазам равишда янгилаб боришни таъминлайди;

Ўзбекистон Республикаси Ташқи ишлар вазирлиги билан биргаликда хорижий давлатлар билан шартнома-ҳуқуқий базани хатловдан ўтказиш бўйича ишларни амалга оширади;

Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикасининг халқаро шартномалари бўйича мажбуриятларни бажаришнинг аҳволи тўғрисида туркумлаштирилган маълумотлар банкини ва таҳлилий базани шакллантириш масалаларида Ўзбекистон Республикаси Ташқи ишлар вазирлиги, Адлия вазирлиги ҳамда бошқа вазирликлар ва идоралар билан ўзаро ҳамкорлик қилади;

«Ўзбекистон Республикасининг халқаро шартномалари тўғрисида»ги Ўзбекистон Республикаси Қонунига мувофиқ Ташқи ишлар вазирлиги ҳамда бошқа давлат органлари билан биргаликда Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикаси халқаро шартномаларининг амалга оширилиши мониторинги олиб борилишини ташкил қилади;

Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикасининг халқаро шартномаларини амалга ошириш масалалари бўйича таҳлилий ва маълумотнома материалларни тайёрлайди;

д) Ўзбекистон Республикасининг МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларини ривожлантириш масалаларини мувофиқлаштириш соҳасида:

вазирликлар ва идораларнинг МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларни ривожлантириш ишларини мувофиқлаштиришда қатнашади;

Ўзбекистон Республикаси Олий Мажлиси палаталари, Ўзбекистон Республикаси Президенти ҳузуридаги Хавфсизлик кенгаши аппарати ва Ўзбекистон Республикаси Президентининг Ижро этувчи аппарати билан Ўзбекистон Республикасининг ШҲТ тузилмаларида ва бошқа халқаро ташкилотларда иштирок этиши масалаларида ўзаро ҳамкорлик қилади;

МДҲ ва ШҲТ миллий координаторлари, ШҲТ котибияти, МДҲ, ШҲТ ТҚМТнинг ижро этувчи қўмиталари ва ушбу ташкилотларнинг доимий ишлайдиган бошқа органлари билан Ўзбекистон Республикасининг ҳамкорлиги масалалари, шунингдек МДҲ ва ШҲТ доирасида турли даражадаги мажлисларга ахборот-таҳлилий материаллар тайёрлаш, тадбирларнинг (ДРХ, ҲРК, ТИВК ва бошқалар) кун тартибидаги масалалар бўйича республика нуқтаи назарини аниқлаш юзасидан Вазирлар Маҳкамасининг ахборот-таҳлил департаментлари ишларини мувофиқлаштиради;

МДҲ, ШҲТ ва бошқа халқаро ташкилотлар фаолиятига тааллуқли бўлган сиёсий, ҳуқуқий ва ахборот характеридаги ҳужжатлар лойиҳаларини ишлаб чиқиш ва экспертизадан ўтказишда, шунингдек Ўзбекистон Республикасининг халқаро шартномалар ва ташкилотлар қўшилиши, улардаги иштирокини тўхтатиб туриш ёки тўхтатиш масалаларини ишлаб чиқишда қатнашади;

мутасаддилик қилинадиган ташкилотлар фаолияти доирасида республика вазирликлари ва идоралари, шунингдек хорижий томоннинг халқаро шартномаларни амалга ошириши юзасидан мониторингни амалга оширади;

мутасаддилик қилинадиган ташкилотлар — ШҲТ, МДҲ ва бошқа халқаро ташкилотлар доирасида кўп томонлама ҳамкорлик ҳолатининг доимий мониторингини олиб боради.

Бошқарма белгиланган тартибда ўзига юкланган бошқа функцияларни ҳам амалга оширади.

7. Бошқарма ўзига юкланган вазифалар ва функцияларни бажариш учун қуйидаги ҳуқуқларга эга:

зарур бўлган материаллар ва маълумотларни, шу жумладан халқаро шартномаларни имзолаш, уларга қўшилиш, уларни ратификация қилиш ва тасдиқлашнинг мақсадга мувофиқлиги тўғрисидаги хулосаларни, Ўзбекистон Республикаси Вазирлар Маҳкамаси томонидан киритилган қонун ҳужжатларининг Ўзбекистон Республикаси Олий Мажлиси палаталарида кўриб чиқилиши тўғрисидаги маълумотларни Ўзбекистон Республикаси Вазирлар Маҳкамаси Ижро этувчи аппаратининг бошқа таркибий бўлинмаларидан, давлат ва хўжалик бошқаруви органларидан ва маҳаллий ижро этувчи ҳокимият органларидан, бошқа ташкилотлардан белгиланган тартибда сўраш ва олиш;

