Ўзбекистон Республикаси «Аҳолини иш билан таъминлаш тўғрисида»ги Қонунининг 17-моддаси ҳамда Ўзбекистон Республикаси Вазирлар Маҳкамасининг 2008 йил 20 августдаги 186-сон қарори билан тасдиқланган «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисида»ги (Ўзбекистон Республикаси қонун ҳужжатлари тўплами, 2008 й., 34-сон, 333-модда) низомга асосан ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тўғрисида қарор қиламан:

1. Ўзбекистон Республикаси Вазирлар Маҳкамасининг 2008 йил 20 августдаги 186-сонли қарори билан тасдиқланган «Ижтимоий муҳофазага муҳтож ва иш топишда қийналадиган шахсларни ишга жойлаштириш учун иш ўринларини банд қилиб қўйиш тартиби тўғрисида»ги низомга асосан корхоналар кесимида ижтимоий муҳофазага муҳтож ва иш топишда қийналадиган шахслар учун иш ўринларининг энг кам сони (квоталанган иш ўринлари) иловага* мувофиқ тасдиқлансин.

Ходимларнинг рўйхат бўйича ўртача сонидан 305 кишини ташкил этадиган 100 фоиз миқдорида, шу жумладан:

ёлғиз ота, ёлғиз она ҳамда 14 ёшгача ва ногирон болалари бор кўп болали ота-оналар учун 37,0 фоиз (113 киши);

таълим муассасаларини тугатган ёшлар учун 53,7 фоиз (164 киши);

муддатли ҳарбий хизматдан бўшатилганлар учун 4,3 фоиз (13 киши);

ногиронлар учун 3,0 фоиз (9 киши);

жазони ўташ муассасаларидан бўшатилган, жазони ўтаётган ёки суд қарорига кўра тиббий йўсиндаги мажбурлов чоралар кўриладиган шахслар учун 1,3 фоиз (4 киши);

ижтимоий муҳофазага муҳтож шахсларнинг бошқа тоифалари учун 0,6 фоиз (2 киши) этиб белгилансин.

2. Корхона, ташкилотлар раҳбарларига Ўзбекистон Республикаси Вазирлар Маҳкамасининг 2008 йил 20 августдаги 186-сонли қарори билан тасдиқланган «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисида»ги низомга мувофиқ ижтимоий муҳофазага муҳтож ва иш топишда қийналаётган шахслар учун иш ўринлари ташкил этиш топширилсин.

3. Туман бандликка кўмаклашиш ва аҳолини ижтимоий муҳофаза қилиш маркази (О. Эргашев)га бир ҳафта муддатда қарорни иловада белгиланган корхоналарга етказсин ҳамда ушбу қарорнинг бажарилиши бўйича юқори ташкилотларга ҳар ой маълумот бериб бориш топширилсин.

4. Ушбу қарор бажарилмаган тақдирда корхонанинг мансабдор шахсларига «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисида»ги низомнинг 15-бандига мувофиқ жарима солинади.

5. Ушбу қарор «Пешкў овози» газетасида эълон қилинсин.

6. Мазкур қарор расмий эълон қилинган кундан эътиборан кучга киради.

7. Мазкур қарорнинг бажарилишини назорат қилиш туман ҳокимининг иқтисодиёт ва ижтимоий ривожлантириш масалалари бўйича ўринбосари С. Сирожов зиммасига юклатилсин.