Ўзбекистон Республикаси Олий Мажлиси қарор қилади:

Афғонистондаги воқеалар муносабати билан Ўзбекистон Республикаси Олий Мажлисининг Баёноти қабул қилинсин (илова қилинади).

Афғонистондаги ҳарбий-сиёсий вазият ғоят кескинлашганлиги муносабати билан Ўзбекистон Республикаси Олий Мажлиси чуқур ташвишда эканлигини изҳор этади.

Мамлакатимиз чегараларининг шундоққина яқинида бугунги кунда рўй бераётган воқеалар қўшни Афғонистондаги биродаркушлик урушининг янада кескинлашувига, хунрезликка олиб бориши мумкин. Тўхтовсиз давом этаётган уруш минтақадаги барқарорликкагина эмас, балки умуман қитъадаги хавфсизликка таҳдид этмоқда.

Бусиз ҳам қалтис вазиятни янада кескинлаштираётган ҳамда ҳарбий қарама-қаршиликни кучайтираётган ташқи кучларнинг аралашуви тобора зўрайиб бораётганлиги катта ташвиш уйғотмоқда.

Ўзбекистон ҳамиша Афғонистон муаммосини тинч йўл билан ҳал этишнинг энг изчил тарафдорларидан бири бўлиб келган ва ҳозир ҳам ана шундай бўлиб келмоқда.

Ўзбекистон ва Афғонистон чегарадош мамлакатлар тариқасида тарихан ҳамиша тинч ҳамсоя бўлиб, бизнинг муносабатларимиз яхши қўшничилик, ҳурмат ва ўзаро манфаат асосига қурилган.

Қўшни давлатдаги тинчлик ва тотувлик, чегараларимиздаги барқарорлик Ўзбекистондаги амалга оширилаётган ижтимоий-сиёсий ва иқтисодий ислоҳотларни муваффақиятли рўёбга чиқаришнинг ҳамда халқимизни уруш келтириши мумкин бўлган қашшоқлик ва кулфатлардан сақлашнинг муҳим шартидир. Ўзбекистон ўз миллий манфаатларидан келиб чиқиб ва ўзининг бевосита жанубий сарҳадларида кучайиб бораётган таҳдидни эътиборга олиб, хавфсизликни таъминлаш ва ўз чегараларини мустаҳкамлаш юзасидан зарур чоралар кўрмоқда.

Олий Мажлис Афғонистондаги тангликни тинч йўл билан бартараф этиш юзасидан аввал Ўзбекистон Республикаси томонидан илгари сурилган ташаббусларга содиқлигини яна бир бор тасдиқлайди.

БМТ ва халқаро ҳамжамиятнинг энг фаол ёрдамидагина бу давлатда узоқ муддатли ва пухта тинчликка эришиш мумкин. Қуйидаги шартларни таъминлаш ғоят муҳимдир:

Биринчидан. Барча жанговар ҳаракатларни дарҳол тўхтатиш.

Иккинчидан. Бу мамлакатга қурол-яроғ етказиб беришга эмбарго жорий этиш.

Учинчидан. Ташқаридан бўладиган аралашишларни тўхтатиш.

Тўртинчидан. Этник гуруҳлар ва сиёсий оқимлар кенг вакиллиги иштирокида коалицион ҳукумат тузиш.

Бешинчидан. Тинчликни таъминлаш жараёнида барча манфаатдор мамлакатлар, энг аввало Афғонистон билан қўшни мамлакатларнинг фаол иштироки. Шу муносабат билан Ўзбекистоннинг ташаббуси билан ва БМТ раҳнамолигида тузилган «6+2» мулоқот гуруҳига Афғонистон муаммосини тинч йўл билан ҳал этишга ҳамкорлик қилишнинг муҳим халқаро механизми тариқасида қараш мумкин.

Ўзбекистон Республикаси Олий Мажлиси хунрезликка барҳам бериш ҳамда Афғонистон муаммосини тинч йўл билан ҳал этиш йўлларини қидириш юзасидан ғоят шошилинч чоралар кўриш чақириғи билан БМТ ва жаҳон ҳамжамиятига мурожаат этади. 19 йилдан бери давом этаётган фуқаролар уруши Афғонистонни халқаро терроризм ва наркобизнеснинг, диний фанатизм ва экстремизм таҳдидининг хатарли манбаига айлантираётганлигига халқаро жамоатчилик кун сайин ишонч ҳосил қилмоқда.

Олий Мажлис БМТ Афғонистондаги жанговар ҳаракатларни дарҳол тўхтатиш учун ўз обрў-эътиборини ва таъсир кучини ишга солади деб ишонч билдиради.