тегишли материалларни ва ҳужжатлар лойиҳаларини ишлаб чиқиш ва тайёрлаш мақсадида давлат ва хўжалик бошқаруви органлари, маҳаллий ижро этувчи ҳокимият органлари, бошқа ташкилотларнинг раҳбарлари ва вакиллари иштирокида йиғилишлар ўтказиш;

Ўзбекистон Республикасининг Бош вазири, Ўзбекистон Республикаси Вазирлар Маҳкамаси аппарати бошқарувчисининг топшириғига кўра, давлат ва хўжалик бошқаруви органлари, маҳаллий ижро этувчи ҳокимият органлари, нодавлат нотижорат ташкилотлари ва бошқа ташкилотларнинг мажлислари ва йиғилишларида қатнашиш;

бошқарма ваколатига кирадиган масалалар ва йўналишлар бўйича халқаро конференциялар, конгресслар, симпозиумлар, семинарлар, йиғилишларда ва халқаро лойиҳаларда қатнашиш;

Бошқарма ваколатига кирадиган масалалар бўйича давлат ва хўжалик бошқаруви органлари, маҳаллий ижро этувчи ҳокимият органлари ва бошқа ташкилотлар билан белгиланган тартибда ёзишмаларни юритиш;

зарурат бўлганда, Ўзбекистон Республикаси Вазирлар Маҳкамасида кўриб чиқиладиган масалаларни ишлаб чиқиш учун давлат ва хўжалик бошқаруви органлари, маҳаллий ижро этувчи ҳокимият органлари, илмий муассасалар ва бошқа ташкилотларнинг раҳбарлари ва вакилларини белгиланган тартибда жалб этиш, ушбу мақсадларда ишчи гуруҳлар ташкил этиш;

зарурат бўлганда, «Ўзбекистон Республикаси Вазирлар Маҳкамаси тўғрисида»ги Ўзбекистон Республикаси Қонуни, Ўзбекистон Республикаси Вазирлар Маҳкамасининг Регламенти ва бошқа қонун ҳужжатлари талаблари бузилган ҳолда тушган ҳужжатларни қайтариб юбориш.

Бошқарманинг зарур материалларни, маълумотларни, ахборотларни тақдим этиш, шунингдек Ўзбекистон Республикаси Қонунлари, Ўзбекистон Республикаси Президентининг Фармонлари, қарорлари ва фармойишлари, Вазирлар Маҳкамасининг қарорлари, фармойишлари ва бошқа ҳужжатлар лойиҳаларини қайта ишлаб чиқиш бўйича талаблари, агар Ўзбекистон Республикаси Президентининг, Ўзбекистон Республикаси Бош вазирининг, унинг ўринбосарларининг ва Ўзбекистон Республикаси Вазирлар Маҳкамаси аппарати бошқарувчисининг, унинг ўринбосарларининг топшириқларида бажаришнинг бошқа муддатлари белгиланмаган бўлса, Бошқарма томонидан белгиланган муддатларда бажарилиши керак.

8. Бошқарма:

ўзига юкланган вазифа ва функцияларнинг зарур даражада ва самарали бажарилиши учун;

Вазирлар Маҳкамаси томонидан тайёрланадиган ва Ўзбекистон Республикаси Президенти, Ўзбекистон Республикаси Олий Мажлиси палаталари кўриб чиқиши учун киритиладиган ва Ўзбекистон Республикаси Вазирлар Маҳкамаси томонидан қабул қилинадиган норматив-ҳуқуқий ҳужжатлар лойиҳалари ҳуқуқий экспертизасининг комплекслиги ва сифати, халқаро шартномалар лойиҳаларининг ҳуқуқий экспертизаси сифати, имзоланганидан кейин уларнинг амалга оширилиши мониторинги таъминланиши, шунингдек Бошқарма ваколатига кирадиган масалалар бўйича конструктив ҳамкорликни ривожлантириш, МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларнинг ривожлантирилилиши;

Ўзбекистон Республикаси Президентининг «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат ва хўжалик бошқаруви органлари ҳамда барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорига ҳамда Вазирлар Маҳкамасининг «Ижро интизомини мустаҳкамлаш чора-тадбирлари тўғрисида» 1999 йил 12 январдаги 12-сон қарорига мувофиқ ижро интизомининг таъминланиши учун жавоб беради.

