Ўзбекистон Республикаси Олий Мажлисининг Кенгаши қарор қилади:

1. «Халқ депутатлари вилоят, туман, шаҳар Кенгаши депутатининг гувоҳномаси тўғрисидаги Низом» тасдиқлансин (илова қилинади).

2. Халқ депутатлари вилоят, туман, шаҳар Кенгаши депутати гувоҳномасининг тавсифи тасдиқлансин (илова қилинади).

3. Халқ депутатлари вилоят, туман Кенгаши депутати гувоҳномасининг транспортда бепул юриш ҳуқуқини берадиган илова варақасининг тавсифи тасдиқлансин (илова қилинади).

4. «ВИЛОЯТ (ТУМАН, ШАҲАР) КЕНГАШИ ДЕПУТАТИ» кўкрак нишони тўғрисидаги Низом» тасдиқлансин (илова қилинади).

5. «ВИЛОЯТ (ТУМАН, ШАҲАР) КЕНГАШИ ДЕПУТАТИ» кўкрак нишонининг тавсифи тасдиқлансин (илова қилинади).

Ташқи кўриниши «ВИЛОЯТ (ТУМАН, ШАҲАР) КЕНГАШИ ДЕПУТАТИ» кўкрак нишонига айнан ўхшаш бўлган кўкрак нишонлари тайёрланишига йўл қўйилмайди.

1. Халқ депутатлари вилоят, туман, шаҳар Кенгаши депутатининг гувоҳномаси тегишли халқ депутатлари вилоят, туман, шаҳар Кенгаши депутатининг Ўзбекистон Республикаси Конституцияси ва бошқа қонунлар билан белгилаб қўйилган ваколатини тасдиқловчи ҳужжатдир.

2. Халқ депутатлари вилоят, туман, шаҳар Кенгаши депутатининг гувоҳномаси депутат тегишли вилоят, туман, шаҳар сайлов комиссияси томонидан рўйхатга олинганидан кейин тегишли сайлов комиссияси раиси ёки унинг ўринбосари томонидан берилади.

Халқ депутатлари вилоят, туман Кенгаши депутатига гувоҳнома билан бир вақтда давлат йўловчилар транспортининг барча турларида тегишли ҳудудда қонун ҳужжатларида белгиланган тартибда бепул юриш ҳуқуқини берувчи гувоҳноманинг илова варақаси ҳам берилади.

3. Халқ депутатлари вилоят, туман, шаҳар Кенгаши депутати ўзига берилган гувоҳномадан ўз ваколат муддати давомида фойдаланади.

Тегишли халқ депутатлари Кенгашининг ваколат муддати тугаганидан кейин гувоҳнома депутат этиб сайланган шахсда қолади. Депутатнинг ваколати муддатидан илгари тўхтатилган тақдирда гувоҳнома тегишли вилоят, туман, шаҳар ҳокимлигига қайтарилиши керак.

Халқ депутатлари вилоят, туман, шаҳар Кенгаши депутатининг гувоҳномаси 90x60 миллиметр катталикдаги лидерн қопланган қаттиқ муқовали китобча кўринишига эга.

Вилоят Кенгаши депутати гувоҳномасининг муқоваси тўқ қизил рангли, туман Кенгаши депутати гувоҳномасининг муқоваси тўқ рангли, шаҳар Кенгаши депутати гувоҳномасининг муқоваси тўқ яшил ранглидир.

Гувоҳноманинг олд томон сўл қисмининг юқорисига — тилларанг зарвараққа Ўзбекистон Республикаси Давлат гербининг тасвири босиб туширилган, пастда гербдан ўнгроқ икки сатрда «ХАЛҚ ДЕПУТАТЛАРИ ВИЛОЯТ (ТУМАН, ШАҲАР) КЕНГАШИ» ёзуви бор.

Гувоҳноманинг ички қисмидаги матнлар икки бетга жойлаштирилган.

Гувоҳноманинг ички сўл томони юқорисига бир сатрда «O’ZBEKISTON RESPUBLIKASI» сўзлари ёзилган, чап қисмига Ўзбекистон Республикаси Давлат гербининг тасвири туширилган, пастроқда эса беш сатрда — чақириқни ифодаловчи рақам, «CHАQIRIQ», «ЧАҚИРИҚ» сўзлари, шунингдек мазкур чақириқдаги халқ депутатлари вилоят, туман, шаҳар Кенгашлари сайлови бўлган йил ва ваколатлари тугайдиган йилни кўрсатувчи рақамлар жойлашган.

Гувоҳнома сўл томони ўнг қисмининг юқорисига «GUVOHNOMA» сўзи ёзилган бўлиб, ундан ўнгроқда гувоҳноманинг тартиб рақами қўйилади. Ушбу матнда пастроқда алоҳида депутатининг фамилияси, исми, отасининг исми, шунингдек уч сатрда тегишли халқ депутатлари Кенгашининг номи ва «deputatidir» сўзи ёзилади. Гувоҳноманинг ички сўл томонидаги матнлар лотин ҳарфларида ёзилади. «Чақириқ» сўзи кириллицада такрорланади.

Гувоҳнома ички ўнг томонининг чап қисмида депутатнинг 30x40 миллиметр катталикдаги фотосурати жойлашади. Фотосурат ўнг томонининг пастки бурчагига тегишли вилоят, туман, шаҳар сайлов комиссиясининг гербли муҳри босилади.

