Қуйида «Аҳдлашувчи Томонлар» деб аталувчи Ўзбекистон Республикаси Ҳукумати билан Финляндия Республикаси Ҳукумати,

тенг ҳуқуқлилик ва ўзаро манфаатдорлик асосида Ўзбекистон Республикаси билан Финляндия Республикаси ўртасида савдо-иқтисодий муносабатларни ривожлантириш ва кенгайтиришга кўмаклашишга интилиб,

иккала Аҳдлашувчи Томон ҳудудида сармоя маблағлари миқдори ўсиб бориши учун қулай шарт-шароитлар яратиш истагида,

сармоя қўйиш ва уни ўзаро ҳимоялашга кўмаклашиш иккала мамлакат ўртасидаги иқтисодий муносабатларни ривожлантириш ишида амалий ташаббусни орттириб боришни эътироф этиб,

қуйидагилар тўғрисида келишиб олдилар:

Ушбу Битимда:

а) «Сармоя қўйиш» атамаси иқтисодий фаолият билан боғлиқ бўлган қийматга эга барча мулк турларини билдириб, хусусан, ўз ичига қуйидагиларни қамраб олади, бироқ бунда истисно жоиз:

1) Кўчириб бўладиган ва кўчмас мулк ҳамда кўчмас мулк кафолати ва кафолатлар каби бошқа мулкий ҳуқуқлар;

2) Компанияларга қўйилган омонатлар, акциялар ва ҳуқуқий шахслар мулкида иштирок этишнинг бошқа шакллари;

3) Пул маблағларига бўлган ҳуқуқлар қарзни талаб қилиш ҳуқуқлари ёки иқтисодий қийматга эга тўловларга бўлган ҳуқуқлар;

4) Саноат, тижорат ва ақлий мулкчиликка бўлган ҳуқуқлар, жумладан турли муаллифлик ҳуқуқлари, патентлар, мол белгилари, хизмат кўрсатиш соҳасининг номлари, фирма номлари ва саноат намуналари, тижорат сирлари, технологик жараёнлар, «НОУ-ХАУ» ва «ГУДВИЛЛ» билан боғлиқ ҳуқуқлар;

5) Тижорий фаолият ва имтиёзларга бўлган ҳуқуқлар, жумладан табиий бойликларни қидириш, режалаш, қазиб олиш ёки улардан фойдаланишга тегишли ҳуқуқлар, шунингдек қонун, Битим ёки ҳокимият қарори асосида берилган ҳуқуқлар;

6) Ушбу Битим кўзда тутилган сармоя билан боғлиқ ва қонунларга мувофиқ ижарачи фойдаланадиган ижара сармоя моллари.

б) «Сармоядор» атамаси:

1) Ўз мамлакати қонунларига мувофиқ Ўзбекистон Республикаси ёки Финляндия фуқароси бўлган шахс ёки Ўзбекистон Республикаси ёхуд Финляндиядаги қонунларга мувофиқ ташкил топган юридик шахс бўлиб, ўз мамлакати қонунларига кўра бошқа Аҳдлашувчи Томон ҳудудига сармоя қўйиш ҳуқуқига эга бўлган;

2) Аҳдлашувчи Томонлардан бирининг ёки Аҳдлашувчи Томонлардан бирининг сармоядори катта ҳиссага эга бўлган учинчи давлатнинг ҳудудида ўз манзилгоҳига эга бўлган;

3) 1, 2-бандларда ўз таърифига эга бўлмаган, Аҳдлашувчи Томонлар уни ва у режалаштирган ҳар бир алоҳида сармояни биргаликда маъқуллаган фуқаро ёки юридик шахсни билдиради;

в) «даромадлар» атамаси сармоя қўйиш натижасида олинган ёки олиниши лозим бўлган пул маблағлари ва бошқа қийматига эга мулклар, жумладан фойда, фоизлар, девидентлар, роялти кабиларни англатади. Аммо бунда истисно жоиз;

г) «ҳудуд» атамаси Аҳдлашувчи Томонлардан ҳар бирининг давлат ҳудудини, шунингдек Аҳдлашувчи Томонлардан ҳар бирининг ҳудудий сув сарҳадлари билан чегарадош иқтисодий минтақа, балиқ овлаш минтақаси ва соҳилбўйи сувларини билдириб, бунда Аҳдлашувчи Томонлар халқаро ҳуқуққа мувофиқ бойликларни қидириш, ишлаш ва сақлаш мақсадида ўз суверен ҳуқуқларини амалга оширадилар ва ана шу бойликларни тасарруф этадилар.

1. Ушбу Битим ҳудудига сармоя қўйилган Аҳдлашувчи Томон қонунларига мувофиқ ишга солинган сармояларга нисбатан қўлланилади.

