Ўзбекистон Республикаси Ҳукумати ва Россия Федерацияси Ҳукумати, кейинги ўринларда «Томонлар» деб аталувчилар, стратегик шериклар ҳисобланиб, шу жумладан иқтисодий соҳада,

Ўзбекистон Республикаси билан Россия Федерацияси ўртасида стратегик шерикчилик тўғрисида 2004 йил 16 июнда имзоланган Шартнома, Ўзбекистон Республикаси билан Россия Федерацияси ўртасида иттифоқчилик муносабатлари тўғрисида 2005 йил 14 ноябрда имзоланган Шартнома ҳамда Ўзбекистон Республикаси билан Россия Федерацияси ўртасида стратегик шерикчиликни чуқурлаштириш тўғрисида 2012 йил 4 июнда имзоланган Декларацияга амал қилган ҳолда,

жаҳон иқтисодиётидаги замонавий талаб ва тенденцияларни ҳисобга олиб, иккала давлат ўртасида кенг қамровли ўзаро манфаатли савдо-иқтисодий, инвестициявий, молиявий ва транспорт-коммуникациялари соҳасидаги ҳамкорликни янада кенгайтириш ва мустаҳкамлаш муҳимлигини эътироф этиб,

икки томонлама иқтисодий муносабатларни узоқ муддатли асосда ривожлантириш ҳамда чуқурлаштириш, уларни сифат жиҳатидан янги поғонага олиб чиқиш мақсадида,

ўзаро савдо ҳажмларининг барқарор ўсишини таъминлашга, иқтисодий ҳамкорлик йўналишларини кенгайтириш учун қулай шароитлар яратишга интилиб,

қуйидагилар тўғрисида келишиб олдилар:

Ушбу Битим қуйидаги мақсадларда ишлаб чиқилди ва қўлланилади:

иқтисодий ҳамкорликнинг барқарор ривожланишини, иқтисодий соҳада узоқ муддатли икки томонлама муносабатларни янада ривожлантириш ва чуқурлаштириш бўйича келишилган чоралар мажмуини Томонлар давлатлари тарафидан амалга оширилишини таъминлаш;

савдо-иқтисодий ҳамкорликнинг устувор йўналишларини белгилаш ва илгари суриш;

миллий иқтисодиётнинг юқори суратларда барқарор ўсишига ва уларнинг рақобатбардошлигини оширишга эришиш мақсадида иқтисодий ҳамкорликни чуқурлаштириш;

товар айланмаси ҳажмини ошириш ва тузилмасини такомиллаштириш, Томонлар давлатларининг корхона ва компаниялари ўртасида ўзаро манфаатли шериклик алоқаларини кенгайтиришга кўмаклашиш ва уларни рағбатлантириш;

инвестиция соҳасида ҳамкорликни фаоллаштириш, иккала давлатнинг инвестициявий жозибадорлигини ошириш;

миллий иқтисодиёт тузилмасини диверсификация қилишга қаратилган, энг аввало, саноатнинг қайта ишлаш тармоқларида, инновация ва юқори технология соҳаларида хамда хизмат кўрсатиш соҳасининг замонавий тармоқларидаги қўшма лойиҳаларни қўллаб-қувватлаш;

ўзаро манфаатли асосда транспорт ва юкларни транзит ташиш соҳасида ҳамкорликни янада ривожлантириш ва мустаҳкамлаш;

молия-банк соҳасида ўзаро манфаатли ҳамкорликни ривожлантириш.

Битим мақсадларига эришиш учун Томонлар куйидаги вазифаларни ҳал этадилар:

иқтисодий соҳада олий даражада эришилган келишувларни кенг миқёсда амалга оширилишини таъминлаш;

икки томонлама савдо-иқтисодий муносабатларни ўзаро манфаатли ва тенг ҳуқуқлилик асосида кенгайтириш ва ривожлантириш;

икки давлат ўртасида иқтисодиётнинг турли соҳаларида ҳамкорлик қилиш масалалари бўйича Томонлар давлатлари ўртасида амалда бўлган халқаро шартномаларга риоя этилишини таъминлаш;

иқтисодий ҳамкорликнинг норматив-ҳуқуқий базасини кенгайтириш ва такомиллаштириш;

товар айланмаси ўсиши ва тузилмасини такомиллаштириш, инвестициявий ҳамкорлик ҳажмини кенгайтириш ва йўналишларини диверсификация қилиш учун қулай шароитлар яратиш;

илғор тажриба ва технологияларни жорий қилиш асосида замонавий ишлаб чиқаришни йўлга қўйиш, ишлаб чиқарилаётган маҳсулотларнинг сифати ва рақобатбардошлигини ошириш бўйича қўшма лойиҳаларни илгари суриш;

агросаноат мажмуида, шу жумладан, қишлоқ хўжалик маҳсулотларини етказиб бериш соҳасида узоқ муддатли ҳамкорлик ва тажриба алмашишни ривожлантириш;

Томонлар давлатларининг корхона ва компаниялари ўртасида узоқ муддатли шериклик алоқаларини ўрнатишга, шунингдек қўшма корхоналар ташкил этиш ва уларнинг фаолиятига кўмаклашиш;

транспорт-коммуникация соҳасида ўзаро манфаатли ҳамкорликни кенгайтириш, юклар ташиш ҳажмини ошириш, минтақавий транспорт йўлаклари ва инфратузилмаларидан самарали фойдаланиш учун қулай шароитлар яратиш;

молия ва банк соҳаларида ҳамкорликни ривожлантириш.

