Ўзбекистон Республикаси Вазирлар Маҳкамасининг «Вазирликлар, идоралар ва бошқа республика органлари ходимларининг чет эл хизмат сафарларига боришини тартибга солиш чора-тадбирлари тўғрисида» 1999 йил 9 сентябрдаги 417-сон қарорининг 10-бандига мувофиқ Вазирлар Маҳкамаси қарор қилади:

1. Қуйидагилар:

Ўзбекистон Республикасининг Элчихонаси тўғрисидаги низом 1-иловага мувофиқ;

Ўзбекистон Республикасининг вазирликлари, идоралари, бошқа давлат органлари, ташкилотлари ва корхоналарининг чет элдаги ваколатхоналари тўғрисидаги Намунавий низом 2-иловага мувофиқ тасдиқлансин.

2. Белгилансинки, Ўзбекистон Республикаси Ташқи иқтисодий алоқалар агентлиги Ўзбекистон Республикасининг вазирликлари, идоралари, бошқа давлат органлари, ташкилотлари ва корхоналарининг ҳисобга қўйилган чет эллардаги ваколатхоналари тўғрисида Ўзбекистон Республикаси Ташқи ишлар вазирлигига ҳар чоракда ахборот бериб туради.

3. Маълумот учун қабул қилинсинки:

Ўзбекистон Республикасининг чет элдаги дипломатик ваколатхоналари ва консуллик муассасалари раҳбарлари ўша давлатда жойлашган Ўзбекистон Республикасининг бошқа ваколатхоналари, делегациялари ва мутахассислари гуруҳларига кўмаклашадилар ва уларнинг фаолиятини мувофиқлаштириб борадилар;

ваколатхоналар ва мутахассислар гуруҳлари раҳбарлари дипломатик ваколатхоналарни ёки консуллик муассасаларини ўз фаолияти тўғрисида хабардор қилиб турадилар, уларга ўз функцияларини амалга оширишларида кўмаклашадилар.

4. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов ва Ўзбекистон Республикаси Ташқи ишлар вазири А.Ҳ. Комилов зиммасига юклансин.

1. Ўзбекистон Республикаси Элчихонаси (кейинги ўринларда «Элчихона» деб аталади) Ўзбекистон Республикасининг Элчихона жойлашган мамлакатда Ўзбекистон Республикаси манфаатларини ифодаловчи ташқи муносабатлар соҳасидаги давлат органи ҳисобланади.

Элчихона тегишли хорижий давлат билан элчихоналар даражасида дипломатик муносабатлар ўрнатилиши муносабати билан Ўзбекистон Республикаси Вазирлар Маҳкамасининг қарорига кўра таъсис этилади.

Элчихона Ўзбекистон Республикаси Ташқи ишлар вазирлиги тизимига киради.

2. Элчихона Элчихона жойлашган давлатда Ўзбекистон Республикасининг ташқи сиёсий йўли амалга оширилишини ва унинг манфаатлари ҳимоя қилинишини таъминлайди.

3. Элчихона ўз фаолиятини Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, Ўзбекистон Республикаси Ташқи ишлар вазирлиги тўғрисидаги низомга, мазкур низомга, Ўзбекистон Республикаси Ташқи ишлар вазирлигининг меъёрий ҳужжатлари ва кўрсатмаларига, шунингдек, дипломатик муносабатлар тўғрисидаги Вена конвенциясига ҳамда халқаро ҳуқуқнинг бошқа умумэътироф этилган ҳужжатларига мувофиқ амалга оширади.

4. Элчихона биносида ёки унинг ҳудудида Ўзбекистон Республикасининг Давлат байроғи кўтарилади, Ўзбекистон Республикаси Давлат герби тасвири туширилган ҳамда ўзбек тилида ва Элчихона жойлашган давлатнинг давлат тилида «Ўзбекистон Республикасининг (Элчихона жойлашган хорижий давлат номи)даги Элчихонаси» сўзлари ёзилган лавҳа ўрнатилади. Ўзбекистон Республикасининг давлат рамзларидан Элчихона жойлашган давлатнинг протокол амалиёти ҳисобга олинган ҳолда фойдаланилади.

