Ўзбекистон Республикаси Ҳукумати ва Литва Республикаси Ҳукумати, бундан кейин «Томонлар» деб аталувчилар,

Иккала мамлакат ва уларнинг халқлари ўртасида дўстона муносабатларни мустаҳкамлашга интилиб,

Инсонпарварлик ва демократия асосида миллий таълим тизимлари мазмунини янгилашни истаган ҳолда,

Иккала мамлакат иқтисодиётини ривожлантириш учун фан ва технология соҳасидаги ҳамкорликнинг фойдали эканлигини тан олган ҳолда,

Қуйидагилар тўғрисида келишиб олдилар:

Томонлар аҳдлашувчи Томонларнинг қонун ва қоидаларига мувофиқ таълим, фан ва технология соҳасида тенг ҳуқуқли ва фойдали ҳамкорликка кўмаклашадилар ва ривожлантирадилар.

Томонлар доимий яшовчи бошқа мамлакат фуқароларига, уларнинг миллатидан қатъи назар, бу мамлакатда амалда бўлган қонун ва қоидаларга мувофиқ ўрта ва олий таълимга бўлган ҳуқуқни кафолатлайдилар.

Томонлар бошқа мамлакатдаги таълим тўғрисида кўпроқ билимга эга бўлиш истагида, таълим соҳасида ҳамкорлик қиладилар. Томонлар ўз эҳтиёжларига мувофиқ педагогика соҳасида ўқитувчи ва олимларнинг бориш-келиши ва стажировкаларини ташкил қиладилар, иккала мамлакатда ўтказиладиган илмий конференцияларда олимлар ва мутахассисларнинг иштирокини рағбатлантирадилар.

Томонлар мактаблар ўртасида алоқалар ўрнатишга кўмаклашадилар.

Томонлар бошқа мамлакат тилини ўрганишга, унинг адабиёти, тарихи, маданияти билан танишишга кўмаклашадилар, шунингдек, бошқа мамлакатнинг тили, адабиёти, тарихи ва маданиятини ўрганиш учун курслар ва лекциялар уюштирадилар.

Томонлар таълим тўғрисидаги ҳужжатларни тан олиш ва тенг эканлигига ёндашувларни ишлаб чиқиш мақсадида қўшма маслаҳатлашувлар ўтказиш тўғрисида келишиб олдилар.

Томонлар фан ва олий таълим муассасалари ўртасида бевосита алоқалар ўрнатишни рағбатлантирадилар.

Томонлар олимлар ўртасидаги ҳамкорликни рағбатлантирадилар ва ўз имкониятларига мувофиқ ўз мамлакатлари университетлари ва бошқа олий мактабларида ўқиш учун жойлар, шунингдек, ўзаро келишилган соҳаларда стажировка ва докторантуралар учун жойлар ва стипендиялар ажратадилар.

Томонлар илмий ҳамкорликнинг қуйидаги шаклларини белгилайдилар:

а) умумий илмий-техникавий лойиҳалар, уларнинг натижалари билан алмашув, бу лойиҳаларни бажарувчи олимлар, мутахассислар ва техник ходимлар билан алмашув,

б) умумий илмий конференциялар, симпозиумлар, семинарлар, кўргазмалар ва бошқа учрашувлар,

в) илмий ва технологик ахборот, шунингдек, тадқиқот маълумотлари билан алмашув,

г) келишувга биноан илмий ва технологик ҳамкорликнинг бошқа шакллари.

1. Томонлар иккала мамлакатнинг илмий давлат ташкилотлари, фан ва олий таълим муассасалари, илмий марказлари ва корхоналари ўртасидаги бевосита алоқаларни рағбатлантирадилар.

2. Томонлар ёки уларнинг илмий давлат ташкилотлари ушбу Битимни амалга ошириш учун зарур бўлган ҳамкорликнинг тафсилот ва процедураларини ўзида ифода этган узоқ муддатга мўлжалланган битимларни имзолайдилар.

