Ўзбекистон Республикаси Ҳукумати ва Қозоғистон Республикаси Ҳукумати, кейинги ўринларда «Томонлар» деб аталувчилар,

Ўзбекистон Республикаси Ҳукумати билан Қозоғистон Республикаси Ҳукумати ўртасида халқаро автомобиль қатнови тўғрисида 2006 йил 20 мартда имзоланган Битимнинг (кейинги ўринларда — Битим) 15-моддаси 2-бандига, шунингдек Томонлар давлатлари ўртасида йўловчиларни автомобилда халқаро ташиш соҳасида ҳамкорликни ривожлантириш заруриятига амал қилган ҳолда,

қуйидагилар тўғрисида келишиб олдилар:

Битимга ҳамда Битимни қўллаш тўғрисида Ижро Баённомасига (кейинги ўринларда — Ижро Баённомаси) қуйидаги ўзгартиш ва қўшимчалар киритилсин:

1. Битимнинг муқаддимаси қуйидаги таҳрирда баён этилсин:

«Ўзбекистон Республикаси Ҳукумати ва Қозоғистон Республикаси Ҳукумати, кейинги ўринларда «Томонлар» деб аталувчилар,

Томонлар давлатлари ўртасида йўловчи ва юкларни автомобилда халқаро ташиш соҳасида ҳамкорликни янада ривожлантириш заруриятига амал қилган ҳолда,

Томонлар давлатлари ўртасида автомобилда йўловчи ва юкларни, шунингдек уларнинг ҳудудлари орқали транзит ташишларни енгиллаштиришга интилиб,

мазкур масалаларни ўзаро ёрдам, ҳамкорлик ва ўзаро манфаатдорлик асосида тартибга солиш истагида,

қуйидагилар тўғрисида келишиб олдилар:».

2. Битимнинг 1-моддаси 1-банди қуйидаги таҳрирда баён этилсин:

«1. Мазкур Битим қоидалари Томонлардан бирининг давлати ҳудудида рўйхатга олинган автотранспорт воситаларида амалга ошириладиган Ўзбекистон Республикаси билан Қозоғистон Республикаси ўртасида автомобилда йўловчи ва юкларни халқаро ташишлар, уларнинг ҳудудлари орқали транзит ташишлар, учинчи мамлакатлардан/га ташишларга қўлланилади.».

3. Битимнинг 2-моддаси 1 ва 2-бандлари қуйидаги таҳрирда баён этилсин:

«1. «Ташувчи» атамаси:

Томонлардан бирининг давлати ҳудудида рўйхатга олинган, миллий қонунчиликка мувофиқ ҳақ эвазига ёки ўз ҳисобидан йўловчи ва юкларнинг халқаро ташишларини амалга ошириш ҳуқуқига эга бўлган жисмоний ёки юридик шахсни англатади.

2. «Автотранспорт воситаси» атамаси:

йўловчиларни ташишда — автобус, яъни йўловчиларни ташиш учун мўлжалланган ҳамда ҳайдовчи ўриндиғи билан бирга ҳисоблаганда камида 9 та ўриндиққа эга бўлган автотранспорт воситасини;

юкларни ташишда — юк ташиш учун мўлжалланган автотранспорт воситаси, шу жумладан юк автомобили, тиркамали юк автомобили, шатакчи автомобиль ёки ярим тиркамали шатакчи автомобилни англатади.».

4. Битимнинг 2-моддаси қуйидаги мазмундаги 7, 8 ва 9-бандлар билан тўлдирилсин:

«7. «Йўловчиларни мунтазам ташишлар» атамаси:

Томонлар давлатлари ваколатли органлари ўртасида олдиндан келишилган йўналишлар, жадвал, тарифлар, ташувчи йўловчиларни чиқарадиган ва туширадиган бекатлар бўйича амалга ошириладиган автобусда йўловчи ташувларини англатади.

8. «Йўловчиларни номунтазам ташишлар» атамаси:

«йўловчиларни мунтазам ташишлар» атамаси қамровига кирмайдиган йўловчиларни автобусда ташишларни англатади.

9. «Транзит ташишлар» атамаси:

Томонлардан бирининг давлати ҳудуди орқали йўловчилар ёки юкларни ташишни англатади, бунда жўнаш ва етиб бориш манзили мазкур давлат ҳудудидан ташқарида жойлашган бўлади.».

5. Битим III бобининг номланиши қуйидаги таҳрирда баён этилсин:

«III. Йўловчи ва юкларни ташиш».