5. Элчихона ходимлари ва уларнинг оила аъзолари Элчихона жойлашган давлатнинг қонунлари ва бошқа меъёрий ҳужжатларини, анъаналари ва урф-одатларини ҳурмат қилишга, Элчихона жойлашган давлатнинг ички ишларига аралашиш деб талқин қилиниши мумкин бўлган ҳар қандай хатти-ҳаракатлардан ўзларини тийишга мажбурдирлар.

6. Қуйидагилар Элчихонанинг асосий вазифалари ва функциялари ҳисобланади:

Элчихона жойлашган давлатда Ўзбекистон Республикаси манфаатларини ифодалаш;

Элчихона жойлашган давлатда Ўзбекистон Республикасининг ташқи сиёсий йўлини амалга ошириш ва Ўзбекистон Республикасининг ва унинг фуқароларининг манфаатларини халқаро ҳуқуқ йўл қўйган доираларда ҳимоя қилиш;

Элчихона жойлашган давлат билан муносабатларнинг аҳволи ва истиқболлари, Ўзбекистон Республикасининг миллий манфаатлари ва унинг фуқароларининг манфаатлари ҳимоя қилинишини таъминлаш масалалари бўйича таклифлар тайёрлаш ва киритиш;

Ўзбекистон Республикаси билан Элчихона жойлашган мамлакат ўртасида ўзаро фойдали савдо-иқтисодий ва молиявий ҳамкорлик ривожланишига ҳар томонлама кўмаклашиш;

Элчихона жойлашган мамлакатда Ўзбекистон Республикасининг иқтисодий манфаатларини ҳимоя қилиш, Элчихона жойлашган мамлакатдан Ўзбекистон Республикасига инвестицияларни жалб қилиш тадбирларини амалга ошириш, товарларнинг Ўзбекистон Республикасидан Элчихона жойлашган давлат бозорларига экспорт қилинишига кўмаклашиш;

Элчихона жойлашган мамлакатнинг савдо режимлари ва тариф сиёсатини, шунингдек, савдо-иқтисодий ҳамкорлик истиқболларининг аҳволини таҳлил қилиш, шу асосда унинг самарадорлигини ошириш юзасидан тавсиялар ва тегишли таклифлар тайёрлаш;

ташқи иқтисодий фаолиятнинг ўзбекистонлик қатнашчиларига ҳамкорлар излашда ва танлашда кўмаклашиш, кўргазмалар, ярмаркалар ўтказиш, Элчихона жойлашган давлатнинг ишбилармонлари доиралари билан учрашувлар ташкил этиш;

Элчихона жойлашган мамлакатнинг ташқи сиёсий идоралари билан, шунингдек, ушбу давлатда аккредитация қилинган хорижий ваколатхоналар билан доимий алоқа ўрнатиш;

Элчихона жойлашган давлатда Ўзбекистон Республикасининг ички ва ташқи сиёсати, унинг ижтимоий-иқтисодий, маданий ва маънавий ҳаёти тўғрисидаги расмий ахборотларни тарқатиш;

Элчихона жойлашган давлат ҳукумати ва бошқа муассасалари билан музокаралар олиб бориш, белгиланган тартибда икки томонлама ҳужжатларни имзолаш;

Элчихона жойлашган давлатдаги шарт-шароитлар ва воқеаларни барча қонуний воситалар билан аниқлаштириш ҳамда Элчихона жойлашган давлатнинг ижтимоий-сиёсий ва ижтимоий-иқтисодий ривожланиши, ташқи сиёсий ва ташқи иқтисодий йўли тўғрисида мунтазам ахборот бериш;

Ўзбекистон Республикаси билан Элчихона жойлашган давлат ўртасидаги дўстона муносабатларни рағбатлантириш ҳамда уларнинг сиёсий, иқтисодий, маданий ва бошқа соҳалардаги ўзаро муносабатлари ривожланишига кўмаклашиш;

олий ва юқори даражада давлатлараро ташрифларни тайёрлашда ва амалга оширишда, шунингдек, давлат ва ҳукумат делегациялари ташрифларини тайёрлаш ва амалга оширишда қатнашиш;

