Ўзбекистон Республикаси Олий Кенгаши Раёсати ва Ўзбекистон Республикаси Президенти ҳузуридаги Вазирлар Маҳкамаси қарор қиладилар:

Ўзбекистон Республикаси Олий Кенгаши Раёсати ва Ўзбекистон Республикаси Президенти ҳузуридаги Вазирлар Маҳкамасининг сиёсий партияларига, жамоат ҳаракатларига, барча аҳолисига Мурожаатномаси қабул қилинсин. (илова қилинади).

Азиз тожик биродарлар ва опа-сингиллар!

Қардош тожик халқи учун бу оғир дамларда Ўзбекистон Республикаси Олий Кенгаши Раёсати ва Ўзбекистон Республикаси Президенти ҳузуридаги Вазирлар Маҳкамаси сизларга кейинги пайтда қўшни республикада авж олиб кетган фожиали воқеалар муносабати билан ғоят чуқур ташвиш ва андуҳ сўзлари билан мурожаат этмоқда.

Асрлар мобайнида Ўзбекистон билан Тожикистон халқлари ўртасида чамбарчас боғланиб кетган дўстлик, уларнинг қон-қардошлиги, яхши ва ёмон кунларни биргаликда бошдан кечирганликлари, тарихий илдизларимизнинг муштараклиги бизга шундай қилиш ҳуқуқини беради деб ўйлаймиз.

Биз сизларга шу боисдан мурожаат этмоқдамизки, тожик заминида отилган ҳар бир ўқ Ўзбекистон аҳолисининг қалбларига найзадек ботмоқда. Биродаркушлик муҳорабасида ҳалок бўлган ва шикастланганлар тўғрисидаги хабарларни ўз шахсий қайғумиз, кулфатимиздек қабул қилмоқдамиз.

Биз Тожикистон Республикасининг ҳамма сиёсий партиялари, жамоат ҳаракатларига, республиканинг барча аҳолисига юзага келаётган зиддиятлар тамомила тинч сиёсий воситалар йўли билан, қонун доирасида ҳал этилиши учун уруш оловини дарҳол тўхтатиш мақсадида имкони бўлган ҳамма ишни қилиш даъвати билан мурожаат этмоқдамиз.

Тожикистондаги ўзаро курашаётган кучлар муросага келиш йўлини топишларига, юзага келган муаммоларни ҳамжиҳатлик, тинч мулоқот йўл билан ҳал этишга эришишларига ишончимиз комил. Кўҳна халқнинг асрий ва тарихий тажрибаси тантана қилажак.

Тожикистон Республикаси Олий Кенгаши ҳамда Вазирлар Маҳкамаси Раёсатларининг Мустақил Давлатлар Ҳамдўстлигига аъзо бўлган мамлакатларнинг давлат ва ҳукумат раҳбарлари мурожаатномасига жавобан Ўзбекистон Тожикистон халқига қўлидан келганча инсонпарварлик ёрдами кўрсатади. Биз Тожикистон раҳбариятининг тинчлик ўрнатувчи қўшимча кучларни йўллаш тўғрисидаги илтимосини қўллаб-қувватлаймиз. Кўпмиллатли, мустақил Тожикистонда, унинг ҳар бир хонадонида, ҳар бир оилада тинчлик тезроқ қарор топишига, унинг барча фуқаролари тотувликда ва фаровонликда яшашларига тилакдошмиз.