9. Бошқарма тузилмасига қуйидагилар киради:

ҳуқуқий экспертиза бўлими;

ташқи алоқаларни ривожлантириш, сиёсий ва маданий-гуманитар соҳалардаги халқаро шартномаларни экспертизадан ўтказиш ва уларнинг амалга оширилиши мониторинги бўлими.

Бўлимлар таркибига бўлим мудири, бош ва етакчи мутахассислар, инспекторлар киради.

Бошқарма тузилмаси Ўзбекистон Республикаси Президенти томонидан тасдиқланади.

10. Бошқарма ишларига Бошқарма бошлиғи раҳбарлик қилади.

11. Бошқарма бошлиғи, бўлимлар мудирлари ва мутахассислари белгиланган тартибда лавозимга тайинланади ва лавозимдан озод қилинади.

Бошқарма ходимларига олдинги иш жойида унга берилган узоқ муддат ишлаганлиги учун устамалар ва лавозим маошларига қўшимча ҳақ, мартаба даражалари сақланиб қолади. Бошқармада ишланган вақт мартаба даражалари ва узоқ муддат ишлаганлиги учун устамалар олиш учун зарур бўлган иш стажига қўшилади.

Бунда узоқ муддат ишлаганлиги учун устамалар ва лавозим маошларига қўшимча ҳақлар учун харажатлар Ўзбекистон Республикаси Давлат бюджети маблағлари ҳисобига амалга оширилади.

12. Бошқарма ишлари Ўзбекистон Республикаси Конституциясига ва «Ўзбекистон Республикаси Вазирлар Маҳкамаси тўғрисида»ги Ўзбекистон Республикаси Қонунига, Ўзбекистон Республикаси Вазирлар Маҳкамасининг Регламентига, Ўзбекистон Республикаси Вазирлар Маҳкамасининг Ижро этувчи аппарати тўғрисидаги Низомга, ушбу Низомга, Ўзбекистон Республикаси Вазирлар Маҳкамасининг Ижро этувчи аппаратида иш юритиш бўйича Йўриқномага, Ўзбекистон Республикаси Президентининг, Ўзбекистон Республикаси Бош вазирининг топшириқларига, Вазирлар Маҳкамаси аппарати бошқарувчисининг буйруқлари ва топшириқларига мувофиқ, шунингдек Вазирлар Маҳкамасининг иш режалари, Бошқарманинг иш режалари, бошлиқнинг, бўлимлар мудирлари ва мутахассисларнинг шахсий иш режалари асосида ташкил этилади.

Бошқарманинг иш режалари ва Бошқарма бошлиғининг шахсий иш режаси Ўзбекистон Республикаси Вазирлар Маҳкамаси аппарати бошқарувчиси томонидан тасдиқланади.

Бўлим мудирлари ва мутахассисларнинг шахсий иш режалари Ўзбекистон Республикаси Вазирлар Маҳкамаси аппарати бошқарувчиси билан келишилади ва Бошқарма бошлиғи томонидан тасдиқланади.

Бошқарманинг Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари амалга оширилиши тизимли мониторингини таъминлаш бўйича фаолияти давлат ва хўжалик бошқаруви органларида, маҳаллий ижро этувчи ҳокимият органларида Вазирлар Маҳкамасининг иш режаси, шунингдек Ўзбекистон Республикаси Бош вазирининг ва ўринбосарларининг топшириқларига мувофиқ комплекс ўрганишларни ўтказиш йўли билан, Ўзбекистон Республикаси Вазирлар Маҳкамаси, унинг Раёсати, Бошқарма мажлисларида ҳисоботларни эшитиш ва маълумотларнинг тегишли банкини юритиш орқали ташкил этилади.

13. Бошқарма бошлиғи:

Бошқармага бевосита раҳбарликни амалга оширади, бўлимлар мудирлари ва мутахассислар ишини ташкил қилади ҳамда Бошқармага юкланган вазифалар ва функцияларнинг бажарилиши, ижро интизомининг ҳолати учун шахсан жавоб беради;

давлат ва хўжалик бошқаруви органлари, маҳаллий ижро этувчи ҳокимият органлари томонидан Ўзбекистон Республикаси Вазирлар Маҳкамасига киритиладиган Ўзбекистон Республикасининг Қонунлари, Ўзбекистон Республикаси Президентининг Фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари лойиҳаларининг ҳар томонлама ҳуқуқий экспертизадан ўтказиш ташкил этилишини таъминлайди, кўрсатилган лойиҳаларга виза қўяди ва улар бўйича эксперт хулосаларни имзолайди;