Томонлар икки томонлама савдо муносабатларини янада ривожлантиришда, товар айланмаси номенклатурасини диверсификация қилишда, унинг барқарор ўсишини таъминлаш ва мувозанат ҳолатига эришишда кўмаклашадилар.

Томонлар савдо алоқаларини кенгайтириш учун қулай шароитлар яратиш бўйича ҳамкорликни давом эттирадилар.

Иккала давлатнинг иқтисодий салоҳиятини ҳисобга олган ҳолда, Томонлар товар айланмаси ҳажмини ошириш ва унинг тузилмасини такомиллаштириш учун қўшимча имкониятларни аниқлаш, шу жумладан ўзаро қизиқиш уйғотадиган тайёр маҳсулот ва юқори даражада қўшимча қийматга эга бўлган товарларни бир-бирига етказиб беришни кенгайтириш ҳамда қишлоқ хўжалик маҳсулотларини етказиб бериш ҳисобига амалга ошириш бўйича чоралар кўрадилар.

Томонлар мунтазам равишда савдо-саноат палаталарига ва ўзбек-рус тадбиркорларининг бошқа бирлашмаларига мустаҳкам шериклик муносабатларини ўрнатишда ҳамда иккала давлат корхона ва компаниялари ўртасида узоқ муддатли ташқи савдо битимларини тузишда, ишбилармон доираларнинг ўзаро ташрифларини ташкил этишда, қўшма кўргазмалар, бизнес форумлар, «давра суҳбатлари», презентациялар, музокара ва учрашувлар ҳамда бошқа тадбирлар ўтказишда ёрдам кўрсатадилар.

Томонлар икки давлат корхона ва компанияларини, шу жумладан, кичик бизнес корхоналарини Томонлар давлатлари ҳудудларида ўтказиладиган халқаро кўргазма-ярмарка тадбирларига жалб қилишга ва фаол иштирок этишларига кўмаклашадилар.

Томонлар ташқи иқтисодий фаолият соҳасида, шунингдек савдо, божхона бошқаруви ва солиққа тортиш соҳаларида ахборот алмашиш амалиётини давом эттиришга кўмаклашадилар.

Томонлар инвестиция, энг аввало, хом ашё бўлмаган соҳаларда ўзаро манфаатли ҳамкорликни ривожлантирадилар, ўзаро инвестицияларни диверсификация қилиш ва уларнинг ҳажмини ошириш бўйича чоралар кўрадилар.

Томонлар Ўзбекистон Республикаси Ҳукумати билан Россия Федерацияси Ҳукумати ўртасида инвестицияларни рағбатлантириш ва ўзаро ҳимоя қилиш тўғрисида 2013 йил 15 апрелда имзоланган Битим қоидаларига мувофиқ, Томонлардан бири давлатининг инвесторлари бошқа Томон давлати ҳудудида инвестициявий фаолиятини амалга оширишлари учун қулай шароитларни яратишга бўлган интилишларини тасдиқлайдилар.

Томонлар саноатнинг турли тармоқларида қўшма лойиҳаларни амалга оширишга кўмаклашадилар, шу жумладан:

нефть ва газ мажмуаси;

машинасозлик;

асбоб-ускуналар ишлаб чиқариш;

электротехника соҳаси;

телекоммуникация;

енгил ва озиқ-овқат саноати;

қурилиш материалларини ишлаб чиқариш;

ўзаро манфаатли бошқа йўналишлар.

Томонлар инновация ва юқори технологиялар соҳаларида ҳамкорликни ривожлантиришга, энергия самарадорлигини ошириш ҳамда энергияни тежаш технологияларини жорий этиш, биотехнологиялар ва муқобил энергетикани ривожлантириш соҳаларида ҳамжиҳатлик қилишга интиладилар.

Томонлар узоқ муддат давомида ишловда бўлган нефть ва газ қазилмаларидан фойдаланиш самарадорлигини ошириш юзасидан илғор ишлов беришни жорий этишнинг қўшма дастурларини ишлаб чиқишга кўмаклашадилар.

