Ўзбекистон Республикаси Хукумати ва Россия Федерацияси Ҳукумати, кейинги ўринларда «Томонлар» деб аталувчилар,

Томонлар давлатлари ҳамкорлигини янада ривожлантириш мақсадида миграция соҳасида шерикчилик ҳамкорлиги орқали муносабатларни чуқурлаштириш истагида,

Ўзбекистон Республикаси Ҳукумати билан Россия Федерацияси Ҳукумати ўртасида Ўзбекистон Республикасининг Россия Федерациясидаги меҳнаткаш-мигрантлари-фуқароларининг ва Россия Федерациясининг Ўзбекистон Республикасидаги меҳнаткаш-мигрантлари-фуқароларининг меҳнат фаолияти ва ҳуқуқларини ҳимоя қилиш тўғрисида 2007 йил 4 июлда имзоланган Битимни ҳамда Ўзбекистон Республикаси Ҳукумати билан Россия Федерацияси Ҳукумати ўртасидаги ноқонуний миграцияга қарши курашиш тўғрисида 2007 йил 4 июлда имзоланган Битимни эътиборга олиб,

қуйидагилар тўғрисида келишиб олдилар:

Томонлар иккала давлат ҳудудларида миграция соҳасида ваколатли органларнинг ваколатхоналарини (кейинги ўринларда — ваколатхоналар) таъсис этадилар:

Ўзбекистон томонидан — Ўзбекистон Республикаси Меҳнат вазирлиги ва Ўзбекистон Республикаси Ички ишлар вазирлиги;

Россия томонидан — Россия Федерацияси Ички ишлар вазирлиги.

Ваколатхоналарни очиш муддатларини юборувчи Томон мустақил белгилайди.

Ваколатхоналар ўз фаолиятларини қабул қилувчи давлатдаги ўз давлатларининг дипломатик ваколатхоналари бошлиқлари умумий раҳбарлигида амалга оширадилар.

Ваколатхоналарнинг штат бирликлари Томонлар келишувига мувофиқ белгиланади.

Ваколатхоналарнинг ҳодимлари, маъмурий-техник персонали ва уларнинг оила аъзолари қабул қилувчи Томон давлати Ташқи ишлар вазирлигида қабул қилувчи Томон давлати қонун ҳужжатларига мувофиқ ўз давлатининг дипломатик ваколатхонаси ҳодимлари тегишли тоифалари сифатида аккредитация қилинади.

Ваколатхоналарнинг хизмат ва яшаш жойлари, мол-мулки, шунингдек архивлари, ҳужжатлари ва ёзишмалари халқаро ҳуқуқда дипломатик ваколатхоналар жойлари, мол-мулки, архивлари, ҳужжатлари, ёзишмалари ва дипломатик персонал хусусий резиденциялари учун белгиланган имтиёз ва иммунитетлардан фойдаланади.

Ваколатхоналар қабул қилувчи давлат ҳудудида ўз ҳатти-харакатлари билан фаолиятларини амалга ошириш учун зарур бўлган мулкий ва шахсий номулкий ҳуқуқ ва мажбуриятларга эга бўлишлари ва уларни амалга оширишлари мумкин.

Ваколатхоналар қуйидаги асосий функцияларни бажарадилар:

миграция соҳасидаги ўз ваколатли органларининг қабул қилувчи давлат миграция ва бошқа ваколатли органлари билан ҳамкорлигини таъминлайдилар;

қабул қилувчи давлат билан миграция соҳасида тузиладиган халқаро шартномаларни ишлаб чиқиш, келишиш ва амалга оширишда ўз ваколати доирасида иштирок этадилар;

қабул қилувчи давлатда ўз мамлакатининг фуқаролари меҳнат миграцияси тўғрисида, шунингдек қабул қилувчи давлатнинг миграция соҳасидаги қонунчилиги тўғрисида ахборотни тўплаш, ўрганиш ва таҳлил қилишни амалга оширадилар;

ўз ваколатига оид масалалар юзасидан фуқаролар қабулини амалга оширадилар;

зарур ҳолларда ўз ваколатларига алоқадор масалалар бўйича ўз давлатлари фуқароларининг ҳуқуқлари, эркинликлари ва қонуний манфаатларини ҳимоя қилишни амалга оширади.

Мазкур Битим қоидаларини талқин қилиш ва қўллаш юзасидан Томонлар ўртасидаги низоли масалалар музокаралар ва маслаҳатлашувлар орқали ҳал этилади.

Томонларнинг ўзаро келишувига кўра мазкур Битимга ўзгартиш ва қўшимчалар киритилиши мумкин.

Мазкур Битим Томонлар унинг кучга кириши учун зарур бўлган давлат ички процедураларини бажарганликлари тўғрисидаги сўнгги ёзма хабарнома дипломатик каналлар орқали олинган кундан бошлаб кучга киради.

Мазкур Битим номуайян муддатга тузилади.

Мазкур Битимнинг амал қилиши Томонлардан бири бошқа Томоннинг унинг амал қилишини тугатиш нияти тўғрисидаги тегишли ёзма хабарномасини олган санадан бошлаб олти ойдан сўнг тугатилади.

Москва шаҳрида 2017 йил 5 апрелда ҳар бири ўзбек ва рус тилларида бўлган икки асл нусхада тузилди, бунда барча матнлар бир хил кучга эга.