Вилоят ҳудудида ҳайвонлар касалликларини тарқалишини олдини олиш, аҳоли истеъмоли учун чорвачилик маҳсулотлари билан таъминлашда унинг хавфсизлигини таъминлаш, шунингдек юзага келиши мумкин бўлган фавқулодда ҳолатларни ўз вақтида олдини олиш ҳамда масъул шахсларнинг жавобгарлигини ошириш мақсадида, Ўзбекистон Республикасининг «Ветеринария тўғрисида»ги Қонуни (Ўзбекистон Республикаси қонун ҳужжатлари тўплами, 2016 й., 1-сон, 1-модда), Ўзбекистон Республикаси «Маъмурий жавобгарлик тўғрисида»ги кодекснинг 6-моддаси (Ўзбекистон Республикаси Олий Мажлисининг Ахборотномаси, 1995 й., 9-сон, 193-модда) ҳамда Ўзбекистон Республикаси «Маҳаллий давлат ҳокимияти тўғрисида»ги Қонуни (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда)нинг 6-моддасига асосан қарор қиламан:

1. Вилоят ҳудудида ҳайвонларни карантинга қўйиш қоидалари иловага мувофиқ тасдиқлансин.

2. Туман ва шаҳарлар ҳокимликлари, вилоят давлат ветеринария (Валиев), мулкчилик шаклидан қатъи назар, ҳайвонларни парвариш қилаётган аҳоли, ёрдамчи, деҳқон ва чорвачиликка ихтисослаштирилган фермер хўжаликлари ҳамда корхона, ташкилотлар раҳбарларига:

вилоят ҳудудига киритилган барча турдаги ҳайвонлар, ҳудудий давлат ветеринария хизмати назорати остида керакли ташхис текширувлари ўтказилишини;

аниқ ҳудуд учун тузилган эпизоотик касалликларга қарши тадбирлар режасига биноан, касалликларни олдини олиш бўйича иммунитетни кўтарувчи барча чоралар кўрилишини;

карантин вақтида ҳайвонларнинг ҳар бир бошини тана ҳароратини ўлчаш билан бирга, клиник кўрикдан ўтказилиши ҳамда ушбу муддатда белгиланган ветеринария-санитария тадбирлари ўтказилгандан кейингина сотилиши ёки тарқатилиши йўлга қўйилишини;

зоогигиена талабларига мувофиқ ҳайвонларнинг тегишли тартибда сақланиши ва озиқлантирилишини, шунингдек уларни сақлаш бўйича мавжуд йўриқнома, қўлланма ва кўрсатмалар асосида мажбурий даволаш, касалликнинг олдини олиш тадбирлари ўз вақтида ўтказилишини;

давлат ветеринария хизматининг талабига биноан, ҳайвонларни текшириш учун кўрсатиш, диагностик текшириш, даволаш ва профилактик тадбирларни ўтказиш ҳамда уларни рўйхатга олинишини таъминлаб, янги ҳайвон сотиб олинганлиги тўғрисида, ҳайвонларнинг тўсатдан ўлиши, касалланиши ёки уларда ғайритабиий ҳолатлар пайдо бўлган ҳолларда дарҳол хабар беришни таъминласинлар.

3. Вилоят ички ишлар бошқармаси (Султанов), вилоят давлат ветеринария бошқармаси (Валиев), Бозорлар ва савдо комплекслари фаолиятини назорат қилиш Бош бошқармаси Фарғона вилоят бўлими (Абдуҳолиқов) вилоятдаги ҳайвон бозорларига сотишга олиб келинган ҳайвонларни соғлиғи ва юқумли касалликларга эмланганлиги тўғрисидаги ветеринария врачининг белгиланган тартибда расмийлаштирилган маълумотномаси асосида сотишга рухсат этилиши устидан назоратни кучайтирсинлар.

