Ўзбекистон Республикаси Ҳукумати ва Грузия Республикаси Ҳукумати, кейинги ўринларда Томонлар деб аталади,

ўзаро фойдали ҳамкорликни янада ривожлантиришдан ҳар иккала Томоннинг манфаатдорлигидан келиб чиқиб ушбу Битимни имзоладилар:

Томонлар соғлиқни сақлаш миллий тизимларини янада такомиллаштириш манфаатлари йўлида ҳамкорликни ривожлантириш мажбуриятини ўз зиммаларига оладилар.

Томонлар амалий соғлиқни сақлаш ва тиббиёт фанининг қуйидаги соҳаларида ўзаро фойдали ҳамкорликни ривожлантиришга аҳдлашдилар:

соғлиқни сақлашни ва касалликларнинг олдини олишни ташкил этиш;

ўзаро қизиқиш уйғотувчи фавқулодда вазиятлар ва эпидемиологик вазият бўйича шошилинч ахборотни айирбошлаш;

катта ёшдагиларга ва болаларга ихтисослаштирилган ёрдам кўрсатиш;

илмий ва тиббий кадрлар тайёрлаш;

фармация ва тиббиёт техникаси;

талабаларни ўзаро айирбошлаш, врачлар малакасини ошириш;

контракт асосида ишловчи врачларни ўзаро айирбошлаш.

Томонлар қуйидагилар биргаликдаги фаолиятнинг устувор йўналишлари эканлиги тўғрисида аҳдлашдилар:

фармация;

ортопедия;

урология;

офтальмология;

халқ табобати;

отоларингология;

акупунктура;

реконструктив-пластик жарроҳлик;

трансплантология;

неврология ва нейрожарроҳлик;

ОИТС муаммоси;

норкология ва токсикология;

курортология;

аллергология ва иммунология;

онкология;

доячилик, гинекология ва репродуктология.

Ушбу рўйхат чеклаб қўйилмайди ва кенгайтирилиши мумкин.

Мазкур Битимнинг 2 ва 3-моддалари бўйича ҳамкорлик биргаликда илмий тадқиқотлар, маслаҳатлашувлар ўтказиш, мутахассислар ва тиббий-техник ахборотларни ўзаро айирбошлаш, услубий тавсиялар ишлаб чиқиш, симпозиумлар ташкил этиш, монографиялар ва мақолалар эълон қилиш, ҳамкорликнинг мавзулари ва вақти аниқланадиган бошқа турлари орқали амалга оширилади.

Томонлар экстримал вазиятларда ўзаро шошилинч даволаш-маслаҳат бериш ва махсус моддий-техника ёрдами кўрсатишни таъминлашга келишдилар.

Томонлар олий ва ўрта махсус ўқув юртлари ўртасидаги тўғридан-тўғри алоқаларни йўлга қўйиш, шунингдек ўзаро фойдали шартларда ёки тижорат асосида талабалар ва ўқувчиларни ўзаро айирбошлаш бўйича биргаликда иш олиб борадилар.

Томонлар талабларга мувофиқ ва тегишлича ҳақ тўланган ҳолда ўзларига қарашли муассасаларда тиббиёт, педагогика ходимлари ва илмий ходимларнинг малакасини оширишни таъминлаш мажбуриятини оладилар.

Томонлар санитария-эпидемиология хизматлари ўртасида тўғридан-тўғри алоқаларни ўрнатадилар, зарур санитария-эпидемиология ишлари, шунингдек атроф муҳитни муҳофаза қилиш тадбирлари ўтказилишини таъминлайдилар.

Томонлар фармация соҳасида ҳамкорлик қилишга, дори-дармонлар ва тиббиёт техникаси ишлаб чиқариш бўйича қўшма корхоналар ташкил этишга, фармакологик тадқиқотлар ўтказишга, ўзларининг ва биргаликда ишлаб чиқарилган препаратлар ва тиббиёт буюмларини рўйхатга олишга ва сотишга келишдилар.

Томонлар тиббий ва илмий тадқиқотлар, тиббий ёрдам, даволаш туризми ва тиббиёт индустриясини ривожлантириш соҳасида грузин ва ўзбек ишбилармон доираларининг қатнашчиларига ва биргаликда ишлашларига кўмаклашишга келишдилар.

Томонлар икки мамлакатнинг ишбилармон доиралари билан мустаҳкам алоқада даволовчи минерал сув ресурсларини ўрганиш, қайта ишлаш ва фойдаланиш ишида ҳамкорлик қилишга келишдилар.

Томонлар Битимни амалга ошириш мақсадида ҳар бир Томондан 2 кишидан иборат мувофиқлаштирувчи комиссия ташкил этадилар.

Мазкур Битим Томонларнинг қарори билан ўзгартирилиши ёки тўлдирилиши ҳамда улар Битимга қўшимча сифатида расмийлаштирилиши мумкин.

Башарти Томонлардан ҳеч бири Битимнинг амал қилиш муддати тамом бўлишигача бир ой давомида Битим матнига бирор-бир ўзгартириш киритиш зарурлиги тўғрисида иккинчи Томонга ёзма равишда маълум қилмаса, мазкур Битимнинг амал қилиш муддати кейинги ҳар бир йилга узайтирилади.

Мазкур Битим имзоланган кундан бошлаб кучга киради.

Битим 1995 йил 4 сентябрда, Тошкент шаҳрида, ўзбек, грузин ва рус тилларида икки нусхада тузилди ва имзоланди. Барча матнлар бир хил кучга эгадир. Талқин қилиш мақсадларида рус тилидаги матндан фойдаланилади.