Ўзбекистон Республикаси ва Можористон Республикаси,

иккала давлат халқларининг ўзаро тарихий анъанавий ҳурматига таяниб,

халқларнинг ўз тақдирини ўзи белгилаш ҳуқуқини эътироф этиб,

ўз давлатлараро муносабатларини суверен тенглик, ички ишларга аралашмаслик, шунингдек халқаро ҳуқуқнинг умумэътироф этган бошқа принциплари ва нормалари асосида ривожлантиришга интилиб,

улар ўртасидаги дўстлик ва ўзаро манфаатли ҳамкорликни ривожлантириш ва мустаҳкамлаш ҳар икки давлат халқларининг туб миллий манфаатларига мос келади ҳамда тинчлик ва хавфсизлик ишига хизмат қилади деб ҳисоблаб,

Бирлашган Миллатлар Ташкилоти Низомининг, Хельсинки якунловчи ҳужжатининг, янги Оврупо учун Париж Хартиясининг ҳамда Оврупо ва Осиёда хавфсизлик ва ҳамкорлик бўйича аҳамиятга молик бошқа ҳужжатларнинг мақсад ва принципларига содиқликларини тасдиқлаб,

инсон ҳуқуқлари тўғрисидаги умумэътироф этган халқаро нормаларга риоя қилиш мажбуриятини олиб,

қуйидагилар ҳақида аҳдлашиб олдилар:

Ўзбекистон Республикаси ва Можористон Республикаси, қуйида «Аҳдлашувчи Томонлар» деб аталувчилар, бир-бирларининг мустақиллик ва суверенитетларини эътироф этадилар ва ҳурмат қиладилар. Улар ўз муносабатларини дўст мамлакатлардек ривожлантирадилар.

Аҳдлашувчи Томонлар ҳар бир халқ ва давлат эркин, четдан аралашувсиз ўз тақдирини ўзи ҳал қилиш ҳуқуқига эгалигини ва сиёсий, иқтисодий, ижтимоий ва маданий ривожланишини ўз хоҳиш-иродаси асосида амалга оширишини таъкидлайдилар.

Аҳдлашувчи Томонлар ўз халқлари ва давлатлари ўртасида сиёсат, иқтисод, савдо, маданият, таълим, соғлиқни сақлаш, фан, техника, гуманитар ва бошқа соҳалардаги ўзаро манфаатли ҳамкорликни ривожлантирадилар, муштарак мажбуриятларга ҳалол ва сўзсиз риоя этадилар.

Аҳдлашувчи Томонлар ҳамкорлик тўғрисида тегишли битимлар тузишни зарур деб ҳисоблайдилар.

Аҳдлашувчи Томонлар иккиёқлама муносабатларни бундан буён ривожлантириш ва ўзаро манфаатларни ифодаловчи халқаро масалалар юзасидан мунтазам равишда консультациялар олиб боришга келишиб олдилар.

Аҳдлашувчи Томонлар миллий озчиликни ташкил қилувчиларнинг қонуний ҳуқуқларини таъминлаш халқаро уюшма барқарорлигининг асосий қоидаси эканлигини, шубҳасиз эътиборни жалб этишини ва давлатларнинг доимий ҳамкорлигини талаб қилишини эътироф қиладилар.

Томонлар, ўзларининг халқаро шартномаларда зиммаларига олган ёки оладиган мажбуриятларига мувофиқ, миллий озчиликни ташкил қилувчиларнинг ҳуқуқлари ва ўзига хосликларини ҳимоя қилиш учун керакли чораларни кўрадилар.

Аҳдлашувчи Томонлар ўзаро манфаатли иқтисодий, савдо, илмий-техникавий муносабатларни давлат ҳокимияти ва бошқарув органлари, банклар ва молия системалари, фанлар академиялари, корхоналар, бирлашмалар, ташкилотлар, муассасалар ва индивидуал тадбиркорлар даражаларида ривожлантирилишини рағбатлантирадилар.

Аҳдлашувчи Томонлар иқтисод соҳасида ўзаро манфаатни ифодаловчи икки томонлама ҳамкорликни ривожлантиришга алоҳида эътибор берадилар.

Томонлар ушбу Шартномада зикр этилмаган товар айирбошлаш, алоқа, транспорт, ҳисоб-китоб, шунингдек бошқа соҳалардаги ҳамкорлик алоқалари алоҳида шартномалар орқали ҳал қилиниши ҳақида келишиб олдилар.

