Ўзбекистон Республикаси Ҳукумати ва Туркманистон Ҳукумати, бундан кейинги ўринларда «Томонлар» деб аталувчилар,

божхона қонунчилигининг бузилиши Томонлар давлатларининг иқтисодий, ижтимоий ва маданий манфаатларига зиён етказади деб ҳисоблаб,

божхона қонунчилигига риоя этиш ва бошқарув масалаларида халқаро ҳамкорликка бўлган эҳтиёжни тан олиб,

товарларнинг импорти ёки экспортида ундириладиган божхона божи ва бошқа солиқларнинг аниқ ҳисобланишини, шунингдек товарларнинг қиймати ва келиб чиқишини тўғри аниқлашни таъминлаш муҳимлигини англаб,

божхона қонунчилиги бузилишининг олдини олишга қаратилган саъй-ҳаракатлар Томонлар давлатлари божхона органларининг яқиндан ҳамкорлиги орқали янада самаралироқ бўлишига ишонч ҳосил қилиб,

Божхона ҳамкорлиги кенгашининг ўзаро маъмурий ҳамкорлик тўғрисида 1953 йил 5 декабрдаги Тавсияси, Гиёҳвандлик воситалари тўғрисида 1961 йил 30 мартдаги Ягона конвенция, Психотроп моддалар тўғрисида 1971 йил 21 февралдаги Конвенция, Бирлашган Миллатлар Ташкилотининг Гиёҳвандлик воситалари ва психотроп моддаларнинг ноқонуний муомаласига қарши курашиш тўғрисида 1988 йил 19 декабрдаги Конвенцияси қоидаларини инобатга олиб,

қуйидагилар тўғрисида келишиб олдилар:

Мазкур Битим мақсадлари учун қўлланиладиган атамалар қуйидагиларни англатади:

1. «Божхона қонунчилиги» — товарлар, йўловчиларнинг багаж ва қўл юклари, халқаро почта жўнатмалари, валюта ва бошқа бойликларни олиб кириш, олиб чиқиш ва транзит олиб ўтиш, божхона божи ҳамда бошқа солиқ ва йиғимларни ундириш тартибини ёки имтиёзлар, таъқиқлар, чекловлар, рухсатномалар, божхона чегараси орқали ҳаракатланаётган товарлар учун назорат ўрнатишни тартибга солувчи норматив-ҳуқуқий ҳужжатлар мажмуи;

2. «Божхона органлари»:

Ўзбекистон Республикаси учун — Давлат божхона қўмитаси,

Туркманистон учун — Давлат божхона хизмати;

3. «Сўраётган божхона органи» — мазкур Битимга мувофиқ ёрдам кўрсатиш тўғрисида сўровнома йўллайдиган ёки шундай кўмак оладиган божхона органи;

4. «Сўралаётган божхона органи» — мазкур Битимга мувофиқ ёрдам кўрсатиш тўғрисида сўровнома оладиган ёки шундай кўмак кўрсатадиган божхона органи;

5. «Божхона ҳуқуқбузарлиги» — божхона қонунчилигининг ҳар қандай бузилиши ёхуд бузишга ҳар қандай уриниш;

6. «Божхона тўловлари» — тегишли Томонлар давлатлари ҳудудларида божхона қонунчилигига мувофиқ ундириладиган божхона божи, солиқлар, божхона йиғимлари;

7. «Шахс» — ҳар қандай жисмоний ёки юридик шахс;

8. «Шахсларга оид маълумотлар» — аниқланган ёки аниқланаётган шахсга оид барча маълумот;

9. «Гиёҳвандлик воситаси» — Гиёҳвандлик воситалари тўғрисида 1961 йил 30 мартдаги Ягона Конвенциянинг I ва II Рўйхатларига кейинги ўзгартириш ва қўшимчалар билан киритилган ҳар қандай табиий ёки синтетик моддалар;

10. «Психотроп модда» — Психотроп моддалар тўғрисида 1971 йил 21 февралдаги Конвенциянинг I, II, III, IV Рўйхатларига кейинги ўзгартириш ва қўшимчалар билан киритилган ҳар қандай табиий ёки синтетик модда ёхуд ҳар қандай табиий материал;

11. «Прекурсорлар» — Гиёҳвандлик воситалари ва психотроп моддаларнинг ноқонуний муомаласига қарши кураш тўғрисидаги 1988 йил 19 декабрдаги БМТ Конвенцияси Иловасининг I, II жадвалларига киритилган ҳар қандай модда;

