Ўзбекистон Республикаси Ҳукумати ва Польша Республикаси Ҳукумати, бундан кейин «Аҳдлашувчи Томонлар» деб аталувчилар,

Ўзбекистон Республикаси билан Польша Республикаси ўртасида дўстона ҳамкорлик тўғрисидаги Шартноманинг 8-моддасидан келиб чиқиб,

1980 йилнинг 21 майидаги ҳудудий тузилмалар ва ҳокимиятлар ўртасида трансчегара ҳамкорлиги тўғрисидаги Европа Умумий Конференцияси қоидаларини назарда тутиб,

иккала давлат маҳаллий ҳокимиятлараро ҳамкорлик Ўзбекистон Республикаси билан Польша Республикаси ўртасидаги муносабатларнинг мустаҳкамланишига хизмат қилишини ҳисобга олиб,

бундай ҳамкорликни астойдил қўллаб-қувватлашга ва шу тариқа иккала Давлатнинг иқтисодий ва ижтимоий равнақига кўмаклашишга тайёр ҳолда,

қуйидагилар тўғрисида келишиб олдилар:

1. Аҳдлашувчи Томонлар иккала Давлат маҳаллий ҳокимиятлари ўртасида муносабатларни мустаҳкамлаш ва ривожлантиришга қаратилган иқтисодий, ижтимоий, ҳуқуқий, техникавий, илмий, маданий ва бошқа турдаги ҳар қандай ташаббуслар бўйича келишиб, тегишли битимлар тузишга ҳам кўмаклашадилар.

2. Ушбу Битимнинг мақсадлари учун унда санаб ўтилган тушунчалар қуйидаги маъноларга эга:

«маҳаллий ҳокимиятлар аро ҳамкорлик» — иқтисодий, ижтимоий, ҳуқуқий, техникавий, маъмурий, илмий, маданий ва бошқа турдаги иккала Давлат маҳаллий ҳокимиятлари ўртасидаги муносабатларни мустаҳкамлаш ва ривожлантиришга қаратилган барча келишилган ташаббусларни, шунингдек, иккала Давлат миллий қонунчилигига мувофиқ бошқа битимлар тузишни билдиради;

«маҳаллий ҳокимиятлар» — иккала Давлат миллий қонунчилигига мувофиқ маҳаллий вазифаларни амалга оширадиган ҳудудий ҳокимиятларни билдиради.

3. Аҳдлашувчи Томонлар «маҳаллий ҳокимиятлар» тушунчасини янада аниқлаштириш учун зарур бўлган маълумотларни бир-бирларига етказадилар.

1. Аҳдлашувчи Томонлар ўз маҳаллий ҳокимиятларини бошқа Давлат маҳаллий ҳокимиятлари билан ҳамкорлик соҳасидаги фаолиятлари имкониятларидан хабардор қилиб турадилар.

2. Аҳдлашувчи Томонлар ўзаро келишувлар асосида маҳаллий ҳокимиятларнинг ўзаро ҳамкорлигини амалга ошириш учун тегишли шароитлар яратиб берадилар.

3. Ушбу Битим икки Давлат ҳамкорлигини тартибга солувчи кучда бўлган, хусусан, бошқа халқаро шартномалардан келиб чиқувчи қоидаларни бузмайди.

4. Ушбу Битим икки Давлатдан ҳар бирининг миллий қонунчилиги билан белгиланган минтақавий ва маҳаллий ҳокимиятлар ваколатларини бузмайди.

5. Аҳдлашувчи Томонлардан ҳар бири истаган вақтда ўз Давлатининг ушбу Битим амал қилмайдиган ҳудудининг қисмини, ҳамкорликнинг предмети ва шаклларини белгилаши мумкин.

Аҳдлашувчи Томонлар маҳаллий ҳокимиятлар ҳамкорлигини қийинлаштирадиган низоли масалаларни ҳал этишга бор куч-ғайратларини ишга соладилар.

1. Аҳдлашувчи Томонлар иккала Давлат маҳаллий ҳокимиятларининг саноат, қишлоқ хўжалиги, озиқ-овқатни қайта ишлаш, савдо ва маиший хизмат, денгиз ва қуруқлик нақлиёти, алоқа, жойларни режалаштириш ва қурилиш, атроф муҳитни муҳофаза қилиш, табиий бойликлардан фойдаланиш, молия ва банк фаолияти, саёҳат, спорт, маданият, маориф ва фан соҳасида ҳамкорлик олиб боришлари учун қулай шароитлар яратадилар.

2. Туманлар, шаҳарлар ва қишлоқ жойлари, хусусан, қуйидагилар бу ҳамкорликнинг предмети ҳисобланади:

жойларни режалаштириш ва ўзлаштириш,

коммунал хўжалиги,

нақлиёт ва алоқа,

табиатни ва атроф муҳитни муҳофаза қилиш,

савдо,

қишлоқ хўжалиги,

маориф ва фан, шунингдек бошқа Давлатнинг тилини ўргатиш,

соғликни сақлаш,

маданият ва санъат,

саёҳат, бўш вақтни ўтказиш ва спорт,

жиноятчиликка қарши курашиш,

табиий фалокат ва офатда ўзаро ёрдам,

ўзаро манфаатли бошқа соҳалар.

