Ўзбекистон Республикаси Ҳукумати ва Грузия Республикаси Ҳукумати, бундан буён «Томонлар» деб аталади,

иқтисодий, саноат ҳамда фан-техника соҳасидаги ҳамкорлик икки томонлама муносабатларни барқарор ва узоқ муддатли асосда ривожлантиришнинг муҳим ва зарур жиҳати эканлигини англаб,

ўз давлатлари ишлаб чиқариши ва фан-техника салоҳияти ўртасида қарор топган ўзаро технология алоқаларини ҳисобга олиб,

Томонлар давлатлари хўжалик фаолияти субъектларининг бозор муносабатлари базасида умумий иқтисодий маконни вужудга келтиришда бевосита ўзаро ишлаб чиқариш алоқаларининг ҳал қилувчи аҳамиятини эътироф этиб,

корхоналар ва тармоқлар ўртасидаги ишлаб чиқариш кооперациясини қўллаб-қувватлаш ва ўзаро фойдали тарзда ривожлантириш учун қулай шароитни таъминлашга интилиб,

иккала мамлакат ўртасидаги ўзаро иқтисодий алоқада эришилган даражасига таяниб,

тарифлар ва савдо тўғрисидаги бош битимнинг асосий қоидаларига мувофиқ равишда кўп томонлама савдо тизимини мустаҳкамлашга ва савдо соҳасидаги муносабатларни ривожлантиришга кўмаклашишга қатъиятни ифодалаб,

муттасил иқтисодий юксалишни таъминлаш, ўз фуқаролари турмуш даражасини яхшилаш, иш билан таъминлашни кенгайтириш, моддий ресурслардан ва ишчи кучидан самарали фойдаланиш ҳамда атроф муҳитни муҳофаза қилиш мақсадларига амал қилиб,

қуйидагилар ҳақида келишиб олдилар:

Томонлар мулкчиликнинг барча шаклидаги корхоналар, тармоқлар ва тармоқлараро мажмуалар ўртасидаги кооперацияни бевосита ишлаб чиқариш алоқалари асосида амалга ошириш ва ривожлантиришга кўмаклашадилар.

Томонлар халқаро ихтисослашишни ва ишлаб чиқариш кооперациясини ривожлантириш, бу ишларни рўёбга чиқариш учун шарт-шароитни таъминлаш, саноат тармоқларида устувор йўналишларни белгилаш, қўшма лойиҳалар ва дастурларни ишлаб чиқиш ва амалга оширишга кўмаклашиш мақсадида зарур чора-тадбирлар кўрадилар.

Томонлар:

кооперация бўйича товарлар етказиб бериш деганда хом ашё, материаллар, узеллар, деталлар, эҳтиёт қисмлар, ярим тайёр, бутловчи маҳсулотларни ҳамда технология жиҳатидан ўзаро боғлиқ бўлган ва тайёр маҳсулотни биргаликда тайёрлаш учун зарур бўлган тармоқда ва тармоқлараро фойдаланишга мўлжалланган бошқа буюмларни етказиб бериш тушунилади,

хизмат кўрсатиш деганда лойиҳа, таъмирлаш ишлари, техник хизмат кўрсатиш ва технология операциялари тушунилади,

божхона тартиби доирасида қайта ишлаш маҳсулотларини етказиб бериш деганда Томонлар давлатлари бож қонунларида белгилаб қўйилган шартларга мувофиқ товарлар етказиб бериш тушунилади, деб келишиб олдилар.

Томонлар тегишли тармоқ ва тармоқлараро битимлар асосида хўжалик фаолияти субъектлари томонидан тўғридан-тўғри тузиладиган шартномалар (Битимлар)ни ишлаб чиқариш кооперацияси ва бевосита алоқаларнинг асосий шакли деб биладилар.

Томонлар ишлаб чиқариш кооперацияси тўғрисида тармоқ ва тармоқлараро Битимлар тузилишига кўмаклашадилар.

Томонлар қуйидаги тармоқларда ишлаб чиқариш кооперацияси бўйича Битимлар тузишни устувор йўналиш деб ҳисоблайдилар:

ёнилғи энергетика комплекси;

металлургия, кимё, нефть-кимё саноати;

машинасозлик саноати:

транспорт;

тиббиёт ва фармакология саноати;

қишлоқ хўжалиги ва озиқ-овқат саноати;

енгил саноат.