Ўзбекистон Республикасининг Элчихона жойлашган давлат билан халқаро шартномалари лойиҳаларини, шартномалар тузиш, уларни бажариш, амал қилишини тўхтатиш ва тўхтатиб қўйиш тўғрисидаги таклифларни тайёрлашда қатнашиш, Ўзбекистон Республикасининг Элчихона жойлашган давлат билан икки томонлама шартномалари, шунингдек, кўп томонлама шартномаларнинг Элчихона жойлашган давлат билан Ўзбекистон Республикаси муносабатларига тегишли қисми бажарилишини кузатиш;

Элчихона жойлашган давлатнинг давлат ҳокимияти органлари, идоралари, жамоат бирлашмалари, ишбилармонлари, илмий ва маданий доиралари, оммавий ахборот воситалари билан алоқалар ўрнатиш ва уларни қўллаб-қувватлаш;

Элчихона жойлашган давлатда яшовчи ватандошлар ва миллий марказлар билан алоқалар ва муносабатлар ўрнатилиши ва ривожлантирилишига кўмаклашиш;

Ўзбекистон Республикаси Ташқи ишлар вазирлигининг топшириғига кўра Ўзбекистон Республикаси делегацияларини ва давлат ҳокимияти органлари вакилларини Элчихона жойлашган давлатга юбориш масалаларини келишиб олиш;

Элчихона жойлашган давлатда Ўзбекистон Республикаси ва унинг фуқароларининг мулкий ҳуқуқлари ва манфаатларини ҳимоя қилиш;

Элчихонанинг, унинг ходимлари ва уларнинг оила аъзоларининг хавфсизлигини таъминлашга доир зарур чора-тадбирларни амалга ошириш, фавқулодда вазиятлар шароитида Ўзбекистон Республикасининг чет элдаги муассасалари ва унинг фуқароларининг хатти-ҳаракатларини белгиланган тартибда ташкил этиш ҳамда улар хатти-ҳаракатларига раҳбарлик қилиш;

Элчихона жойлашган давлатнинг олдиндан берган розилиги билан ва Элчихона жойлашган давлатда вакили бўлмаган учинчи давлатнинг илтимосига кўра учинчи давлат ва унинг фуқароларининг манфаатларини вақтинча ҳимоя қилиш;

Ўзбекистон Республикаси қонун ҳужжатларига, Элчихона жойлашган давлат қонун ҳужжатларига, халқаро ҳуқуқ нормаларига мувофиқ бошқа функцияларни бажариш.

Ушбу мақсадда Элчихона Элчихона жойлашган давлатда Ўзбекистон Республикасининг ижро этувчи ҳокимият органлари, давлат муассасалари, ташкилотлари ва корхоналари ваколатхоналарининг, уларнинг делегациялари ва мутахассислари гуруҳларининг, шунингдек, ўқувчиларининг ишига кўмаклашади ва улар фаолиятини мувофиқлаштиради.

Кўрсатиб ўтилган ваколатхоналар, делегациялар ва мутахассислар гуруҳлари Элчихона ўз функцияларини амалга оширишида унга кўмаклашади ва ўз фаолияти тўғрисида Элчихонага ахборот беради.

7. Элчихонага Ўзбекистон Республикаси Президентининг Фармони билан тайинланадиган ва Элчихона жойлашган давлатда аккредитация қилинган Ўзбекистон Республикасининг юқори расмий вакили ҳисобланувчи Ўзбекистон Республикасининг хорижий давлатдаги Фавқулодда ва Мухтор Элчиси (кейинги ўринларда — Элчи деб аталади) бошчилик қилади.

Элчи Ўзбекистон Республикаси манфаатларини ифодалайди, Элчихона ишига бевосита раҳбарлик қилади, Элчихонага юкланган вазифалар бажарилиши ва унинг функциялари амалга оширилиши учун шахсан жавоб беради, Ўзбекистон Республикаси Ташқи ишлар вазирлигининг меъёрий ҳужжатларига мувофиқ Элчихона тузилмасини белгилайди, унинг ходимлари ўртасидаги лавозим вазифаларини тақсимлайди.

Элчихона жойлашган давлатда Элчи бўлмаган тақдирда унинг функцияларини Элчихонанинг катта дипломатик ходимларидан белгиланган тартибда тайинланадиган Ўзбекистон Республикаси ишлари бўйича вақтинчалик ишончли вакил бажаради.