Аҳдлашувчи Томонлар ўзаро манфаат асосида атроф-муҳитни муҳофаза қилишда, кенг миқёсдаги халқаро экологик хавфсизлик системасини ташкил этишда, шунингдек табиат бойликларидан тежамли фойдаланишда ҳамкорлик қилишга интиладилар.

Аҳдлашувчи Томонлар ўз халқларининг маънавий ва маданий мерослари билан бир-бирларини янада яқинроқ таништириш мақсадида маданият, санъат, фан ва таълим соҳаларида ҳар томонлама ҳамкорликни рағбатлантирадилар, туристик алмашувларни кенгайтирадилар ва кишиларнинг борди-келдиларига кўмаклашадилар.

Аҳдлашувчи Томонлар, ўз қонунларига мувофиқ, архивлар, кутубхоналар ва шу каби муассасаларда сақланувчи манбалардан фойдаланишда кўмаклашадилар.

Улар иккинчи Томоннинг миллий ифтихори ҳисобланган маданий бойликларни қайтаришда кўмаклашадилар.

Аҳдлашувчи Томонлар, халқаро ҳамкорлик доирасида, уюшган жиноятчилик, терроризм, наркотик моддаларни ғайриқонуний ишга солиш каби граждан авиацияси ва кемалар қатнови хавфсизлигини хавф-хатар остида қолдирадиган харакатларга ва контрабандага қарши курашда, биргаликда ҳаракат қилишга ўзларининг тайёрликларини билдирадилар.

Томонлар ҳуқуқий ёрдам соҳасида ўзаро ҳамкорлик қиладилар.

Аҳдлашувчи Томонлар ушбу Шартномани шарҳлаш ва татбиқ этишга оид низоларни авваламбор тўғридан-тўғри музокаралар ва консультациялар йўли билан ҳал қиладилар.

Агарда, низолар юзасидан шу модданинг биринчи сатр бошига мувофиқ, маълум муддат ичида икки томонни қониқтирувчи жавоб топилмаган ҳолатда, Томонлар, ўзаро келишилган ҳолда, Бирлашган Миллатлар Ташкилоти Низомида, Оврупода хавфсизлик ва ҳамкорлик бўйича Кенгаш ҳужжатларида ва халқаро ҳуқуқда низоларни ҳал қилиш бўйича қабул қилинган бошқа қандай методга мурожаат қилишлари мумкинлиги масаласини кўриб чиқиш мажбуриятини ўз зиммаларига оладилар.

Ушбу Шартнома Аҳдлашувчи Томонларнинг бошқа давлатлар билан икки томонлама ва кўп томонлама имзолаган амалдаги шартномаларидан келиб чиқадиган ҳуқуқ ва мажбуриятларига дахл қилмайди.

Аҳдлашувчи Томонларнинг ҳар бири ушбу Шартнома ёки унинг айрим моддалари амал қилишда давом этишининг қанчалик мақсадга мувофиқлиги тўғрисида машваратлар доирасида музокаралар ўтказиш ташаббуси билан чиқиш ҳуқуқини ўзида сақлаб қолади.

Томонларнинг ўзаро келишувига мувофиқ ушбу Шартноманинг қоидаларига қўшимчалар ёки ўзгартишлар киритилишини мумкин.

Ушбу Шартнома 5 йил муддатга тузилади.

Башарти Томонлардан ҳеч бири Шартномани бекор қилиш истагини шартнома муддати тугашидан камида олти ой олдин ёзма равишда баён этмаса, Шартноманинг амал қилиш муддати кейинги беш йилга узайтирилади.

Ушбу Шартнома ҳар бир Томоннинг конституциявий тартиб-қоидаларига мувофиқ ратификация қилиниши керак ва ратификация ёрлиқлари айирбошланган куни кучга киради.

Ушбу Шартнома Бирлашган Миллатлар Ташкилоти Низомининг 102-моддасига биноан БМТ Котибиятида рўйхатдан ўтказилади.

Шартнома 1992 йил 3 мартда Будапешт шаҳрида икки нусхада ўзбек ва можор тилларида имзоланди, ҳар иккала нусха матни ҳам бир хил кучга эга.