2013 йилнинг «Обод турмуш йили» деб эълон қилинганлиги муносабати билан мамлакатда халқнинг турмуш даражаси ва сифатини ошириш, фаровонлик, тинчлик ва тотувликни таъминлаш вазифаларини амалга оширишга ресурслар ва имкониятларни сафарбар қилиш, давлат, нодавлат ва жамоат ташкилотларини кенг жалб этиш бўйича аниқ мақсадга йўналтирилган чора-тадбирлар комплексини амалга ошириш, шунингдек Ўзбекистон Республикаси Президентининг 2013 йил 14 февралдаги «Обод турмуш йили» Давлат дастури тўғрисида»ги ПҚ-1920-сонли ҳамда вилоят ҳокимининг 2013 йил 13 мартдаги Қ-49-сонли қарорлари ижросини таъминлаш мақсадида қарор қиламан:

1. «Обод турмуш йили» туман дастури иловага* мувофиқ тасдиқлансин.

2. Қуйидагилар «Обод турмуш йили» туман дастурини амалга оширишнинг асосий устувор йўналишлари этиб белгилансин:

туманда барқарорлик ва хавфсизликни, фуқаролар тотувлигини, миллатлараро ва конфессиялараро тотувликни янада мустаҳкамлаш, инсон ҳуқуқлари, эркинлиги ва манфаатлари муҳофазасини таъминлаш;

аҳоли фаровонлиги ва реал даромадларининг изчил ўсишини таъминлаш, иш билан бандликни ошириш, кичик бизнес ва хусусий тадбиркорликни, фермерликни янада ривожлантириш, аҳолини, биринчи навбатда, унинг ижтимоий ночор қатламларини ва кам таъминланган оилаларни давлат томонидан аниқ манзилли муҳофаза қилиш ва уларга ижтимоий ёрдам кўрсатиш тизимини такомиллаштириш;

аҳоли саломатлигини муҳофаза қилиш тизимини такомиллаштириш, соғлиқни сақлаш муассасаларининг моддий-техника базасини мустаҳкамлаш ва ривожлантириш, уларни замонавий ташхис ва даволаш асбоб-ускуналари билан жиҳозлаш, касалликлар профилактикасини кенгайтириш ҳамда уларни даволашнинг илғор тиббий технологиялари ва методларини жорий этиш, пировард натижада одамларнинг, айниқса болалар ва оналарнинг соғлиғини мустаҳкамлаш;

жисмоний ва маънавий соғлом, уйғун камол топган ўсиб келаётган авлодни, профессионал, замонавий даражада тайёрланган кадрларни тарбиялаш борасида олиб борилаётган ишларнинг самарадорлигини ҳар томонлама ошириш, таълим савиясини янада такомиллаштириш ва сифатини юксалтириш, таълим муассасаларининг моддий-техника базасини мустаҳкамлаш;

халқнинг турмуш даражаси ва сифатини янада ошириш, муносиб уй-жой ва ижтимоий-маиший шароитлар яратиш, янги уй-жойлар қуриш, замонавий йўллар ва муҳандислик-коммуникация инфратузилмаларини ривожлантириш, аҳоли пунктларини тоза ичимлик сув, электр энергияси ва иссиқлик билан кафолатли таъминлаш бўйича аниқ чора-тадбирларни амалга ошириш;

фуқароларнинг ўзини ўзи бошқариш органлари фаолиятини янада такомиллаштириш, уларнинг ҳуқуқлари ва ваколатларини кенгайтириш, жойларда иқтисодий ва ижтимоий ривожлантириш, ёш ва эҳтиёжманд оилаларни ижтимоий қўллаб-қувватлаш ва уларга ёрдам беришни яхшилаш, маҳаллалар ва уй-жой мавзеларининг ташқи қиёфасини сифат жиҳатидан яхшилаш, ободонлаштириш ва кўкаламзорлаштириш вазифаларини ҳал этишда уларнинг роли ва аҳамиятини ошириш;

оилаларни янада мустаҳкамлаш, аёлларнинг оила ва жамиятдаги роли ва мақомини ошириш, уларнинг ижтимоий фаоллигини кучайтириш, иш билан бандлигини таъминлаш ҳамда аёлларнинг иқтисодиётнинг турли тармоқлари ва соҳаларидаги фаолиятини муносиб рағбатлантириш, уларнинг ўз иқтидорини намоён қилиши ва уй-рўзғордаги ишларини енгиллаштириш учун қулай ижтимоий-маиший шароитлар яратиш чора-тадбирларини амалга ошириш.

