Шаҳарда чиқиндиларнинг фуқаролар ҳаёти ва соғлиғига, атроф муҳитга зарарли таъсирининг олдини олиш, табиатни муҳофаза қилиш, экология ва санитария-эпидемиологик муҳитни яхшилаш, чиқиндиларни турларга ажратиш орқали чиқиндихоналар майдонини камайтириш, замонавий технологиялар ёрдамида қайта ишлаш тизимини жорий этиш, аҳолидан чиқиндиларни йиғиш ва ташкилий равишда олиб чиқиб кетиш ишларини янада такомиллаштириш ва тартибга солиш мақсадида, Ўзбекистон Республикаси «Маҳаллий давлат ҳокимияти тўғрисида»ги (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда), «Давлат санитария назорати тўғрисида»ги (Ўзбекистон Республикаси Олий Кенгашининг Ахборотномаси, 1992 й., 9-сон, 355-модда), «Табиатни муҳофаза қилиш тўғрисида»ги (Ўзбекистон Республикаси Олий Кенгашининг Ахборотномаси, 1993 й., 1-сон, 38-модда), «Чиқиндилар тўғрисида»ги (Ўзбекистон Республикаси Олий Мажлисининг Ахборотномаси, 2002 й., 4-5-сон, 72-модда) қонунларига асосан қарор қиламан:

1. Бухоро шаҳрида маиший чиқиндиларни ажратиш, тўплаш, йиғиш, ташлаш ва ташкилий равишда олиб чиқиб кетиш бўйича қоидалар иловага мувофиқ тасдиқлансин.

2. Шаҳар архитектура ва қурилиш бошқармаси (О. Адизов) чиқинди йиғиш майдончалари ва санитар тозалаш ҳудудлари чегарасини аниқлаб берсин, шаҳар ер тузиш ва кўчмас мулк кадастр хизмати давлат унитар корхонаси (Ж. Ҳабибов) тегишли ҳужжатларни тайёрлаб берсин.

3. Бухоро шаҳар «Махсусавтохўжалик» МЧЖ (С. Кенжаев):

шаҳар ҳудудида белгиланган муддатларда маиший чиқиндиларни олиб чиқиб кетиш учун махсус автотранспорт воситаси билан таъминлаш, чиқиндиларни ташкилий равишда олиб кетиш ва Марказий чиқиндихонага жойлаштириш бўйича тизимни тубдан яхшилаш чорасини кўриш;

маиший чиқиндиларни ўз вақтида олиб кетилишини таъминлаш ва ҳисобини юритиш тизимини яратиш;

махсус чиқинди ташлаш жойларини тартибга келтириш, белгиланган муддатларда дезинфекциялаш, турли чиқиндилар учун зарур миқдорда махсус темир қути билан таъминлашни ташкил этиш тавсия этилсин.

4. Аҳоли учун чиқиндиларни ташлаш тартиби, кўчага бириктирилган Бухоро шаҳар «Махсусавтохўжалик» МЧЖнинг махсус автотранспорт воситаси ва унинг келиш муддати, мурожаат учун телефонлар бўйича тарғибот воситалари тайёрланиб, жойларга ўрнатилсин.

5. Шаҳар ҳокимлиги ободонлаштириш бошқармаси (А. Ахмедов)га:

шаҳар кўчалари ва майдонларини тозалаш, ободонлаштириш ва кўкаламзорлаштириш даврида юзага келадиган чиқиндилар, шох-шаббалар ва хазонларни ўз вақтида олиб чиқиб кетиш ишларини амалга ошириш;

шаҳар архитектура ва қурилиш бошқармаси (О. Адизов) билан биргаликда шаҳар кўчалари учун замонавий урналарни тайёрлаш, ишлаб чиқарилишини ташкил этиш ҳамда жамоат жойларига жойлаштириш бўйича чора-тадбирлар белгилаш топширилсин.

6. Шаҳар уй-жой мулкдорлари ширкатлари уюшмаси (Ш. Азимов)га хусусий уй-жой мулкдорлари ширкатларига кўп қаватли уй-жой фонди атрофини тозалаш, озода тутиш ва ҳосил бўлган чиқиндиларни йиғиштириб, белгиланган жойга ташлаш ишларини ташкил этиш ва назоратга олиш топширилсин.

