Ўзбекистон Республикаси Ҳукумати билан Россия Федерацияси Ҳукумати, бундан буён «Томонлар» деб аталувчилар,

жиноятчилик, хусусан, унинг уюшган шакллари кучайиб бориши миқёслари ва тамойилларидан ташвишланаётганликларини билдириб,

инсоннинг ҳаёти, ҳуқуқи ва эрки, шаъни ва қадр-қимматига таҳдид солувчи кучлардан ишончли ҳимоя қилишни, жамият ва давлат манфаатларини таъминлашга интилишдан келиб чиқиб,

умумий равишда тан олинган инсон ҳуқуқлари ва эркига риоя қилишда халқаро ҳамкорликка муҳим аҳамият бериб,

Бирлашган Миллатлар Ташкилотининг ва Мустақил Давлатлар Ҳамдўстлигининг жиноятчиликнинг олдини олиш ва жиноятчиларга ҳаққоний жазо бериш борасидаги ҳужжатлари қоидаларини ҳисобга олиб,

фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисида 1993 йил 22 январдаги Конвенцияни, шунингдек, Мустақил Давлатлар Ҳамдўстлигига аъзо давлатлар ҳудудида уюшган жиноятчиликка ва жиноятларнинг бошқа хавфли турларига қарши ҳамкорликда чоралар кўриш бўйича МДҲ ҳукуматлари бошлиқлари Кенгашининг 1993 йил 12 мартдаги қарори билан тасдиқланган Дастурни инобатга олиб,

Ўзбекистон Республикаси билан Россия Федерацияси ўртасида давлатлараро муносабатларнинг асослари, дўстлик ва ҳамкорлик тўғрисида 1992 йил 30 майдаги Шартнома қоидалари ҳамда Ўзбекистон Республикаси билан Россия Федерацияси ўртасида ҳар тарафлама ҳамкорликни ривожлантириш ва чуқурлаштириш тўғрисидаги 1994 йил 2 мартдаги Декларация қоидаларига амал қилиб,

тенг ҳуқуқлилик ва ўзаро фойдали ҳамкорлик тамойилларидан келиб чиқиб,

қуйидагилар тўғрисида келишиб олдилар:

1. Томонлар ўзларининг ваколатли марказий органлари орқали ушбу Битим қоидаларига мувофиқ ва ўз давлатларининг қонунчилиги ҳамда халқаро мажбуриятларига риоя қилиб, жиноятчиликка қарши курашишда ҳамкорликни амалга оширадилар.

2. Ушбу Битим жиноий ишлар бўйича ҳуқуқий ёрдам кўрсатиш ва тутиб бериш масалаларига дахл қилмайди.

3. Ушбу Битимнинг мақсадлари учун қуйидагилар марказий ваколатли органлар ҳисобланадилар:

Ўзбекистон Республикаси учун — Давлат солиқ қўмитаси, Ички ишлар вазирлиги, Прокуратура, Миллий хавфсизлик хизмати;

Россия Федерацияси учун — Бош прокуратура, Давлат божхона қўмитаси, Солиқ полицияси департаменти, Ички ишлар вазирлиги, Ташқи разведка хизмати, Контрразведка федерал хизмати, Валюта ва экспорт назорати федерал хизмати, Федерал чегара хизмати.

4. Томонлардан ҳар бири ўзининг марказий ваколатли органлари рўйхатига ўзгартиришлар киритиш тўғрисида бошқа Томонни хабардор қилади.

5. Марказий ваколатли органлар ушбу Битимни амалга ошириш мақсадида бир-бирлари билан бевосита алоқалар боғлайдилар. Ушбу Битимда назарда тутилган ҳамкорлик тадбирлари, агар манфаатдор марказий ваколатли органлар шундай тартиб хусусида келишиб олсалар, маҳаллий даражада ҳам амалга оширилиши мумкин.

