2015 йилда янги иш ўринлари ташкил этиш ва аҳоли бандлигини таъминлаш дастурига мувофиқ йил давомида 4283 та иш ўринлари ташкил қилиш кўзда тутилиб, шу жумладан, янги ишлаб чиқариш объектларини ишга тушириш, мавжуд корхоналарни кенгайтириш ва қувватларни янгилаш соҳасида 100 та, кичик корхоналар ва микрофирмаларни ташкил қилиш бўйича 1255 та, шундан, саноатда 305 нафар, қурилиш-пудрат ишларини кенгайтириш, жумладан уй-жой қурилиши ва таъмирлаш соҳасида 283 та, хизмат кўрсатиш ва сервис соҳасида 677 та, якка ва оилавий тадбиркорликни ривожлантириш соҳасида 890 та, уй меҳнатининг барча шаклларини ривожлантириш эвазига 675 та, бу борада корхоналар ва кооперацияда меҳнат шартномалари асосида касаначиликни ривожлантиришда 120 та, фермер хўжаликларини ривожлантириш (паррандачилик, чорвачилик, балиқчилик ва бошқалар) соҳасида 930 та, ишлаб чиқариш ва бозор инфратузилмасини ривожлантириш эвазига 430 та, ишламасдан турган корхоналарни фаолиятини тиклаш бўйича 25 та янги иш ўринлари яратиш режалаштирилмоқда.

Бунда, 2191 нафар аёлларни иш билан таъминлаш, 2293 нафар ёшларни, шу жумладан 1303 нафар касб-ҳунар коллеж битирувчиларини иш билан таъминлаш кўзда тутилмоқда. Бунинг асосий қисми 3206 нафар қишлоқ жойларида ташкил этилади.

Кун тартибидаги масалани муҳокама этиб, халқ депутатлари Оқдарё туман Кенгаши қарор қилади:

1. 2015 йилда янги иш ўринлари ташкил этиш ва аҳоли бандлигини таъминлаш дастури иловага* асосан тасдиқлансин.

2. Дастурда 2015 йилда туманда қуйидаги асосий йўналишлар бўйича 4283 та янги иш ўринлари ташкил этилиши кўзда тутилганлиги:

янги ишлаб чиқариш объектларини ишга тушириш, мавжуд корхоналарни кенгайтириш ва қувватларни янгилаш соҳасида 100 та янги иш ўринлари;

кичик корхоналар ва микрофирмаларни ташкил қилиш бўйича 1255 та, шундан, саноатда 305 та янги иш ўринлари;

қурилиш-пудрат ишларини кенгайтириш, жумладан уй-жой қурилиши ва таъмирлаш соҳасида 283 та янги иш ўрин;

хизмат кўрсатиш ва сервис соҳасида 667 та янги иш ўринлари;

якка ва оилавий тадбиркорликни ривожлантириш соҳасида 890 та янги иш ўринлари;

уй меҳнатининг барча шаклларини ривожлантириш эвазига 675 та янги иш ўринлари;

бу борада корхоналар ва кооперацияда меҳнат шартномалари асосида касаначиликни ривожлантиришда 120 та янги иш ўринлари;

фермер хўжаликларини ривожлантириш (паррандачилик, чорвачилик, балиқчилик ва бошқалар) соҳасида 930 та янги иш ўринлари;

ишлаб чиқариш ва бозор инфратузилмасини ривожлантириш эвазига 430 та янги иш ўринлари;

ишламасдан турган корхоналар фаолиятини тиклаш бўйича 25 та янги иш ўринлари яратилиши эътиборга олинсин.