Элчихона, унинг ходимлари ва улар оила аъзоларининг хавфсизлигини таъминлаш, давлат ва қонун билан қўриқланадиган бошқа сирларни муҳофаза қилишни ташкил этиш, молиявий маблағларни тасарруф этиш, ходимлар ишини ташкил этиш ва Элчихона бўлинмаларининг ўзаро ҳамкорлиги бевосита Элчи томонидан ёки Элчи томонидан тайинланадиган катта дипломатик ходим томонидан амалга оширилади.

8. Элчихона штат жадвали ва харажатлар сметаси белгиланган тартибда Ўзбекистон Республикаси Вазирлар Маҳкамасининг қарори билан тасдиқланади.

Элчихонада тасдиқланган штат жадвали ва харажатлар сметаси доирасида Ўзбекистон Республикаси Ташқи ишлар вазирлиги ва Молия вазирлигининг қарорига кўра қуйидаги: ташқи сиёсат, ички сиёсат, икки томонлама муносабатлар, иқтисодий ишлар, фан ва техника, матбуот ва ахборот, маданият, консуллик, протокол йўналишлари ва бошқа масалалар бўйича бўлимлар ва гуруҳлар ташкил этилиши мумкин.

Ташқи ишлар вазирлиги Молия вазирлиги билан биргаликда Вазирлар Маҳкамаси томонидан тасдиқланган ходимлар доирасида навбатдаги молиявий йил учун бюджетда тасдиқланадиган чет элдаги муассасаларни маблағ билан таъминлаш ҳажмларидан келиб чиққан ҳолда фаолиятнинг иккинчи ва келгуси йиллари учун Элчихонанинг харажатлар сметасини ҳар йили тасдиқлайди.

9. Элчихона ходимларининг ҳуқуқлари ва вазифалари Ўзбекистон Республикасининг қонун ҳужжатлари, Ўзбекистон Республикаси Ташқи ишлар вазирлигининг меъёрий ҳужжатлари, лавозим йўриқномалари билан белгиланади. Элчихона ходимлари Элчининг, у бўлмаганда Ўзбекистон Республикаси ишлари бўйича вақтинчалик ишончли вакилнинг буйруқлари ва кўрсатмаларини бажаришга мажбурдирлар.

10. Элчихона иши Ўзбекистон Республикаси Ташқи ишлар вазирлиги томонидан тасдиқланадиган режалар асосида ташкил этилади.

11. Элчихона штатига тайинлаш, шунингдек, ходимларни бошқа лавозимга ўтказиш ва алмаштириш Ўзбекистон Республикаси Ташқи ишлар вазирлиги томонидан белгиланган тартибда амалга оширилади.

Ходимлар Элчихонада ишлаш учун, қоидага кўра, икки йил муддатга хизматга юборилади. Ишлаш муддати узайтирилиши мумкин, лекин у кўпи билан икки йилдан ошиб кетмаслиги керак.

Элчихонада лавозимга кейинги тайинлаш кечи билан икки йилдан кейин амалга оширилади.

Элчилар ва вакилларнинг лавозимда бўлиш муддатлари ҳар бири алоҳида ҳолда Ўзбекистон Республикаси Президенти томонидан белгиланади.

12. Ўзбекистон Республикаси қонун ҳужжатларига мувофиқ Элчихонада сиёсий партиялар тузилмалари, диний ва жамоатчилик бирлашмалари ташкил этилиши мумкин эмас, касаба уюшмалари бундан мустасно.

13. Элчихона юридик шахс ҳисобланади, Ўзбекистон Республикаси Давлат герби тасвирланган ва ўз номи ёзилган муҳрга, тегишли муҳрлар ва штампларга, банкларда ҳисоб рақамларига эга бўлади.

14. Ўзбекистон Республикасининг мулки ҳисобланган ер участкалари, бинолар, иншоотлар ва Элчихонанинг бошқа мол-мулклари унга Ўзбекистон Республикаси қонун ҳужжатларида белгиланган тартибда биркитилиб қўйилади.

Элчихона ўзига биркитилиб қўйилган мол-мулкка нисбатан ўзи жойлашган давлат қонун ҳужжатларини ҳисобга олган ҳолда уларга эгалик қилиш, улардан фойдаланиш ва тасарруф этиш ҳуқуқини белгиланган тартибда амалга оширади.