1. Томонлар жиноятларнинг олдини олиш, уларни аниқлаш, бартараф этиш ва очиш бўйича, айниқса қуйидаги қилмишлар бўйича ҳамкорлик қиладилар:

шахснинг ҳаёти, соғлиғи, эркинлиги ва қадр-қиммати, шунингдек мулкига қарши куч ишлатиб қилинадиган жиноятлар;

терроризм, уюшган жиноятчилик ва коррупция;

ғайриқонуний равишда қурол-яроғлар, ўқ-дорилар, портловчи ва заҳарли моддалар, шунингдек радиоактив ашёларни ишлатиш;

одамларни ўғирлаш, фоҳишабозликдан фойдаланиш;

гиёҳвандлик воситаларини ва психотроп моддаларни, шунингдек уларни ишлаб чиқаришда фойдаланиладиган моддаларни ғайриқонуний ишлаб чиқариш ва ишлатиш;

экологик жиноятлар;

иқтисодиёт, шу жумладан, валюта бойликлари операцияси билан ғайриқонуний шуғулланиш, ғайриқонуний равишда халқаро молиявий ва экспорт операциялари билан шуғулланиш, жиноий фаолият билан топилган даромадларни легализация қилиш, сохта пул белгиларини ва молиявий ҳужжатларни, қийматли қоғозларни ва нақд пулсиз тўлов воситаларини ясаш ва тарқатиш;

контрабанда;

маданий ва тарихий бойликларга жиноий тажовузлар;

транспортдаги жиноятлар;

автотранспорт воситаларини ўғирлаш.

2. Томонлар жамоат хавфсизлигини таъминлаш соҳасига тааллуқли куйидаги йўналишлар бўйича ҳам ҳамкорлик қиладилар:

транспортда ва йўлларда ҳаракат хавфсизлигини таъминлаш;

жиноий жазоларни ўташни ташкил этиш;

паспорт-виза ишлари, хорижий фуқаролар ва фуқаролиги бўлмаган шахсларнинг келиши, кетиши, транзит йўли билан ўтиши ва туришини назорат қилиш;

қимматбаҳо ва махсус юкларни кузатиб бориш ва қўриқлаш;

енғин хавфсизлигини таъминлаш;

номаълум жасадларнинг, ўзи ҳақида маълумот бера олмайдиган беморлар ва болаларнинг шахсини аниқлаш.

3. Томонлар қуйидаги соҳалар бўйича ҳам ҳамкорлик қиладилар:

ўзларининг ваколатли органлари фаолиятини моддий-техникавий таъминлаш;

кадрлар тайёрлаш ва уларнинг малакасини ошириш;

жиноятчиликка қарши курашиш ва жамоат хавфсизлигини таъминлаш, шу жумладан, ахборот тизимлари, алоқа воситалари ва махсус техникани ривожлантириш бўйича илмий тадқиқотни амалга ошириш.

Ушбу Битимнинг 2-моддаси қоидаларини амалга ошириш мақсадида Томонларнинг марказий ваколатли органлари, жумладан, қуйидаги шаклларда ҳамкорликни амалга оширадилар:

тайёрланган ёки содир этилган жиноятлар ва уларга алоқадор жисмоний ҳамда юридик шахслар ва ташкилотлар ҳақида қизиқиш уйғотадиган ахборотларни ўзаро алмашиш;

тезкор-қидирув тадбирлари ўтказиш тўғрисида сўровларни бажариш;

жиноий-қидирувдан ёки жазони ўташдан бекиниб юрган, шунингдек бедарак йўқолган шахсларни излаш;

гиёҳвандлик воситалари ва психотроп моддаларнинг янги турлари ғайриқонуний равишда муомалага киритилгани, уларни ишлаб чиқариш технологияси ва бунда ишлатиладиган моддалар, шунингдек гиёҳвандлик воситалари ва психотроп моддаларни тадқиқ этиш ва аниқлаш бўйича амалга оширилган янги тадқиқотлар ҳақида ахборотларни ўзаро алмашиш;

муайян номерга ёки ажралиб турувчи махсус белгига эга бўлган ашёлар (нарсалар), шу жумладан, автотранспорт ва ўт очувчи қурол, шунингдек номерли қийматли қоғозлар ва паспортларни (шахсий гувоҳномаларни) излаш ва фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисида 1993 йил 22 январдаги конвенцияда ўрнатилган тартиб бўйича қайтариб бериш;

иш тажрибасини алмашиш, шу жумладан, малака оширишлар, маслаҳатлашувлар, семинарлар ва ўқув курслари ўтказиш;

қонуншуносликка оид ва бошқа норматив-ҳуқуқий ҳужжатларни ўзаро алмашиш, ўқув ва услубий адабиётларни сотиб олишда ёрдам кўрсатиш;

ўзаро манфаатли муаммолар бўйича биргаликда илмий тадқиқотлар ўтказиш;

ўзаро фойдали асосда илмий-техникавий адабиётлар ва ахборотларни ўзаро алмашиш.