7. Шаҳар ҳокимлиги халқ таълими муассасалари фаолиятини методик таъминлаш ва ташкил этиш бўлими томонидан шаҳарнинг тозалигини сақлаш, чиқиндиларни белгиланган жойга ташлаш, табиатни муҳофаза қилиш ва атроф муҳитни ифлослантиришнинг олдини олиш юзасидан махсус дарсларда тарғибот-ташвиқот ишлари олиб борилсин.

8. Мазкур қарор «Бухоро оқшоми» газетасида ва шаҳар ҳокимлигининг веб-сайтида расмий эълон қилинсин.

9. Мазкур қарор расмий эълон қилинган кундан бошлаб кучга киради.

10. Мазкур қарорнинг ижросини назорат қилишни ўз зиммамда қолдираман.

Мазкур Қоидалар Ўзбекистон Республикасининг «Маҳаллий давлат ҳокимияти тўғрисида»ги (Ўзбекистон Республикаси Олий Кенгашининг Ахборотномаси, 1993 й., 9-сон, 320-модда), «Давлат санитария назорати тўғрисида»ги (Ўзбекистон Республикаси Олий Кенгашининг Ахборотномаси, 1992 й., 9-сон, 355-модда), «Табиатни муҳофаза қилиш тўғрисида»ги (Ўзбекистон Республикаси Олий Кенгашининг Ахборотномаси, 1993 й., 1-сон, 38-модда), «Чиқиндилар тўғрисида»ги (Ўзбекистон Республикаси Олий Мажлисининг Ахборотномаси, 2002 й., 4-5-сон, 72-модда) қонунларига мувофиқ ишлаб чиқилган бўлиб, Бухоро шаҳрида маиший чиқиндиларни йиғиш, ажратиш, ташлаш ва ташкилий равишда олиб чиқиб кетиш, шаҳарни ободонлаштириш, озодалигини сақлаш, чиқиндиларни йиғиш, уларни тўплаш, олиб чиқиб кетиш талабларини белгилайди.

1. Мазкур Қоидаларда қуйидаги тушунчалар қўлланилади:

чиқиндилар — ишлаб чиқариш ёки истеъмол қилиш жараёнида хом ашё, материаллар, хомаки маҳсулотлар, бошқа буюмлар ёки маҳсулотларнинг ҳосил бўлган қолдиқлари, шунингдек ўзининг истеъмол хусусиятларини йўқотган товарлар (маҳсулотлар);

чиқинди билан боғлиқ ишларни амалга ошириш — чиқиндиларнинг ҳосил бўлиши, уларни тўплаб олиб кетиш, сақлаш, ташиш, кўмиб ташлаш, қайта ишлаш, утилизация ва реализация қилиш билан боғлиқ фаолият;

чиқинди билан боғлиқ ишларни амалга ошириш объектлари — чиқиндиларни тўплаш, сақлаш, ташиш, кўмиб ташлаш, қайта ишлаш, утилизация ва реализация қилиш учун фойдаланиладиган объектлар;

чиқиндиларни сақлаш — кўмиб ташлаш, қайта ишлаш ёки утилизация қилиш мақсадида чиқиндилар олиб кетилгунча уларни махсус жиҳозланган тўплагичларда сақлаш;

хавфли чиқиндилар — таркибида хавфли (заҳарлилик, юқумлилик, портловчанлик, тез алангаланиб ёнғин чиқарувчанлик, реакцияга тез киришувчанлик, радиоактивлик) хусусиятлардан лоақал биттасига эга моддалар мавжуд бўлган, бундай моддалар фуқаролар соғлиғи ва ҳаётига, атроф-муҳитга ўзи мустақил тарзда ҳам, шунингдек бошқа моддаларга қўшилганда ҳам бевосита ёки потенциал хавф туғдирадиган миқдорда ва шаклда мавжуд бўлган чиқиндилар.

2. Чиқиндиларни сақлаш ва кўмиб ташлашга доир талаблар.

Чиқиндиларни сақлаш санитария нормалари ва қоидаларига, экологик хавфсизлик талабларига мувофиқ ҳамда чиқиндилардан оқилона фойдаланилишини ёки уларнинг бошқа шахсларга берилишини таъминловчи усулларда амалга оширилади.