15. Элчихона фаолиятини таъминлаш билан боғлиқ молиявий ва бошқа масалалар Ўзбекистон Республикаси қонун ҳужжатларига ва Ўзбекистон Республикаси Молия вазирлиги ҳамда Ташқи ишлар вазирлиги меъёрий ҳужжатларига мувофиқ ҳал этилади.

16. Мазкур Низом халқаро ташкилотлар ҳузуридаги Ўзбекистон Республикаси миссиялари ва ваколатхоналари фаолияти учун ҳам татбиқ этилади.

1. Ўзбекистон Республикаси вазирликлари, идоралари, давлат бошқа органлари, ташкилотлари, корхоналари (кейинги ўринларда муассис деб аталади) хорижий давлатларда ваколатхоналар, бош ваколатхоналар ёки минтақавий ваколатхоналар (кейинги ўринларда — ваколатхона деб аталади) очишлари мумкин.

Ваколатхона Ўзбекистон Республикасининг ваколатхона ўзининг таклифига биноан таъсис этилган вазирлиги, идораси, давлат бошқа органи, ташкилоти, корхонаси тизимига киради.

Чет эллардаги ваколатхона мустақил ваколатхона сифатида таъсис этилади ёхуд бош ёки минтақавий ваколатхона таркибига киради.

Бош ваколатхона Ўзбекистон Республикаси вазирлиги, идорасининг ёки давлат бошқа органи, ташкилоти, корхонасининги икки ёки ундан кўпроқ ваколатхонаси бўлган давлатда, шунингдек, уларнинг юқори даражадаги манфаатлари уни талаб қиладиган давлатларда таъсис этилиши мумкин.

Чет эллардаги минтақавий ваколатхона иқтисодий ва жуғрофий белгилари бўйича ўзаро боғлиқ давлатлар гуруҳи учун таъсис этилади.

Ваколатхона очиш учун розилик, кейинчалик уни ҳисобга қўйиш шарти билан, Ўзбекистон Республикаси Ташқи иқтисодий алоқалар агентлиги томонидан берилади.

2. Ваколатхона ўзи жойлашган давлат қонунчилигига мувофиқ рўйхатдан ўтказилади.

3. Ваколатхона ўз фаолиятида Ўзбекистон Республикаси қонун ҳужжатларига, ушбу Низомга, ваколатхонанинг таъсис ҳужжатларига, шунингдек, ўзи жойлашган давлат қонунчилигига амал қилади.

4. Ваколатхона ходимлари сони Ўзбекистон Республикасининг тегишли вазирлиги, идораси, давлат бошқа органи, ташкилоти, корхонаси эҳтиёжларидан келиб чиқиб, ваколатхона жойлашган давлатдаги мавжуд шарт-шароитларни ҳисобга олган ҳолда белгиланади.

5. Ваколатхоналарда сиёсий партиялар тузилмалари, диний ва жамоат бирлашмалари ташкил этилиши мумкин эмас, касаба уюшмалари бундан мустасно.

6. Ваколатхона ходимлари ва уларнинг оила аъзолари ҳудудида ваколатхона фаолият кўрсатаётган давлатнинг қонунлари ва меъёрий ҳужжатларига риоя этишга, анъана ва урф-одатларини ҳурмат қилишга мажбурдирлар.

7. Ваколатхона ходимларининг ва улар оиласи аъзоларининг шахсий манфаатни кўзлаб тадбиркорлик ёки тижорат фаолияти билан шуғулланишлари тақиқланади.

8. Чет эллардаги ваколатхоналар:

ҳамкорлик шаклларини ривожлантириш, чуқурлаштириш ва такомиллаштириш имкониятларини қидириб топиш;

савдо, иқтисодиёт, молия, фан ва техника, транспорт, туризм, маданият соҳасидаги ва бошқа соҳалардаги ҳамкорлик тўғрисидаги битимларни амалга оширишга самарали кўмаклашиш;

савдо-иқтисодий алоқаларни ривожлантириш ҳамда иқтисодий, тижорат ва илмий-техника ахборотлари алмашишни кенгайтириш;

мамлакатимиз товарларининг хорижий бозорларга кириб бориши, шу жумладан конференциялар, кўргазмалар, кўчма ярмаркалар ва реклама компаниялари ўтказиш бўйича маркетинг тадқиқотлари ўтказиш ҳамда амалий ёрдам кўрсатиш;

тижорат битишувлари ва бошқа шартномалар бажарилишини таъминлаш;

машиналар, асбоб-ускуналар, товарлар ва хизматлар экспорти ва импортини ривожлантиришга самарали кўмаклашиш, уларга техника хизматлари кўрсатиш, жаҳон техникасининг энг янги ютуқлари билан таништириш мақсадида очилади.

