Ўзбекистон Республикаси Солиқ кодекси (Ўзбекистон Республикаси қонун ҳужжатлари тўплами, 2007 йил 52 (I)-сон) Ўзбекистон Республикасининг «Давлат солиқ хизмати тўғрисида»ги Қонуни (Ўзбекистон Республикаси Олий Мажлисининг Ахборотномаси, 1997 йил 9-сонли, 232-модда), Ўзбекистон Республикаси Президентининг 2014 йил 4 декабрдаги «Ўзбекистон Республикасининг 2015 йилги асосий макроиқтисодий кўрсаткичлари прогнози ва давлат бюджети параметрлари тўғрисидаги»ги ПҚ-2270-сонли қарори (Ўзбекистон Республикаси қонун ҳужжатлари тўплами, 2014 йил 50-сон, 590-модда) ижроси юзасидан ер солиғи тўловларини ўз вақтида маҳаллий бюджетга ундирилишини таъминлаш, ер солиғи тўлаш ставкалари асосида ҳудуддаги зона чегараларини белгилаш ва тарифларини жорий қилиш мақсадида, «Маҳаллий давлат ҳокимияти тўғрисида»ги Қонунининг (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда) 24-моддасига асосан Халқ депутатлари туман кенгаши қарор қилади:

1. Ўзбекистон Республикаси Президентининг 2014 йил 4 декабрдаги «Ўзбекистон Республикасининг 2015 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ-2270-сонли қарорига мувофиқ ўрнатилган ставкалар асосида Нишон тумани ҳудудида юридик ва жисмоний шахслар томонидан ер участкаларидан фойдаланганлик учун ер солиғи ставкалари 1-иловага мувофиқ тасдиқлансин.

2. Ер солиғини тўлаш ставкалари бўйича Нишон туманининг ҳудудий зона чегаралари 2-иловага мувофиқ тасдиқлансин.

3. Нишон туман Давлат солиқ инспекцияси (У. Мирзаев)га:

иловага мувофиқ тасдиқланган зоналар ҳудуди бўйича ер солиғини тўловчилардан солиқларни ҳисоблаш ва ундириш;

барча қишлоқ ва маҳалла фуқаролар йиғини ҳудудларида солиқларнинг аҳамияти, айрим тоифадаги жисмоний шахсларга солиқлардан бериладиган имтиёз тўғрисида, шунингдек солиқларнинг ўз вақтида тўлаб борилиши тўғрисида кенг тушунтириш ишларини олиб бориш;

аҳоли ўртасида Ўзбекистон Республикаси солиқ қонунчилиги бўйича амалдаги меъёри-ҳуқуқий ҳужжатларнинг моҳияти юзасидан қишлоқ ва маҳалла фуқаролар йиғини раислари ҳамда фаоллар иштирокида мунтазам равишда семинар йиғилишлар ўтказиш вазифаси юклатилсин.

4. Туман ҳокимининг 2014 йил 6 мартдаги Х-297/03-сонли қарори ўз кучини йўқотган деб ҳисоблансин.

5. Мазкур қарор расмий эълон қилинган кундан эътиборан кучга киради.

6. Қарорнинг ижросини назорат қилиш туман ҳокимининг ўринбосари З. Баратов зиммасига юклансин.