Ўзбекистон Республикаси Ҳукумати ва Россия Федерацияси Ҳукумати, кейинги ўринларда «Томонлар» деб аталади,

Ўзбекистон Республикаси Ҳукумати билан Россия Федерацияси Ҳукумати ўртасида 1993 йил 19 мартда тузилган маданият,фан ва техника, таълим, соғлиқни сақлаш, ахборот, спорт ва туризм соҳасида ҳамкорлик қилиш тўғрисидаги Битимга, 1993 йил 13 мартда Москва шаҳрида имзоланган илмий ва илмий-педагогик кадрларни тайёрлаш соҳасида ҳамкорлик қилиш ҳамда уларнинг малакалари ҳақидаги ҳужжатларни Мустақил Давлатлар Ҳамдўстлиги доирасида тенглаштириш тўғрисидаги Битимга амал қилиб,

олий таълим соҳасида тенг ҳуқуқли ҳамкорликни ривожлантиришдаги ўзаро манфаатдорликни ҳисобга олиб,

инсонпарварлик ва мулоқот маданияти асосида таълимнинг миллий тизимлари мазмунини янгилашга интилиб,

ўзаро муносабатларда Инсон ҳуқуқлари умумжаҳон декларациясида қайд этилган умуминсоний қадриятлар устуворлигидан келиб чиқиб,

қуйидагилар ҳақида келишиб олдилар:

Томонлар ўзаро келишувга биноан белгилаб олинган йўналишлар бўйича олий таълим соҳасидаги ҳамкорликни шерикчилик тамойилларида ривожлантирадилар. Улар бу ҳамкорлик узоқ муддатли ва конструктив характер касб этиш учун куч-ғайрат сарфлайдилар.

Томонлар қуйидаги йўналишларни ҳамкорликнинг устувор йўналишлари деб биладилар:

университетлар, институтлар ва ўрта ўқув юртлари ўртасида бевосита алоқаларни ривожлантириш;

ижтимоий, табиий-илмий ва техник таълимни ривожлантиришга ёрдам берадиган ўқув ва илмий дастурлар ҳамда лойиҳаларни биргаликда тайёрлашни ташкил этиш;

ёш олимлар ва профессор-ўқитувчи кадрлар алмашиш йўли билан илмий салоҳиятни кенгайтириш;

таълим тизимида лицензиялаш ва аккредитациялашнинг қиёсий таҳлилини амалга ошириш;

ахборот тармоқлари ва матбуот банкларини вужудга келтириш, мавжуд материалларни алмашиш ва дистанцион таълим бўйича янги технологиялар ишлаб чиқиш;

шерик-мамлакат тилини ва маданиятини ўрганиш.

Томонлар мавжуд ва келгусида тузиладиган ҳамда халқаро ҳужжатларнинг бир қисми бўлиб қоладиган қўшма дастур ва лойиҳалар ишлаб чиқишга кўмаклашадилар, уларни амалга оширишда иккала мамлакат олимлари ва мутахассислари фаол жалб этишига ёрдам берадилар.

Улар халқаро дастурлар ва лойиҳалар доирасида олий таълим мазмунини такомиллаштириш, фундаментал таълимни ривожлантириш, ўқув фанлари ва ўқув-методик материалларнинг янги курсларини вужудга келтиришни кўзда тутувчи ишларнинг бажарилишига кўмаклашишни ният қиладилар.

Томонлар тил ва адабиётлар соҳасида билимнинг бошқа соҳаларида Томонларнинг талабномалари бўйича мутахассислар алмашадилар.

Томонлар ўз давлатининг фуқароларини бошқа давлатнинг давлат таълими муассасаларига юборилишига кўмаклашадилар.

Улар ўзаро мақбуллик принципи асосида Россия Федерацияси ва Ўзбекистон Республикаси фуқароларини келишиб олинган мутахассисликлар бўйича Россия Федерациясининг Олий таълим Давлат қўмитаси ва Ўзбекистон Республикасининг Олий ва ўрта махсус таълим вазирлигига қарашли олий ўқув юртларида ўқишга қабул қилиш учун эквивалент квоталарини белгилайдилар.

Ўқитишга номзодларнинг тайёргарлик даражаси Томонлардан ҳар бирининг қабул қилувчи олий ўқув юртлари талабларига мос бўлиши керак.

Ушбу Битимнинг 5-моддасига асосан ўқитишга танлаб олинган номзодлар олий ўқув юртларига қабул қилаётган Томоннинг олий ўқув юртларида қабул қилиш қоидаларига мувофиқ кирадилар.

Томонлар белгиланган муддатларда ушбу битимнинг 5-моддасига мувофиқ навбатдаги ўқув йилида ўқишга киришни хоҳлаган номзодлар рўйхатларини, уларнинг бўлажак ихтисоси ва танлаган олий ўқув юртини кўрсатган ҳолда, ўзаро алмашиб турадилар.

Томонлар ўқишга киришни хоҳлаган номзодларни қабул қилиш имкониятлари ҳақида ҳар йили 15 июнга қадар бир-бирларини хабардор қиладилар.

