Ўзбекистон Республикаси Солиқ кодекси ҳамда 1997 йил 29 августдаги «Давлат солиқ хизмати тўғрисида»ги Ўзбекистон Республикаси Қонуни ижроси юзасидан туман ҳудудидаги жисмоний шахслар тасарруфида бўлган мол-мулк, ер солиғи объектлари ва субъектлари, шунингдек якка тартибда тадбиркорлик фаолияти билан шуғулланувчи жисмоний шахсларни тўлиқ рўйхатга олиш, солиқларни ҳисоблаш, тегишли имтиёзларни тўғри қўллаш ҳамда белгиланган муддатларда маҳаллий бюджетга тушумлар тушишини таъминлаш мақсадида ҳамда Ўзбекистон Республикаси «Маҳаллий давлат ҳокимияти тўғрисида»ги Қонунининг 6 ва 25-моддаларига асосан қарор қиламан:

1. 2014 йилда мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, солиқ ҳисоблаш, тегишли имтиёзларни тўғри қўллашни тўлиқ ва сифатли ўтказиш, уларга тегишли бўлган маълумотларни ваколатли идоралар томонидан туман Давлат солиқ инспекциясига тўлиқ тақдим этилишини таъминлаш мақсадида 2014 йил 20 январдан 2014 йил 1 мартга қадар «Солиқ тўловчи жисмоний шахсларни ҳисобга олиш» даври этиб белгилансин.

2. Туман Давлат солиқ инспекцияси (И. Исмаилов)га:

солиқ тўловчиларни ҳисобга олиш даврида туман ҳудудидаги мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, уларга солиқ ҳисоблаш ва солиқ қонунчилигида белгиланган имтиёзларни қўллаш;

барча маҳаллаларда солиқларнинг аҳамияти, айрим тоифадаги жисмоний шахсларга солиқлардан бериладиган имтиёзлар тўғрисида, 2014 йил учун тўланиши керак бўлган солиқларнинг муддатидан олдин тўланиши ҳақида кенг тушунтириш ишларини олиб бориш ҳамда солиқ тўлови ҳақида хабарномалар бериш;

аҳоли ўртасида Ўзбекистон Республикаси солиқ қонунчилиги бўйича амалдаги меъёрий-ҳуқуқий ҳужжатларнинг моҳияти юзасидан қишлоқ (маҳалла) фуқаролар йиғини раиси ва фаоллари иштирокида мунтазам равишда семинар йиғилишлар ўтказиш вазифалари юклатилсин.

3. Туман ҳудудида фаолият юритаётган қишлоқ ҳамда маҳалла фуқаролар йиғинлари раислари, жамоат ташкилотлари, коммунал хўжалик бўлимлари, уй-жой мулкдорлар ширкатлари, корхона ва ташкилотларнинг раҳбарлари жисмоний шахсларни рўйхатга олиш, ҳисобланган солиқларни белгиланган муддатларда маҳаллий бюджетга ундирилиши юзасидан туман Давлат солиқ инспекциясининг участка солиқ инспекторларига доимий равишда яқиндан амалий ёрдам бериш вазифаси топширилсин.

4. «Солиқ тўловчи жисмоний шахсларни ҳисобга олиш» даврини кенг қамровли ва сифатли ўтказилиши юзасидан Ўзбекистон Республикаси Солиқ кодекси ва «Давлат солиқ хизмати тўғрисида»ги Ўзбекистон Республикаси Қонунига асосан, туман Давлат солиқ инспекцияси томонидан мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ ҳисобга олиш, солиқ ҳисоблаш ҳамда тегишли имтиёзларни тўғри қўлланилишини таъминлаш мақсадида;

туман «Ермулккадастр» хизмати ДУК (М. Умаров)га, 1-иловага мувофиқ туман ҳудудида жисмоний шахсларнинг эгалигида бўлган мол-мулк объектлари, ер майдони миқдори ва уларнинг 2014 йил 1 январь ҳолатига инвентаризация қийматлари тўғрисидаги маълумотларни;