3. «Обод турмуш йили» туман дастурини ишлаб чиқиш ва амалга ошириш бўйича туман комиссиясига «Обод турмуш йили» туман дастурининг бажарилишини ташкил этиш ва мониторингини олиб бориш вазифаси юклатилсин.

4. «Обод турмуш йили» туман дастурини ишлаб чиқиш ва амалга ошириш бўйича комиссияси (С. Мирзаев) қуйидагиларни таъминласин:

икки ҳафта муддатда — «Обод турмуш йили» Давлат дастурининг устувор йўналишлари ва тадбирларидан келиб чиққан ҳолда тумандаги барча корхона, ташкилот, муассасалар, қишлоқ ва маҳалла фуқаролар йиғинлар, жамоат ташкилотлари томонидан «Обод турмуш йили»нинг тармоқ дастурлари ишлаб чиқилишини ҳамда қабул қилиниши таъминлансин;

«Обод турмуш йили» Давлат дастурига киритилган тадбирларни тўлиқ ва сифатли ҳамда ўз вақтида бажариш бўйича давлат хўжалик бошқарув органлари, корхона, ташкилот ва муассасалар ва нодавлат нотижорат ташкилотлари даражасида ишлар аниқ-пухта мувофиқлаштиришни ташкил этсин, дастур амалга оширилиши устидан тизимли назорат ўрнатсин;

ҳар ой якунлари бўйича «Обод турмуш йили» Давлат дастурида назарда тутилган тадбирлар бажарилиши тўғрисида туман ва вилоят ҳокимлигига ахборот бериб борсин.

5. Туман ҳокимининг иқтисодиёт ва ижтимоий масалалар бўйича ўринбосари (С. Мирзаев) тумандаги корхона, ташкилот, муассасаларда, қишлоқ ва маҳалла фуқаролар йиғинларида «Обод турмуш йили» Давлат дастурини амалга оширилиши бўйича комиссиялар тузилишини таъминласин, уларнинг зиммасига дастурда назарда тутилган чора-тадбирларни тегишли ташкилот ва муассасалар раҳбарларига, оғишмай ва тўлиқ ҳажмларда амалга оширилиши юзасидан шахсий жавобгарликни юкласин.

6. Туман телевиденияси ва «Нурнома» газетасига:

«Обод турмуш йили» Давлат дастурининг мақсади ва вазифаларини, уни амалга оширишнинг асосий йўналишлари ва чора-тадбирларини аҳоли ўртасида мунтазам, тизимли кенг ёритилишини;

тумандаги барча корхона, ташкилот, муассасалар, қишлоқ ва маҳалла фуқаролар йиғинлари, нодавлат нотижорат ташкилотларининг Дастурда назарда тутилган тадбирларни амалга оширишга қўшган аниқ ҳиссасини акс эттирган ҳолда «Обод турмуш йили» Давлат дастурининг амалга оширилиши тўғрисида кенг жамоатчиликка доимий хабардор қилиб турилишини таъминласинлар.

7. Туман ҳокимлиги ташкилий-назорат гуруҳи (Ў. Тиллаев) мазкур қарорни Халқ депутатлари туман Кенгашининг тасдиғига киритсин.

8. Ушбу қарорнинг бажарилишини назорат қилишни ўз зиммамда қолдираман.

9. Мазкур қарор матбуотда эълон қилинган кундан бошлаб кучга киради.