Ўзбекистон Республикаси Вазирлар Маҳкамасининг 2008 йил 20 августдаги 186-сон қарори билан тасдиқланган «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисида»ги Низом (Ўзбекистон Республикаси қонун ҳужжатлари тўплами, 2008 й, 34-сон, 333-модда)да белгиланган вазифалардан келиб чиқиб ҳамда туманда ижтимоий муҳофазага муҳтож ва иш топишда қийналаётган шахсларни ишга жойлаштириш учун 2016 йилда иш ўринларини банд қилиб қўйиш мақсадида «Маҳаллий давлат ҳокимияти тўғрисида»ги Қонуннинг (Ўзбекистон Республикаси Олий Мажлис Кенгашининг Ахборотномаси, 1993 йил 9-сон 320-модда) 6-моддасига асосан қарор қиламан:

1. Банд қилиниши керак бўлган иш ўринлари сонини ва уларга қуйиладиган талабларни белгилаш мақсадида ишчи гуруҳи 1-иловага* мувофиқ тасдиқлансин.

2. Ижтимоий муҳофазага муҳтож ва иш топишда қийналадиган шахсларни ишга жойлаштириш учун иш ўринларини банд қилиб қўйиш (2-иловага* мувофиқ) ходимлар сони 20 нафардан ортиқ кишини ташкил этадиган корхоналар учун 7 фоиз (114 киши), шундан ногиронлар учун иш ўринларининг энг кам сонига мувофиқ 3 фоиз (11 киши) миқдорида ва 4 фоиз ( 103 киши) учун иш жойларини банд қилиб қуйиш ёки барпо этиш белгилансин.

Жумладан, умумий банд қилиб қуйилган ёки барпо этиладиган иш жойларига нисбатан:

а) ёлғиз ота, ёлғиз она ҳамда 14 ёшгача ва ногирон болалари бор кўп болали ота-оналар учун 19 фоиз (22 киши);

б) таълим муассасаларини тугатган ёшлар учун 45 фоиз (52 киши);

в) муддатли ҳарбий хизматдан бўшатилганлар учун 8 фоиз (10 киши);

г) Пенсия ёшга яқинлашиб қолган шахслар учун 6 фоиз (7 киши);

д) жазони ижро этиш муассасаларидан бўшатилган шахслар учун 6 фоиз ( 7 киши);

е) ижтимоий муҳофазага муҳтож иш топишда қийналадиган шахсларнинг бошқа тоифалари учун 4 фоиз ( 5 киши);

ё) ногиронлар учун 3 фоиз (11 киши).

3. 2016 йилда банд қилиниши керак бўлган иш ўринлари сонини ва уларга қўйиладиган талабларни белгилаш мақсадида махсус ишчи гуруҳи 1-иловага, 2016 йил учун банд қилиб қўйиш лозим бўлган корхоналар рўйхати 2-иловага, корхона, муассаса ва ташкилотлар ҳар чоракда туман Бандликка кўмаклашиш ва аҳолини ижтимоий муҳофаза қилиш марказига бериб борадиган ахбороти 3-иловага мувофиқ тасдиқлансин.

4. Тумандаги корхоналар, муассасалар ва ташкилотлар 2016 йил бошлангунгача 10 кундан кечикмай ижтимоий муҳофазага муҳтож ва иш қидиришда қийналаётган шахсларни ишга жойлаштириш учун банд қилиб қўйилган иш ўринлари умумий сонининг камида 25 (йигирма беш) фоизи хажмда иш ўринлари банд қилиб қўйилишини, тайёр бўлишини ҳамда бу тўғрида туман Бандликка кўмаклашиш ва аҳолини ижтимоий муҳофаза қилиш марказига йил бошлангунгача ёзма равишда ахборот беришни таъминласин.

5. Ижтимоий муҳофазага муҳтож ва иш қидиришда қийналаётган шахслар учун иш ўринларининг қолган қисмини банд қилиб қўйиш корхона, муассаса, ташкилотлар (иш берувчи) томонидан календарь йилнинг биринчи чораги мобайнида амалга ошириб, бу тўғрида туман Бандликка кўмаклашиш ва аҳолини ижтимоий муҳофаза қилиш марказига йилнинг биринчи чораги тугагандан кейин 10 кундан кечикмай ёзма равишда ахборот бериш топширилсин.

6. Ушбу қарорни бажармаган ташкилотга «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини бaнд қилиб қўйиш тартиби тўғрисида»ги низом»нинг 15-бандига мувофиқ жарима солинади.

7. Ўзбекистон Республикаси Вазирлар Маҳкамасининг 2008 йил 20 августдаги 186-сонли қарори бидан тасдиқланган «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тўғрисида»ги Низомга асосан ижтимоий муҳофазага муҳтож ва иш қидиришда қийналаётган шахслар учун банд қилиб қўйиладиган иш ўринларини туман ҳокими томонидан белгиланган миқдордан ортиқча ташкил этган корхона ташкилот ва муассасалар ушбу иш ўринларини ташкил этишга сарфланган маблағларининг бир қисмини туман Бандликка кўмаклашиш ва аҳолини ижтимоий муҳофаза қилиш маркази билан тузилган шартнома асосида Бандликка кўмаклашиш ва аҳолини ижтимоий муҳофаза қилиш жамғармаси маблағлари ҳисобидан қоплаш ҳуқуқига эга эканликлари инобатга олинсин.

8. Туман Бандликка кўмаклашиш ва аҳолини ижтимоий муҳофаза қилиш марказ директори А. Сапаровга бир ҳафта муддатда мазкур қарорни тегишли корхона, муассаса ва ташкилотлар раҳбарлари эътиборига етказсин ҳамда унинг бажарилиши устидан қатъий назоратни таъминласин.

9. Чироқчи туман ҳокимининг 2014 йил 19 сентябрдаги «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини 2015 йил учун банд қилиб қўйиш тўғрисида»ги Х-652/09- сонли қарори 2015 йил 31 декабрдан ўз кучини йўқотган деб ҳисоблансин.

10. Мазкур қарорнинг ижросини назорат қилиш туман ҳокимининг ўринбосари Ш. Хусаинов зиммасига юклатилсин.

11. Мазкур қарор расман эълон қилинган кундан эътиборан кучга киради.