Ўзбекистон Республикаси ва Америка Қўшма Штатлари, бундан кейин «Томонлар» деб аталувчилар;

иккала мамлакатда дипломатик ва консуллик ваколатхоналарнинг мавжудлиги икки халқ ўртасида алоқаларни кенгайтиришга хизмат қилиши ва ўзаро алмашувга кўмаклашишини тан олган холда;

чекланмаган ҳаракат қилиш иккала мамлакат дипломатик ва консуллик ваколатхоналарининг муваффақиятли ишлаши учун зарурлигини ҳисобга олиб;

ва Ўзбекистон Республикаси билан Америка Қўшма Штатлари ўртасидаги яқин ва ўзаро дипломатик муносабатларнинг характерини таъкидлаш истагида;

уларнинг 1961 йил 18 апрелдаги дипломатик алоқалар тўғрисидаги Вена Конвенцияси қоидаларига қатъий амал қилишга содиқликларини тасдиқлаб;

Европада Ҳамкорлик ва Хавфсизлик Ташкилоти доирасида Томонларнинг эркин ҳаракат қилиш борасида зиммаларига олган мажбуриятларини ҳаётга татбиқ қилишга интилиб;

куйидаги принципларга амал қилиш тўғрисидаги умумий истакларини билдирадилар:

1. Ўзаро асосда Бошқа Томоннинг дипломатик ва консуллик ходимларининг ҳаракати учун ваколатхона жойлашган мамлакат ҳудудида ёпиқ районлар бўлмайди.

Томонлар бундан кейин ҳам ҳарбий базалар, стратегик объектлар ва кенг омманинг бемалол кириши учун ёпиқ бўлган жойларга тегишли рухсатномасиз киришни тақиқлаши мумкин.

Бундан ташқари, Томонларнинг ҳеч бири тегишли рухсатномасиз хусусий мулкчилик доирасига бостириб киришга ҳаққи йўқ.

2. Ўзаро асосда иккала Томоннинг дипломатик ва консуллик ходимларининг ҳаракати учун ваколатхона жойлашган мамлакат ҳукуматининг рухсатини олиш, шунингдек, уни олдиндан хабардор қилиш талаб қилинмайди.

Бундан ташқари, бундай шахслар ваколатхона жойлашган мамлакат фуқаролари учун тегишли хизматларни кўрсатувчи ташкилотлар орқали ва ўша асосда бевосита ўз сафарларини ўзлари уюштиришлари мумкин.

3. Дипломатик алоқалар тўғрисидаги Вена Конвенциясининг 11-бандига қарамасдан Ўзбекистон Республикаси Ҳукумати Америка Қўшма Штатларининг Ўзбекистон Республикасидаги дипломатик миссиялари ходимлари сонини асоссиз равишда чекламайди, Америка Қўшма Штатлари Ҳукумати эса Ўзбекистон Республикасининг Америка Қўшма Штатларидаги дипломатик миссиялари ходимлари сонини асоссиз равишда чекламайди.

4. 1 ва 2-параграфларнинг дипломатик миссиялар аъзоларининг чекланмаган эркин ҳаракат қилиши тўғрисидаги қоида Ўзбекистон Республикаси ва Америка Қўшма Штатларининг бошқа ҳамма фуқароларига тааллуқли бўлади.

5. Меморандумдаги ҳеч бир нарса Томонлардан ҳеч бирининг ўз ҳудудига кириш учун виза тартибини ўрнатиш ҳуқуқини чекламайди.

6. Ушбу Меморандум қоидалари ҳеч бир ҳолда Томонлардан бирортасининг учинчи давлатларга нисбатан олган мажбуриятларига таъсир қилмайди ва улардан бирортасига қарши қаратилмайди.

7. Ушбу Меморандум имзоланган вақтдан 1994 йил 1 мартда имзоланган Ўзбекистон Республикаси Ҳукумати билан Америка Қўшма Штатлари Ҳукумати ўртасида дипломатик ва консуллик ходимларининг чекланмаган ҳаракат қилиши тўғрисидаги ҳамжиҳатлик Меморандуми ўз кучини йўқотади.

8. Мамлакатлардан бирортаси ушбу ҳамжиҳатлик Меморандумини тўхтатиш истагида бўлса, бу мамлакат бошқа Томонни хабардор қилгандан сўнг икки ойдан кейин Меморандумнинг амал қилишини тўхтатиши мумкин.

Вашингтон шаҳрида 1995 йил 20 июнда ўзбек ва инглиз тилларида имзоланди.