2. Ушбу модданинг 1-банди қоидаларини ҳисобга олган ҳолда Битим бир Аҳдлашувчи Томоннинг сармоядорлари иккинчи Аҳдлашувчи Томон ҳудудига ушбу Битим кучга киргунга қадар ва кучга кирганидан кейин қўйган барча сармояларга нисбатан қўлланилади.

Аҳдлашувчи Томонларнинг ҳар бири ўз қонунлари ва қоидалари, шунингдек халқаро ҳуқуқда кўзда тутилган доирада ва ҳар қандай ҳолатда иккинчи Аҳдлашувчи Томон сармояларига ва шунингдек бу сармоялардан келадиган даромадларга нисбатан мақбул ва адолатли шароитни таъминлайди.

Аҳдлашувчи Томонларнинг ҳар бири ўз ҳудудида иккинчи Аҳдлашувчи Томон сармоядорларининг сармоялари ва даромадларига нисбатан мақбул ва адолатли шароитни таъминлайди.

1. Аҳдлашувчи Томонларнинг ҳар бири ўз ҳудудида иккинчи Аҳдлашувчи Томон сармоядорлари ушбу Битим қоидаларига мувофиқ қўйган сармояларига ва улардан келадиган даромадларига нисбатан учинчи мамлакатлар сармоялари ва даромадларига нисбатан яратилган шароитдан кам бўлмаган мақбул тартибни қўллайди.

2. Уруш ёки бошқа қуролли можаро, фавқулодда ҳолат эълон қилиниши, жамоат тартибсизликлари натижасида сармоялари зарар кўрган Аҳдлашувчи Томонлардан бирининг сармоядорларига нисбатан иккинчи Аҳдлашувчи Томон ҳар қандай учинчи мамлакат сармоядорларига мулкни тиклаш, мулкни тўлаш, товон тўлаш ёки моддий қийматини тиклаш билан боғлиқ бошқа услублар бўйича яратган шарт-шароитидан кам бўлмаган тартибни таъминлайди.

Юқоридаги жумлада кўзда тутилган тўловлар эркин муомаладаги валютада амалга оширилади ва бир мамлакатдан иккинчисига эркин ҳолда ўтказиб берилиши лозим.

3. Ушбу модданинг 1 ва 2-бандларида кўзда тутилган тартиб Аҳдлашувчи Томонларнинг бири тарафидан учинчи мамлакатлар сармоядорлари, сармоялари ва даромадларига берадиган афзаллик, енгиллик ёки товон учун асосларга нисбатан қўлланилмайди ва улар қуйидагиларга яъни:

икки иқтисодий макон, божхона уюшмаси ёки эркин савдо минтақаси тўғрисида амалдаги ёки келгусида тузилиши мумкин бўлган битимдан;

иккиёқлама солиқ солишни бекор қилиш тўғрисидаги битимга;

тўла ёки қисман солиқ солиш билан боғлиқ бошқа халқаро битимга асосланади.

1. Аҳдлашувчи Томонлардан ҳар қайсисининг сармоядорлари иккинчи Аҳдлашувчи Томон ҳудудига қўйган сармоялари миллийлаштирилиши, экспоприация қилиниши ёки миллийлаштириш ёхуд экспоприацияга (бундан буён «экспоприация» дейилади), ўхшаган оқибатларга эга бўлган чораларга дучор бўлиши мумкин эмас. Жамоатчилик манфаатларини кўзлайдиган, камситмайдиган ҳамда кечиктирмай тегишли ва самарали товон пули тўланадиган ҳоллар бундан мустаснодир.

Товон пулининг миқдори экспоприация ҳақида ёки бўлажак экспоприация тўғрисидаги хабар бевосита маълум қилинишидаги экспорпиация қилинадиган экспоприация кунидан бошлаб икки ой мобайнида тўланиши лозим. Шу муддат тугаганидан кейин тўланаётган товон пули тўлаб бўлингунга қадар унга оддий тижорат миқдорида фоизлар қўшилиб боради ва маблағ эркин муомаладаги валюта ҳисобида қиймати аниқланган кундаги курс бўйича самарали амалга оширилади ҳамда эркин тарзда ўтказиб берилади.

Сармоясига дахл қилинган сармоядор экпоприация қилган Аҳдлашувчи Томон қонунларига мувофиқ содир ҳолатни зудлик билан мазкур Аҳдлашувчи Томон суди ёки бошқа мустақил орган томонидан кўриб чиқилишига ва ушбу моддада баён қилинган қоидаларга мувофиқ ўзининг сармояси қиймати аниқлаб олинишига ҳақлидир.

