Ўзбекистон Республикаси Ҳукумати ва Грузия Республикаси Ҳукумати, кейинги ўринларда Томонлар деб аталади,

илмий-техник ҳамкорлик икки томонлама муносабатлар бутун мажмуининг муҳим таркибий элементи эканлигига ишонч ҳосил қилиб ва илмий тадқиқотлар ҳамда ишланмаларнинг байналмилаллашуви шароитларида ўзаро алоқанинг зарарлигини тан олиб,

Ўзбекистон ва Грузия ўртасида тарихий шаклланган илмий-техник алоқаларни ҳисобга олиб,

бундай ўзаро алоқалар иккала мамлакат ва халқлар ўртасидаги ҳамкорликни мустаҳкамлашга ёрдам беришини, шунингдек ўзаро фойдали савдо-иқтисодий алоқаларни ривожлантиришга замин яратишини назарда тутиб,

бу ҳамкорликни ривожлантириш учун узоқ муддатли асос яратишни зарур деб ҳисоблаб,

қуйидагилар тўғрисида аҳдлашиб олдилар:

Томонлар илмий-техник ҳамкорликни тенг ҳуқуқлилик ва ўзаро фойдалилик принциплари асосида ривожлантирадилар.

Иккала давлат илмий-техник сиёсатидаги устуворликларни эътиборга олиб, Томонлар ҳамкорликни қуйидаги йўналишларда ривожлантирадилар:

табиий фанлар соҳасидаги фундаментал тадқиқотлар;

миллий фанлар академиялари ўртасидаги ҳамкорлик;

техник фанлар ва технологияларни ривожлантириш соҳасидаги тадқиқотлар;

мутахассислар тайёрлаш ва малакасини ошириш;

стандартлаш, метрология ва сертификация;

интеллектуал мулкни муҳофаза қилиш;

илмий-техника ахбороти.

2-моддада назарда тутилган ҳамкорлик иккала давлат вазирликлари, идоралари, миллий академиялари, илмий-тадқиқот муассасалари, олий ўқув юртлари, фирмалари, илмий ташкилотлари, жамиятлари, алоҳида олим ва мутахассислари томонидан ўзларига берилган ваколат доирасида миллий қонунчиликка мувофиқ бевосита битимлар тузиш асосида амалга оширилади. Ҳамкорликка умумий раҳбарликни ва уни мувофиқлаштиришни Ўзбекистон Республикаси Фан ва техника давлат қўмитаси ва Грузия Республикаси Фан ва технологиялар давлат қўмитаси амалга оширади. Бевосита битимлар ҳамкорлик дастурларини амалга ошириш масалаларини, унинг иқтисодий ва ташкилий шарт-шароитларини, яъни:

ҳамкорлик мақсади ва мазмунини, қўшма дастурлар вазифаси ва кутилаётган натижаларини, уларни амалга ошириш муддати ва шартларини;

давлатлардан ҳар бирида ҳамкорлик доирасида бажарилаётган ишларни маблағ билан таъминлаш манбаларини, ўзаро молиявий мажбуриятларни;

илмий-техника объектларидан биргаликда фойдаланиш, қўшма тадқиқотлар натижаларидан фойдаланиш ва интеллектуал ҳамда саноат мулки масалаларини ҳал қилиш тартибини:

баҳсли масалаларни ҳал қилиш ва ҳамкорликни амалга оширишда иштирок этган шахслар томонидан ҳамкорлик доирасидаги ўз мажбуриятларини бевосита бажаришлари вақтида шерикларига етказишлари мумкин бўлган зарарларни қоплаш тартибини;

ҳамкорликда учинчи давлатлар шахслари ёки халқаро ташкилотларнинг иштирок этиши, бундай иштирокни маблағ билан таъминлаш, бу шахслар ёки ташкилотлар томонидан ҳамкорлик натижаларидан фойдаланиш тартибини;

ҳамкорлик жараёнида бир-бирига бериладиган ахборотнинг тўғрилиги ва материаллар ҳамда асбоб-ускуналар сифати учун жавобгарликни белгилаб бериши керак.

Мазкур Битим доирасидаги ҳамкорлик қуйидаги шаклларда амалга оширилиши мумкин:

кўп билим талаб қиладиган технологияларни яратиш ва ўзлаштириш бўйича қўшма илмий-тадқиқот дастурлари ва лойиҳаларини амалга ошириш;

янги технологияларни ўзлаштиришни таъминлайдиган қўшма илмий-тадқиқот жамоалари, лабораториялар, шунингдек инновация фирма ва ташкилотларини ташкил қилиш;

бошқа Томон илмий-тадқиқот муассасалари, олий ўқув юртлари, технопарклари, архивлари, кутубхоналари ва музейларида, биргаликдаги дала тадқиқотлари ва экспедицияларда ҳам илмий ишлар олиб бориш;

илмий-техника ахборотлари, ҳужжатлар, адабиёт ва библиография нашрларини айирбошлаш;

биргаликда семинарлар, илмий конференциялар ва иш юзасидан учрашувлар ўтказиш;

олимлар ва мутахассислар алмашиш;

олимлар ва мутахассислар малакасини ошириш, малака оширишни ташкил этиш;

шунингдек, ўзаро келишинилган бошқа шаклларда.