Ваколатхонанинг асосий вазифалари, функциялари, тузилмаси ва фаолиятини ташкил этиш уларнинг таъсис ҳужжатларига ҳамда муассиснинг хусусиятларига мувофиқ белгиланади.

9. Ўзбекистон Республикасининг дипломатик ваколатхоналари ва консуллик муассасалари ўзлари жойлашган давлатдаги ваколатхоналар фаолиятини мувофиқлаштириб борадилар. Ваколатхона дипломатик ваколатхоналарни ва консуллик муассасаларини ўз фаолияти тўғрисида хабардор қилиб туради ва уларга ўз функцияларини амалга оширишда кўмаклашади.

Ваколатхона бошлиғи дипломатик ваколатхонани ёки консуллик муассасасини муассислар томонидан назарда тутилган чет элларда юриш-туриш қоидалари ваколатхона ходимлари томонидан бузилишининг барча ҳоллари тўғрисида мажбурий тартибда хабардор қилиб туриши керак.

Ваколатхона жойлашган давлатда Ўзбекистон Республикасининг дипломатик ваколатхоналари ва консуллик муассасалари бўлмаган тақдирда ваколатхона олдиндан келишиб олган ҳолда вазирликлар, идоралар, давлат бошқа органларининг ваколатхона жойлашган давлатга хизмат сафарига келишган мансабдор шахсларига, делегацияларига, мутахассислар гуруҳларига ёрдам кўрсатадилар.

10. Минтақавий ваколатхонани минтақавий вакил, бош ваколатхонани — бош вакил, ваколатхонани — муассис вакили бошқаради.

Минтақавий вакил, бош вакил ва вакил бевосита Ўзбекистон Республикаси вазирлиги, идораси, давлат бошқа органи, ташкилоти, корхонаси раҳбарига бўйсунади ва улар томонидан берилган ишончнома асосида фаолият кўрсатадилар.

11. Ваколатхона бошлиғи ва ваколатхона ходимлари лавозим вазифаларининг бажарилиши учун шахсан жавоб берадилар.

12. Ваколатхона ишлари ваколатхона раҳбари томонидан тузиладиган ва муассис тасдиқлайдиган режалар асосида олиб борилади.

13. Ваколатхона бошлиғи ўз фаолиятини ушбу Низомга мувофиқ амалга оширади ва у қуйидаги ҳуқуқларга эга:

ваколатхона жойлашган давлат идоралари ва бошқа ташкилотлари олдида муассиснинг расмий вакили сифатида иш кўриш, ушбу ташкилотларнинг раҳбар шахслари билан бевосита алоқалар ўрнатиш;

ваколатхона жойлашган давлатдаги ваколатхонага унга юкланган вазифалардан келиб чиққан ҳолда раҳбарлик қилиш;

муассис номидан ваколатхона жойлашган давлатдаги ташкилотлар билан ўз ваколатлари доирасида шартномалар ва контрактлар тузиш;

ваколатхонанинг пул маблағларини, ўз номига берилган ишончномага биноан, тасдиқланган смета доирасида, тасарруф этиш;

йил чораги режаларини ваколатхона учун тасдиқланган йиллик режалар доирасида, бу тўғрида юқори турувчи вакилни ва муассисни хабардор қилган ҳолда, ўзгартириш;

ваколатхонага тегишли ёки ўзи ижарага олган мол-мулкни муассис билан келишган ҳолда суғурта қилиш;

белгиланган смета доирасида, муассис билан келишган ҳолда, ваколатхона ходимларини ишга қабул қилиш ва ишдан бўшатиш;