3. Иккала мамлакатнинг фан ва олий таълим муассасалари, илмий марказлари ва корхоналари фан ва технология соҳасида ҳамкорлик тўғрисидаги ўзаро фойдали битимни имзолайдилар.

8-моддада қайд этилган битимларда:

а) ҳамкорликнинг объекти ва мақсадлари,

б) умумий тадқиқотларнинг натижаларидан фойдаланиш,

в) биргаликдаги ишларни молиявий таъминлаш белгиланади.

Томонларнинг ҳар бири амалдаги қонунларга мувофиқ ўз ҳудудида ақлий мулкни ҳимоя қилишни кафолатлайди.

Экспертлар, олимлар ва бошқа мутахассисларнинг хизмат сафарлари бўйича харажатлари қуйидаги тартибда тўланади: юборувчи Томон бошқа мамлакатнинг пойтахтигача ва орқага қайтиш бўйича йўл харажатларини тўлайди, қабул қилувчи Томон эса мамлакат ичкарисидаги сафарлари бўйича ва бошқа барча харажатларни, агар улар 9-моддада қайд этилган битимларга зид бўлмаса, тўлайди.

Томонлар ушбу Битимни бажаришда иштирок этувчи шахсларга ҳудудга тез ва тўсиқларсиз кириш ва ундан ташқарига чиқишларини, шунингдек, илмий жиҳозлар ва асбоб-ускуналарни олиб кириш ва олиб кетишларини кафолатлайди.

1. Ушбу Битимни бажариш мақсадида Томонлар Қўшма Ўзбек-Литва комиссиясини ташкил қиладилар, унинг фаолияти устидан раҳбарлик қилиш Ўзбекистон Республикаси Олий ва ўрта махсус таълим вазирлиги, Ўзбекистон Республикаси Халқ таълими вазирлиги, Ўзбекистон Республикаси Фан ва техника бўйича давлат қўмитаси ва Литва Республикаси Таълим ва фан вазирлиги раҳбарларига юклатилади. Қўшма Комиссия навбатма-навбат Тошкентда ва Вильнюсда йиғилиб туради.

2. Қўшма Комиссия қуйидаги вазифаларни бажаради:

а) ушбу Битимнинг бажарилиши учун қулай шароитлар яратади,

б) умумий дастур ва лойиҳаларни бажаришга ёрдам беради,

в) таълим ва фан соҳасида ҳамкорликнинг келажаги тўғрисида ахборот ва фикрлар билан алмашади ва уни такомиллаштириш бўйича таклифларни кўриб чиқади.

Ушбу Битим Томонлар ўртасидаги бошқа битимларга, шунингдек, улар аъзо бўлган халқаро шартномаларга зид келмайди.

1. Ушбу Битим Томонлар бир-бирларини ёзма равишда дипломатик йўллар орқали Битимнинг кучга кириши учун зарур бўлган барча ҳуқуқий процедуралар бажарилгани тўғрисида билдиришнома юборган кундан бошлаб кучга киради. Охирги билдиришнома санаси кучга кириш санаси ҳисобланади.

2. Битим беш йиллик муддатда амалда бўлади ва Томонлардан ҳеч бири бошқа Томонга унинг амалини тўхтатиш тўғрисидаги ниятини тегишли муддат тугашидан олти ой илгари билдирмаса, унинг амали кейинги беш йиллик муддатларга ўз-ўзидан узаяди.

3. Битим қоидалари Томонларнинг ўзаро ёзма келишувига биноан ўзгартирилиши мумкин.

4. Ушбу Битимнинг ўзгартирилиши ёки тўхтатилиши унинг асосида бошланган лойиҳаларга, уларнинг бажарилиши охирига етказилгунга қадар, таъсир қилмайди.

Вильнюс шаҳрида, 1995 йил 7 июнда икки нусхада, ҳар бири ўзбек, литва ва рус тилларида тузилди, бунда барча матнлар бир хил ҳуқуқий кучга эга. Ушбу Битим қоидаларини талқин қилишда тафовутлар бўлса, Томонлар рус тилидаги матнга амал қиладилар.