Ўзбекистон Республикасининг Божхона кодексига мувофиқ Ўзбекистон Республикаси Давлат божхона қўмитаси қарор қилади:

1. Ўзбекистон Республикаси божхона ҳудудида автомобиль ва темир йўл транспорт воситаларида божхона назорати остидаги товарлар ташилганда юк бўлимларига божхона пломбаларини қўллаш қоидалари иловага мувофиқ тасдиқлансин.

2. Мазкур қарор расмий эълон қилинган кундан эътиборан уч ой ўтгач кучга киради.

Мазкур Қоидалар Ўзбекистон Республикасининг Божхона кодексига мувофиқ божхона ҳудудига божхона назорати остида кираётган, ундан чиқаётган ҳамда транзит тартибида ўтаётган авто ва темир йўл транспортининг (бундан буён матнда транспорт воситаси деб юритилади) товарлар ортилган юк бўлимларига божхона органлари томонидан божхона пломбаларини қўллаш тартибини белгилайди.

1. Мазкур Қоидаларда қуйидаги асосий тушунчалар қўлланилади:

божхона пломбаси — Ўзбекистон Республикасининг Божхона кодексига мувофиқ:

Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси (бундан буён матнда Божхона қўмитаси деб юритилади) томонидан тасдиқланган шакл, ўлчам ва кўринишдаги, белгиланган серия ва тартиб рақамли, товар ва транспорт воситаларини идентификациялашда бир марта фойдаланиладиган, шунингдек транспорт воситаларини бошқариш ва назорат қилишнинг онлайн механизмини назарда тутадиган навигацион божхона идентификациялаш воситаси;

товар жўнатувчилар ва ташувчилар томонидан, шунингдек чет давлатларнинг божхона органлари томонидан Ўзбекистон Республикасининг халқаро шартномаларига мувофиқ қўйилган пломбалар;

жўнатувчи божхона пости — божхона органи фаолият кўрсатиш зонасида товарларни божхона назорати остида ташиш бошланадиган божхона пости;

манзил божхона пости — божхона органи фаолият кўрсатиш зонасида товарларни божхона назорати остида ташиш тугалланадиган божхона пости.

2. Божхона кодексининг 197-моддасига мувофиқ божхона пломбаси божхона органлари томонидан ўзгартирилиши, олиб ташланиши ёки йўқ қилиниши мумкин, бундан товарларнинг ва транспорт воситаларининг йўқ қилиниши, қайта тиклаб бўлмайдиган тарзда йўқотилиши ёки жиддий тарзда бузилиши ҳақиқий хавфи бўлган ҳоллар мустасно. Божхона органларига божхона идентификациялаш воситалари ўзгартирилганлиги, олиб ташланганлиги ёки йўқ қилинганлиги тўғрисида дарҳол хабар берилади ва ҳақиқий хавф мавжудлигининг далиллари тақдим этилади.

3. Божхона назорати остида товарлар ташилаётган барча транспорт воситаларининг юк бўлимларига божхона пломбалари қўйилиши лозим, бундан мазкур Қоидаларнинг 4-бандида келтирилган ҳоллар мустасно.

4. Қуйидаги ҳолларда божхона назорати остидаги товарлар ортилган транспорт воситаларининг юк бўлимларига божхона органлари томонидан божхона пломбалари қўйилмайди:

бир транспорт воситасида контейнерлар эшиклари бир-бирига қараб жойлаштирилганлиги натижасида пломба қўйишнинг имкони бўлмаса;

товарлар усти очиқ транспорт воситасига юкланса;

темир йўл станцияларида юқори кучланишли электр симлари ўтган жойлардаги вагон ва контейнерларига божхона пломбаларини қўйиш ходимнинг ҳаёти ва саломатлигига жиддий хавф солса;

«экспорт», «реэкспорт», «вақтинча олиб чиқиш» ва «божхона ҳудудидан ташқарида қайта ишлаш» божхона режимларида божхона юк декларацияси «яшил» ва «сариқ» йўлаклар орқали расмийлаштирилган ҳолларда, бундан мазкур Қоидаларнинг 5-банди иккинчи хатбошисида кўрсатилган ҳолатлар мустасно;

чегара божхона постлари ҳудудларига туташ жойларда жойлашган божхона терминалларига юбориладиган автотранспорт воситаларига;

транспорт воситасининг юк бўлимига божхона пломбалари қўйилган бўлса;

божхона пломбалари қўйишнинг имкони бўлмаган бошқа асосли ҳолларда.

4¹. Товар жўнатувчилар ва ташувчилар томонидан, шунингдек чет давлатларнинг божхона органлари томонидан Ўзбекистон Республикасининг халқаро шартномаларига мувофиқ қўйилган пломбалар, муҳрлар ёки бошқа божхона идентификациялаш воситалари божхона идентификациялаш воситалари ҳам тан олинади.

5. Ўзбекистон Республикаси божхона ҳудудига олиб кирилаётган, божхона ҳудудидан олиб чиқилаётган ва транзит тартибида ҳаракатланаётган товарлар ортилган транспорт воситаларининг юк бўлимларига божхона пломбалари жўнатувчи божхона постларида божхона назорати ва расмийлаштируви ўтказилганидан сўнг қўйилади, бундан мазкур Қоидаларнинг 4-бандида келтирилган ҳоллар мустасно.