4. Вилоят давлат ветеринария бошқармаси (Валиев), вилоят давлат Санитария ва эпидемиология назорати маркази (Якубов) қишлоқ хўжалик ҳайвонларини уй шароитида боқилишида аҳолини тозаликка ва ветеринария-санитария қоидаларига риоя қилиш бўйича маданиятини ошириш юзасидан тарғибот ва ташвиқот ишларини кенг кўламда олиб борсинлар.

5. Вилоят молия бошқармаси (Ортиқов), вилоят давлат ветеринария бошқармаси (Валиев) билан биргаликда жойлардаги ветеринария бўлимлари ва лабораторияларининг моддий-техника базасини замонавий асбоб-ускуналар, автотранспорт воситалари билан босқичма-босқич жиҳозлаб, мустаҳкамлаб бориш бўйича тегишли чораларни кўрилсин.

6. Вилоят ҳокимлигининг Ўрта-махсус, касб-ҳунар таълими ҳудудий бошқармаси (Холдаров), вилоят давлат ветеринария бошқармаси (Валиев) билан биргаликда ветеринария соҳаси бўйича кадрлар билан таъминланганлик масаласини ўрганиб чиқиб, ўрганиш натижаси асосида кадрларни салоҳиятига кўра иш билан таъминлаш ва уларнинг касбий маҳоратини ошириш бўйича ўқув амалий семинарларини ўтказилсин.

7. Ветеринария тўғрисидаги қонун ҳужжатлари бузилишида айбдор бўлган шахслар Ўзбекистон Республикасининг қонун ҳужжатларига мувофиқ жавобгар бўлиши кўрсатиб ўтилсин.

8. Мазкур қарор «Фарғона ҳақиқати» ва «Ферганская правда» газеталарида расмий эълон қилинсин ҳамда вилоят ҳокимлигининг расмий веб-сайтига жойлаштирилсин.

9. Белгилансинки, ушбу қарор расмий эълон қилинган кундан эътиборан кучга киради.

10. Ушбу қарорнинг бажарилиши юзасидан назорат вилоят ҳокимининг ўринбосари С. Қўчқоров зиммасига юклатилсин.

Мазкур Қоидалар Ўзбекистон Республикасининг «Ветеринария тўғрисида»ги Қонуни, Маъмурий жавобгарлик тўғрисидаги кодекснинг 6-моддасига асосан вилоятда ҳайвонларни карантинга қўйиш ва бошқа ветеринария-санитария қоидаларига риоя қилинишини белгилайди.

1. Шаҳар, туманларни, вилоятни ҳайвонларнинг юқумли касалликлари тарқалганлиги жиҳатидан ёмон аҳволда деб эълон қилиш ҳамда уларда карантин ёки бошқа чеклашлар ўрнатиш тегишли бош Давлат инспекторларининг тақдимномасига биноан халқ депутатлари вилоят Кенгаши ёки вилоят ҳокимининг қарори билан амалга оширилади.

2. Ҳайвонларни юқумли касалликлар билан оғриши батамом тўхтаганидан кейин карантин ёки чеклашлар ўрнатилган ҳудудда зарур ветеринария-санитария тадбирлари амалга оширилгандан (касалликларга қарши кураш қўлланмаларида кўрсатилган муддат ўтганидан) сўнг тегишли бош Давлат ветеринария инспекторларининг тақдимномасига биноан карантин ёки чеклашлар ўрнатган халқ депутатлари вилоят Кенгаши ёки ҳокимнинг қарори билан карантин ёки чеклашлар бекор қилинади.

3. Ҳайвонларнинг юқумли касалликлари тарқалгани аниқланган ҳолларда туман (шаҳар) давлат ветеринария инспекторининг тақдимномасига биноан шаҳар, туман ҳокимликларининг қарорлари билан айрим подалар, отарлар, уюрлар, қўралар, фермалар, хўжаликлар, корхоналар, темир йўл бекатлари, аэропортлар, қишлоқ ва қўрғонларнинг ҳудудлари ҳайвонларнинг юқумли касалликлари тарқалганлиги жиҳатидан ёмон аҳволда деб эълон қилинади ҳамда уларда карантин ёки зарур чеклашлар ўрнатилади.

