Ўзбекистон Республикаси Ҳукумати ва Малайзия Ҳукумати (қуйида «Аҳдлашувчи Томонлар» деб аталадилар),

икки мамлакат ўртасидаги муносабатларни мустаҳкамлаш мақсадида ўзаро маданий ва илмий ҳамкорликни ривожлантиришга ва халқлари ўртасидаги ҳамжиҳатликни оширишга кўмаклашишга интилиб,

қуйидагилар ҳақида аҳдлашиб олдилар:

Аҳдлашувчи Томонлар икки мамлакат ўртасидаги маданий ва илмий ҳамкорликни бир-бирларининг суверенитетларини ўзаро ҳурмат қилиш, ички ишларига аралашмаслик ва ўзаро манфаат асосида Томонларнинг тегишли қонунлари ва қоидаларига биноан ривожлантиришга кўмаклашадилар.

Аҳдлашувчи Томонларнинг ўзаро келишуви мавзуси ва унинг мақбул бўлишини ҳисобга олган ҳолда, 1-моддада зикр этилган маданий ва илмий ҳамкорлик, жумладан:

а) радио ва телевизион дастурлар, фильмлар ва мусиқавий ёзувлар билан айрибошлашни,

б) тижорий-асосда ёки Аҳдлашувчи Томонлар ўртасидаги ўзаро битимларга мувофиқ театр, опера, балет ва рақс гуруҳларининг, оркестрлар ва бошқа бадиий жамоалар ва якка санъаткорларнинг ижодий сафарларини,

в) санъат соҳасида айрибошлаш, бадиий, фото ва бошқа кўргазмалар ташкил этишни,

г) ҳайъатлар айрибошлаш, гуруҳлар ва айрим мутахассислар сафари орқали илм-фан, технология ва шу каби соҳалардаги ютуқлар ва тажрибалар билан алмашишни,

д) олий ва махсус ўқув юртларида ўқиш имкониятини яратиш ва

е) миллий кутубхоналар, музейлар, архивлар ва шу каби бошқа муассасалар ўртасидаги алоқаларни рағбатлантиришни ҳамда тарихий, маданий ва илмий қийматга эга бўлган нашр этилган ва этилмаган материалларни айрибошлашни, жумладан, ёзувчилар ва маданият соҳасидаги бошқа мутахассислар билан алмашиб туришга кўмаклашишни,

ё) Аҳдлашувчи Томонлар тарафидан келишилиши мумкин бўлган бошқа вазиятларни қамраб олади.

Аҳдлашувчи Томонлар икки мамлакат ўртасида саёҳатчиликни ривожлантиришга кўмаклашадилар.

Ушбу Битимда зикр этилган ўзаро ахборотлар ва материалларни айрибошлаш, айрим шахслар, гуруҳлар ва ҳайъатлар билан алмашиш Ўзбекистон Республикаси ва Малайзиядаги мавжуд қонунлар ва қоидаларга мувофиқ амалга оширилади.

Аҳдлашувчи Томонлар ушбу Битим қоидаларини амалга ошириш мақсадида дипломатик йўллар билан бир-бирларига ҳамкорликнинг ҳажми ва моҳияти тўғрисида хабар қиладилар ва агар муайян масалалар юзасидан саволлар чиқиб қолса, ҳамкорлик мақбуллиги ва шарт-шароитлари тўғрисида, жумладан дипломатик йўллар билан музокаралар ўтказишга келишиб олдилар.

Ушбу Битим қоидалари Аҳдлашувчи Томонларнинг ўз хавфсизликларини ҳимоя қилиш учун тадбирлар қабул қилиш ва амалга оширишдаги ҳуқуқларини чегараламайди.

Аҳдлашувчи Томонларнинг ҳар бири ушбу Битимнинг исталган жойига ёки ҳамма бандларига ўзгартиришлар киритишни ёки қайта кўриб чиқишни ёзма равишда талаб қилиши мумкин. Аҳдлашувчи Томонлар ўзаро келишган ҳолда киритган ҳар қандай ўзгартиришлар ва қайта кўришлар Аҳдлашувчи Томонлар белгилаган кундан эътиборан кучга киради.

Ушбу Битим ҳар бир Аҳдлашувчи Томон бу Битим тасдиқланиши учун зарур барча ички расмий ишлар адо этилгани ҳақида бошқа Томондан хабар олгандан кейин кучга киради.

Ушбу Битим кучга кирганидан кейин Беш йил давомида амал қилади. Мазкур муддат, агар Аҳдлашувчи Томонлардан бири бошқа Томонни муддат тугашига камида олти ой қолгунича Битимга амал қилишни тўхтатиш нияти ҳақида дипломатик йўллар орқали ёзма равишда хабар қилмаса, Битимга амал қилиш ўз-ўзидан ҳар сафар бир йиллик муддатга чўзилаверади. Ушбу Битим муддати тугаши ёки унга амал қилишнинг тўхтатилиши мазкур Битим доирасида Аҳдлашувчи Томонлар имзолаган бошқа протоколлар, битимлар, шартномалар, эслатма хатларига доир амалдаги мажбуриятлар ёки лойиҳалар қоидаларига таъсир этмайди.

Ушбуга гувоҳлик бериб, ўз Ҳукуматларининг тегишли ваколатларига эга бўлган қуйидаги шахслар ушбу Битимни имзоладилар.

1992 йил 20 июнда Куала-Лумпур шаҳрида олти асл нусхада, ҳар бири икки нусхадан ўзбек, малай ва инглиз тилларида имзоланди, барча матнлар бир хил кучга эга. Талқин қилишда тафовут юзага келган тақдирда инглиз тилидаги матн устуворлик қилади.