Ишлаб чиқариш кооперацияси тўғрисидаги тармоқ ва тармоқлараро Битимларда кооперация иштирок этаётган ва маҳсулот ишлаб чиқариш (хизмат кўрсатиш) бўйича ихтисосини сақлаб қолаётган корхоналар ва ташкилотлар рўйхати шунингдек, кооперация асосида маҳсулот етказиб бериш (хизмат кўрсатиш) турлари ва ҳажмлари аниқланади.

Ушбу Битимнинг 4-моддасида кўзда тутилган шартномалар (Битимлар) маҳсулотларни божхоналарда расмийлаштириш ва давлатларнинг бож чегаралари орқали ўтказиш учун асосдир.

Ишлаб чиқариш кооперацияси доирасида етказиб бериладиган маҳсулотларни (хизматларни) декларациялаш ва ҳисобга олиш томонларнинг божхона органлари томонидан уларнинг қонунларига мувофиқ амалга оширилади.

Қайта ишлаб бериш учун бериладиган хом ашёдан кооперация асосида ишлаб чиқарилган маҳсулотни етказиб бериш Томонлар мамлакатларида амал қилаётган қайта ишлаб бериш учун юбориладиган хом ашё операцияларига доир қонунларга мувофиқ амалга оширилади.

Ишлаб чиқариш кооперацияси доирасида етказиб бериладиган хом ашё, материаллар ва бутловчи буюмлар ишлаб чиқариш кооперацияси доирасида хом ашё, материаллар ва бутловчи буюмлар етказиб берилган ҳудуд томони органларининг олдиндан берган тегишли ёзма розилиги бўлмаса, учинчи мамлакатга такрорий экспорт қилинмайди.

Томонлар ишлаб чиқариш соҳасида интеграция жараёнларини ривожлантириш мақсадида ўз мамлакатлари миллий қонунларининг хўжалик фаолияти субъектлари корхоналар ва тармоқлар кооперация алоқаларини тартибга солиш қисми меъёрларини мувофиқлаштириш ва бир-бирига яқинлаштириш бўйича изчил иш олиб боришга келишдилар.

Томонлар зарур ҳолларда фан билан боғлиқ бўлган ишлаб чиқариш ва экспортга мўлжалланган тармоқларда кооперацияни ривожлантиришни шунингдек, четдан келтириладиган маҳсулотлар ўрнини босадиган товарлар ишлаб чиқаришни рағбатлантирувчи кредитлар ва сармоялар бериш шартларини келишиб олдилар.

Томонлар қуйидаги муаммоларни биргаликда ишлаб чиқаришни ташкил этиб, бу муаммоларни ҳал қилишни манфаатдор вазирликлар ва идораларга топширадилар:

маркетинг, лизинг тадқиқотлари ўтказиш ва кўргазмалар ташкил қилиш, хизматларни бажариш;

мамлакатлар ўртасида мижозларни қидириб топишда, шартномалар (Битимлар)ни тайёрлаш, тузиш ва бажаришда кўмаклашадиган замонавий ахборот алоқаларини ривожлантириш;

мутахассислар тайёрлаш бўйича қўшма тадбирларни амалга ошириш.

Мазкур Битим томонларнинг ўзаро розилигига мувофиқ ўзгартирилиши ёки тўлдирилиши мумкин.

Мазкур Битимни талқин этиш ёки қўлланиш билан боғлиқ баҳслар аввало Томонлар ўртасида маслаҳатлашиш ва музокаралар йўли билан ҳал қилинади.

Ушбу Битим томонларнинг ҳар бири бу Битимнинг кучга кириши учун зарур бўлган давлат ички тадбирлари бажарилгани тўғрисида ёзма хабарнома олган кундан бошлаб кучга киради.

Битим Томонлардан бири иккинчи Томоннинг мазкур Битимнинг амал қилишини тўхтатиш нияти тўғрисида ёзма хабарнома олган кундан бошлаб олти ойдан сўнг ўз кучини йўқотади.

1995 йил 4 сентябрда, Тошкент шаҳрида икки нусхада, ҳар бири ўзбек, грузин ва рус тилларида, тузилди, барча матнлар бир хил кучга эгадир. Талқин қилиш мақсадлари учун рус тилидаги матн афзалроқ кучга эгадир.