12. «Назорат қилинадиган етказиб бериш» — гиёҳвандлик воситалари, психотроп моддалар ва прекурсорларнинг ноқонуний муомаласига дахлдор шахсларни аниқлаш мақсадида ноқонуний ёки ноқонунийликда гумон қилинаётган товарлар гуруҳини, шунингдек гиёҳвандлик воситалари, психотроп моддалар ҳамда прекурсорларни Томонлар давлатларининг ваколатли органларини хабардор этган ҳолда ва уларнинг назорати остида Томонлар давлатларидан бирининг ҳудуди орқали ҳаракатланишига йўл қўйилишини назарда тутувчи усул.

Мазкур Битим асосида Томонлар божхона органлари орқали ўз ваколатлари доирасида маълумот алмашиш ва ўзаро ёрдам кўрсатиш йўли билан қуйидаги мақсадларда ҳамкорликни амалга оширадилар:

а) Томонлар давлатлари божхона чегаралари орқали товарларнинг ҳаракатланиши, транспорт воситаларининг транзити билан боғлиқ муносабатларни тартибга солиш тартибини такомиллаштириш;

б) Томонлар давлатларининг божхона қонунчилигига риоя этилишини таъминлаш;

в) божхона ҳуқуқбузарликларини олдини олиш, аниқлаш, бартараф этиш ва тергов қилиш;

г) Томонлар давлатлари ўртасида йўловчи ва юк ташишни енгиллаштириш ва тезлаштириш;

д) божхона ишининг турли йўналишлари бўйича тажриба ва тегишли маълумот билан алмашиш;

е) божхона қонунчилигини қўллашга оид ҳужжатлар тўғрисида билдиришнома юбориш.

2. Мазкур Битим доирасида кўрсатилаётган ёрдам сўралаётган Томон давлатининг қонунчилиги ҳамда Томонлар давлатлари иштирокчи бўлган халқаро шартномаларга мувофиқ амалга оширилади.

1. Сўраётган божхона органининг сўровномасига кўра сўралаётган божхона органи божхона қонунчилигига риоя этилишини таъминлашга кўмак бериши мумкин бўлган тегишли маълумотни, шу жумладан товарларни ташиш ва юклаш, бундай товарлар жойлашган жой ва улардан кўзланган мақсад, қиймати ва келиб чиқиши бўйича маълумот, шунингдек бундай қонунчиликнинг бузилишига олиб келган ёки олиб келиши мумкин бўлган содир этилган ёки режалаштирилаётган ҳаракатларга оид тегишли маълумотни тақдим этади.

2. Сўраётган божхона органининг сўровномасига биноан сўралаётган божхона органи Томонлардан бирининг давлати ҳудудидан олиб чиқилган товарлар бошқа Томон давлати ҳудудига тегишли тартибда олиб кирилганлиги тўғрисида маълумот тақдим этади.

3. Сўраётган божхона органининг сўровномасига кўра сўралаётган божхона органи қуйидагилар устидан назоратни таъминлаш бўйича зарурий чораларни кўради:

а) муайян жисмоний ёки юридик шахслар, башарти улар сўраётган Томон давлати ҳудудида божхона қонунчилигини бузаётган ёки бузганликда гумон қилинаётган бўлишса;

б) сўраётган Томон давлати ҳудудига ноқонуний импорт қилиш кўзланаётган деб гумон қилиш учун асослар мавжуд бўлган товарлар сақланаётган жойлар;

в) ҳаракатланиш сўраётган Томон давлати ҳудудида божхона қонунчилигининг жиддий бузилишига олиб келиши мумкинлиги тўғрисида сўраётган божхона органи томонидан хабар берилган товарлар;

г) сўраётган Томон давлати ҳудудида божхона ҳуқуқбузарлиги содир этишда фойдаланилган ёхуд фойдаланилиши мумкинлиги маълум бўлган ёки гумон қилинаётган транспорт воситалари.

1. Божхона органлари сўровномага кўра ёки ўз ташаббуси билан бир - бирларига Томонлар давлатларидан ҳар бирининг божхона қонунчилигини белгиланган тартибда қўллаш ва божхона ҳуқуқбузарликларининг олдини олиш, аниқлаш, бартараф этиш ва тергов қилишга оид маълумотни, шу жумладан божхона тўловларини тўғри ҳисоблаш ва ундиришга ёрдам бериши мумкин бўлган маълумотни тақдим этадилар.