Чиқиндилар кўмиб ташланадиган жой (хавфли чиқиндилар бундан мустасно) маҳаллий давлат ҳокимияти органлари томонидан қонун ҳужжатларида белгиланган тартибда белгиланади.

Чиқиндиларни аҳоли пунктлари ерларида, табиатни муҳофаза қилиш, соғломлаштириш; рекреация мақсадларига мўлжалланган ерларда ва тарихий-маданий аҳамиятга молик ерларда, фуқароларнинг ҳаёти ва соғлиғига, шунингдек табиатни муҳофаза қилиш объектларига ҳамда муҳофаза этиладиган табиий ҳудудларга зарар етказиш таҳдиди келиб чиқиши мумкин бўлган бошқа жойларда сақлаш ва бундай жойларга кўмиб ташлаш тақиқланади.

3. Бухоро шаҳрида жойлашган, фаолият юритаётган мулкчилик шаклидан қатъи назар, барча корхоналар, ташкилотлар, идоралар, муассасалар, ўзини ўзи бошқариш органлари, хонадон эгалари, истиқомат қилаётган фуқаролар ва шаҳар меҳмонлари мазкур Қоидаларда белгиланган талабларга риоя этишга мажбурдирлар.

4. Симобли лампаларнинг ишлатиб бўлган ресурсларини тўплаш лампаларни шикастламайдиган ва улардаги симобли моддаларнинг ҳавога чиқишига, сув таъминоти манбаларига, тупроққа ва озиқ-овқат маҳсулотларига тушишига йўл қўймайдиган махсус идишга солинади ва белгиланган жойга топширилади.

5. Юридик ва жисмоний шахслар чиқиндиларни турларга ажратган ҳолда йиғади ҳамда ўз ҳудудида санитария-гигиена қоидаларига асосан сақлайди.

6. Юридик ва жисмоний шахслар томонидан чиқиндилар белгиланган чиқинди ташлаш жойига ва «Махсусавтохўжалик» МЧЖнинг чиқиндини олиб кетиш махсус автотранспорт воситасига ташланади.

7. Бино, иншоот, якка тартибдаги хусусий уйлар ва кўп қаватли уй-жой атрофига чиқиндиларни олиб чиқиб қўйиш, тўплаш, кўча, сув, ариқ ва белгиланмаган жойга чиқиндиларни ташлаш, ҳаракатланаётган автотранспорт воситасидан йўлларга турли чиқиндиларни ташлаб юбориш ман этилади.

8. Чиқинди ташлаш жойининг амалдаги қонунчиликда белгиланган тартибда чегараси белгиланган бўлиб, санитария ва экологик ҳолати нормаллаштириш учун зарур шарт-шароит яратилган бўлади.

9. Чиқинди ташлаш жойи чиқиндиларнинг зарур миқдордаги махсус темир қутилар билан таъминланади.

10. Якка тартибдаги хусусий хонадон эгалари ва унда истиқомат қилувчи фуқаролар ўзларининг кундалик чиқиндиларини ўз ҳовлисида сақлайди ва «Махсусавтохўжалик» МЧЖнинг чиқинди олиб кетиш махсус автотранспорт воситаси келиш вақтига қараб чиқиндиларни шу махсус автотранспорт воситасига ташлайди.

11. Юридик ва жисмоний шахслар қурилиш чиқиндилари, шох-шабба ва барг-хазонларни чиқинди олиб кетувчи ташкилот билан шартнома тузган ҳолда ёки ўзлари ёллаган махсус автотранспорт воситасида чиқиндилар ташлаш учун белгиланган жойга олиб бориб ташлашга мажбурдир.

12. Юридик ва жисмоний шахслар томонидан ўзларига тегишли қурилиш чиқиндиларини маиший чиқиндилар билан аралаштиришга йўл қўйилмайди.

13. Хусусий уй-жой мулкдорлари ширкатлари уй-жой фонди атрофини тозалаш даврида йиғилган чиқиндиларни турларга ажратади ва уларни «Махсусавтохўжалик» МЧЖ билан тузилган шартнома асосида белгиланган тартибда чиқинди ташлаш жойига олиб бориб ташлайди.