туман Архитектура ва қурилиш бўлими бошлиғи (О. Хамидов)га, 2-иловага мувофиқ 2013 йилда фуқароларга туман ҳудудидан янги қурилишлар учун 2014 йил 1 январь ҳолатига ажратилган ер майдонлари ва уларнинг эгалари тўғрисидаги маълумотларни;

туман Бюджетдан ташқари пенсия жамғармаси бўлими (М. Муйдинова)га, 3-иловага мувофиқ туманда истиқомат қилувчи I-II-гуруҳ ногиронлари, пенсионерлар, ёлғиз пенсионерлар ва бошқа нафақа олувчи сифатида рўйхатга олинган фуқаролар тўғрисидаги маълумотларни;

туман мудофаа ишлари бўлими (Ш. Бобоев)га, 4-иловага мувофиқ 1941-1945 йиллардаги уруш ногиронлари ва қатнашчилари ҳамда уларга тенглаштирилган шахслар ва Афғонистонда ҳарбий хизматни ўтаган фуқаролар ҳақидаги маълумотларни;

туман Давлат санитария-эпидемиология назорати маркази (З. Анорқулов) ва «Ветеринария хизмати» раҳбари (Ҳ. Юлдашев)ларга, 7-иловага мувофиқ янгиланган тартибда санитария рухсатномалари олган жисмоний шахслар тўғрисидаги маълумотларни;

туман «Водийгазтаъминот» унитар корхонаси Чуст туман филиали (И. Арслонов)га, 8-иловага мувофиқ туман ҳудудида тадбиркорлик фаолиятини амалга оширувчи жисмоний шахслар билан газ истеъмоли учун тузилган шартномалар тўғрисидаги маълумотларни;

туман «Электр тармоқлари» корхонаси (Б. Рахимов)га, 9-иловага мувофиқ туман ҳудудида тадбиркорлик фаолиятини амалга оширувчи жисмоний шахслар билан электр истеъмоли учун тузилган шартномалар тўғрисидаги маълумотларни;

Туман ички ишлар бўлимининг йўл ҳаракати хавфсизлиги бўлинмаси бошлиғи (А. Мамадалиев)га, 10-иловага мувофиқ туман ҳудудидаги шахсий юк автотранспорт воситалари эгалари тўғрисидаги тўлиқ маълумотларни (қишлоқ, маҳалла фуқаролар йиғинлари кесимида) туман Давлат солиқ инспекциясига 2014 йил 1 февралига қадар тақдим этиш вазифалари юклатилсин.

5. Туман фуқаролик ҳолатларига далолатномалар ёзиш бўлимига, 5-иловага мувофиқ туман ҳудудида 2012-2013 йилларда вафот этган фуқаролар тўғрисидаги маълумотларни, туман давлат нотариал идорасига 6-иловага мувофиқ 2013 йил давомида жисмоний шахслар томонидан кўчмас мулк ижара шартномаси тасдиқланганлиги ва ижара ҳақи миқдори, шунингдек мерос қилиб олиш ёки ҳадя тарзида фуқароларнинг мулкига ўтаётган мол-мулк қиймати тўғрисидаги маълумотларни ўз вақтида тақдим этиб бориши тавсия этилсин.

6. «Маҳалла» хайрия жамоат фонди туман бўлими (Ж. Мирахмедов)га, қишлоқ, маҳалла фуқаролар йиғинлари раислари «Солиқ тўловчи жисмоний шахсларни ҳисобга олиш» ойлиги тадбирини ўтказишда фаол қатнашишлари ва жойларда участка солиқ инспекторлари билан жисмоний шахсларни солиқ органларида рўйхатга олиш тадбирларини ҳамкорликда амалга оширилиши белгилаб қўйилсин.

7. Қишлоқ, маҳалла фуқаролар йиғини раислари, участка Давлат солиқ инспекторлари ва «Ер ресурслари ва давлат кадастри» бўлими ходимлари билан биргаликда ҳисобга олинган солиқ тўловчи жисмоний шахслар тўғрисидаги маълумотни далолатнома асосида расмийлаштириш топширилсин.

8. Мазкур қарор расмий эълон қилинган кундан эътиборан кучга киради.

9. Мазкур қарор ижросини назорат қилиш туман ҳокимининг ўринбосари А. Абдулҳодиев зиммасига юклатилсин.