«Ўзбекистон Республикасида маъмурий-ҳудудий тузилиш масалаларини ҳал этиш тартиби тўғрисида»ги Ўзбекистон Республикаси Қонунининг 5 ва 13-моддаларига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. Ўзбекистон Республикаси Вазирлар Маҳкамасининг таклифи қабул қилиниб, Фарғона вилоятининг Фарғона шаҳри ва Фарғона тумани чегаралари ўзгартирилсин.

2. Фарғона вилояти Фарғона тумани ҳудудининг 576 гектар майдони («Чекшўра» қишлоқ фуқаролар йиғинининг «Усмонобод» ва «Ўрташўра» маҳаллалари ҳудудининг бир қисми; «Аввал» қишлоқ фуқаролар йиғинининг «Оқтепа» маҳалласи ҳудудининг бир қисми; «Дамкўл» қишлоқ фуқаролар йиғинининг «Дамкўл» маҳалласи ҳудудининг бир қисми) Фарғона вилоятининг Фарғона шаҳри таркибига;

Фарғона вилояти Фарғона шаҳри ҳудудининг 43,8 гектар майдони (2-Ўрмончилар маҳалласи ҳудудининг бир қисми) Фарғона вилоятининг Фарғона тумани таркибига ўтказилсин.

3. Фарғона вилояти Фарғона шаҳрининг ва Фарғона туманининг чегаралари Ўзбекистон Республикаси Вазирлар Маҳкамаси томонидан 1, 2-иловаларга* биноан тақдим этилган тавсиф ва график чизмага мувофиқ тасдиқлансин.

4. Ўзбекистон Республикаси Вазирлар Маҳкамаси ушбу қарорнинг ижроси бўйича комплекс чора-тадбирлар амалга оширилишини таъминласин.

5. Мазкур қарор Ўзбекистон Республикаси Олий Мажлиси Сенатига юборилсин.

6. Ушбу қарор қабул қилинган кундан эътиборан кучга киради.