Ўзбекистон Республикаси Ҳукумати ва Грузия Республикаси Ҳукумати, кейинги ўринларда «Томонлар» деб аталади,

тенг ҳуқуқлилик ва ўзаро ҳурмат принципларига асосланиб,

темир йўл — транспорт тармоғининг технологик бирлигини сақлаб қолишни мақсадга мувофиқ деб ҳисоблаб;

ҳар иккала давлат темир йўл транспортини мувофиқлаштириш ва уларнинг биргаликдаги фаолияти аҳамиятини тан олиб;

қуйидагилар тўғрисида аҳдлашдилар:

Ўзбекистон Республикаси ва Грузия Республикаси темир йўл транспортининг функционал фаолияти, ҳаракат қилувчи составни, техник воситаларни тайёрлаш ва сақлаш, ҳаракат хавфсизлигини ва меҳнат шароитларини таъминлаш, ташиш ишларини, юкларнинг сақланишини ташкил этиш темир йўл транспортининг унинг хизматларидан фойдаланувчилар ва транспортнинг бошқа турлари билан ўзаро ҳамкорлиги амалдаги нормативлар бўйича амалга оширилади.

Томонлар мувофиқлаштирилган тариф сиёсатини амалга оширишни зарур деб тан олдилар. Давлатлараро алоқада тарифлар ва ҳисоб-китоблар тартиби махсус давлатлараро битимлар билан белгиланади.

Хар иккала давлатнинг темир йўл станциялари ўртасида йўловчилар ва юкларни ташиш мазкур Битимни имзолаш пайтида амалда бўлган норматив ҳужжатлар асосида амалга оширилади.

Йўловчилар ва юкларни темир йўл транспортида Ўзбекистон Республикасидан Грузия Республикаси ҳудуди бўйича ҳамда Грузия Республикасидан Ўзбекистон Республикаси ҳудуди бўйича олиб ўтишни, шунингдек қўшимча равишда транзит юк оқимларини жалб этиш мақсадида учинчи мамлакатлардан учинчи мамлакатларга олиб ўтишни ташкил этишда Томонлар ўз хатти-ҳаракатларини ўз давлатларининг қонунчилигини ҳисобга олган, зарур ҳолларда тегишли битимларни расмийлаштирган ҳолда тариф сиёсатини ишлаб чиқиш чоғида мувофиқлаштирадилар.

Томонлар темир йўл транспорти соҳасида ўзлари қатнашчи ҳисобланган давлатлараро ва халқаро битимларга ҳамда конвенцияларга мувофиқ халқаро юк ва йўловчилар ташишни амалга оширишнинг темир йўл транспортида амалда бўлган тартибига риоя қилишга келишдилар.

Бундай битимлар рўйхатини Томонлар алоҳида Битим билан аниқлайдилар.

Томонларнинг ҳар бири бошқа мамлакатлар билан темир йўл транспорти соҳасида ушбу модданинг биринчи хатбошисида кўрсатилган битимлар билан белгиланган тартибни ўзгартирувчи битимлар тузган тақдирда бу ҳақда иккинчи Томонга маълум қиладилар.

Томонлар қуйидагиларни таъминлашни ўз зиммаларига оладилар:

Томонларнинг темир йўллари ўртасидаги шаклланган технология алоқаларини сақлаб қолиш;

ҳаракат қилувчи состав, контейнерлар, асбоб-ускуналар ва техника сотиб олиш, тузатиш бўйича Томонларнинг ваколатли органлари томонидан ўзаро келишилган мажбуриятларнинг бажарилиши;

темир йўл транспорти бошқармасининг тегишли органларига иқтисодий баҳолаш ва ўзаро манфаатларни ҳисобга олишга доир музокаралар ўтказиш, ташиш ишлари технологик параметрларини тайёрлаш ва тасдиқлаш тартибини аниқлаш бўйича ҳуқуқлар бериш.

Томонлар темир йўл транспорти эҳтиёжлари учун техника, асбоб-ускуналар, эҳтиёт қисмлар, ёқилғи-энергетика ва бошқа моддий ресурслар ўзаро етказиб берилишини таъминлашга кўмаклашадилар.

Томонлар тайёрланаётган қарорлар ҳақида бир-бирларига маълум қилган ҳолда темир йўл транспорти ходимларига нисбатан ижтимоий сиёсатни мувофиқлаштирадилар.

Томонлар темир йўл транспортида ягона илмий-техника сиёсатини ишлаб чиқадилар ва амалга оширадилар.

Томонлар муҳандислар, техниклар, шунингдек оммавий касблар ходимларини ўқитиш ва уларнинг тайёргарлик даражасига нисбатан зарур талабларни ишлаб чиқиш соҳасида ҳамкорлик қиладилар.

Томонлар Ўзбекистон Республикаси ва Грузия Республикасининг темир йўл транспорти соҳасида мутахассислар тайёрловчи ўқув юртларини тамомлаганлик ҳақидаги малака ҳужжатларини ўзаро тан олиш тартибини ишлаб чиқадилар.

Мазкур Битимга ўзгартириш ва қўшимчалар Битимнинг ажралмас қисми ҳисобланган протоколлар билан расмийлаштирилади.

Ушбу Битим темир йўл тармоғи Томонларнинг темир йўл тармоғи билан технологик алоқага эга бўлган исталган давлат ёки ушбу Битимга қўшилган учинчи давлат ҳукумати томонидан имзолаш учун очиқдир.

Мазкур Битим имзоланган кундан бошлаб кучга киради ва томонлардан бири Битимнинг амал қилишини тўхтатиш ҳақидаги ўз нияти тўғрисида иккинчи томонга ёзма равишда маълум қилган кундан бошлаб 90 кун ўтгунча амал қилади.

1995 йил 4 сентябрда Тошкент шаҳрида ўзбек, грузин ва рус тилларида икки нусхада тузилди, барча матнлар бир хил кучга эгадир. Мазкур Битим қоидаларини талқин қилиш мақсадида рус тилидаги матндан фойдаланилади.