Бошқарма юритуви соҳасига кирадиган масалалар бўйича Ўзбекистон Республикаси Қонунлари, Ўзбекистон Республикаси Президентининг Фармонлари, қарорлари ва фармойишлари, Ўзбекистон Республикаси Вазирлар Маҳкамасининг қарорлари ва фармойишлари лойиҳаларини тайёрлашда қатнашади ва тайёрлайди;

қонунлар лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш бўйича дастурларни ишлаб чиқиш ва амалга оширишни ташкил қилади;

Ўзбекистон Республикаси Вазирлар Маҳкамаси томонидан киритилган қонун лойиҳалари ва бошқа масалалар бўйича Ўзбекистон Республикаси Олий Мажлиси палаталари ва уларнинг қўмиталари билан ўзаро ҳамкорликни таъминлайди;

халқаро шартномаларни имзолаш, уларга қўшилиш, уларни ратификация қилиш ва тасдиқлаш тўғрисидаги таклифлар ва халқаро шартномалар лойиҳаларининг эксперт жиҳатидан ишлаб чиқилишини таъминлайди, Ўзбекистон Республикасининг халқаро шартномалари лойиҳаларини тайёрлашда қатнашади;

Ўзбекистон Республикаси Президентининг хорижий давлатларга ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган Ўзбекистон Республикасининг халқаро шартномалари амалга оширилишининг туркумлашган маълумотлар банки шакллантирилишини ва мониторинги олиб борилишини ташкил қилади;

Ўзбекистон Республикасининг МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларни ривожлантириш масалалари ишлаб чиқилишини ташкил этади;

Бошқарманинг юритиши соҳасига кирадиган масалалар бўйича Ўзбекистон Республикаси Вазирлар Маҳкамаси ва унинг Раёсати мажлисларида, Ўзбекистон Республикасининг Бош вазири, унинг ўринбосарлари ўтказадиган йиғилишларда, Ҳукумат комиссиялари, кенгашлари ва бошқа коллегиал кенгашувчи органлар мажлисларида, Ўзбекистон Республикаси Вазирлар Маҳкамаси аппарати бошқарувчиси ўтказадиган йиғилишларда қатнашади;

Ўзбекистон Республикаси Вазирлар Маҳкамасига келиб тушган ва улар бўйича Ўзбекистон Республикаси Ҳукумати қарори талаб этилмайдиган ҳужжатларни давлат ва хўжалик бошқаруви органлари, маҳаллий ижро этувчи ҳокимиятнинг тегишли органларига ва бошқа ташкилотларга кўриб чиқиш учун юборади;

Бошқарма кадрлар захирасини шакллантиради, тасдиқланган тузилма ва штатлар жадвалига мувофиқ лавозимга тавсия этиладиган номзодлар бўйича таклифларни Вазирлар Маҳкамаси аппарати бошқарувчиси ва Ўзбекистон Республикасининг Бош вазирига кўриб чиқиши учун киритади, таркибий бўлинмалар раҳбарлари ва мутахассисларнинг касбий даражасини ва иш малакасини ошириш чораларини кўради, шунингдек уларни рағбатлантириш ёки уларга танбеҳ бериш бўйича таклифлар киритади;

Бошқарманинг иш режаси ишлаб чиқилишини ва унинг бажарилишини назорат қилишни ташкил этади;

Бошқарма юритуви соҳасига кирадиган масалалар бўйича давлат ва хўжалик бошқаруви органлари, маҳаллий ижро этувчи ҳокимият органлари ва бошқа ташкилотлар раҳбарлари ва вакиллари иштирокида йиғилишлар ўтказади;

норматив-ҳуқуқий ҳужжатлар ва халқаро шартномалар лойиҳаларини тайёрлашнинг сифати бўйича Ўзбекистон Республикаси Вазирлар Маҳкамаси Ижро этувчи аппарати таркибий бўлинмаларининг, шунингдек давлат ва хўжалик бошқаруви органлари, маҳаллий ижро этувчи ҳокимият органларининг юридик хизматлари ва бошқа бўлинмалари ишларининг ҳолати ва натижадорлигини ўрганишни ташкил қилади, зарурият бўлганда уларнинг коллегиал органлари мажлисларида қатнашади, уларнинг фаолияти самарадорлигини ошириш бўйича таклифлар киритади;

Бошқарманинг бўлим мудирлари ва мутахассислари ўртасида вазифалар тақсимотини Ўзбекистон Республикаси Вазирлар Маҳкамаси аппарати бошқарувчиси томонидан тасдиқлаш учун киритади;

Ўзбекистон Республикаси Вазирлар Маҳкамаси Ижро этувчи аппаратида амал қиладиган Йўриқномага мувофиқ иш юритилишини таъминлайди;

чиқувчи хат-хабарларни имзолайди;

вазифалар тақсимотига мувофиқ бошқа функцияларни амалга оширади.