4. Карантин ёки чеклашлар Ўзбекистон Республикаси Қишлоқ ва сув хўжалиги вазирлиги ҳузуридаги Давлат ветеринария бош бошқармаси томонидан тасдиқланган ҳайвонларнинг юқумли касалликлари рўйхати асосида амалга оширилади.

5. Юридик ва жисмоний шахслар:

карантин ёки чеклов эълон қилиш тўғрисидаги қарорлар билан белгиланган тартиб ва қоидаларга риоя этишлари ҳамда ўзларига юклатилган соғломлаштириш тадбирларини тўлиқ амалга оширишлари;

истеъмолчилар соғлиғи учун хавфли бўлган моддалар ёки юқумли касаллик қўзғатувчи микроблар билан ифлосланган ёхуд зарарланган чорвачилик маҳсулотлари ишлаб чиқарилиши ва сотилишини истисно этувчи ҳайвонлар гигиенаси нормаларини бажаришлари ва ветеринария-санитария қоидаларига риоя этишлари;

ҳайвон сотиб олинганда ёки олиб келинганда 1 кун муддатда ўз ҳудудидаги ветеринария хизматида рўйхатга қўйишлари;

ҳайвонларнинг тўсатдан ўлиши ёки ғайриодатий хатти-ҳаракати тўғрисида муайян ҳудудга хизмат кўрсатувчи тегишли ветеринария хизматига зудлик билан хабар қилишлари;

ветеринария хизматининг ҳайвонларни юқумли касалликлардан муҳофаза этиш юзасидан берган кўрсатмаларини бажаришлари ҳамда карантинга доир тегишли тадбирлар ва бошқа ветеринария тадбирлари ўтказилишини таъминлашлари, шунингдек даволаш-профилактика ишловларини тўлиқ ҳажмда ўтказишлари;

чорвачилик фермаларини, ҳайвонлар ҳамда чорвачилик маҳсулотлари сақланадиган бинолар ва бошқа иншоотларни лозим бўлган ветеринария-санитария ҳолатида сақлашлари, уларда дезинфекциялаш, дезинсекциялаш ва дератизациялаш ишларини ўз вақтида ўтказишлари, шунингдек ўлган ҳайвонлар жасадини йиғиштириб олишлари ва йўқ қилиб ташлашлари шарт.

6. Ит эгалари бўлган фуқаролар ва ташкилотлар (миллий хавфсизлик хизмати, мудофаа ва ички ишлар вазирликларининг муассасалари бундан мустасно):

ҳар йилнинг январь — май ойларида ўз қарамоқларидаги итларни ўзлари турадиган жойдаги (ёки ташкилот жойлашган ерда) ветеринария шифохоналарига олиб келиб, қайта рўйхатдан, шунингдек ветеринария профилактикаси кўригидан ўтказишлари шарт. Ушбу хизматлар бепул бажарилади.

зотидан қатъи назар, 3 ойлиқдан бошлаб итлар вакцинация қилиниши керак.

янги сотиб олинган итлар, агар улар вакцинация қилинган муддат номаълум бўлса, сотиб олингандан кейин бир ҳафта муддатда вакцинация қилиниши ва рўйхатга олиниши керак.

7. Итлар ва мушукларни сотиб олиш, сотиш, ушбу ҳайвонларнинг рўйхатдан ўтказилганлиги тўғрисидаги гувоҳнома ва уларнинг саломатлиги тўғрисидаги ветеринария ҳужжати мавжуд бўлган, карантин ҳолати юз бермаган вақтдагина рухсат этилади. Итлар ва мушукларни сотишга фақат махсус ажратилган жойлардагина рухсат берилади.