2. Агар Аҳдлашувчи Томонлардан бири амалдаги қонунларга мувофиқ ҳудудининг ҳар қандай қисмида барпо этилган компания ёки корхонанинг мулкини ва иккинчи Аҳдлашувчи Томон сармоядорлари эгалик қилувчи акцияларни экспоприация қилса, бундай ҳолда ушбу модданинг 1-банди қоидалари қўлланилади.

Аҳдлашувчи Томонларнинг ҳар бири иккинчи Аҳдлашувчи Томон сармоядорларига асоссиз кечиктирмай, аммо кўпи билан уч ой вақт ичида сармоя қўйиш муносабати билан кўчириб бўладиган мулкни монесиз ўтказишни ва сармоя қўйиш муносабати билан эркин муомаладаги валютада тўловларни:

1) Иккинчи Аҳдлашувчи Томон сармоядори қўйган сармоядан тушган фойдалар, девидендлар, фоизлар, роялти, лицензия тўловлари, воситачилик, техник ёрдам ва техник хизмат учун тўловлар ва бошқа даромадларни;

2) Заёмлар ёки тегишли бошқа мажбуриятларни қоплаш билан боғлиқ пул маблағларини;

3) Сармоянинг сотилиши, қисман ёки тўла тугатилиши муносабати билан сармоядорга тегишли маблағларни;

4) Сармоя қўйиш муносабати билан уни қабул қилувчи мамлакат ҳудудида сармоядор мамлакати фуқароларининг меҳнати учун олган иш ҳақларини ёки иш ҳақи билан боғлиқ даромадларини ўтказиб беришни таъминлайди.

Аҳдлашувчи Томонлар ўз қонунлари доирасида ушбу Битимга кўра кўзда тутилган сармоялар асосида барпо қилинган ёки барпо қилинадиган корхоналарни, шунингдек ушбу Битим 1-моддасининг а-банди 5-кичик бандида кўзда тутилган тижорат фаолияти ва концессияга берилган ҳуқуқлар асосида қўйилган сармояларни, шунингдек уларнинг фаолиятини жумладан хом ашё, электр қуввати, ишчи кучи, юк ташиш ва молия-ҳисобот хизмати ҳамда фаолият кўрсатиш ҳуқуқини бериш билан қулай шарт-шароитларни таъминлашга кўмаклашадилар.

1. Аҳдлашувчи Томонлардан бирининг сармоядори ва иккинчи Аҳдлашувчи Томон ўртасида иккинчи томоннинг ҳудудида биринчи томоннинг сармоясига тааллуқли ҳуқуқий низолар ёзма равишдаги талабнома топширганига уч ой бўлишига қарамай, Томонлар уларни ҳал қила олмасалар, Аҳдлашувчи Томонлардан бирининг талабига мувофиқ кўриб чиқиш учун:

а) 1965 йил 18 мартда Вашингтонда имзоланган сармоялар бўйича давлатлар ва бошқа давлатлар фуқаролари ўртасидаги низоларни ҳал қилиш тартиби тўғрисидаги Битим қоидаларидан келиб чиқиб, агар иккала Томон ҳам бу Шартномада қатнашса, сармоя низоларини ҳал этиш бўйича халқаро марказ (бундан кейин «марказ»)га;

б) халқаро савдо ҳуқуқи бўйича Бирлашган Миллатлар Ташкилоти Комиссиясининг амалдаги ҳакамлик регламентига мувофиқ тузилган халқаро ҳакамлик «ad hoc» судига берилади. Низолашувчи Томонлар мазкур қоидаларга ўзгаришлар киритиш тўғрисида ёзма равишда аҳдлашиб олишлари мумкин.

2. Ушбу модданинг 1-бандидаги низони ҳакамлик судига беришга тааллуқли қоидалар борлигидан қатъи назар, сармоядор низони кўриб чиқиш учун ҳакамлик судига бергунга қадар низони ҳал этиш тартибини танлаш ҳуқуқига эга.

Аҳдлашувчи Томонлар ҳакамлик суди қарорини тан оладилар ва 1958 йил Нью-Йоркда қабул қилинган ажнабий ҳакам қарорларини эътироф этиш ва бажариш тўғрисидаги конвенцияга мувофиқ уни бажарадилар.

1. Аҳдлашувчи Томонлар ўртасидаги ушбу Битимни талқин қилиш ёки қўллашга тааллуқли низолар имкони борича музокаралар йўли билан ҳал қилиниши лозим.

2. Аҳдлашувчи Томонлар ўртасидаги низони бундай йўл билан ҳал қилиш имконияти бўлмаган тақдирда Аҳдлашувчи Томонлардан бирининг илтимосига кўра, бетараф ҳакамлик суди кўриб чиқиш учун топширилиши лозим.