14. Бошқарма бошлиғи вақтинча бўлмаганда унинг вазифасини Ўзбекистон Республикаси Вазирлар Маҳкамаси аппарати бошқарувчиси томонидан белгиланадиган бўлим мудирларидан бири бажаради.

15. Бўлим мудири ўзига биркитилган масалалар юзасидан:

бўлимга бевосита раҳбарлик қилади ва Бошқарма зиммасига юкланган вазифалар ва функцияларнинг бажарилиши ҳамда бўлимдаги ижро интизомининг аҳволи учун шахсан жавоб беради;

материаллар ва ҳужжатлар лойиҳаларининг сифатли ва ўз вақтида ҳуқуқий экспертизадан ўтказилишини ва тайёрланишини ташкил этади, кўрсатиб ўтилган лойиҳаларга виза қўяди ва улар юзасидан эксперт хулосаларни имзолайди;

сиёсий ва маданий-гуманитар соҳалардаги норматив-ҳуқуқий ҳужжатлар, халқаро шартномалар лойиҳаларини тайёрлашда ва экспертизадан ўтказишда бевосита қатнашади, улар бўйича тегишли таҳлилий ва маълумотнома материаллар, эксперт хулосалар тайёрланишини таъминлайди;

МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларни ривожлантириш масалалари бўйича материаллар ва ҳужжатларнинг тайёрланишини таъминлайди;

норматив-ҳуқуқий ҳужжатлар ва халқаро шартномалар лойиҳаларини экспертизадан ўтказиш сифати ва самарадорлигини ошириш чора-тадбирларини кўради, Бошқарма бошлиғига норматив-ҳуқуқий ҳужжатлар ва халқаро шартномалар лойиҳаларини тайёрлаш ва экспертизадан ўтказиш тартибини такомиллаштириш бўйича таклифлар киритади;

тегишли масалалар бўйича тизимлаштирилган маълумотлар базаси яратилиши ва юритилишини, уларнинг мунтазам равишда янгилаб борилишини назорат қилади;

материаллар тўғрисида Бошқарма бошлиғига, шунингдек белгиланган тартибда Ўзбекистон Республикасининг Бош вазирига, унинг ўринбосарларига ва Ўзбекистон Республикаси Вазирлар Маҳкамаси аппарати бошқарувчисига ахборот беради;

республика қонунчилигини янада такомиллаштириш, шунингдек қонунчиликнинг тегишли соҳаларидаги мавжуд муаммоларни, такрорланишларни, зиддиятларни ва бошқа камчиликларни бартараф этиш бўйича таклифлар ишлаб чиқилишини ташкил қилади ва Бошқарма бошлиғига тақдим этади;

Ташқи ишлар вазирлиги билан биргаликда ҳамкорликнинг шартномавий-ҳуқуқий базасини хатловдан ўтказиш масалалари бўйича хорижий давлатлар билан музокараларда қатнашади, сиёсий ва маданий-гуманитар соҳаларда халқаро шартномаларни хатловдан ўтказишни мунтазам равишда ташкил этади, шунингдек, Бошқарма бошлиғига ушбу йўналишдаги ишларни янада такомиллаштириш бўйича таклифлар тақдим этади;

ўзи юритадиган соҳага кирадиган масалалар бўйича Вазирлар Маҳкамаси ва унинг Раёсати мажлисларида, Ўзбекистон Республикасининг Бош вазири, унинг ўринбосарлари томонидан ўтказиладиган йиғилишларда, Ҳукумат комиссиялари, кенгашлари ва коллегиал маслаҳатлашув органлари мажлисларида, Вазирлар Маҳкамаси аппарати бошқарувчиси ва унинг ўринбосарлари томонидан ўтказиладиган йиғилишларда белгиланган тартибда қатнашади;

давлат ва хўжалик бошқаруви органлари, маҳаллий ижро этувчи ҳокимият органлари ва бошқа ташкилотлар раҳбарлари ва вакиллари билан йиғилишлар ўтказади;