Хўжалик фаолиятининг субъектлари, иккала Давлат маҳаллий ҳокимиятлари ҳудудида амалда бўлган мулк шаклларидан қатъий назар, миллий қонунчиликка риоя қилган ҳолда ушбу Битим 1-моддасининг 2-банди ва 4-моддасида белгиланган соҳалар бўйича ҳамкорлик тўғрисида битимлар тузадилар. Ушбу битимлар, хусусан, етказиб бериш ва хизмат кўрсатиш, қўшма корхоналар, акционерлик жамиятлари, бирлашмалар ва фондларни барпо қилишга тааллуқли бўлади.

1. Иккала Давлат маҳаллий ҳокимиятлари ўз миқёсларида маҳаллий ҳокимиятлар ҳамкорлиги бўйича қўшма мувофиқлаштирувчи идора тузадилар.

2. Иккала Давлат маҳаллий ҳокимиятлари ўз миқёсларида ушбу Битим 1-моддасининг 1-банди ва 4-моддасида белгиланган ҳамма соҳаларда ҳамкорликни дастурлаштирадилар ва ташкил этадилар. Агар бу ҳамкорлик иккала Давлатдан бирортаси марказий идораларининг ваколатига тааллуқли бўлса, маҳаллий ҳокимиятларнинг таклифлари бу идоралар томонидан маьқулланиши талаб этилади.

1. Аҳдлашувчи Томонлар Маҳаллий Ҳокимиятлар Ҳамкорлиги бўйича Ўзбек-Поляк Ҳукуматлараро Мувофиқлаштирувчи Ҳайъатни, бундан кейин «Ҳайъат» деб аталувчи, идорани ташкил этишлари мумкин.

2. Ҳайъатни вазифасига иккала Давлат маҳаллий ҳокимиятлари ҳамкорликлари дастурлари ва шаклларининг умумий йўналишларини белгилаш ва мувофиқлаштириш ҳамда ҳамкорликни қийинлаштирадиган низоли масалаларни кўриб чиқиш киради. Ҳайъат, шунингдек, маҳаллий миқёсдаги қўшма мувофиқлаштирувчи идораларни ташкил этиш шунингдек ушбу органлар томонидан тайёрланадиган қарорлар бўйича тавсияномалар ҳам ишлаб чиқади.

3. Ҳайъатнинг мажлислари эҳтиёжга кўра, лекин камида бир йилда бир марта ўтказиб турилади.

4. Ҳайъатнинг мажлисларида маҳаллий миқёсдаги қўшма мувофиқлаштирувчи идораларнинг вакиллари маслаҳат овози билан иштирок этишлари мумкин.

5. Ҳайъат алоҳида масалаларни ўрганиш учун экспертларни таклиф қилиши мумкин.

1. Ҳайъат ва маҳаллий миқёсдаги мувофиқлаштирувчи идоралар ўзларининг низомлари асосида фаолият олиб борадилар. Ҳайъат Низоми Аҳдлашувчи Томонлар томонидан тасдиқланади. Маҳаллий миқёсдаги қўшма мувофиқлаштирувчи Низом Ҳайъат томонидан тасдиқланади.

2. Қўшма мувофиқлаштирувчи идоралар мажлисларида қатнашиш билан боғлиқ бўлган харажатларни бу мажлисларга ўзининг вакилларини юборган маҳаллий идоралар қоплайди.

Аҳдлашувчи Томонлар қўшма мувофиқлаштирувчи идораларга 1980 йил 21 майдаги ҳудудий тузилмалар ва ҳокимиятлар ўртасида трансчегара ҳамкорлиги тўғрисида Европа Умумий Конвенциясига илова бўлган битим ва низомларнинг намуналаридан фойдаланишни тавсия этадилар.

1. Аҳдлашувчи Томонлар халқаро шартномаларнинг кучга кириши билан боғлик ҳар иккала Давлат миллий қонунчилигида кўзда тутилган ҳуқуқий тадбирларни бажариш ҳақида ўзаро ноталар билан алмашадилар. Мазкур Битимнинг кучга кириш муддати бўлиб охирги нота олинган муддат ҳисобланади.

2. Ушбу Битим 10 йил муддатга тузилади. Агар Аҳдлашувчи Томонлардан бири иккинчи Аҳдлашувчи Томонни Битимни бекор қилиш тўғрисида тегишли муддат тугашидан олти ой илгари нота юбориш йўли билан огоҳлантирмаса, унинг кучи, ўз-ўзидан, ҳар сафар яна кейинги беш йиллик муддатга узайтирилади.

Варшава шаҳрида 1995 йил 11 январда икки нусхада, ҳар бири ўзбек, поляк ва рус тилларида тузилди, бунда учала матн ҳам бир хил кучга эга. Ушбу Шартнома қоидаларини талқин этишда келишмовчиликлар юзага келган ҳолда рус тилидаги матнга амал қилинади.