Мазкур Битимни амалга ошириш мақсадларида Томонлар Фан ва технология соҳасидаги ҳамкорлик масалалари бўйича икки томонлама комиссия тузадилар. Комиссия ўз фаолиятини ташкил этиш учун Иш тартибини ишлаб чиқади ва тасдиқлайди.

Томонлар ўзлари ва уларнинг вакиллари томонидан ушбу Битим асосида олинган илмий-техник ахборотни ҳамда ҳужжатларни Томонлар ўртасидаги расмий келишувсиз ҳеч қандай учинчи мамлакатга бермаслик мажбуриятини оладилар.

Томонлар ҳамкорлик вақтида олинган илмий ва илмий-техник ахбороти, бундан интеллектуал ва саноат мулки ҳисобланадиган ёки тижорат ва ишлаб чиқариш сабабларига кўра ошкор қилиниши мумкин бўлмаганлар мустасно қилинади, ўзаро келишувга кўра уни жаҳон илмий жамоатчилигига етказишнинг умумқабул қилинган усулларидан фойдаланиш йўли билан ҳамда Томонларнинг амалдаги қонунчиликларига кўра очиқ бўлишига келишиб олдилар.

Томонлар ҳамкорлик натижасида яратилиши мумкин бўлган интеллектуал ва саноат мулкини ҳимоя қилиш масалаларини ҳар иккала давлат қонунчилиги ва халқаро ҳуқуқ нормаларини ҳисобга олиб ҳал қиладилар. Интеллектуал ва саноат мулки ҳамда ундан фойдаланиш ҳуқуқига дахлдор, бу муносабатда юзага келиши мумкин бўлган молиявий мажбуриятлар муаммоларини ҳал қилишнинг аниқ масалалари 3-моддада назарда тутилган битимларда айтиб ўтилади.

Томонлар қўшма лойиҳаларда иштирок этаётган экспертлар, олимлар ва бошқа мутахассисларни алмашиш харажатларини қоплаш масалаларини қуйидаги тартибда ҳал қиладилар;

мутахассисларни йўллаётган ташкилот иккала давлат ўртасида белгиланган жойга бориш йўл харажатларини тўлайди;

мутахассисларни қабул қилаётган ташкилот ўз давлати ҳудудида уларнинг яшашлари, овқатланишлари, жойдан-жойга боришлари бўйича харажатларни ва бошқа харажатларни қабул қилаётган ташкилотда шу даражадаги мутахассислар учун белгиланган харажатлар нормасидан келиб чиқиб тўлайди;

мазкур тартиб, агар ҳамкорлик қилаётган ташкилотлар ўзаро келишув бўйича бошқача тартиб белгиламаган бўлсалар, амалда бўлади.

Қўшма лойиҳаларда иштирок этаётган ҳамда бунда бошқа давлат ҳудудида бўлган бир давлат шахсларига тиббий хизмат кўрсатиш масалалари (оғир дард ёки бахтсиз ҳодисаларда) қабул қилаётган ташкилот ҳисобига, қабул қилаётган ташкилот ходимлари учун белгиланган шарт-шароитларда ҳал қилинади.

Мазкур Битим Томонларнинг ўзлари тузган бошқа халқаро шартномалар ва битимлардан келиб чиқадиган ҳуқуқлари ҳамда мажбуриятларига дахл қилмайди.

Мазкур Битим имзоланган кундан бошлаб кучга киради ва ўн йил мобайнида амалда бўлади. Агар Томонлардан бири Битимнинг амалда бўлиш муддати тугашидан олти ой олдин Битимни амалда бўлишини тўхтатиш тўғрисида бошқа Томонни ёзма шаклда хабардор қилмаса ўзидан-ўзи кейинги ўн йиллик даврга чўзилади.

Мазкур Битим иккала Томоннинг ёзма шаклдаги розилиги бўлганда ўзгартирилиши ёки тўлдирилиши мумкин.

1995 йил 4 сентябрда, Тошкент шаҳрида, ҳар бири ўзбек, грузин ва рус тилларида, икки нусхада тузилди. Бунда барча матнлар бир хил кучга эга. Мазкур Битим қоидаларини шарҳлаш мақсадида рус тилидаги матндан фойдаланилади.