«Экспорт», «реэкспорт», «вақтинча олиб чиқиш» ва «божхона ҳудудидан ташқарида қайта ишлаш» божхона режимлари асосида божхона юк декларацияси «яшил» ва «сариқ» йўлаклар орқали божхона расмийлаштирувидан ўтказилиб, товарлар Юкларни халқаро йўлларда ташиш дафтарчасини расмийлаштирилган ҳолда олиб чиқилаётганда ёки юк жўнатувчилар ва (ёки) ташувчилар томонидан талаб этилганда божхона пломбалари божхона органи томонидан транспорт воситаларининг юк бўлимларига чегара божхона постларида ўрнатилади.

6. Товарлар ортилган транспорт воситаларининг юк бўлимларига божхона пломбалари қўйиш транспорт воситаларидан товар ёки буюмларни тушириш, шунингдек транспорт воситаларига бошқа товар ва буюмларни ортиш имкониятини истисно этиши лозим.

7. Божхона пломбаси тўғрисидаги маълумот товар ва транспорт воситаларига расмийлаштирилган товарни етказиб беришнинг назорат ҳужжатида ва (ёки) божхона кўриги далолатномасида қайд этилади.

Юк жўнатувчилар ва (ёки) ташувчилар талабига кўра, божхона пломбалари тўғрисидаги маълумот транспорт ҳужжатларида кўрсатилади.

8. Жўнатувчи ва (ёки) манзил божхона постларида товарлар ортилган транспорт воситаларининг юк бўлимларига қўйилган божхона пломбаларининг мавжудлиги ва пломба қўйилган жиҳозлар (вагон/контейнер конструкцияси, тиркаманинг троси, тенти, том, пол қисмлари ва ҳ. к) (бундан буён матнда пломба қўйилган жиҳозлар деб юритилади) божхона пости ходими ёки божхона омборининг эгаси ёхуд унинг ваколатли шахси томонидан текширилади ҳамда транспорт ҳужжатларидаги маълумотлар билан солиштирилади

Манзил божхона постларида божхона пломбалари ҳамда пломба қўйилган жиҳозларга зарар етказилмаганлигига ходим ёки божхона омборининг эгаси ёхуд унинг ваколатли шахси томонидан ишонч ҳосил қилингандан сўнг белгиланган тартибда божхона расмийлаштируви амалга оширилади.

Божхона пломбалари ҳамда пломба қўйилган жиҳозларга зарар етказилганлиги аниқланганда тегишли тартибда божхона қоидаларининг бузилиши юзасидан иш материаллари юритилиб, товарлар божхона кўригидан ўтказилади.

9. Транспорт воситаларига ортилган товарлар Ўзбекистон Республикасининг икки ва ундан ортиқ ташқи иқтисодий фаолият (бундан буён матнда ТИФ деб юритилади) қатнашчиларига олиб келинаётган тақдирда жўнатувчи божхона пости томонидан пломбаланган транспорт воситаси энг яқин ҳудуддаги ТИФ қатнашчиси жойлашган жойдаги манзил божхона постига йўналтирилади.

Биринчи манзил божхона постида товарлар ортилган транспорт воситаси билан мазкур Қоидаларнинг 8-бандига мувофиқ тегишли ҳаракатлар амалга оширилгандан сўнг ушбу божхона пости томонидан кейинги энг яқин ҳудуддаги ТИФ қатнашчиси жойлашган жойдаги манзил божхона постига янги божхона пломбалари қўйилган ҳолда йўналтирилади, бундан мазкур Қоидаларнинг 4-бандида келтирилган ҳоллар мустасно. Қўйилган янги божхона пломбаси бўйича тегишли маълумотлар Божхона қўмитасининг ягона автоматлаштирилган ахборот тизимига киритилади.

10. Божхона кодексининг 224-моддасига мувофиқ, авария ёки енгиб бўлмас куч таъсири ёхуд товарларни тайин қилинган жойга ташишга тўсқинлик қиладиган бошқа вазиятлар оқибатида ташувчи:

товарнинг, транспорт воситасининг бутлигини сақлаш ва улардан фойдаланилишига йўл қўймаслик учун зарур чора-тадбирларни кўриши;

энг яқин божхона органига тегишли вазиятлар, товарнинг ва транспорт воситасининг турган жойи тўғрисида дарҳол хабар бериши;

товарларни энг яқин божхона органига ёки божхона органи кўрсатган бошқа жойга олиб бориши ёхуд, агар унинг транспорт воситаси бузилган бўлса, олиб борилишини таъминлаши шарт.

Божхона органи божхона назоратини таъминлаш учун қўлланиладиган чора-тадбирларни содир бўлган ҳодисанинг хусусиятига, товар сифатининг йўқотилиш даражаси ва товар ташилишини амалга ошираётган транспорт воситасининг техник ҳолатига боғлиқ равишда белгилайди.

Бунда, божхона органи томонидан транспорт воситасининг юк бўлимига янгидан божхона пломбалари қўйилади ва бу тўғрисида транспорт ҳужжатлари ҳамда Божхона қўмитасининг ягона автоматлаштирилган ахборот тизимига маълумотлар киритилади.

11. Товарларни бир (божхона) омбордан бошқа (божхона) омборга олиб ўтиш жараёнида божхона постлари томонидан божхона пломбаларини қўйиш ҳамда текшириш мазкур Қоидаларнинг 2-бобида қайд этилган тартибда амалга оширилади.

12. Транспорт воситаларининг товарлар ортилган бўлимларидан ечиб олинган божхона пломбаларидан такроран фойдаланилишига йўл қўйилмайди, бундан навигацион божхона идентификациялаш воситалари мустасно.

13. Мазкур Қоидаларда кўрсатилган талабларнинг бузилишида айбдор бўлган шахслар қонунчилик ҳужжатларида белгиланган тартибда жавобгарликка тортилади.