1. Ушбу Битим доирасидаги ҳамкорлик Томонлар ваколатли органларининг ёрдам кўрсатиш ҳақидаги сўровлари асосида амалга оширилади.

2. Ёрдам кўрсатиш ҳақидаги сўров ёзма равишда юборилади. Шошилинч ҳолатларда сўровлар оғзаки тарзда берилиши ҳам мумкин, лекин улар етти кундан кечикмай ёзма равишда тасдиқланиши керак.

Сўровнинг ҳаққонийлигига ёхуд ёрдам кўрсатиш ҳақидаги сўровнинг мазмунига шубҳа туғилганда уни тасдиқлашни сўраб мурожаат қилиниши мумкин.

3. Ёрдам кўрсатиш ҳақидаги сўровда қуйидагилар бўлиши зарур:

а) ёрдам кўрсатишни сўраётган ваколатли органнинг ва сўров юборилаётган органнинг номи;

б) ишнинг моҳияти баёни;

в) мақсад ва сўровнинг асосланганлигини кўрсатиш;

г) сўралган ёрдамнинг мазмуни.

4. Зарур ва мумкин бўлган даражада сўровда қуйидагилар ҳам бўлиши керак:

а) ишга алоқадор шахснинг фуқаролиги, исми ва фамилияси, лақаби, туғилган вақти ва жойи, машғулоти, турар жойи ва ўрнашган манзили;

б) ишга алоқадор фирма ва ташкилотларнинг номи ва манзили;

в) қилмиш ёхуд ҳодисанинг баёни, жиноий ишлар бўйича эса — сўров жўнатаётган Томоннинг давлат қонунчилигига мувофиқ қилмишнинг квалификацияси ва қўлланадиган қонуннинг матни;

г) жавоб олиниши керак бўлган саволлар рўйхати;

д) сўров бажарилаётганда амал қилиниши зарур бўлган махсус тартиб баёни ва бу заруратнинг асосланганлиги;

е) сўровни амалга оширишни осонлаштириш учун фойдали бўлган бошқа ҳар қандай ахборот.

5. Ёрдам кўрсатиш ҳақида берилган ёки ёзма шаклда тасдиқланган сўров сўраётган ваколатли органнинг раҳбари ёки унинг ўринбосари томонидан имзоланади ва ушбу Битимнинг 1-моддасидаги 5-бандда назарда тутилган тартибда жўнатилади.

1. Агар сўров олган Томон сўровни бажариш унинг мустақиллигига, хавфсизлигига, жамоат тартибига ёки бошқа муҳим давлат манфаатларига зарар етказади ёхуд давлат қонунчилигига ёки халқаро мажбуриятларига зид келади, деб ҳисобласа, у ушбу Битим доирасида ёрдам кўрсатишни тўлиқ ёки қисман рад этиши мумкин.

2. Агар сўров юборилишига сабаб бўлган қилмиш сўровни қабул қилган Томон давлатининг амалдаги қонунчилиги бўйича жиноят ҳисобланмаса, ёрдам кўрсатиш рад этилиши мумкин.

3. Сўровни бажаришни рад этиш ҳақида қарор қабул қилинган тақдирда сўровни юборган Томон бу ҳақда рад этишнинг сабаби кўрсатилган ҳолда ёзма равишда хабардор қилинади.

1. Агар сўровни бажариш сўровни олган органнинг ваколатига кирмаса, мазкур орган уни дарҳол ваколатли органга жўнатади ва бу ҳақда сўров юборган Томонни хабардор қилади.