8. Вилоят Давлат ветеринария бошқармаси ва ҳудудий бўлимлари шаҳар, туманлар бўйича итлар рўйхатини олади. Итларнинг эгаларига, уларни сақлаш қоидаларини тушунтиради ва рўйхатдан ўтказилганлиги тўғрисидаги гувоҳномани тақдим этади.

9. Итлар ва мушукларнинг эгалари қуйидагиларни бажаришга мажбурдир:

итларни алоҳида ажратилган ҳудудда маҳкам боғланган ва чиқиб кетмайдиган ҳолатда сақлаш;

итларни калта занжирга боғланган, тумшуқ банди кийгизилган ҳолда фақатгина катта ёшдаги шахслар ҳовлига ёки кўчага олиб чиқишлари мумкин. Махсус ажратиб берган жойлардагина итлар сайр қилишга рухсат этилади.

итларни савдо, умумий овқатланиш объектлари, мактаблар, хиёбонлар, пляжлар, стадионлар, спорт ва болалар майдончалари, бозорлар, лифтларга олиб кирмаслик;

хонадонлар, зинапоя майдончалари, кўчалар, ҳовлилар ва умумий фойдаланиладиган бошқа жойларни итлар ва мушукларнинг ифлос қилишига йўл қўймаслик (бу ҳайвонларнинг эгалари ҳар қандай ҳолларда, уларнинг чиқиндиларини дарҳол йўқотишлари лозим);

итлар ва мушуклар касал бўлганда ёхуд нобуд бўлганда (уларнинг жасадларини) шаҳар ва туман ветеринария бўлимига олиб бориш (ўлган ит ва мушукларни кўмиш ёки чиқариб ташлаш ман этилади);

итлар ва мушукларни қаровсиз қолдирмаслик, улар кўпайиб кетганда шаҳар ва туман ветеринария бўлимларига хабар бериш;

шаҳар ва туман ветеринария бўлимининг талаби билан итлар ва мушукларни кўрсатиш, диагностика текширувига, эмлашга олиб бориш.

10. Ташкилот, корхона ва муассасаларга, туман ветеринария хизматига албатта хабардор қилинган ҳолда қўриқлаш итларини сақлашга рухсат берилади. Бундай ҳолда итлар маҳкам боғланган бўлиши, болалар ва бу жойларга келувчиларни яқин йўлатмаслик лозим. Ана шу муассасаларнинг ходимларига ўзларига тегишли бўлган итларни, шу муассасанинг ҳудудида сақлашлари тақиқланади.

11. Фақат шаҳар ва туман ветеринария хизматининг рухсати билангина ҳайвонларни виварий, питомник ва ҳайвонлар бурчакларида сақлашга ижозат берилади.

12. Итлар ва мушукларни умумий яшайдиган ҳовлиларда, умумий фойдаланадиган жойлар ва очиқ майдонларда (ошхона, коридор, айвон, балкон, лоджия, зинапоя, чердак ва ертўлалар)да сақлаш ман этилади.

13. Итлар қайси зотга мансуб бўлишидан, кимга тегишли бўлиши ва қандай мақсадда боқилаётганлигидан қатъи назар, бўйинбоғи ва тумшуқ банди бўлса ҳам, агар улар кўчалар, майдонлар, хиёбонлар, ҳовли ва бошқа жамоат жойларида эгаларисиз пайдо бўлиб қолса, шунингдек боқилаётган хонадондан ташқарида юрган мушуклар дайди саналади ва ушлаб олиб кетилади.

Белгиланган муҳлатда рўйхатдан ўтказилмаган ҳамда қутуриш касаллигига қарши эмланмаган итлар ветеринария назорати ходимлари томонидан сўзсиз олиб кетилади ва йўқ қилиб юборилади.

14. Дайди итлар ва мушукларни тутиш ишларини шаҳар ва туман Ободонлаштириш бошқармалари бажаради.

15. Одамлар ёки ҳайвонларни тишлаб олган ит ва бошқа ҳайвонлар ўз эгалари томонидан зудлик билан кўрикдан ўтказилиши учун туман ветеринария шифохонасига олиб борилиши шарт.