6. Битимнинг 4-моддасига қуйидаги мазмундаги 3-банд қўшилсин:

«3. Томонлар давлатлари ваколатли органлари рухсатнома бланкаларини алмаштириш тартибини ўзаро келишиб оладилар. Мазкур бланкаларда рухсатномани берган ваколатли органнинг муҳри ва масъул шахсининг имзоси мавжуд бўлиши лозим.».

7. Битим қуйидаги мазмундаги 5-1 ва 5-2-моддалар билан тўлдирилсин:

1. Йўловчиларни мунтазам ташишлар Томонлар давлатлари ваколатли органлари ўртасидаги келишув бўйича ташкил этилади.

2. Томонлар давлатлари ўртасида ёки уларнинг ҳудудлари орқали транзит тарзда йўловчиларни мунтазам ташишлар Томонлар давлатлари ваколатли органлари тарафидан йўналишнинг ўз давлати ҳудудидан ўтадиган қисмига бериладиган рухсатномалар асосида амалга оширилади. Рухсатномалар Томонлар давлатларининг ваколатли органлари келишган тартибда 5 йилгача бўлган муддатга берилади.

3. Мунтазам ташишларни ташкил этиш тўғрисидаги таклифлар Томонлар давлатларининг ваколатли органлари томонидан бир-бирига берилади ва унда қуйидаги маълумотлар баён этилиши лозим:

а) ташувчининг номи;

б) етказиб бериш манзиллардаги автовокзаллар (автостанциялар) кўрсатилган қатнов йўналиши;

в) ҳаракат жадвали ва тарифлар;

г) ташишларни амалга оширишнинг мўлжалланган муддати ва мунтазамлиги;

д) ташувчи йўловчиларни чиқарадиган ва туширадиган тўхташ бекатлари, шунингдек чегарадан ўтиш пунктлари;

е) қўшма шартнома, башарти хизмат бир неча ташувчилар томонидан биргаликда кўрсатилаётган бўлса.

4. Томонларнинг ваколатли органлари йўловчиларни мунтазам ташишларни ўз ҳудудлари орқали ташкил этиш тартибини (ёзма равишда) келишиб оладилар.

1. Томонлар давлатлари ўртасида ёки уларнинг ҳудудлари орқали транзит тарзда йўловчиларни номунтазам ташишлар Томонлар давлатлари ваколатли органлари тарафидан бериладиган рухсатномалар асосида амалга оширилади, ушбу модданинг 2-бандида белгиланган ташишлар бундан мустасно.

2. Ушбу модданинг 1-бандида кўрсатилган рухсатнома йўловчиларни номунтазам ташишлар учун қуйидаги ҳолларда талаб этилмайди:

а) агар йўловчилар гуруҳи худди шу таркибда айни автобуснинг ўзида бутун йўналиш бўйлаб ташилаётган бўлса ва бунда:

йўналиш автобус рўйхатдан ўтган Томон давлати ҳудудида бошланса ва тугаса, ёхуд;

йўналиш автобус рўйхатдан ўтган Томон давлати ҳудудида бошланса ва бошқа Томон давлатининг ҳудудида тугаса, башарти автобус мазкур бошқа Томон давлатининг ҳудудидан бўш қайтса ёки;

автобус бошқа Томон давлати ҳудудига айнан шу ташувчи томонидан илгари олиб бориб қўйилган йўловчилар гуруҳини олиб кетиш мақсадида бўш кириб борса;

б) носоз автобус бошқа автобус билан алмаштирилса.

3. Мазкур модданинг 2-банди а) кичик бандида назарда тутилган ташувларни амалга оширишда, автобус ҳайдовчиси Томонлар давлатлари ваколатли органлари тарафидан келишилган шакл бўйича тузилган йўловчилар рўйхатига эга бўлиши лозим.

4. Йўловчиларни ҳар бир номунтазам ташишга бир марта манзилга бориш ва қайтишни амалга ошириш ҳуқуқини берувчи алоҳида рухсатнома берилиши лозим.».

8. Битимнинг 6-моддаси 1-банди қуйидаги таҳрирда баён этилсин:

«1. Мазкур Битимга биноан талаб этилаётган рухсатномалар (4-модданинг 2-банди, 5-модданинг 1-банди, 5-1 — модданинг 2-банди, 5-2-модданинг 1-банди), шунингдек ташувларга оид бошқа ҳужжатлар мазкур Битимда кўрсатилган барча ташувлар давомида автотранспорт воситасида бўлиши керак ва Томонлар давлатлари ваколатли органлари вакилларининг талабига кўра текшириш учун тақдим этилиши лозим.».

