Ўзбекистон Республикаси Ҳукумати ва Малайзия Ҳукумати, қуйида биргаликда «Аҳдлашувчи Томонлар» ва ҳар бири алоҳида «Аҳдлашувчи Томон» деб аталувчилар,

икки мамлакат ўртасидаги мавжуд алоқаларни мустаҳкамлаш зарурлигини эътироф этган ҳолда,

ахборот соҳасида тенгҳуқуқлилик ва ўзаро манфаатдорлик асосида ҳамкорликни ривожлантиришни истаб,

қуйидагилар тўғрисида келишиб олдилар:

Аҳдлашувчи Томонлар ўз мамлакатларида ҳозирги вақтда амалда бўлган қонун-қоидаларига мувофиқ ўзаро манфаатдорлик асосида икки мамлакат ўртасида ахборот соҳасидаги ҳамкорликни ривожлантиришга кўмаклашишни ва рағбатлантиришни ўз зиммаларига оладилар.

Аҳдлашувчи Томонлар Ўзбекистон Миллий Ахборот Агентлиги ва Малайзиянинг БЕРНАМА Миллий Ахборот Агентлиги ўртасида янгиликлар ва ахборотлар алмашувига кўмаклашадилар. Шу мақсадда бу ташкилотлар ўзаро келишувга мувофиқ шу каби айирбошлаш дастурларини ривожлантирадилар.

1-моддада қайд этилган ҳамкорлик мавжуд жамғармалар ва ресурслар асосида ҳамда орттириладиган тажриба, олинадиган фойда эътиборга олинган ҳолда, ўзаро келишувга мувофиқ қуйидаги соҳаларни қамраб олиши мумкин:

а) Аҳдлашувчи Томонлар ўртасидаги икки томонлама алоқаларнинг мустаҳкамланишига хизмат қиладиган янгилик ва ахборотлар билан алмашиш;

б) радио ва телевизион репортажлар билан алмашиш ҳамда сиёсий, иқтисодий, ижтимоий ва маданий ҳаёт томонларини аудио ва видео ёритиш;

в) миллий байрамларнинг нишонланишига бағишланган радио, телевизион дастурлар ва ҳужжатли фильмлар билан алмашиш;

г) журналистлар ташрифлари ва уларни миллий аҳамиятга молик воқеаларга оид янгиликларни ёритиш ва репортажлар тайёрлаш билан боғлиқ фаолиятлари учун зарур воситалар билан таъминлаш;

д) оммавий ахборот воситаларининг вакиллари, жумладан техник ходимлар, таржимонлар, ёзувчилар, шунингдек телевидение, радио ва нашриёт журналистлари ва мухбирларининг ташрифлари;

е) фильмлар ишлаб чиқариш соҳасида ҳамкорлик, шунингдек улар билан боғлиқ фильмлар ишлаб чиқариш бўйича қўшма корхоналар ва ҳар икки мамлакатда фильм Ҳафталикларини ташкил этиш каби ўзаро манфаатли лойиҳаларни амалга оширишда кўмаклашиш.

Ушбу Битимнинг амалга оширилиши мақсадида Аҳдлашувчи Томонларнинг ҳар биридан тенг сонли аъзолардан иборат (қуйида Комиссия деб номланувчи) қўшма Комиссия ташкил этилади. Ҳар бир Аҳдлашувчи Томоннинг Ахборот вазири навбати билан Ўзбекистон Республикасида ва Малайзияда учрашиб турадиган Комиссия аъзоларини тайинлайди.

Комиссия қуйидагиларга масъулдир:

а) Аҳдлашувчи Томонларнинг тегишли ваколатли органларига ушбу Битимнинг ижро этилишига кўмаклашадиган тавсияларни бериш;

б) Аҳдлашувчи Томонлар ўртасида ахборот соҳасидаги ҳамкорликнинг янги услубларини тавсия этиш;

в) Ушбу Битимнинг амалга оширилиши учун дастурлар, бюджетлар ва бошқа молиявий жиҳатлар тафсилотларини тайёрлаш;

г) Томонлардан бирон-бирининг илтимосига биноан ушбу Битим қоидаларини вақти-вақти билан қайта кўриб чиқиш.

Аҳдлашувчи Томонларнинг ҳар бири ушбу Битимнинг ёки унга мувофиқ эришилган бошқа ҳар қандай битимнинг амалга оширилиши даврида олинган ҳужжатлар,ахборотлар ёки бошқа маълумотларнинг сир тутилишини ёки махфийлигини сақлашга риоя этишни ўз зиммасига олади.

Аҳдлашувчи Томонларнинг ҳар бири ёзма равишда ушбу Битимга бутунлай ёки қисман ўзгариш ёки тузатиш киритилишини илтимос қилиши мумкин. Аҳдлашувчи Томонлар ўртасида келишилган ҳар қандай ўзгариш ёки тузатиш ёзма равишда бўлиши ҳамда ушбу Битимнинг бир қисми бўлиб ҳисобланиши лозим. Бундай ўзгариш ёки тузатиш Аҳдлашувчи Томонлар белгилаган кундан бошлаб кучга киради.

Ушбу Битимнинг моддаларини қўллашда ёки шарҳлашда келиб чиқадиган ҳар қандай келишмовчиликлар ёки низолар Аҳдлашувчи Томонлар ўртасида дўстона тарзда маслаҳатлашув ва музокаралар йўли билан ҳал этилади.

Ушбу Битим имзоланган кундан бошлаб кучга киради ва Аҳдлашувчи Томонлардан бири дипломатик йўллар орқали ёзма равишда иккинчи Аҳдлашувчи Томонни Битимнинг амал этиш муддати тугашидан камида олти ой илгари уни тўхтатиш нияти тўғрисида хабардор қилмагунга қадар Битимнинг амал қилиши давом этаверади.

Бунинг тасдиғи сифатида ўз Ҳукуматлари томонидан ваколатга эга бўлганлар қуйида ушбу Битимни имзоладилар.

Ушбу Битим амал қилишининг тўхтатилиши, у амалда бўлган даврда қабул қилинган ёки кучга кирган ҳар қандай битим ёки мажбуриятнинг ўз қоидаларига мувофиқ бажарилиши заруратига таъсир кўрсатмайди.

Ушбу Битимни имзолаганлар ўз Ҳукуматларининг тегишли ваколатларига эгадирлар.

Ушбу Битим 1993 йил 1 апрель куни Тошкент шаҳрида тўрт нусхада, ўзбек ва инглиз тилларида тайёрланди ва барча матнлар тенг кучга эга. Матнларда тафовут юзага келган тақдирда, инглиз тилидаги матн устуворлик қилади.