жисмоний ва юридик шахсларнинг Бошқармага келиб тушган мурожаатларини белгиланган тартибда кўриб чиқилишини таъминлайди;

Ўзбекистон Республикаси Вазирлар Маҳкамаси Ижро этувчи аппарати таркибий бўлинмаларининг, шунингдек давлат ва хўжалик бошқаруви органлари, маҳаллий ижро этувчи ҳокимият органлари юридик хизматлари ва бошқа бўлинмаларининг норматив-ҳуқуқий ҳужжатлар, халқаро шартномалар лойиҳаларини тайёрлашнинг сифати бўйича ишларининг ҳолати ва натижадорлигини ўрганади, зарурат бўлганда уларнинг коллегиал органлари мажлисларида қатнашади, улар фаолиятининг самарадорлигини ошириш бўйича таклифлар киритади;

Бошқарма бошлиғининг топшириғига биноан чиқувчи хат-хабарларни имзолайди;

Бошқарма бошлиғига тегишли мутахассислар ўртасида вазифаларни тақсимлаш бўйича таклифлар киритади;

мутахассисларни лавозимга тайинлаш ва лавозимдан озод қилиш, уларнинг малакасини ошириш, рағбатлантириш ва уларга танбеҳ бериш тўғрисида Бошқарма бошлиғига таклифлар тақдим этади;

вазифалар тақсимотига мувофиқ бошқа функцияларни амалга оширади.

Бўлим мудири вақтинча бўлмаганда унинг вазифасини Бошқарма бошлиғи томонидан белгиланадиган бўлим бош мутахассисларидан бири бажаради.

16. Бошқарманинг бош мутахассиси ўзига биркитилган масалалар бўйича:

материалларни ва ҳужжатлар лойиҳаларини тайёрлайди, Бошқарма бошлиғи, бўлим мудири топшириқларини бажаради, материалларнинг ўз вақтида тайёрланиши, уларнинг сифатли ишлаб чиқилиши ва топшириқларнинг бажарилиши юзасидан назорат таъминланиши учун шахсан жавоб беради;

давлат ва хўжалик бошқаруви органлари, маҳаллий ижро этувчи ҳокимият органлари, бошқа ташкилотлар ва Ўзбекистон Республикаси Вазирлар Маҳкамаси Ижро этувчи аппаратининг таркибий бўлинмалари томонидан тақдим этилган норматив-ҳуқуқий ҳужжатлар, халқаро шартномалар лойиҳаларини ва бошқа материалларни ўрганади, уларни эксперт жиҳатидан ишлаб чиқади, улар бўйича тегишли таҳлилий ва маълумотнома материаллар, эксперт хулосалар тайёрлайди;

тегишли масалалар бўйича тизимлаштирилган маълумотлар базасини яратади ва юритади, уларни мунтазам равишда тўлдириб ва янгилаб боради;

халқаро шартномаларнинг амалга оширилиши юзасидан мониторинг олиб боради;

халқаро шартномалар маълумотларининг тизимлаштирилган банкини юритади, уларнинг мунтазам янгилаб борилишини амалга оширади;

МДҲ мамлакатлари ва тузилмалари, ШҲТ тузилмалари ва бошқа халқаро ташкилотлар билан ташқи алоқаларни ривожлантириш масалалари бўйича материаллар ва ҳужжатларни тайёрлайди;

Ўзбекистон Республикаси Вазирлар Маҳкамаси Ижро этувчи аппарати таркибий бўлинмаларининг, шунингдек давлат ва хўжалик бошқаруви органлари, маҳаллий ижро этувчи ҳокимият органлари юридик хизматлари ва бошқа бўлинмаларининг норматив-ҳуқуқий ҳужжатлар, халқаро шартномалар лойиҳаларини тайёрланиши сифати бўйича ишларининг ҳолати ва натижадорлигини ўрганади, зарурат бўлганда уларнинг коллегиал органлари мажлисларида қатнашади, улар фаолиятининг самарадорлигини ошириш бўйича таклифлар киритади;

материаллар тўғрисида Бошқарма бошлиғига, бўлим мудирига, шунингдек белгиланган тартибда Ўзбекистон Республикасининг Бош вазирига, унинг ўринбосарларига ва Ўзбекистон Республикаси Вазирлар Маҳкамаси аппарати бошқарувчисига ва унинг ўринбосарларига ахборот беради;

