Ўзбекистон Республикаси Ҳукумати ва Корея Республикаси Ҳукумати (бундан кейин «Томонлар» деб аталувчилар),

Ўзбекистон Республикаси Ҳукумати ва Корея Республикаси Ҳукумати ўртасида маданият соҳасидаги 1994 йил 10 октябрда кучга кирган Битимга мувофиқ,

Таълим соҳасида иккала мамлакат ўзаро манфаатли асосларда ҳамкорликни ривожлантиришга интилиб ва уни янада самаралироқ қилиш истагида,

Қуйидагилар тўғрисида келишиб олдилар:

Томонлар ўзларининг амалдаги қонунларига мувофиқ таълим соҳасида ҳамкорликни ривожлантириш бўйича барча даражаларда лозим чоралар кўрадилар.

Томонлар ушбу Меморандум кўзда тутган, ўз мамлакатларининг амалдаги қонунлари ва қоидаларига мувофиқ ташрифлар ва алмашувларни амалга оширадилар. Бу борада бундай ташриф ва алмашувларни амалга ошириш учун қулай шарт-шароитларни таъминлаш мақсадида иккала Томон ўзларига боғлиқ барча ҳаракатларни қиладилар.

Таълим соҳасида ташрифлар ва алмашувлар қуйидаги шартлар асосида амалга оширилади: қабул этувчи Томон ўз мамлакатида таклиф этилган иштирокчиларнинг расмий бўлиши билан боғлиқ барча харажатларни қоплайди, юборувчи Томон эса иштирокчиларнинг бир мамлакатдан иккинчисига бориб келиши билан боғлиқ ва бошқа харажатларни тўлайди.

Ҳар бир Томон бошқа Томоннинг олий, ўрта, ўрта махсус ва ҳунар-техник таълим соҳасида юборувчи томон ҳисобидан мутахассислар алмашувини амалга ошириш таклифини хайрихоҳлик билан кўриб чиқади ва қабул қилувчи мамлакатда илмий-техник кадрлар тайёрлаш ҳамда олий, ўрта, ўрта махсус ва ҳунар-техник таълимнинг бошқа жиҳатлари ҳақида маълумот олишга оид истакларини бажаради.

Томонлар университетлар ва бошқа олий ўқув юртлари ўртасида, шунингдек махсус фондлар дастурлари бўйича амалга ошириладиган олий таълим ва фан соҳасидаги мутахассислар ўртасида тўғридан-тўғри мулоқотлар ва алоқаларни ўрнатиш бўйича таклифларни рағбатлантирадилар.

Ҳар бир Томон иккала Томоннинг ўрта, ҳунар-техник ва олий ўқув юртлари ўртасида тўғридан-тўғри мулоқот ва алоқалар ўрнатишни рағбатлантиради ҳамда тил ўрганиш ва махсус тайёргарлик мақсадида студентлар билан алмашади. Улар, шунингдек ҳар бир мамлакатнинг таълим тизимини, тилини ўзаро тушунишга ёрдам бериш, ўқитиш ва изланишлар тажрибаси билан алмашиш учун ўқитувчилар ва илмий ходимлар алмашувини рағбатлантирадилар.

Томонлар ўқув, педагогик ва методик адабиёт, фильмлар ва бошқа материаллар билан алмашувни ривожлантирадилар, шунингдек мутахассислар алмашуви ва келишилган мавзуларда семинарлар ўтказишга ёрдамлашадилар.

Томонлар икки мамлакат халқлари ўртасида муҳим мулоқот воситаси бўлган ўзбек ва корейс тилларини янада кенг ўрганишни, шунингдек бошқа мамлакат маданияти билан ўзаро танишувни рағбатлантирадилар.

Томонлар таълим тизимидаги ўзгаришлар тўғрисида, шунингдек маълумот тўғрисидаги ҳужжатларнинг номланишидаги ўзгаришлар ва уларни бериш тартиби ҳақида бир-бирларини хабардор қилиб турадилар.

Томонлар ўз мамлакатларининг ваколатли ўқув юртлари берадиган ёки тақдим этадиган илмий даражалар, дипломлар ва бошқа сертификатларни ўзаро тан олишлик тартиби ва шартларини шу масалаларни тартибга солувчи қоидалар доирасида кўриб чиқадилар.

Томонлар ушбу Меморандум бажарилишини мувофиқлаштириш мақсадида мунтазам, шунингдек зарурат бўлганда Томонларнинг Ҳукумати илтимосига биноан ўзаро маслаҳатлашувлар ўтказиб турадилар.

Ушбу Меморандумни амалга ошириш бўйича Ўзбекистон Республикаси Олий ва ўрта махсус таълим вазирлиги ҳамда Ўзбекистон Республикасининг Халқ таълими вазирлиги ва Корея Республикаси Таълим вазирлиги бош масъул идоралар бўлиб ҳисобланадилар.

Мазкур Меморандум имзоланган пайтидан бошлаб кучга кириб, беш йил мобайнида амал қилади. Башарти Томонлардан ҳеч бири бошқа Томонга уни бекор қилиш истагини Меморандумнинг амал қилиш муддати тугашидан олти ой олдин ёзма тарзда маълум қилмаса, унинг муддати кейинги беш йиллик муддатларга узаяверади.

Сеул шаҳрида 1995 йил 16 февралда икки нусхада, ҳар бири ўзбек, корейс ва инглиз тилларида тузилди, бунда ҳар бир матн бир ҳил кучга эгадир. Матнни талқин этишда тафовут туғилганда, инглиз тилидаги матн устунлик қилади.