2. Божхона органи ўз ташаббуси билан ёки сўровномага биноан бошқа божхона органига Томонлардан бирининг давлатида божхона ҳуқуқбузарлиги содир этилишига олиб келиши мумкин бўлган ҳаракатлар юзасидан ўзида мавжуд бўлган маълумотни тақдим этади.

3. Божхона органи ўзидаги мавжуд маълумотни бошқа божхона органи давлатининг иқтисодиёти, жамоат хавфсизлиги ёхуд бошқа муҳим манфаатларига сезиларли зиён етказиши мумкин бўлган жиддий божхона ҳуқуқбузарлигига алоқадор деб ҳисоблаган тақдирда, бундай маълумотни бошқа божхона органига ўз ташаббуси билан тақдим этади.

1. Божхона органлари гиёҳвандлик воситалари, психотроп моддалар ва прекурсорларнинг ноқонуний муомаласининг олдини олиш, бартараф этиш ва тергов қилиш бўйича ҳаракатларни фаоллаштириш мақсадида бир-бирларига сўровларсиз ва қисқа муддатда қуйидагилар тўғрисида маълумот тақдим қиладилар:

а) гиёҳвандлик воситалари, психотроп моддалар ва прекурсорларнинг ноқонуний муомаласи билан шуғулланаётганлиги маълум бўлган ёки бунда гумон қилинаётган шахслар;

б) гиёҳвандлик воситалари, психотроп моддалар ва прекурсорларнинг ноқонуний муомаласи учун фойдаланилаётганлиги маълум бўлган ёки бундай фойдаланишда гумон қилинаётган транспорт воситалари, шу жумладан контейнерлар ва почта жўнатмалари;

2. Божхона органлари гиёҳвандлик воситалари, психотроп моддалар ва прекурсорларнинг ноқонуний муомаласида қўлланилаётган усуллар, шунингдек уларни назорат қилишнинг янги услублари тўғрисида бир-бирларини олдиндан сўралинадиган сўровномасиз хабардор қиладилар.

3. Ушбу модданинг 1 - ва 2-бандларига мувофиқ божхона органларининг ҳар бири томонидан олинган маълумот, хабар ва ҳужжатлар тегишли Томоннинг бевосита гиёҳвандлик воситалари, психотроп моддалар ва прекурсорларнинг ноқонуний муомаласига қарши курашиш билан шуғулланувчи ҳуқуқни муҳофаза қилиш ва бошқа давлат органларига тақдим қилиниши мумкин.

4. Зарур ҳолларда Томонлар давлатларининг қонунчилигига мувофиқ ва ўзаро келишув асосида божхона органлари гиёҳвандлик воситалари, психотроп моддалар ва прекурсорларнинг ноқонуний муомаласига алоқадор шахсларни аниқлаш мақсадида назорат қилинадиган етказиб бериш усулидан фойдаланадилар.

Ҳар бир назорат қилинадиган етказиб беришга нисбатан божхона органлари ўртасидаги келишув инобатга олинган ҳолда уни ўтказиш бўйича алоҳида қарор қабул қилинади.

Божхона органлари ўз ташаббуси билан ёки сўровномага кўра бир - бирларига божхона ҳуқуқбузарлиги таркиби бўлган ёки бўлиши мумкин бўлган, хусусан қуйидагилар ҳаракатланишига нисбатан содир этилган ёхуд режалаштирилаётган ҳаракатлар тўғрисида маълумот тақдим этадилар:

а) қурол - яроғ, ўқ - дори, портловчи моддалар, портлатиш қурилмалари, радиоактив материаллар, шунингдек атроф муҳит ва жамият саломатлигига таҳдид қиладиган бошқа моддалар;

б) товарлар, башарти уларга нисбатан интеллектуал мулк ҳуқуқи бузилган бўлса;

в) Томонлар давлатларининг бири учун муҳим тарихий, маданий ёки археологик қийматга эга бўлган қадимий буюмлар ва санъат асарлари;

г) анча миқдорда божхона тўловлари ундириладиган товарлар;

д) нотариф чекловлар қўлланиладиган товарлар.