2. Зарурат туғилганда сўров олган Томон, унинг фикрига кўра, сўровни бажариш учун зарур бўладиган қўшимча маълумотларни талаб қилишга ҳақлидир.

3. Сўров олган Томоннинг марказий ваколатли органлари сўровни тез, имкони борича тўла ва сифатлироқ бажариш учун барча зарур чораларни кўради.

Сўровнинг бажарилишига тўсқинлик қиладиган ёки бажаришни жиддий кечиктирувчи вазиятлар мавжуд бўлганда, бу ҳақда сўров юборган ваколатли орган дарҳол хабардор қилинади.

4. Сўровни бажаришда сўров олган Томон давлатининг қонунчилиги қўлланади, бироқ бу агар сўров олган Томон давлатининг қонунчилиги ёки унинг халқаро мажбуриятларига зид келмаса, сўров юборган Томоннинг илтимосига биноан, унинг давлати қонунчилиги қўлланиши мумкин.

5. Агар сўров олган Томоннинг ваколатли органи, сўровни бажариш ўз давлатида амалга оширилаётган жиноят қидирув ёки бошқа ишларга халақит беради, деб ҳисобласа, у сўровни бажаришни кечиктириши ёки унинг бажарилишини сўров юборган Томоннинг марказий ваколатли органи билан маслаҳатлашув ўтказганидан кейин ўртага зарурий деб қўйилган шартларга риоя қилиш билан алоқадор қилиб қўйиши мумкин. Агар сўров юборган Томон шундай шартларда ёрдамни қабул қилса, у мазкур шартларга амал қилиши керак.

6. Сўров олган Томон сўров юборган Томоннинг ваколатли органи илтимос қилганда сўров ва унинг мазмунини сир тутишни таъминлаш учун барча зарур чора-тадбирларни кўради. Сўровни сир тутган ҳолда бажаришнинг имкони бўлмаганда, сўров олган Томоннинг ваколатли органи бу ҳақда сўров юборган Томоннинг ваколатли органини хабардор қилади ва у сўровни шундай шароитда бажариш керакми-йўқлигини ҳал қилади.

7. Сўров олган Томоннинг ваколатли органи сўров юборган Томонинг ваколатли органи илтимос қилган тақдирда уни сўровнинг бажарилиши қандай бораётганидан хабардор қилади.

8. Сўров олган Томоннинг ваколатли органи сўров юборган Томоннинг ваколатли органини сўровнинг бажарилиши натижаларидан мумкин бўлган энг қисқа муддатларда хабардор қилади.

1. Сўров олган Томон сўров юборган Томонга сўров олган Томоннинг ваколатли органи олдиндан келишиб олмасдан ушбу Битимга мувофиқ олинган сўровни бажариш натижаларидан сўровда кўрсатилганидан бошқа мақсадларда фойдаланмаслик тўғрисида илтимос билан мурожаат қилиши мумкин. Бундай ҳолларда сўров юборган Томон сўровни бажариш натижаларидан фойдаланишнинг кўрсатилган чеклашларига амал қилади.

2. Сўров олган Томон сўров юборган Томонга ушбу Битимга мувофиқ олинган сўровни бажариш натижаларини ошкор қилмаслик ёки улардан фақат келишиб олинган шартлардагина фойдаланиш тўғрисида илтимос билан мурожаат қилиши мумкин. Агар сўров юборган Томон сўровни бажариш натижаларини шундай шартларда қабул қилиб олса, унда у мазкур шартларга амал қилишга имкони борича интилиши керак.

3. Ушбу модда қоидалари сўровни бажариш натижаларидан фойдаланишни ёки уларни ошкор этишни, агар сўров юборган Томон давлат қонунчилигида шундай ҳаракат қилиш мажбурияти назарда тутилган бўлса, истисно қилмайди. Сўров юборган Томон сўров олган Томонни сўров натижаларидан шу тариқа фойдаланиш ва ошкор қилиш имконияти ҳақида олдиндан хабардор қилади.