қонун ҳужжатларини ва ҳуқуқни қўллаш амалиётини такомиллаштириш, Ўзбекистон Республикаси Вазирлар Маҳкамаси қарорларини талқин қилиш ва тушунтириш бўйича таклифларни ишлаб чиқади ва Бошқарма бошлиғига, бўлим мудирига тақдим этади;

мутасаддилик қилинадиган масалалар бўйича тегишли маълумотномалар ва таҳлилий материалларни тайёрлашда қатнашади;

ўзига биркитилган масалалар бўйича Ўзбекистон Республикаси Вазирлар Маҳкамаси ва унинг Раёсати мажлисларида, Ўзбекистон Республикасининг Бош вазири ва унинг ўринбосарлари томонидан ўтказиладиган йиғилишларда, Ҳукумат комиссиялари, кенгашлари ва бошқа коллегиал органлар мажлисларида, Ўзбекистон Республикаси Вазирлар Маҳкамаси аппарати бошқарувчиси ва унинг ўринбосарлари томонидан ўтказиладиган йиғилишларда белгиланган тартибда қатнашади;

ўзига биркитилган масалалар бўйича давлат ва хўжалик бошқаруви органлари, маҳаллий ижро этувчи органлар ва бошқа ташкилотларнинг вакиллари, олимлар ва мутахассислар билан материалларни Ўзбекистон Республикаси Вазирлар Маҳкамаси ва унинг Раёсати мажлисларида, Ўзбекистон Республикаси Президенти, Ўзбекистон Республикасининг Бош вазири ва унинг ўринбосарлари томонидан ўтказиладиган йиғилишларда кўриб чиқишга тайёрлаш, шунингдек ижродаги Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ҳукумат қарорлари лойиҳаларини уларни тайёрлаш мақсадида муҳокама этиш учун йиғилишлар ўтказади;

вазифалар тақсимотига мувофиқ бошқа функцияларни амалга оширади.

17. Бошқарманинг етакчи мутахассиси ўзига биркитилган масалалар юзасидан:

материаллар ва ҳужжатлар лойиҳаларини тайёрлайди, Бошқарма бошлиғи, бўлим мудири топшириқларини бажаради, материалларнинг ўз вақтида тайёрланиши, уларни ишлаб чиқишнинг сифати ва топшириқларнинг бажарилиши юзасидан назорат таъминланиши учун шахсан жавоб беради;

давлат ва хўжалик бошқаруви органлари ва маҳаллий ижро этувчи ҳокимият органлари, бошқа ташкилотлар ҳамда Ўзбекистон Республикаси Вазирлар Маҳкамаси Ижро этувчи аппарати таркибий бўлинмалари томонидан тақдим этилган норматив-ҳуқуқий ҳужжатлар лойиҳаларини ўрганади, улар бўйича тегишли таҳлилий ва маълумотнома материалларни, эксперт хулосаларни тайёрлайди;

тегишли масалалар бўйича маълумотларнинг тизимлаштирилган базаларини ташкил этади ва юритади, уларни мунтазам тўлдириб ва янгилаб боради;

норматив-ҳуқуқий ҳужжатлар лойиҳаларини тайёрлашнинг сифати бўйича Ўзбекистон Республикаси Вазирлар Маҳкамаси Ижро этувчи аппарати таркибий бўлинмаларининг, шунингдек давлат ва хўжалик бошқаруви органлари, маҳаллий ижро этувчи ҳокимият органларининг юридик хизматлари ва бошқа бўлинмалари ишларининг ҳолати ва натижадорлигини ўрганади, зарурат бўлганда уларнинг коллегиал органлари мажлисларида қатнашади, улар фаолиятининг самарадорлигини ошириш бўйича таклифлар киритади;

материаллар тўғрисида Бошқарма бошлиғига, бўлим мудирига, тегишли бош мутахассисга, шунингдек белгиланган тартибда Ўзбекистон Республикасининг Бош вазирига, унинг ўринбосарларига ва Ўзбекистон Республикаси Вазирлар Маҳкамаси аппарати бошқарувчисига ва унинг ўринбосарига ахборот беради;

қонун ҳужжатларини ва ҳуқуқий қўллаш амалиётини такомиллаштириш, Ўзбекистон Республикаси Вазирлар Маҳкамаси қарорлари ва фармойишларини талқин қилиш ва тушунтириш бўйича таклифларни ишлаб чиқади ҳамда Бошқарма бошлиғига, бўлим мудирига тақдим этади;

мутасаддилик қилинадиган масалалар бўйича тегишли маълумотнома ва таҳлилий материалларни тайёрлашда қатнашади;

