Маҳаллий хомашёни чуқур қайта ишлаш негизида жаҳон стандартларига мувофиқ бўлган юқори сифатли рақобатбардош кабел-ўтказгич маҳсулотлари ишлаб чиқаришни янада кўпайтириш, замонавий юқори технологияли ишлаб чиқаришларни ташкил этиш учун тўғридан тўғри хорижий инвестицияларни жалб этиш, шунингдек, экспорт салоҳиятини кенгайтириш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Рақобатбардошли маҳсулотларнинг янги турларини ишлаб чиқариш ҳажмларини кенгайтириш ва ўзлаштириш бўйича биринчи навбатдаги чора-тадбирлар дастури тўғрисида» 2011 йил 4 октябрдаги ПҚ-1623-сон қарорига мувофиқ «Навоий» ЭИИЗ ҳудудида «Олмалиқ КМК» АЖ (25 фоиз), «Ўзкабел» АЖ (25 фоиз) ва Хитойнинг «Gulf Cable Trading Company» компанияси (50 фоиз) иштирокида ташкил этилган «Nayat Power Cable Systems» МЧЖ ҚК негизида замонавий куч кабеллари ишлаб чиқаришни ташкил этиш лойиҳасининг I-босқичи амалга оширилганлиги;

«Nayat Power Cable Systems» МЧЖ ҚК таъсисчилари «Олмалиқ КМК» ҚКнинг устав капиталидаги улушини 25 фоиздан 50 фоизга ошириш ва Gulf Cable Trading Company (ХХР) улушини мос равишда камайтириш бўйича келишувга эришилганлиги маълумот учун қабул қилинсин.

2. «Nayat Power Cable Systems» МЧЖ ҚК таъсисчиларининг қуйидагиларни назарда тутувчи лойиҳанинг II-босқичини (кейинги ўринларда инвестиция лойиҳаси деб аталади) амалга ошириш тўғрисидаги таклифи маъқуллансин:

замонавий технологик талабларга жавоб берадиган илғор технологик асбоб-ускуналарни жорий этиш асосида «Nayat Power Cable Systems» МЧЖ қўшма корхонасининг мисни чуқур қайта ишлаш қувватларини йилига 3 минг тоннадан 10 минг тоннагача кенгайтириш, 400 кВгача кучланишга мўлжалланган замонавий кабел-ўтказгич маҳсулотларининг 35 та янги тури ва турларини ишлаб чиқаришни ўзлаштириш;

маҳсулот ишлаб чиқаришнинг йиллик ҳажмини 65 млн АҚШ доллари эквивалентига, шу жумладан экспортга — ишлаб чиқариш ҳажмининг камида 65 фоизига етказиш;

камида 200 та янги иш ўрни ташкил этиш.

3. «Олмалиқ КМК» АЖ:

икки ой муддатда инвестиция лойиҳасининг лойиҳа ҳужжатларини ишлаб чиқсин ва тасдиқласин;

2017 йил охиригача янги қувватларни ишга туширсин, 2019 йилдан бошлаб эса лойиҳа қувватига эришсин.

4. Ўзбекистон Республикаси Иқтисодиёт вазирлиги, Ташқи иқтисодий алоқалар, инвестициялар ва савдо вазирлиги инвестиция лойиҳаси Ўзбекистон Республикасининг 2017 йилги ва кейинги йилларга мўлжалланган Инвестиция дастурига белгиланган тартибда киритилишини таъминласин.

5. «Навоий» ЭИИЗ Маъмурий кенгаши Ўзбекистон Республикаси Ташқи иқтисодий алоқалар, инвестициялар ва савдо вазирлиги, Иқтисодиёт вазирлиги ва «Навоий» ЭИИЗ дирекцияси билан биргаликда «Nayat Power Cable Systems» МЧЖ ҚК муассислари томонидан ушбу қарорнинг 2-бандига мувофиқ инвестиция лойиҳасининг II-босқичи доирасида қабул қилинган мажбуриятларнинг бажарилиши устидан тизимли назоратни таъминласин.

6. Ўзбекистон Республикаси Иқтисодиёт вазирлиги «Олмалиқ КМК» АЖ билан биргаликда ҳар йилги моддий балансларни ишлаб чиқишда «Nayat Power Cable Systems» МЧЖ ҚК томонидан ушбу қарорнинг 2-бандига мувофиқ қабул қилинган мажбуриятларни бажариш учун зарур ҳажмдаги мис ресурслари ажратилишини назарда тутсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.