14. Бухоро шаҳрида юридик ва жисмоний шахслар томонидан йиғилган, тўпланган ва белгиланган контейнерлардаги чиқиндиларни олиб кетиш ишлари «Махсусавтохўжалик» МЧЖ ва бошқа ваколатли ташкилотлар томонидан амалга оширилади.

«Махсусавтохўжалик» МЧЖ ва бошқа ваколатли ташкилотлар ҳудудларга махсус автотранспорт воситасини бириктириб, маҳалла фуқаролар йиғинлари билан келишилган ҳолда чиқиндини олиб кетиш муддатларини ҳамда вақтларини белгилаб, шу асосда чиқиндиларни ўз вақтида олиб чиқиб кетиш ишларини ташкил этади.

15. Маҳалла фуқаролар йиғинлари — чиқиндиларни олиб кетиш махсус автотранспорт воситасининг ўз вақтида белгиланган ҳудудга келиши ва чиқиндиларни олиб чиқиб кетиши устидан жамоатчилик назоратини ўрнатади ҳамда ҳисобини олиб боради.

16. Ободонлаштириш бошқармаси ва унинг тизимидаги ташкилотлар шаҳар кўчаларини ободонлаштириш, кўкаламзорлаштириш, тозалаш даврида йиғилган чиқиндилар, шох-шабба ҳамда барг-хазонларни энг камида бир кун муддатда йиғиштириб, олиб кетиш ишларини таъминлайди.

17. «Махсусавтохўжалик» МЧЖ юридик ва жисмоний шахслар билан шартнома асосида, қўшимча йиғилган маиший ва бошқа чиқиндиларни олиб кетиш ишларини амалга оширади.

18. Бухоро шаҳрининг санитария-эпидемиологик ҳолатини яхшилаш ва ҳудудда тозаликни сақлаш мақсадида шаҳарда жойлашган мулкчилик шаклидан қатъи назар, барча корхоналар, ташкилотлар, идоралар, муассасалар фуқароларнинг ўзини ўзи бошқариш органлари, уй-жойлар ҳамда истиқомат қилаётган аҳолининг барча қатламлари ва меҳмонлари учун қуйидаги талаблар мажбурийдир:

кундалик маиший чиқиндиларни тасдиқланган қоидаларга асосан, белгиланган чиқинди тўплаш жойидаги махсус темир қутига ёки Бухоро шаҳар «Махсусавтохўжалик» МЧЖга тегишли автомашиналарга топшириш;

чиқиндиларни ташкилий равишда олиб кетиш учун мулкчилик шаклидан қатъи назар, барча корхона, ташкилот, муассасалар ва яшовчилар сонидан келиб чиқиб маҳалла фуқаролар йиғинлари Бухоро шаҳар «Махсусавтохўжалик» МЧЖ билан шартнома тузиш;

бино, иншоот, якка тартибдаги уй-жойлар ва кўп қаватли уй-жой атрофига чиқиндиларни олиб чиқиб қўйиш ва тўплаш, кўча, сув, ариқ ва белгиланмаган жойга чиқиндиларни ташлаш, автотранспорт воситасидан турли чиқиндиларни ташлаб юбориш ва қурилиш чиқиндиларини маиший чиқиндилар билан аралаштириб ташлаш ман этилади;

шаҳар ҳудудида шох-шаббалар, барг-хазонлар, барча чиқиндилар, қуриган ўт ва ўсимликларни ёқиш, қурилиш чиқиндиларини олиб чиқиб, белгиланмаган жойга ташлаш ҳамда шаҳар экологиясини ифлослантиришнинг бошқача усуллари ман этилади.

19. Чиқинди билан боғлиқ ишларни амалга ошириш соҳасида юзага келадиган низолар қонун ҳужжатларида белгиланган тартибда ҳал этилади.

20. Мазкур Қоидаларда белгиланган талаблар бажарилмаган тақдирда, юридик ва жисмоний шахслар ҳуқуқни муҳофаза этувчи ва ваколатли органлар томонидан амалдаги қонунчиликда белгиланган тартибда жавобгарликка тортилади.