Ўзбекистон Республикаси Вазирлар Маҳкамаси ва унинг Раёсати мажлисларида, Ўзбекистон Республикасининг Бош вазири ва унинг ўринбосарлари ўтказадиган йиғилишларда, Ҳукумат комиссиялари, кенгашлари ва бошқа коллегиал маслаҳатлашув органлари мажлисларида, Ўзбекистон Республикаси Вазирлар Маҳкамаси аппарати бошқарувчиси томонидан ўтказиладиган йиғилишларда белгиланган тартибда қатнашади;

Бошқарма бошлиғи, бўлим мудири ёки тегишли бош мутахассис билан келишган ҳолда Ўзбекистон Республикаси Вазирлар Маҳкамаси ва унинг Раёсати мажлисларида, Ўзбекистон Республикаси Президенти, Ўзбекистон Республикаси Бош вазири ва унинг ўринбосарлари йиғилишларида кўриб чиқишга материалларни тайёрлаш учун, шунингдек ижродаги Ўзбекистон Республикаси қонунлари, Ўзбекистон Республикаси Президентининг фармонлари, қарорлари ва фармойишлари, Ҳукумат қарорлари лойиҳаларини давлат ва хўжалик бошқаруви органлари, маҳаллий ижро этувчи ҳокимият органлари ва ташкилотлар вакиллари, олимлар ва мутахассислар билан уларни тайёрлаш мақсадида муҳокама қилиш учун йиғилишлар ўтказади.

Вазифалар тақсимотига мувофиқ бошқа функцияларни амалга оширади.

18. Инспекторлар:

Бошқармада ва бўлимларда иш юритилишини таъминлайдилар;

Бошқарма ва бўлимларда ҳужжатлар ўтиши юзасидан назоратни амалга оширадилар;

норматив-ҳуқуқий ҳужжатлар архивини шакллантириш ва юритишни амалга оширадилар;

Ўзбекистон Республикаси Ҳукумати қарорлари тўпламларини техник жиҳатдан тайёрлашни амалга оширадилар;

архивга топширилган норматив-ҳуқуқий ҳужжатларнинг йиғмажилдлари ва лойиҳаларини техник жиҳатдан саралашни амалга оширадилар;

йиғмажилдларни тайёрлашни ва ўз вақтида архивда сақлашга топширишни таъминлайдилар;

ўзларига юкланган бошқа функцияларни бажарадилар.

1. Вазирлар Маҳкамасининг «Ўзбекистон Республикаси Вазирлар Маҳкамасининг ахборот-таҳлил департаментлари ҳамда Ҳуқуқий экспертиза ва халқаро шартномалар бошқармаси тўғрисидаги низомларни тасдиқлаш ҳақида» 2009 йил 26 ноябрдаги 302-сон қарори (Ўзбекистон Республикаси ҚТ, 2009 й., 11-сон, 73-модда).

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикаси Президентининг «Ўзбекистон Республикасининг Интеллектуал мулк агентлигини ташкил этиш тўғрисида» 2011 йил 24 майдаги ПҚ-1536-сон қарори ва Ўзбекистон Республикаси Вазирлар Маҳкамасининг «Ўзбекистон Республикаси Интеллектуал мулк агентлиги фаолиятини ташкил этиш чора-тадбирлари тўғрисида» 2011 йил 8 июндаги 166-сон қарори)» 2011 йил 6 сентябрдаги 248-сон қарорига (Ўзбекистон Республикаси ҚТ, 2011 й., 9-сон, 74-модда) илованинг 13-банди.

3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг «Жисмоний ва юридик шахсларнинг мурожаатлари тўғрисида» 2014 йил 3 декабрдаги ЎРҚ-378-сон Қонуни)» 2015 йил 31 мартдаги 74-сон қарорига (Ўзбекистон Республикаси Ҳукумати ҚҲТ, 2015 й., 3-сон, 22-модда) илованинг 14-банди.

4. Вазирлар Маҳкамасининг «Ўзбекистон Республикаси Президентининг «Юридик хизмат фаолиятини тубдан такомиллаштириш чора-тадбирлари тўғрисида» 2017 йил 19 январдаги ПҚ-2733-сон қарорини амалга ошириш чора-тадбирлари ҳақида» 2017 йил 1 майдаги 250-сон қарорига (Ўзбекистон Республикаси ҚТ, 2017 й., 5-сон, 57-модда) 7-илованинг 2-банди.