Ўзбекистон Республикасининг «Йўл ҳаракати хавфсизлиги тўғрисида»ги Қонуни (ЎР ҚҲТ, 2013 й., 15-сон, 197-модда)га мувофиқ Ўзбекистон Республикаси Вазирлар Маҳкамасининг 2003 йил 31 январдаги 54-сонли қарори билан тасдиқланган «Транспорт воситаларини мажбурий техник кўрикдан ўтказиш тартиби тўғрисида»ги низом (ЎР ҚҲТ, 2003 й, 1-2-сон, 17-модда)га ҳамда Ўзбекистон Республикаси «Маҳаллий давлат ҳокимияти тўғрисида»ги Қонуннинг 6, 25-моддаларига асосан тумандаги транспорт воситаларининг 2015 йилда мажбурий техник кўригини ташкил қилиш мақсадида қарор қиламан:

1. Ўзбекистон Республикаси Вазирлар Маҳкамасининг 2003 йил 31 январдаги «Транспорт воситаларини мажбурий техник кўрикдан ўтказиш тартиби тўғрисида низомни тасдиқлаш ҳақида»ги 54-сонли қарори раҳбарлик ва ижро этиш учун қабул қилинсин.

2. Тумандаги фермер хўжаликлари, корхона ва ташкилотларга қарашли автомототранспорт воситалари 2015 йил 1 мартдан 30 июнга қадар техник кўрикдан ўтказилсин.

Техник кўрикдан ўтказиш 1-босқич жадвали 1-иловага* мувофиқ тасдиқлансин.

3. Тумандаги тижорат асосида йўловчилар ташиш учун фойдаланиладиган енгил автомобиллар, автобуслар, троллейбуслар, трамвайлар ва ўтириладиган жойлар сони 8 та ва ундан ортиқ бўлган (ҳайдовчининг ўрнидан ташқари), одамларни мунтазам ташиш учун жиҳозланган юк автомобиллари, йирик габаритли, оғир вазнли ва хавфли юкларни ташиш учун махсус транспорт воситалари ва уларга тиркамалар — бир йилда икки марта, биринчи марта 1 мартдан — 30 июнгача, иккинчи марта 1 сентябрдан — 31 октябргача техник кўрикдан ўтказилсин. Техник кўрикдан ўтказиш 2-босқич жадвали 2-иловага* мувофиқ тасдиқлансин.

4. Барча жисмоний шахсларга қарашли бўлган транспорт воситаларининг техник кўриги 2015 йил 1 январдан 31 август кунига қадар техник кўрикдан ўтказилсин.

5. Автомототранспорт воситаларининг йиллик мажбурий техник кўрикдан ўтказиш бўйича туман комиссияси таркиби 3-иловага* мувофиқ тасдиқлансин.

6. Комиссия таркибига киритилган масъул шахсларнинг ойлик иш ҳақи, мукофотлари 2015 йил 1 мартдан 31 июлгача ва 2015 йил 1 сентябрдан 31 октябргача тўлиқ сақлансин.

7. Комиссия зиммасига:

Техник кўрик давомида белгиланган жадвалга риоя қилиш, транспорт воситаларини техник кўрикка тайёргарлигини, керакли жиҳозларни етказиб берилишини, туман мудофаа ишлари бўлимида рўйхатда турувчи транспорт воситаларига барча ҳужжатларни расмийлаштирилганлигига, автотранспорт воситаларини техник паспортларини, таъмирга киргизиш рўйхатларини, ишга чиқиш ва қайтишни қайд этиш китобларини юритилганлигини текшириш ва аниқланган камчиликларни жойида бартараф этиш юзасидан чора-тадбирлар кўриш вазифалари юклатилсин.

8. Тумандаги фермер хўжаликлари, корхона ва ташкилотлар раҳбарларига жадвалда кўрсатилган муддатга қадар автомототранспорт воситаларини техник кўрикка тайёрлаш ва техник кўрик комиссиясига тақдим этиш вазифаси топширилсин.

9. «Ўзагросуғурта» ДАСК Ўзбекистон туман бўлими (И. Маматқулов)га фуқаролардан 2015 йил учун транспорт воситаларининг суғурта тўловларини ўз вақтида ундирилишини таъминлаш вазифаси юклатилсин.

10. Мазкур қарор қабул қилиниши муносабати билан туман ҳокимининг 2014 йил 3 мартдаги «Туман ҳудудида 2014 йилда транспорт воситаларини мажбурий техник кўрикдан ўтказиш ва уни ташкиллаштириш тўғрисида» 219-сонли қарори ўз кучини йўқотган деб ҳисоблансин.

11. «Яйпан овози» газетаси (К. Шерматов)га 2015 йил автомоторанспорт воситаларини йиллик мажбурий техник кўрикдан ўтказиш бўйича қабул қилинган туман ҳокимининг мазкур қарори билан белгиланган вазифаларни мазмун моҳияти ва мақсадини кенг ёритиб бориш вазифаси юклатилсин.

12. Мазкур қарор оммавий ахборот воситалари орқали расмий эълон қилинган кундан бошлаб кучга киради.

13. Ушбу қарорнинг бажарилишини назорат қилиш туман ҳокимининг биринчи ўринбосари А. Турсунов зиммасига юклатилсин.