Ўзбекистон Республикаси Ҳукумати ва Украина Вазирлар Маҳкамаси, бундан кейин «Томонлар» деб аталувчилар,

икки давлат ўртасида иқтисод, савдо, фан, техника ва маданият соҳасида ўзаро манфаатли ҳамкорликни ривожлантириш учун интеллектуал мулкни самарали муҳофаза қилишнинг муҳимлигини англаб,

бундай ҳамкорлик учун қулай шароитлар яратишни истаб,

интеллектуал мулк ҳуқуқини муҳофаза қилиш соҳасида ҳамкорликни тенглик ва ўзаро манфаатдорлик тамойиллари асосида кенгайтириш зарурлигини англаб,

қуйидагилар тўғрисида келишиб олдилар:

Ушбу Битим мақсадлари учун «интеллектуал мулк» атамаси Жаҳон интеллектуал мулк ташкилотини таъсис этувчи 1967 йил 14 июлда Стокгольмда имзоланган Конвенциянинг 2-моддасида кўрсатилган маънода тушунилади.

1. Томонлар ўз миллий қонунчилигига ва Томонлар қатнашчилари бўлган халқаро шартнома ва битимларга мувофиқ бошқа Томоннинг интеллектуал мулкка бўлган ҳуқуқларини самарали муҳофазасини таъминлайдилар.

2. Ўзбекистон Республикаси ва Украина аъзо бўлган халқаро шартномалар билан тартибга солинмаган интеллектуал мулк ҳуқуқлари муҳофазасига тегишли масалалар бўйича ушбу Битим кучга кирган санадан эътиборан бир давлатнинг жисмоний ва ҳуқуқий шахслари бошқа давлат ҳудудида шу давлат қонунчилигига мувофиқ ўз жисмоний ва ҳуқуқий шахсларига берилган ҳуқуқлар ва имтиёзлардан фойдаланадилар.

Ушбу Битимнинг мақсади Томонларнинг интеллектуал мулк ҳуқуқларини самарали муҳофазасини таъминлаш йўли билан иқтисод, савдо, фан, технология ва маданият соҳасида ҳамкорлигини янада кенгайтириш ва чуқурлаштиришдан иборат.

Томонларнинг ҳамкорлиги қуйидагиларни ўз ичига олади:

интеллектуал мулкка бўлган ҳуқуқларнинг муҳофазаси билан боғлиқ масалаларни мувофиқлаштириш ва икки Томоннинг тегишли идора ва ташкилотлари ўртасида муаллифлик ҳуқуқлари ва унга турдош ҳуқуқларнинг муҳофазаси, шунингдек саноат мулки объектларига бўлган ҳуқуқларнинг муҳофазаси каби соҳаларда ҳамкорлик қилиш тўғрисида аниқ битимлар тузишга кўмаклашиш;

ҳуқуқий ахборотлар, шунингдек уларни интеллектуал мулк ҳуқуқларини муҳофаза қилиш соҳасида қўллаш тажрибаси тўғрисидаги ахборот билан алмашиш;

интеллектуал мулк соҳасида саводсизликни тугатиш бўйича тадбирлар ўтказиш тажрибаси ҳақидаги ахборот билан алмашиш;

ўқув, услубий ва махсус адабиётлар билан алмашиш;

интеллектуал мулк ҳуқуқларининг муҳофазаси соҳасида мутахассисларни тайёрлаш ва уларнинг касб малакасини ошириш, шу соҳада тажриба билан алмашиш;

халқаро ҳамкорлик тажрибалари ва Томонлардан ҳар бирининг интеллектуал мулк ҳуқуқларини муҳофазаси бўйича кўп томонлама халқаро шартномаларда қатнашиши, шунингдек бу шартномалар билан боғлиқ мажбуриятларни бажариш тўғрисидаги ахборот билан алмашиш;

икки Томон ўртасида савдо-иқтисодий ва илмий-техник ҳамкорликнинг аҳволи тўғрисидаги ахборот билан алмашиш;

интеллектуал мулк ҳуқуқларнинг муҳофазаси масалалари бўйича кўргазма, семинар ва йиғилишлар ташкил этиш;

ҳамкорликнинг Томонлар ўзаро келишиб олган бошқа шакллари.

Томонларнинг ваколатли органлари ўртасида тузиладиган иқтисод, саноат, фан, техника, маданият ва бошқа соҳаларда ҳамкорлик тўғрисидаги битимларга кирган интеллектуал мулк ҳуқуқларнинг муҳофазаси тўғрисидаги низомлари ушбу Битимга зид бўлмаслиги керак.

Томонлар интеллектуал мулк соҳасида ҳуқуқбузарликнинг олдини олиш учун ҳар бирининг амалдаги миллий қонунчилигига ва иккала Томон қатнашган халқаро шартнома ва битимларга мувофиқ жиноий, фуқаро-ҳуқуқий ва маъмурий чораларни кўрадилар.

Агар икки томонлама ҳамкорлик натижасида махфийликни сақлаш лозим бўлган интеллектуал мулк объектларини яратиш ёки фойдаланиш ёки махфий ахборот бериш мўлжалланган бўлса, тегишли шартнома ёки битимларга махфийликни сақлаш тўғрисида қоида киритилади. Бу ҳолларда Томонларнинг тегишли ташкилотлари ўз давлатларининг қонунчилик низомларига, шунингдек шартнома ва битимларда берилган қоидаларга асосланиб, махфийликни сақлаш бўйича мажбуриятларни бажарадилар.

Ушбу Битимни амалга ошириш учун қуйидаги ваколатли органлар масъулдирлар:

Ўзбекистон Республикасида — Ўзбекистон Республикаси фан ва техника давлат қўмитаси қошидаги Давлат патент идораси, шунингдек Ўзбекистон Республикаси Муаллифлик ҳуқуқлари бўйича давлат агентлиги;

Украинада — Украина Давлат патент идораси, шунингдек Украина Муаллифлик ва турдош ҳуқуқлари бўйича давлат агентлиги.

Тегишли ташкилотларнинг ҳамкорлик шартлари ва тартиблари улар ўртасидаги алоҳида битимлар билан аниқланади.

Томонлар ушбу Битимни амалга ошириш чоғида бир-бирларига йўллайдиган ҳужжатлар рус тилида тақдим этилади.

Ушбу Битимга Томонларнинг ўзаро келишуви бўйича ўзгартиш ва қўшимчалар киритилиши мумкин. Барча ўзгартиш ва қўшимчалар ушбу Битимнинг ажралмас қисми бўлган алоҳида протоколлар билан расмийлаштирилади.

Ушбу Битим Томонлар тарафидан уни кучга кириш учун давлатлар ички процедуралари бажарганлиги тўғрисида охирги ёзма билдиришнома олинган кундан 30 кун кейин кучга киради.

Ушбу Битим ўн йил муддатга тузилади ва агарда Томонлардан бири навбатдаги муддат тугамасидан камида олти ой аввал дипломатик каналлар орқали унинг амал қилишини тўхтатиш нияти ҳақида бошқа Томонга хабар бермаса унинг амал қилиши ўз-ўзидан кейинги икки йиллик даврларга узайтирилади.

Киев шаҳрида 1998 йил 19 февралда икки нусхада, ҳар бири ўзбек, украин ва рус тилларида тузилди, бунда барча матнлар бир хил кучга эга.

Ушбу Битим қоидаларини изоҳлаш учун рус тилидаги матндан фойдаланилади.