1. Мазкур Битим доирасида ёрдам кўрсатиш бошқа ҳолатлардан ташқари қуйидагилар бўйича маълумот алмашишни ҳам ўз ичига олади:

а) божхона ҳуқуқбузарликларининг олдини олишда фойдаланилиши мумкин бўлган ҳуқуқни муҳофаза қилишга доир ҳаракатлар;

б) божхона ҳуқуқбузарлигини содир этишда фойдаланиладиган янги усуллар;

в) янги ҳуқуқни муҳофаза қилиш усуллари ва техника воситаларини муваффақиятли қўллаш натижасида эришилган топилмалар ва кузатувлар;

г) йўловчи ва юкларни расмийлаштиришнинг янги технологиялари ва такомиллаштирилган услублари.

2. Божхона органлари бир - бирларига божхона иши соҳасида техник ёрдам кўрсатадилар, жумладан:

а) бошқа Томон божхона органларида фойдаланилаётган техника воситалари билан танишиш мақсадида ўзаро манфаатли бўлган ҳолларда божхона ходимлари билан алмашиш;

б) божхона органлари ходимларининг махсус кўникмаларини такомиллаштиришга кўмаклашиш ва ўқитиш;

в) божхона масалалари бўйича экспертлар билан алмашиш;

г) божхона масалаларига оид касбий, илмий ва техник маълумотлар билан алмашиш.

Сўраётган божхона органининг сўровномасига кўра сўралаётган божхона органи ўз давлати қонунчилигига мувофиқ қуйидаги мақсадларда зарурий чораларни кўради:

а) сўралаётган барча ҳужжатларни бериш;

б) мазкур Битим доирасида қабул қилинган қарорлар бўйича ўз давлати ҳудудида истиқомат қилувчи ёки жойлашган шахсни хабардор қилиш. Бундай ҳолатларда мазкур Битимнинг 9-моддаси 3-банди қўлланилади.

1. Мазкур Битим доирасида сўровномалар ёзма шаклда ва божхона органи раҳбарининг имзоси билан тасдиқланган ҳолда йўлланади. Сўровномага уни ижро этиш учун зарур бўлган ҳужжатлар илова қилинади. Алоҳида ҳолларда дарҳол ёзма шаклда тасдиқланадиган оғзаки сўровномалар ҳам қабул қилиниши мумкин.

2. Ушбу модданинг 1-бандида назарда тутилган сўровномалар қуйидаги маълумотларни ўз ичига олади:

а) сўровнома йўллаётган божхона органи ва сўровнома йўлланаётган божхона органининг номи;

в) мазкур Битимга ҳавола;

б) сўровнома ва сўралаётган ёрдамнинг мақсади, сабаби;

г) ўзига нисбатан сўровнома юборилган шахснинг исми ва манзили;

д) сўралаётган ҳужжатлар рўйхати;

е) сўраётган божхона органи фикрига кўра сўровномани ижро этиш учун зарур бўлган бошқа маълумотлар.

3. Сўровномалар рус тилида йўлланади.

4. Ёрдам кўрсатишда божхона органлари бир бирлари билан бевосита алоқа қиладилар.

5. Сўралаётган Томон давлати божхона органи ўзи сўровномани қаноатлантириши мумкин бўлган орган ҳисобланмаса, у сўровномани ваколатли органга ўз ваколати ва давлати миллий қонунчилиги доирасида ижро этиш учун юборади ёки сўраётган божхона органини бундай сўровномани ижро этиш учун амал қилиниши лозим бўлган тегишли тартиб тўғрисида хабардор этади.

6. Мазкур Битим талабларига жавоб бермайдиган сўровнома ижроси тугатилади ёки мазкур Битим қоидаларига мувофиқлаштирилгунига қадар тўхтатиб турилади.

1. Сўралаётган божхона органи ўз ваколати доирасида сўровномани ижро этиш учун барча чораларни кўради.

2. Томонлардан бирининг давлати божхона органи бошқа Томон давлати божхона органи сўровномаси бўйича зарур бўлган терговни, шу жумладан экспертлар ва гувоҳлар ёки божхона ҳуқуқбузарликларини содир этишда гумон қилинувчи шахсларни сўроқ қилишни амалга оширади.

3. Сўралаётган божхона органи сўровномага мувофиқ сўраётган божхона органининг мансабдор шахсларига божхона ҳуқуқбузарликларини тергов қилишда сўралаётган Томон давлати ҳудудида эксперт ёки гувоҳ сифатида иштирок этишига ўз давлатининг қонунчилигига мувофиқ рухсат бериши мумкин.

4. Сўраётган божхона органи, ундан сўралган тақдирда, сўровнома юзасидан уни мувофиқлаштириш мақсадида ўтказиладиган тадбирнинг вақти ва жойи тўғрисида хабардор этилади.