Ветеринария кузатуви (10 кун давом этади) тугагач, ветеринария кузатувлари натижалари ҳамда тишлаб олиш сабабларини аниқланишига кўра ит ва бошқа ҳайвонлар эгаларига қайтариб берилади.

Эгалари белгиланган қоидага риоя этмаганлиги сабабли кишиларни тишлаб олган, ўз вақтида рўйхатдан ўтказилмаган итлар ва мушуклар шаҳар ва туман ветеринария бўлимлари томонидан тутиб олинади.

16. Чорва моллари, уй ҳайвонлари ва паррандаларнинг эгалари қуйидаги шартларга риоя қилишлари шарт:

а). Ушбу бўлимнинг 1, 2, 4-бандларига риоя қилиш;

б) Чорва моллари, паррандалар, уй ҳайвонларини алоҳида жиҳозланган биноларда сақлаш, бу бинолар даволаш-профилактика, ўқув, маданий- оқартув муассасалари, бозорлар, озиқ-овқат дўконлари, умумий овқатланиш биноларидан камида 100 метр нарида, турар жойлардан эса 15 — 20 метр узоқликда бўлиши, паррандалар боқиладиган жойларни ердан 5 метр баландликда сим тўр билан ўраш;

г) Ҳайвонлар ва паррандаларнинг бинолари, шунингдек уларнинг атрофини озода сақлаш;

д) Молхоналарни пашшага қарши ишловдан ўтказиш мақсадида ҳар йили шаҳар ва туман дезинфекция станциялари ва бошқа махсус корхоналар билан гўнг ва бошқа чиқиндиларни олиб чиқиб кетиш юзасидан шартномалар тузиш;

е) Чорва молларини сўйишни фақат ўрнатилган тартибда, қушхоналарда, сўйиш майдончаларида амалга ошириш.

17. Қуйидагилар ман этилади:

а) Чорва моллари ва асалариларни ташкилот, идора ва муассасалар ҳудудида сақлаш;

б) Кўп қаватли уйлар ва жамоа бўлиб яшаладиган ҳовлида асалари боқиш;

в) Ёввойи, йиртқич ҳайвонларни боқиш.

18. Барча идораларга қарашли бинолари, маҳалла фуқаролар йиғини раислари, шахсий уй эгалари қуйидагиларга амал қилишлари шарт:

а) Рўйхатга олиш ва итларни қайта рўйхатдан ўтказишдан бош тортган шахслар, шунингдек, хонаки ва уй ҳайвонларини сақлаш қоидаларини бузган кишилар устидан далолатнома тузиш. Тузилган далолатномаларни шаҳар ва туман ички ишлар бўлимларига тақдим этиш ва бу ҳақида ветеринария бўлимига маълум қилиш;

хонадонлар ҳудудида итларни сайр эттириб юриладиган махсус жой ажратиш;

хонадонлар ҳудудида дайди ит ва мушукларнинг пайдо бўлишига йўл қўймаслик;

б) Ертўлалар, чердаклар ва бошқа ёрдамчи хоналарга ҳайвонлар кирмаслиги учун уларни ёпиб қўйиш ёхуд тўр билан тўсиш;

в) ҚФЙ ва МФЙлар ўз ҳудудида хонадонларда истиқомат қилувчи барча фуқароларни уй ҳайвонлари ва паррандаларни сақлаш қоидалари билан таништириши.

19. Кўргазма ва мусобақалар ташкил этиш, итларни жамоа бўлиб ўргатишга фақатгина шаҳар ва туман ветеринария бўлимларининг рухсати билангина амалга оширилишига йўл қўйилади.

20. Ушбу Қоидалар бузилишида айбдор бўлган шахслар Ўзбекистон Республикасининг Маъмурий жавобгарлик тўғрисидаги кодексида назарда тутилган жавобгарликка тортилади.