3. Туман ҳокими ўринбосари (Т. Эсиргапов), туман молия бўлими бошлиғи (Ҳ. Самандаров)ларга:

туман Бандликка кўмаклашиш ва аҳолини ижтимоий муҳофаза қилиш маркази (Ғ. Пардаев) ҳамда туман ҳокимлиги Иқтисодиёт бўлими (И. Нарзуллаев) билан келишган ҳолда бир ой муддатда аниқ корхоналар бўйича 2015 йилда янги иш ўринлари ташкил этиш тармоқ дастурини, шунингдек кўп меҳнат талаб этадиган ишлаб чиқаришларни модернизациялаш ва технологик янгилашни, ишчи кучларига бўлган талаб ва таклифнинг мавсумий ўзгаришини ҳисобга олиб, илгари ташкил этилган иш ўринлари сақлаб қолиниши ва барқарор фаолият юритишини сўзсиз таъминлашга қаратилган комплекс чора-тадбирларни;

туман Бандликка кўмаклашиш ва аҳолини ижтимоий муҳофаза қилиш маркази (Ғ. Пардаев) ва тумандаги касб-ҳунар коллежлари билан келишган ҳолда икки ҳафта муддатда касб-ҳунар коллежлари билан ўзаро ҳамкорликни янада такомиллаштириш, айниқса битирувчи курслар ўқувчиларининг ишлаб чиқариш амалиётини ташкил этиш бўйича кооперация алоқаларини мустаҳкамлаш, моддий-техник жиҳатдан ва кадрлар билан амалда қўллаб-қувватлашни кучайтиришни назарда тутувчи комплекс чора-тадбирларни тасдиқлаш учун киритиш вазифаси юклатилсин.

4. Белгилаб қўйилсинки, ҳар чоракда халқ депутатлари туман Кенгашининг депутатлари иштирокида туман ҳокимлигининг мажлисларида 2015 йилда янги иш ўринлари ташкил этиш дастури параметрларининг ва тасдиқланган чора-тадбирлар амалга оширилишининг боришини танқидий кўриб чиқилиши, бунда янги ташкил этилган иш ўринлари тўғрисидаги маълумотларнинг ишончлилигини таъминлаш мақсадида туман Бандликка кўмаклашиш ва аҳолини ижтимоий муҳофаза қилиш маркази (Ғ. Пардаев) ҳамда ваколатли ташкилотлар билан биргаликда амалга оширилган иш ўринларини инветаризациядан ўтказиш натижалари асосий мезонлардан бири деб баҳолансин.

5. Туман ҳокимининг ўринбосари (Т. Эсиргапов), туман Кенгаши депутатлари, туман Бандликка кўмаклашиш ва аҳолини ижтимоий муҳофаза қилиш маркази (Ғ. Пардаев), туман ҳокимлиги иқтисодиёт бўлими (И. Нарзуллаев), тижорат банклари, корхона ва ташкилотлар билан биргаликда:

2014/2015 ўқув йилида касб-ҳунар коллежларининг битирувчиларини ишга жойлаштириш параметрларини алоҳида кўрсатган ҳолда, иш ўринларни ташкил этиш учун зарур бўлган молиявий, моддий ва бошқа ресурсларнинг белгиланишига алоҳида эътибор қаратиб, 2015 йилда ташкил этиладиган янги иш ўринларининг манзилли рўйхатларини;

2015 йилда иш ўринлари ташкил этиш ҳудудий дастурини амалга ошириш бўйича ташкилий чора-тадбирлар комплексини ишлаб чиқсинлар ва тасдиқласинлар.

6. Туман Бандликка кўмаклашиш ва аҳолини ижтимоий муҳофаза қилии маркази (Ғ. Пардаев), туман ҳокимлиги иқтисодиёт бўлими (И. Нарзуллаев), статистика бўлими (З. Эргашов) билан биргаликда:

дастурнинг бажарилиши мониторингини тизимли олиб борилишини таъминлаш;

ишсизларни ишга жойлаштириш, шу жумладан уларни касб-ҳунарга қайта ўқитиш ва қайта тайёрлаш, хақ тўланадиган жамоат ишларига йўллаш, шунингдек «Бўш иш ўринлари ярмаркалари»ни ўтказиш орқали ишга жойлаштириш тадбирларининг сўзсиз бажарилишини таъминласинлар.