1. Томонлар ўз давлатлари қонунчилиги ва ўз имкониятлари доирасида ўзаро мақбул шартномалар, шу жумладан, буюм ва моддаларнинг ноқонуний муомаласида иштирок этувчи шахсларни аниқлаш ва уларни жиноий таъқиб қилиш мақсадида ҳар қандай учинчи томон билан тузилган битим ва шартномалар асосида муомалада бўлиши тақиқланган буюм ва моддаларни назорат қилинадиган етказиб беришлар усулидан лозим даражада фойдаланишни назарда тутувчи зарурий чора-тадбирларни кўрадилар.

2. Назорат қилинадиган етказиб беришлар усулидан фойдаланиш ҳақидаги қарорлар ҳар бир алоҳида ҳолатда иккала Томоннинг ваколатли органлари томонидан жамоат хавфсизлиги учун хавфни ҳисобга олган ҳолда ва, зарурат бўлганда, молиявий шартномаларни ва юрисдикция бўйича Томонлар эришган ўзаро ҳамфикрликни инобатга олган ҳолда қабул қилинади.

3. Буюм ва моддаларни назорат қилинадиган етказиб беришларнинг ғайриқонуний партиялари эришилган шартномаларга мувофиқ, шу жумладан, ҳар қандай учинчи томон иштирокида назорат қилинади, бу юклар ушлаб қолиниши ва кейинги жўнатишларда фойдаланиш учун сақлаб турилиши ёки олиб қолиниши, ёхуд улар тўла ёки қисман алмаштирилиши мумкин.

Томонлар ўз давлатлари қонунчилиги асосида, тегишли ҳолларда, кўрсатмалари ва ҳаракатлари уюшган жиноий гуруҳларнинг жиноий фаолиятининг олдини олиш ўхтатиб қолиш ёхуд жиноий ишларни тергов қилиш ёки судда кўриш учун муҳим аҳамиятга эга бўлган ёхуд эга бўлиши мумкин бўлган шахслар, зарурат бўлганда, уларнинг яқин қариндошлари хавфсизлигини таъминлаш учун ўзаро келишилган чора-тадбирларни амалга оширадилар.

Мазкур Битимни амалга ошириш мақсадида Томонларнинг манфаатдор марказий ваколатли органлари идоралараро битимлар тузишлари мумкин.

1. Мазкур Битимни бажаришда Томонлар вужудга келадиган харажатларни, агар ҳар бир муайян ҳолатда ўзгача тартиб келишиб олинмаса, мустақил равишда ўз зиммаларига оладилар.

2. Томонлар зарурат бўлган ҳолда, жиноятчиликка қарши курашиш бўйича муайян топшириқларни ҳал қилиш учун зарур бўлган жиҳозлар ва ашёлар билан бир-бирларига беминнат ёрдам беришлари мумкин.

Томонларнинг ваколатли органлари ҳамкорликни амалга оширишда рус тилидан амалий иш тили сифатида фойдаланадилар.

1. Томонларнинг вакиллари ёки уларнинг марказий ваколатли органлари зарурат бўлганда мазкур Битим асосида ҳамкорлик самарадорлигини мустаҳкамлаш ва ошириш масалаларини кўриб чиқиш мақсадида амалий учрашувлар ва маслаҳатлашувлар ўтказишлари мумкин.

2. Томонлар ва уларнинг марказий ваколатли органлари мазкур Битим қоидаларини талқин қилиш ёки қўллашда вужудга келиши мумкин бўлган барча баҳсли масалаларни маслаҳатлашувлар ва музокаралар йўли билан ҳал этадилар.

Мазкур Битим қоидалари Томонлар давлатларининг улар қатнашчилари бўлган бошқа халқаро шартномалардан келиб чиқадиган ҳуқуқ ва мажбуриятларига дахл қилмайди.

Ушбу Битим имзоланган кунидан бошлаб кучга киради ва Томонлардан бирининг иккинчи Томондан унинг Битимнинг амал қилишини тўхтатиш нияти ҳақидаги ёзма хабарномасини олган кунидан олти ой ўтгунга қадар амалда бўлади.

1995 йил 27 июлда Тошкент шаҳрида ҳар бири ўзбек ва рус тилларидаги икки нусхада тузилди, иккала матн ҳам бир хил кучга эга.