муассис билан келишган ҳолда Ўзбекистон Республикаси фуқаролари билан, шунингдек, Ўзбекистон Республикаси фуқаролари бўлмаган шахслар билан меҳнат шартномаларини тузиш ва бекор қилиш;

ваколатхона учун ишлаб чиқариш биноларини ва ваколатхона ходимлари учун уй-жойларни ижарага олиш юзасидан шартномалар тузиш;

ваколатхона ходимларига нисбатан Ўзбекистон Республикасининг ва ваколатхона жойлашган давлатнинг меҳнат қонун ҳужжатларида назарда тутилган рағбатлантириш ва интизомий жазо чораларини қўллаш.

Ваколатхонанинг таъсис ҳужжатларида, муассис фаолияти хусусиятларига мувофиқ, ваколатхона бошлиғи учун қўшимча ҳуқуқлар назарда тутилиши мумкин.

14. Ваколатхона бошлиғи қуйидагиларга мажбур:

ваколатхона фаолиятининг юқори рентабеллигини ва самарадорлигини таъминлаш чора-тадбирларини кўриш;

муассисга ваколатхона ишларини режалаштириш ва ташкил этиш, шунингдек, ишлаб чиқариш — молия фаолияти истиқбол режалари бўйича таклифлар киритиш;

ваколатхона барча ходимларининг тайёргарлиги юқори даражада бўлишини, уларнинг малакасини доимий равишда оширишни таъминлаш;

ваколатхона биноларини иғвогарона ва террористик ҳодисалардан муҳофаза қилиш юзасидан ташкилий тадбирларни амалга ошириш, ваколатхона ходимлари ва уларнинг оила аъзолари хавфсизлигини таъминлаш мақсадида барча зарур чора-тадбирларни кўриш;

ваколатхона жамоасида соғлом маънавий муҳитни таъминлаш, ваколатхона ходимларининг ва улар оила аъзоларининг саломатлиги, турмуши, маданий хордиғи ва таълим олиши тўғрисида ғамхўрлик қилиш;

ваколатхона биноларидан ваколатхона функцияларига зид бўлган мақсадларда фойдаланишга йўл қўймаслик;

муассисга белгиланган тартибда ваколатхонанинг ишлаб чиқариш-молия ва тижорат фаолияти тўғрисида ҳисоботлар тақдим этиш.

Ваколатхонанинг таъсис ҳужжатларида ваколатхона бошлиғи учун муассис фаолияти хусусиятига мувофиқ равишда қўшимча мажбуриятлар назарда тутилиши мумкин.

15. Ваколатхона бошлиғи:

муассиснинг халқаро фаолияти ва ташқи алоқаларини такомиллаштириш ҳамда самарадорлигини ошириш мақсадида унга юкланган вазифаларнинг зарур даражада бажарилиши;

умуман ваколатхона тўғрисидаги Низомга риоя этилиши;

муассис томонидан белгиланган ишлаб чиқариш-молия режалари ва топшириқларининг бажарилиши;

режа ва молия интизомининг, ҳисоб ва ҳисоботнинг аҳволи, муассиснинг тегишли бўлимлари ва хизматларига ҳисобот ҳужжатларининг ўз вақтида топширилиши;

давлат, хизмат ва тижорат сирлари сақланишини таъминлаш;

ваколатхона ходимлари ва улар оила аъзоларининг хавфсизлигини, шунингдек, ваколатхона бинолари муҳофазасини таъминлаш бўйича тадбирларнинг ташкил этилиши ва амалга оширилиши;

ваколатхона ходимлари, уларнинг оила аъзолари, ваколатхона йўли билан келувчи делегациялар аъзолари ўртасидаги интизомнинг аҳволи, улар томонидан фуқароларнинг чет элларда юриш-туриши меъёрлари ва қоидаларига риоя этилиши;

ваколатхона йўли билан ваколатхона жойлашган давлатга келган Ўзбекистон Республикаси фуқаролари билан содир бўлган барча воқеалар тўғрисида элчихона (консуллик) ва муассис номига йўлланган ахборотларнинг ишончлилиги ва ўз вақтида топширилиши;

иш юритишнинг, ваколатхонага тегишли моддий бойликларни ҳисобга олиш ва сақлашнинг аҳволи учун жавоб беради.