Гувоҳнома ўнг томонининг юқори қисмида бир сатрда «ЎЗБЕКИСТОН РЕСПУБЛИКАСИ» сўзлари, пастроқда бир сатрда «ГУВОҲНОМА» сўзи ёзилган бўлиб, ундан ўнгроқда гувоҳноманинг тартиб рақами қўйилади.

Ушбу матндан пастроқда алоҳида депутатининг фамилияси, исми, отасининг исми, шунингдек уч сатрда тегишли халқ депутатлари Кенгашининг номи ва «депутатидир» сўзи ёзилади.

Депутатнинг фотосурати тагига: «Вилоят (туман, шаҳар) сайлов комиссияси раиси» деган матн ёзилади, тегишли вилоят, туман, шаҳар сайлов комиссияси раисининг имзоси, исми ва отасининг исми бош ҳарфлари, фамилияси қўйилади.

Гувоҳноманинг ўнг томонидаги матн кириллицада ёзилади.

Гувоҳноманинг ички томонлари оч мовий рангдаги оқ силлиқ қоғоздан тайёрланган. Герб тасвири, гувоҳномадаги матнлар ва рақамлар қора рангда берилади. Гувоҳнома тартиб рақами депутат сайланган сайлов округи тартиб рақамига мувофиқ бўлиши керак.

Халқ депутатлари вилоят, туман Кенгаши депутатига тегишли ҳудудда бепул юриш ҳуқуқини берувчи гувоҳноманинг илова варақаси берилади.

Халқ депутатлари вилоят, туман Кенгаши депутати гувоҳномасининг транспортда бепул юриш ҳуқуқини берадиган илова варақаси 75x55 миллиметр катталикдаги плёнка билан қопланган оқ силлиқ қоғоздан тайёрланади.

Илова варақаси юқори қисмида чап томонда Ўзбекистон Республикаси Давлат герби тасвири туширилган ва «ВИЛОЯТ (ТУМАН) КЕНГАШИ ДЕПУТАТИ» матни, унинг остида гувоҳноманинг тартиб рақами кўрсатилган ҳолда «ГУВОҲНОМАГА» деган сўз бор. Пастда қуйидаги мазмундаги матн бўлади:

«Вилоят (туман) Кенгашининг депутати тегишли вилоят (туман) ҳудудида давлат пассажир транспортининг барча турларида (такси, бошқа транспорт турларининг буюртма йўналишлари, шунингдек шаҳар йўловчи транспорти бундан мустасно) текин юриш ҳуқуқидан фойдаланади».

1. «ВИЛОЯТ (ТУМАН, ШАҲАР) КЕНГАШИ ДЕПУТАТИ» кўкрак нишони халқ депутатлари вилоят, туман, шаҳар Кенгаши депутатига тегишли вилоят, туман, шаҳар сайлов комиссияси томонидан рўйхатга олинганидан кейин тегишли сайлов комиссияси раиси ёки ўринбосари томонидан берилади.

2. Кўкрак нишони кўкракнинг чап томонига тақилади.

3. Депутатнинг ваколат муддати тугаганда ёки унинг ваколати муддатидан илгари тўхтатилганда кўкрак нишонини тақиб юриш ҳуқуқи тўхтатилади.

Тегишли халқ депутатлари вилоят, туман, шаҳар Кенгашининг ваколат муддати тугаганидан кейин кўкрак нишони депутат этиб сайланган шахсда қолади. Депутатнинг ваколати муддатидан илгари тўхтатилган тақдирда кўкрак нишони тегишли вилоят, туман, шаҳар ҳокимлигига қайтарилиши керак.

«ВИЛОЯТ (ТУМАН, ШАҲАР) КЕНГАШИ ДЕПУТАТИ» кўкрак нишони Ўзбекистон Республикаси Давлат байроғига ўхшатиб ишланади.

Депутат кўкрак нишонининг асоси махсус қотишмадан тайёрланади, нишоннинг сирт томони мовий, оқ ва яшил рангдаги эмаль билан қопланган. Оқ йўл мовий ва яшил йўллардан қизил ранг эмаль қопланган ҳошия билан ажралиб туради. Нишондаги тасвирлар, ёзув, нишон қирралари ҳамда орқа томони зарҳал қилиб ишланган.

Нишон чап томонининг юқори бурчагида мовий фонда ярим ой ва унинг ўнг томонида ўн иккита беш қиррали юлдуз тасвирланган. Ярим ой вертикал жойлаштирилган. Юлдуз вертикал ва горизонтал бўйича қуйидаги тартибда жойлаштирилган: юқори қаторда — учта юлдуз, ўрта қаторда — тўртта юлдуз, қуйи қаторда — бешта юлдуз.

Нишоннинг оқ йўлида «ВИЛОЯТ (ТУМАН, ШАҲАР)» сўзлари, яшил йўлда — икки сатрда «КЕНГАШИ ДЕПУТАТИ» сўзлари ёзилган.

Нишон тўғноғич билан тақилади.

«ВИЛОЯТ КЕНГАШИ ДЕПУТАТИ» ва «ШАҲАР КЕНГАШИ ДЕПУТАТИ» (Тошкент шаҳар ва вилоят марказлари ҳисобланувчи шаҳарлар халқ депутатлари Кенгашларининг депутатлари учун) нишонининг катталиги 29x22 миллиметр, «ТУМАН (ШАҲАР) КЕНГАШИ ДЕПУТАТИ» нишонининг катталиги 24x18 миллиметр.