Томонлар Ўзбекистон Республикаси Ҳукумати билан Россия Федерацияси Ҳукумати ўртасида 2013 — 2017 йилларга мўлжалланган иқтисодий ҳамкорлик Дастури ва унинг Режаси қоидаларини амалга оширишда кўмаклашадилар. Мазкур ҳужжатларнинг амал қилиш муддати тугагандан сўнг, янги дастур ва режа ҳужжатлари ишлаб чиқилади ва қабул қилинади.

Томонлар инвестициявий муҳит, амалдаги имтиёз ва преференциялар, ушбу соҳани тартибга солувчи норматив-ҳуқуқий ҳужжатлар тўғрисида маълумотлар ҳамда истиқболли инвестиция лойиҳалари бўйича таклифлар алмашинувига ва ҳамкорлик ўрнатишга кўмаклашадилар.

Томонлар иккала давлат корхона ва компанияларининг инвестиция форумлари ва презентацияларида иштирок этишига, қўшма ҳамкорлик лойиҳаларини илгари суриш бўйича ўзаро ташрифлар, музокара ва учрашувлар ташкил этишга кўмаклашадилар.

Томонлар транспорт ва коммуникация соҳасидаги ўзаро ҳамкорлик устувор характерга эга эканлигини таъкидлайдилар.

Томонлар автомобиль, темир йўл ва ҳаво қатнови соҳаларида ўзаро манфаатли ҳамкорликни ривожлантирадилар, миллий ташувчилар фаолияти, мавжуд транзит салоҳиятидан ҳамда амалдаги инфратузилмадан самарали фойдаланиш учун қулай шароитлар яратадилар.

Томонлар амалдаги ва истиқболдаги халқаро ҳамда минтақавий транспорт йўлакларининг рақобатбардошлигини ривожлантириш ва ошириш соҳасида, шу жумладан юкларни ташиш учун қулай тариф шартларини шакллантириш орқали ўзаро манфаатли ҳамкорликни давом эттирадилар.

Томонлар ташқи савдо юкларини, энг аввало, тез бузиладиган юкларни транспортда ташиш ва транзит ташувларда уларни сақлаш ва ташиш хавфсизлигини таъминлаш соҳасида ўзаро ҳамкорлик қиладилар.

Томонлар иккала давлат транспорт идоралари, транспорт-экспедиторлик ассоциациялари ва корхоналари ўртасида ўзаро манфаатли ҳамкорлик ўрнатилишига, уларнинг Томонлар давлатлари ҳудудларида ўтказиладиган халқаро транспорт конференцияларида, форумларида ва бошқа тадбирларида иштирок этишларига кўмаклашадилар ҳамда транспорт ва юклар транзити соҳасида ахборот ва норматив-ҳуқуқий ҳужжатлар билан алмашинувини амалга оширадилар.

Томонлар транспорт соҳасидаги халқаро ва минтақавий ихтисослашган ташкилотлар доирасида фаол ҳамкорлик қиладилар.

Томонлар коммуникация ва алоқа соҳасида ўзаро манфаатли ҳамкорликни ривожлантирадилар, ушбу йўналишдаги қўшма лойиҳаларни амалга оширишда ёрдам кўрсатадилар.

Мазкур Битим ижроси Томонлар давлати органлари тарафидан ушбу Битимнинг мақсад ва вазифаларига мувофиқ белгиланган муайян хатти-ҳаракатларни бажариш орқали амалга оширилади.

Томонлар Ўзбекистон Республикаси ва Россия Федерацияси ўртасида иқтисодий ҳамкорлик бўйича Ҳукуматлараро комиссия ўз йиғилишларида мазкур Битимнинг ижро этилишини мунтазам тарзда кўриб чиқишига ҳамда ушбу Битим доирасида амалга ошириладиган тадбирларни ўз вақтида бажарилишининг назоратини ва мувофиқлаштирувини олиб боришига келишдилар.

Мазкур Битим Томонлар унинг кучга кириши учун зарур бўлган давлат ички процедураларини бажарганликларини тасдиқловчи ёзма равишдаги икки хабарномадан охиргисини дипломатик каналлар орқали олган санадан кучга киради ва 2019 йил 31 декабрга қадар амал қилади.

Томонларнинг ҳар бири мазкур Битим амал қилишини унинг муддати тугашидан олдин ёзма тарзда бошқа Томонга хабарнома юбориш орқали тугатиши мумкин. Бундай ҳолатда ушбу Битимнинг амал қилиши шундай хабарнома олинган санадан бошлаб олти ой ўтганидан сўнг тугатилади.

Мазкур Битим амал қилишининг тугатилиши унинг амалда бўлган даврида ушбу Битим доирасида тузилган контракт ва келишувлардан келиб чиқадиган ҳуқуқ ва мажбуриятларга нисбатан дахл қилмайди.

Тошкент шаҳрида 2014 йил 10 декабрда икки нусхада, ҳар бири ўзбек ва рус тилларида тузилди, бунда иккала матн ҳам бир хил кучга эга.