Ваколатхонанинг таъсис ҳужжатларида ваколатхона бошлиғи учун муассис фаолияти хусусиятига мувофиқ равишда бошқа жавобгарликлар ҳам назарда тутилиши мумкин.

16. Ваколатхона бошлиғи Ўзбекистон Республикасининг тегишли вазирлиги, идораси, давлат бошқа органи, ташкилоти, корхонасининг Ўзбекистон Республикаси фуқаролари бўлган ходимлари орасидан тайинланади.

Ваколатхона бошлиғи ва ходимларини ишга тайинлаш, шунингдек, уларни чақириб олиш муассис томонидан белгиланган тартибда амалга оширилади.

17. Ваколатхонада ишлашга, муассис билан келишган ҳолда, контракт асосида, Ўзбекистон Республикасининг ваколатхона жойлашган давлат ҳудудида доимий яшовчи фуқаролари, шунингдек Ўзбекистон Республикаси фуқароси бўлмаган шахслар қабул қилиниши мумкин.

18. Бошлиқлар ва ходимлар ваколатхона жойлашган давлатдаги тегишли ваколатхонада ишлаш учун, меҳнат шартномасини расмийлаштирган ҳолда, қоидага кўра:

минтақавий ваколатхоналар, бош ваколатхоналар, ваколатхоналар бошлиқлари — уч йилгача муддатга;

ваколатхонанинг штатдаги бошқа ходимлари — икки йилгача муддатга юборилади.

Ўзбекистон Республикасининг тегишли вазирлиги, идораси, давлат бошқа органи, ташкилоти, корхонаси фаолияти хусусиятига кўра, меҳнат шартномаси билан белгиланган ишлаш муддати вакил ва штатдаги бошқа ходимлар учун кўпи билан бир йилга узайтирилиши мумкин.

Ходимни ваколатхонадаги лавозимга кейинги тайинлаш орадан икки йил ўтгандан кейин амалга оширилиши мумкин. Ушбу муддат истисно ҳоллардагина бир йилгача қисқартирилиши мумкин.

Ваколатхона ходими эгаллаб турган лавозимидан:

ваколатхона жойлашган давлатда унинг саломатлиги ўз функционал вазифаларини бажаришга тўсқинлик қиладиган даражада жиддий ёмонлашганда ва унинг оила аъзолари оғир касалланганда;

унинг томонидан эгаллаб турган лавозимида бундан кейин қолишига зид бўлган қоида бузиш содир этилганда;

ваколатхонанинг ички меҳнат тартибини муттасил бузганда;

Ўзбекистон Республикасининг ва ваколатхона жойлашган давлатнинг қонун ҳужжатларида назарда тутилган бошқа ҳолларда муддатидан олдин чақиртириб олиниши мумкин.

Ўзбекистон Республикаси вазирликлари, идоралари, давлат бошқа органлари, ташкилотлари, корхоналари ўзларининг ички ҳужжатларида мутахассисларни чет элга юборишни навбатлаш тартибини ва уларни жўнатишни олдиндан келишиб олиш масалаларини янада аниқлаштирадилар.

19. Ваколатхона фаолиятини таъминлаш билан боғлиқ бўлган молиявий ва бошқа масалалар Ўзбекистон Республикасининг қонун ҳужжатларига, Ўзбекистон Республикасининг тегишли вазирлиги, идораси, давлат органи, ташкилоти, корхонаси меъёрий ҳужжатларига, шунингдек, ваколатхона жойлашган давлат қонун ҳужжатларига мувофиқ ҳал этилади.

20. Ваколатхона фаолиятини назорат қилиш тегишли вазирлик, идора, давлат органи, ташкилот, корхона меъёрий ҳужжатлари билан белгиланган тартибда Ўзбекистон Республикаси қонун ҳужжатларига мувофиқ амалга оширилади.

21. Ваколатхоналар Ўзбекистон Республикаси вазирлиги, идораси, давлат органи, ташкилоти, корхонасининг таркибий бўлинмалари ҳисобланадилар, ўз номлари ёзилган штамп ва муҳрга, ўз фаолиятларини амалга ошириш учун ўзлари жойлашган давлат банкларида ҳисоб рақамларига эга бўладилар.