9. Битимнинг 8-моддаси қуйидаги таҳрирда баён этилсин:

«1. Мазкур Битимда назарда тутилган ташувлар ўз давлатларининг миллий қонунчилигига мувофиқ йўловчи ва юкларни халқаро ташиш рухсат этилган ташувчилар томонидангина амалга оширилиши мумкин.

2. Йўловчи ва юкларни халқаро ташишларни амалга оширадиган автотранспорт воситалари ўз давлатининг рўйхатга олиш ва фарқловчи белгиларига эга бўлишлари лозим.

Юк автомобиллари ёки шатакчи автомобиллар Томонлар давлатларининг рўйхатга олиш ва фарқловчи белгиларига эга бўлгандагина, тиркамалар ва ярим тиркамалар бошқа давлатларнинг рўйхатга олиш ва фарқловчи белгиларига эга бўлишлари мумкин.

3. Томонларнинг ташувчилари йўловчи ва юклар ташувлари амалга оширилаётган ҳудуд давлатининг ҳаракат қоидалари ва бошқа қонунларига риоя қилишлари лозим.».

10. Битимнинг 9-моддаси қуйидаги таҳрирда баён этилсин:

Мазкур Битимга мувофиқ йўловчи ва юкларни ташиш автотранспорт воситалари эгаларининг учинчи шахсларга етказилган зарар учун фуқаролик жавобгарлигини мажбурий суғурталаш шарти билан амалга оширилади. Ташувчи ташувларни амалга ошираётган ҳар бир автотранспорт воситасини олдиндан суғурталаши лозим.».

11. Битимнинг 12-моддасида:

1-банднинг б) ва в) кичик бандлари қуйидаги таҳрирда баён этилсин:

«б) йўловчи ва юкларни ташиш давомида фойдаланиш учун зарур бўлган миқдордаги мойлаш материаллари;

в) йўловчи ва юкларни халқаро ташишни амалга ошираётган автотранспорт воситасини таъмирлаш учун мўлжалланган эҳтиёт қисмлар ва асбоб-ускуналар.».

2-банд қуйидаги таҳрирда баён этилсин:

«2. Мазкур Битим доирасида йўловчи ва юкларни ташишни амалга ошираётган автотранспорт воситалари автотранспорт воситаларига эгалик қилиш ёки ундан фойдаланиш, бошқа Томон давлатининг автомобиль йўлларидан фойдаланиш ва уларни таъмирлаш билан боғлиқ йиғим ва тўловлардан ўзаро озод этилади, тўловли автомобиль йўллари, автомагистраллар, кўприклар ва тоннеллардан фойдаланиш учун йиғим ва тўловлар, башарти бундай йиғим ва тўловлар ушбу давлатнинг автотранспорт воситаларидан ундириладиган бўлса, бундан мустасно.».

12. Ижро Баённомасининг 1-банди қуйидаги таҳрирда баён этилсин:

«1. Битимнинг ваколатли органлари қуйидагилар ҳисобланади:

Ўзбекистон Республикаси томонидан:

Ўзбекистон автомобиль ва дарё транспорти агентлиги, Ўзбекистон Республикаси Ички ишлар вазирлиги, Давлат божхона қўмитаси ва Автомобиль йўллари давлат қўмитаси.

Қозоғистон Республикаси томонидан:

Қозоғистон Республикаси Инвестициялар ва ривожланиш бўйича вазирлиги.

Томонлар давлатлари ваколатли органларининг расмий номланишларида ўзгаришлар бўлса, Томонлар зудлик билан бир-бирларини дипломатик каналлар орқали хабардор қиладилар.».

Мазкур Баённома унинг кучга кириши учун зарур бўлган давлат ички процедураларини Томонлар бажарганликлари тўғрисида охирги ёзма хабарнома олинган санадан бошлаб кучга киради.

Мазкур Баённома Битимнинг амал қилиш муддати тугаган санадан ўз кучини йўқотади.

Остона шаҳрида 2017 йил 23 мартда икки нусхада, ҳар бири ўзбек, қозоқ ва рус тилларида тузилди, бунда барча матнлар тенг аутентикдир. Матнларда тафовут мавжуд бўлган тақдирда, Томонлар рус тилидаги матнга мурожаат қиладилар.