7. Тумандаги тижорат банкларига:

бир ой муддатда 2015 йилда тижорат банклари томонидан банклар, туман бандлик йўналишлари бўйича хўжалик юритувчи субъектларнинг иш ўринлари ташкил этишни таъминлайдиган бизнес-лойиҳаларини молиялаштириш, шу жумладан касб-ҳунар коллежлари битирувчиларига тадбиркорлик фаолиятини ташкил этиш учун кредит маблағлари ажратиш прогноз параметрларини ишлаб чиқиш ва тасдиқлаш;

иш ўринлари ташкил этиш учун, айниқса касб-хунар коллежлари битирувчиларига ажратилаётган кредит ресурслари бўйича кенг тарғибот-ташвиқот ишларини доимий равишда амалга ошириш тавсия этилсин.

8. Туман ҳокими ўринбоси (Т. Эсиргапов) бир ой муддатда тумандаги саноат ҳудудларида кўп меҳнат талаб қилмай ихчам, кичик ишлаб чиқариш қувватларини ривожлантириш ва жойлаштириш бўйича масалаларни ўрганиш ва таклифлар ишлаб чиқиш учун туман ҳокимлиги иқтисодиёт бўлими, Бандликка кўмаклашиш ва аҳолини ижтимоий муҳофаза қилиш маркази, Давлат солиқ инспекцияси, архитектура ва қурилиш бўлими, тижорат банкларининг масъул ходимларидан иборат таркибда Махсус ишчи гуруҳини тузсин ва туман ҳокимлиги тасдиғига киритсин.

Махсус ишчи гуруҳи туманда жойларга борган ҳолда:

тумандаги мавжуд саноат зоналари (майдончалари)дан фойдаланиш самарадорлигини ва уларнинг иш билан таъминланганлигини, шу жумладан ишлаб чиқариш инфратузилмаси аҳволини танқидий ўрганиб чиқиш;

саноат зоналари (майдонлари)даги саноат корхоналарининг ишламаётганлиги ва тугатилиши сабабини чуқур таҳлил қилиш;

саноат майдончаларида фойдаланилмаётган бинолар (иншоотлар), паст ликвидли объектлар, ишламаётган корхоналар мавжудлиги юзасидан хатлов ўтказиш ҳамда уларнинг фаолиятини тиклаш ва молиявий соғломлаштириш бўйича таклифлар тайёрлаш, 2015 йил мобайнида ҳар бир объект бўйича иш ўринлари ташкил этишнинг аниқ параметрларини тасдиқлашни амалга оширсинлар.

9. Тумандаги ўрта махсус, касб-ҳунар коллежлари, туман Бандликка кўмаклашиш ва аҳолини ижтимоий муҳофаза қилиш маркази (Ғ. Пардаев), туман ҳокимлиги бўлим бошлиқлари, манфаатдор корхоналар, идоралар, хўжалик бирлашмалари ва йирик корхоналар билан биргаликда касб-ҳунар коллежларининг битирувчи курс ўқувчиларини ишлаб чиқариш амалиётини ўташини ташкил этиш ва кейинчалик ишга жойлашишига кўмаклашиш учун аниқ корхоналарга бириктиришни, шунингдек касб-ҳунар коллежларининг моддий-техника базасини мустаҳкамлашни ҳамда педагоглар малакасини оширишни назарда тутувчи қўшма чора-тадбирлар комплексини ишлаб чиқсинлар ва тасдиқлаш учун туман ҳокимлигига киритсинлар.

10. Ушбу қарор 2015 йил 1 январдан кучга киради.

11. Мазкур қарорнинг бажарилишини назорат қилиш Халқ депутатлари туман Кенгашининг маҳаллий бюджетни шакллантириш ва ижро этиш, иқтисодий ислоҳотларни амалга ошириш ҳамда тадбиркорликни ривожлантириш масалалари бўйича доимий комиссия (Ғ. Пардаев) ва туман ҳокимининг ўринбосари (Т. Эсиргапов) зиммасига юклансин.