5. Божхона ҳуқуқбузарликлари бўйича тергов ўтказиш ваколатига эга бўлган сўраётган божхона органининг мансабдор шахслари сўралаётган божхона органига тегишли китоб, журнал ва бошқа ҳужжатлар ёки ахборот ташувчи воситаларни ўрганиш мақсадида мурожаат қилишлари мумкин ва уларга божхона ҳуқуқбузарликларига оид нусхалар ёки ҳар қандай маълумот тақдим этилади.

1. Сўралаётган божхона органи текширув натижаларини сўраётган божхона органига ҳужжатлар, ҳужжатларнинг тасдиқланган нусхалари, ҳисоботлар ва бошқа материаллар кўринишида рус тилида юборади, шунингдек зарурият туғилганда оғзаки равишда кейинчалик ёзма тасдиғини бериш шарти билан хабардор қилади.

2. Мазкур модданинг 1-бандида кўрсатилган ҳужжатлар худди шундай мақсадларда тақдим этилаётган ҳар қандай кўринишдаги компьютер маълумотлари билан алмаштирилиши мумкин. Бундай маълумотларни таржима қилиш (шарҳлаш) ёки фойдаланиш учун зарур бўлган ҳар қандай қўшимчалар бир вақтнинг ўзида берилади.

1. Агар сўралаётган ёрдам ижроси сўралаётган божхона органи томонидан унинг давлати суверенитети, хавфсизлиги, жамоат тартиби ёки бошқа миллий манфаатларига зиён етказадиган, ёхуд маълумотларнинг махфийлиги бузилишига олиб келадиган ёхуд унинг қонунчилигига зид деб топилса, ёрдам кўрсатиш рад этилиши ёки унинг ижроси маълум шартлар ёки талаблар муҳокамасининг предмети бўлиши мумкин.

Ёрдам кўрсатиш божхона тўловларини тартибга солишдан бошқа, солиқ ва валюта бошқаруви масалаларига дахлдор бўлган ҳолларда ҳам рад этилиши мумкин.

2. Агар сўровнома йўллаётган божхона органи ёрдам сўраса ва ўзи шундай ёрдам кўрсата олмаса, у ҳолда мазкур орган сўровномада бу ҳолатни кўрсатиши лозим. Бундай сўровномани ижро этиш сўралаётган божхона органи ихтиёрида қолдирилади.

3. Агар ёрдам кўрсатиш рад этилса, сўраётган божхона органига зудлик билан бу ҳақида хабарнома жўнатилади ҳамда рад этишнинг сабаблари ҳақида маълумот берилади.

Мазкур Битим доирасида тақдим этиладиган маълумот, шу жумладан, ушбу Битим доирасида олинган ҳужжат, материал, техник восита ва жиҳозлар уларни тақдим этган Томоннинг ёзма розилигисиз учинчи томонга берилиши ёки у билан муносабатларда фойдаланилиши мумкин эмас.

1. Ўзаро ёрдам кўрсатиш доирасида олинган маълумот, ҳужжат ва бошқа хабарлардан фақатгина Томонлар давлатларининг қонунчилигига мувофиқ ҳамда мазкур Битимда назарда тутилган мақсадларда, шу жумладан суд ва маъмурий ишларда фойдаланиш мумкин.

2. Сўраётган божхона органи мазкур Битимга мувофиқ олинган далил ёки маълумотдан сўралаётган божхона органининг олдиндан олинган ёзма розилигисиз бошқа мақсадларда фойдаланмайди.

3. Агар мазкур Битим доирасида шахслар тўғрисида маълумотлар алмашинуви амалга оширилса, Томонлар давлатларининг божхона органлари ушбу маълумотдан фақатгина сўровномада кўрсатилган мақсадларда ҳамда сўралаётган божхона органи талаб қилиши мумкин бўлган шартларга мувофиқ фойдаланилишини кафолатлайдилар.

4. Ушбу модданинг 1 ва 2-бандларидаги қоидалар гиёҳвандлик воситалари, психотроп моддалар ва прекурсорлар билан боғлиқ бўлган ҳуқуқбузарликлар тўғрисидаги маълумотларга нисбатан татбиқ қилинмайди. Бундай маълумот Томонларнинг гиёҳвандлик воситалари ноқонуний муомаласига қарши курашишга бевосита жалб қилинган давлат органларига берилиши мумкин.

