Ўзбекистон Республикаси Марказий банки раисининг Ўзбекистон Республикаси Марказий банкининг 1999 йил юзасидан ҳисоботини тинглаб ҳамда Бюджет, банк ва молия масалалари қўмитасининг қарорини кўриб чиқиб, Ўзбекистон Республикаси Олий Мажлисининг Кенгаши қарор қилади:

1. Ўзбекистон Республикаси Марказий банкининг 1999 йил юзасидан ҳисоботи тасдиқлансин.

2. Ўзбекистон Республикаси Марказий банки:

2000 йилга мўлжалланган пул-кредит сиёсатининг асосий йўналишларини амалга оширишга доир зарур чора-тадбирларни кўрсин, бунда Ўзбекистон Республикаси Президентининг 2000 йил 21 мартда чиқарилган «Банк тизимини янада эркинлаштириш ва ислоҳ қилиш борасидаги чора-тадбирлар тўғрисида»ги Фармонига ва Ўзбекистон Республикаси Вазирлар Маҳкамасининг 2000 йил 24 мартда қабул қилинган «Банк тизимини ислоҳ қилишга доир чора-тадбирлар тўғрисида»ги қарорига алоҳида эътибор қаратсин;

банк тизимини янада эркинлаштириш ва ислоҳ қилишга, банкларнинг молиявий барқарорлигини оширишга, уларнинг тузилмавий қайта шаклланиши ва хусусийлаштирилишига, банк хизматларини кенгайтиришга қаратилган фаолиятни такомиллаштирсин;

тижорат банкларига кредит сиёсатини шакллантириш ва амалга оширишда, шу жумладан якка тартибдаги тадбиркорларни, фермер ва деҳқон хўжаликларини, бошқа кичик ва ўрта бизнес субъектларини кредитлаш ва микрокредитлашни амалга оширишда кўпроқ мустақиллик беришга қаратилган ишларга эътибор берсин;

банк тузилмаларини бозор шароитида ишлашга тайёр юқори малакали мутахассислар билан мустаҳкамласин, маълумотларни ва норматив-ҳуқуқий ҳужжатларни банклараро узатиш тармоғининг ахборот-компьютер инфратузилмасини халқаро талаблар ва стандартларга мувофиқ ҳолда такомиллаштирсин.

3. Маҳаллий давлат ҳокимияти органлари молия, банк ва солиқ тузилмалари билан биргаликда:

хўжалик юритувчи субъектларнинг молиявий барқарорлигини мустаҳкамлашга, инвестиция лойиҳалари ва давлат дастурларини ўз вақтида амалга оширишга, тўлов интизомига риоя этилишига, нақд пул эмиссиясини қисқартиришга ва дебиторлик-кредиторлик қарзларини камайтиришга қаратилган чора-тадбирлар кўрсин, иш ҳақи, пенсия ва нафақалар ўз вақтида тўланиши устидан қатъий назорат ўрнатсин;

кичик ва ўрта бизнесни, хусусий тадбиркорликни, фермер ва деҳқон хўжаликларини ривожлантиришга, ҳар бир туманда экспортбоп маҳсулотлар ишлаб чиқаришга мўлжалланган қўшма корхоналар тузишга алоҳида эътибор берсин.

4. Ушбу қарор Ўзбекистон Республикаси Олий Мажлиси тасдиғига киритилсин.