Жўнатаётган Томон ўқитишга келишилган ҳар бир номзоднинг:

туғилганлик тўғрисидаги гувоҳномасининг нотариус томонидан тасдиқланган нусхасини;

ўрта маълумот тўғрисидаги гувоҳномасининг (аспирантлар учун олий маълумот ҳақидаги диплом ва унга илованинг) нотариус томонидан тасдиқланган нусхасини;

қабул қилаётган Томон олий ўқув юртида ўқишга нолойиқ салбий кўрсатгичлари бўлмаган ва ОИТС юзасидан текширув натижалари албатта қайд этилган тиббий маълумотномани;

4 х 6 см ҳажмдаги олтита фотосуратни;

номзоднинг маълумот олганини тасдиқловчи бошқа ҳужжатларни тақдим этади.

Ушбу Битимнинг 5-моддасида кўрсатилган квоталардан ташқари Томонлар шерик мамлакат фуқароларини, уларни ўқитиш учун харажатларни тўлиқ қоплаш шарти билан, қабул қилишлари мумкин.

Бундай ўқитишнинг молиявий ва бошқа шартлари Томонлар алоҳида тузган битимлар билан белгиланади.

Томонлар ўз олий ўқув юртларига шерик мамлакат фуқароларини ўқишга шартнома асосида якка тартибда қабул қилишга кўмаклашадилар.

Жўнатаётган томон 9-моддага мувофиқ ўқитиш сарф-харажатларини тўлиқ қоплаш шарти билан қабул қилинган ўз фуқароларини ўқитилганлик учун ҳар йили қабул қилаётган олий ўқув юртининг банкдаги ҳисоб-китоб счётига ўқитиш пулининг умумий суммасини ўтказишни таъминлайди.

Кейинчалик Россия олий ўқув юртларида таълим олиш қиймати рубл курсининг ўзгаришига қараб индексация қилиниши керак.

Шерик мамлакат фуқароларини ўқишга қабул қилган иккала Томон олий ўқув юртлари қуйидаги ҳолларда уларни муддатидан олдин ўқишдан чиқариб юбориш ҳуқуқини ўзларида сақлаб қоладилар:

ўқишни ўзлаштиролмаганда;

соғлиқни сақлаш органларининг ўқишни давом эттириши мумкин эмаслиги ҳақидаги расмий хулосаси бўлганда соғлиғига кўра;

олий ўқув юртларида ўзини тутиш қоидаларини ва ҳудудида ўзлари ўқиётган давлат қонунларини қўпол равишда бузганда.

Талаба (аспирант) муддатидан олдин ўқишдан чиқариб юборилганда у фойдаланмаган вақт учун қолган маблағ ўқитаётган олий ўқув юрти томонидан жўнатган Томон билан ўзаро ҳисоб-китоб қилиш учун ўз мамлакатининг олий ўқув юртлари масалалари билан шуғулланадиган давлат органига қайтарилади.

Ушбу Битимнинг 5-моддаси доирасида ўқишга қабул қилинган шерик мамлакат фуқароларига қабул қилувчи Томон ўз давлати фуқаролари учун тенг миқдорда стипендия тўлашни, ўз давлати фуқаролари учун белгиланган шартларда ётоқхона, ўқув аудиториялари, кутубхоналар, лабораториялар ва олий ўқув юртининг спорт-соғломлаштириш комплексларидан фойдаланиш ҳуқуқини беришни кафолатлайди.

Ушбу Битим доирасида ўқишга қабул қилинган шерик мамлакат фуқаролари ўқитаётган мамлакат фуқаролари учун яратилган шарт-шароитларда тиббий ёрдам ва хизмат кўрсатиш билан таъминланадилар.

Жўнатаётган Томон ўз давлати фуқароларига ўқиш жойига бориш ва у ердан қайтиш, жумладан, таътилга келиб-кетиш ва ушбу Битимнинг 12-моддасида кўрсатиб ўтилган муддатидан олдин ўқишдан чиқариб юборилганлиги сабабли келиши, шунингдек учинчи мамлакатга бориши учун йўл харажатларини тўлайди.

Ўқиш жараёни билан боғлиқ сафарлар йўл харажатини қабул қилувчи Томон тўлайди.

Томонлар таълим тўғрисида, илмий даража ва унвонлар тўғрисидаги ҳужжатларни эквивалентлаш ҳақида протокол тайёрлаш ва имзолаш бўйича иш олиб борадилар.

Томонлар қўшма икки томонлама ва халқаро тематик конференциялар, кенгашлар, семинарлар ва кўргазмалар ўтказишни, олий таълим муаммолари бўйича илмий-методик, ахборот ва маълумотнома материалларини ўзаро алмашиб туришни рағбатлантирадилар.

Ушбу Битимни бажариш ва талқин қилиш билан боғлиқ барча масалалар маслаҳатлашув ва музокаралар йўли билан ҳал этилади.

Ушбу Битим имзоланган кундан бошлаб кучга киради.

Ушбу Битим беш йиллик муддатга тузилган ва Томонлардан бири Битим кучини йўқотишдан олти ой олдин иккинчи Томонга ушбу Битимдан чиқиш ҳақида хабар бермаса, унинг кучи кейинги беш йиллик даврга ҳам ўз-ўзидан узаяверади.

1995 йил 27 июлда Тошкент шаҳрида икки нусхада, ўзбек ва рус тилларида тузилди, иккала матн ҳам бир хил кучга эгадир.