1. Томонлар давлатлари божхона органлари сўровномага кўра товарларнинг қиймати, келиб чиқиши, жойлашган жойи ва улардан кўзланган мақсадни кўрсатган ҳолда уларни юклаш ва ташиш билан боғлиқ бўлган ҳужжатларни тўкдим этадилар.

2. Бундай иш, ҳужжат ва бошқа материалларнинг асли фақатгина уларнинг нусхалари етарли бўлмаган тақдирда сўралади. Махсус сўровномага мувофиқ бундай иш, ҳужжат ва бошқа материалларнинг нусхалари тегишли равишда тасдиқланади.

3. Сўраётган божхона органига тақдим этилган иш, ҳужжат ва бошқа материалларнинг асли биринчи имконият бўлиши билан қайтарилади. Сўралаётган божхона органи ва ишга алоқадор учинчи томоннинг ҳуқуқлари дахлсиз қолиши лозим. Сўровномага биноан тергов ёки шу каби мақсадлар учун зарур бўлган ҳужжатларнинг асли зудлик билан қайтарилади.

Бир Томон давлатининг божхона органи сўровномасига кўра бошқа Томон давлатининг божхона органи ўз ихтиёри билан ходимларига, уларнинг розилигини олган ҳолда, сўраётган Томон давлати ҳудудида жиноий ёки маъмурий суд муҳокамаларида гувоҳ сифатида қатнашишга ваколат беради ва шундай муҳокама учун муҳим бўлган иш, ҳужжат ва бошқа материаллар ёки уларнинг аслига тўғри бўлган нусхаларини тақдим этади. Бундай сўровномада суд жараёнининг санаси ва кўриниши, жалб этилган томонларнинг исмлари ҳамда ходимнинг ким сифатида иштирок этиши кўрсатилади.

1. Томонлар давлатлари божхона органлари мазкур Битимни ижро этиш билан боғлиқ харажатларни қоплаш бўйича ҳар қандай талабларни илгари суришни рад этадилар, давлат хизматчилари бўлмаган гувоҳлар учун харажатлар ва экспертлар хизматлари, таржимонлар учун тўловлар бундан мустасно.

2. Агар сўровномани ижро этиш сезиларли сарф-харажат талаб этадиган бўлса, Томонлар давлатлари божхона органлари бундай сўровнома ижросини таъминлаш шартларини аниқлаш, шунингдек харажатлар қопланиши тартибини белгилаш учун маслаҳатлашувлар ўтказадилар.

1. Ушбу Битимни ижро этиш Томонлар давлатлари божхона органлари зиммасига юкланади. Улар мазкур Битимни бажариш учун барча амалий чораларни кўрадилар ва шарт-шароитларни яратадилар.

2. Маслаҳатлашувлардан сўнг Томонлар давлатларининг божхона органлари ушбу Битимнинг ижро этилиши учун зарур маъмурий кўрсатмалар ишлаб чиқишлари мумкин.

Ушбу Битим қоидаларини талқин қилиш ва қўллашда юзага келадиган ҳар қандай низо ва келишмовчиликларни Томонлар музокара ва маслаҳатлашувлар орқали ҳал этиладилар.

Томонларнинг ўзаро келишувига кўра ушбу Битимга унинг ажралмас қисми ҳисобланадиган ва алоҳида баённомалар билан расмийлаштириладиган ҳамда Битимнинг 20-моддаси 1-бандига мувофиқ кучга кирадиган ўзгартириш ва қўшимчалар киритилиши мумкин.

1. Ушбу Битим Томонлар тарафидан унинг кучга кириши учун зарур бўлган давлат ички процедураларининг бажарилганлиги тўғрисида сўнгги ёзма хабарнома олинган кундан бошлаб кучга киради.

2. Ушбу Битим номуайян муддатга тузилади ва Томонлардан бири ушбу Битимни тугатиш нияти тўғрисида дипломатик каналлар орқали бошқа Томонни ёзма шаклда хабардор қилганидан сўнг олти ой ўтгач ўз кучини йўқотади.

Тегишли тартибда ўз ҳукуматлари томонидан ваколатланган қуйида имзо чекувчилар шунга гувоҳлик бериб, ушбу Битимни имзоладилар.

Тошкент шаҳрида 2015 йил 8 октябрда икки асл нусхада, ҳар бири ўзбек, туркман ва рус тилларида тузилди, бунда барча матнлар бир хил кучга эга. Битим қоидаларини талқин қилишда рус тилидаги матндан фойдаланилади.