Ўзбекистон Республикаси Олий Кенгаши қарор қилади:

1. Ўзбекистон Республикаси Олий Кенгашининг Ўзбекистон Республикаси давлат мустақиллигини тан олган мамлакатлар давлат раҳбарларига ва парламентларига Мурожаатномаси қабул қилинсин (матн илова қилинади).

2. Ўзбекистон Республикасининг Ташқи ишлар вазирлиги ушбу Мурожаатнома Ўзбекистон Республикасининг мустақиллигини тан олган давлат раҳбарлари ва парламентларига белгиланган тартибда топширилишини таъминласин.

Ўзбекистон Республикаси Олий Кенгаши Ўзбекистон Республикасининг давлат мустақиллигини тан олган мамлакатларининг давлат бошлиқлари ва парламентларига миннатдорчилик изҳор этади.

Ўзбекистон Республикаси Бирлашган Миллатлар Ташкилоти Уставининг, Хельсинкида тузилган Якунловчи ҳужжатнинг, Париж хартиясининг ва Европа ҳамда Осиёда хавфсизлик ва ҳамкорликка доир тузилган бошқа асосий ҳужжатларининг мақсад ва принципларга содиқ қолиб, тинчлик, демократия ва қонунийлик йўлидан қатъий бориш, Инсон ҳуқуқлари умумжаҳон Декларациясига қаттиқ амал қилиш, ўзининг халқаро мажбуриятларига оғишмай риоя этиш ниятида эканлигини баён қилади.

Мустақил Ўзбекистон Республикаси жаҳон ҳамжамиятига аъзо бўлган барча мамлакатлар билан ижобий давлатлараро муносабатлар ўрнатилишини, ўзаро манфаатли асосларда тенг ҳуқуқли мустаҳкам иқтисодий ва маданий алоқалар ривожлантирилишини, умумий экология муаммолари биргаликда ҳал этилишини маъқуллайди.

Ўзбекистон Республикаси халқаро миқёсда хавфсизлик мустаҳкамланишини устувор вазифаси деб билиб, ҳарбий соҳада масъулиятли вазмин сиёсат юритиш истагида эканлигини маълум қилади ва Ядро қуролини тарқатмаслик тўғрисидаги Шартномага қўшилишга тайёр эканлигини тасдиқлайди.