3. Бундай бетараф ҳакамлик суди ҳар бир аниқ ҳолат учун алоҳида қуйидагича тартибда ташкил қилинади. Бетараф ҳакамлик судини тузиш тўғрисидаги илтимос тушганидан кейин 2 ой вақт мобайнида Томонларнинг ҳар бири биттадан судья тайинлайди. Кейин бу икки судья учинчи давлат фуқаросини танлашади. У иккала Аҳдлашувчи Томонлар розилиги билан бетараф ҳакамлик суд раиси этиб тайинланади. Раис бетараф ҳакамлик судининг икки аъзоси тайинланган кундан бошлаб икки ойлик муддат мобайнида тайинланиши лозим.

4. Агар ушбу модданинг 3-бандида кўрсатилган муддат ичида лозим бўлган тайинлашлар амалга ошмаса, Томонларнинг ҳар бири, ўзгача келишув бўлмаган тақдирда, зарур тайинлашларни амалга ошириш илтимоси билан Халқаро Суд Раисига мурожаат қилади. Агар Раис Аҳдлашувчи Томонлардан бирининг фуқароси бўлса ёки у қандайдир сабабга кўра мазкур вазифани бажара олмаса, бундай ҳолда лозим бўлган тайинлашларни амалга ошириш Халқаро Суднинг Вице-Раисига тавсия қилинади. Агар Вице-Раис Аҳдлашувчи Томонлардан бирининг фуқароси бўлса ёки у ҳам мазкур вазифани бажара олмаса, у ҳолда лозим бўлган тайинлашларни амалга оширишни ундан кейинги вазифаси жиҳатидан катта бўлган Халқаро Суд аъзосига тавсия қилинади. У Аҳдлашувчи Томонлардан ҳеч қандай монеъсиз бажара олиши керак.

5. Бетараф ҳакамлик суди кўпчилик овоз билан қарор қабул қилади. Бетараф ҳакам судининг қарори ҳар иккала Томон учун мажбурийдир. Аҳдлашувчи Томонлар суд раиси ва аъзоларининг харажатларини тенг шаклда ўз зиммаларига оладилар. Бетараф ҳакамлик суди ўз қарорида Аҳдлашувчи Томонлардан бири харажатларнинг кўпроқ қисмини қоплайди, деб ажрим чиқариш ҳам мумкин. Бундай ажрим ҳар иккала Томон учун мажбурий бўлади. Суд иш тартиби қоидаси тўғрисидаги масалани ўзи мустақил ҳал қилади.

Агар Аҳдлашувчи Томон ёки у тарафдан шу Аҳдлашувчи Томоннинг сармоядори сармояларига нисбатан берган кафолати асосида тайинланган вакил сармоядорга товон ҳақи тўласа, у ҳолда биринчи Аҳдлашувчи Томон ёки у тарафидан тайинланган вакил ушбу Битимга асосланган ҳолда суброгация тартибида сармоядорнинг маълум ҳуқуқларига эга бўлади.

Ушбу Битим ҳеч бир қоидаси миллий қонунлар ёки халқаро ҳуқуқ асосида берилган ҳуқуқлар ёки имтиёзларни чекламайди.

1. Ушбу Битим Аҳдлашувчи Томонлар Битимнинг кучга кириши учун зарур конституцион расмий жиҳатларни бажарганлиги тўғрисида бир-бирларига дипломатия йўли билан хабар барганларидан сўнг 30 кун ўтгач, кучга киради.

2. Ушбу Битим 15 йил муддат ичида амалда бўлади ва агар ушбу модданинг 3-бандига мувофиқ у бекор қилинмаган тақдирда шу муддат мобайнида ўз кучини сақлаб қолади.

3. Аҳдлашувчи Томонларнинг ҳар бири иккинчи Аҳдлашувчи Томонни ушбу Битимнинг амал қилишини дастлабки биринчи 15 йиллик муддат ичида ёки ундан кейин ҳар қандай вақтда тўхтатиши тўғрисида бир йилдан кам бўлмаган муддат ичида дипломатия йўли билан ёзма равишда хабар бериб, бекор қилиши мумкин.

4. Ушбу Битимнинг амал қилиши тўхтатилгунга қадар қўйилган сармояларига нисбатан 1 ва 11-моддаларнинг қоидалари Битимнинг амал қилиши тўхтатилгандан кейинги 15 йил муддат ичида ўз кучида қолади.

Битим 1992 йил 1 октябрда Тошкент шаҳрида икки асл нусхада, ҳар бири ўзбек ва фин тилларида тузилди, ҳар иккала матн ҳам бир хил кучга эгадир.